LONGO DIA 59
Wajiya Gusala ya Gujinginyina mu Usageshi
Tushigo naye gujimbila egi Aklisto agasue adi naye gutagana nu usageshi. Ndaga yene yajiya gutuhana woma ba?
1. Mukunda natshi tuana tagana nu usageshi?
Biblia yana zuela egi: “Athu agasue adi mutshigina gukhala ya gujinginyina gudi Nzambi mu gudivua nu Klisto Yesu mbaamonesewa nji malamba.” (2 Timote 3:12) Yesu wasagesewe handaga gakhalelego gudinginyisa mu ndaga jia ha mavu awa a Satana. Esue nji tuana gudinginyisago mu ndaga jia ha mavu awa, gishina giene baguvernema nu mafumu a ikombelelo ya mambo ana gutusagesa.—Yone 15:18, 19.
2. Luholo lutshi tuajiya gudilondegamukunda nu usageshi?
Tudi naye gulandula gushila Yehowa mutshima sendese mangino. Khala muzula tangua dia gutshita gisambu nu gutanga Mbimbi yenji lusugu nu lusugu. Khala nji muya mu gudibungisa gua mu hungu phoso nu phoso. Gutshita ndaga eji mbagugukuatesa ha gukolesela mu usageshi wagasue nu gikhesa, ikhale udi mukatuga gudi enya fami yenu. Mupostolo Phaula watagenele nji nu usageshi, gungima wasonegele egi: “Yehowa udi mukuateshi wami; mbangushigo muvua woma.”—Hebelu 13:6.
Gula tudi mulongesa lukuma luabonga tangua diagasue, mbatuheta gikhesa giavula. Gulongesa lukuma luabonga guana gutukuatesa ha gushila Yehowa mutshima nu ha gukatula woma. (Ishima 29:25) Gula udi mulongesa lukuma luabonga mangino nu gikhesa giagasue, mbayigukuatesa ha gulandula gulongesa gula mafumu a leta atunyisa mudimo wetu.—1 Tesalonike 2:2.
3. Gubonga gutshi tuana heta gula tuakolesela tangua adi gutusagesa?
Idi yadiago egi tuana tshigina ndo gusagesewa, uvi gula tuakolesela mu usageshi wene, gutshigina guetu guana kola. Tuana kolesa ufuta wetu nu Yehowa handaga wana gutukuatesa tangua tuana leba muila. (Tanga Yakoba 1:2-4.) Yehowa wana gudisagesa muavula tangua tuana mona malamba, uvi wana suanguluga muavula gula tuakolesela. Biblia yana zuela egi: “Gula mudi mukolesela mu malamba handaga mudi mukalagala ndaga jiabonga, idi ndaga yabonga gu meso a Nzambi.” (1 Phetelo 2:20) Gula tuasala ya gujinginyina gudi Yehowa, mbawutuhana monyo wa ivo nu ivo mu mavu ahe-ahe; mu mavu ene athu agasue mbaakhala mukombelela phamba Yehowa, mbalagaji mbajikhadigo guene.—Matayo 24:13.
TUKAMBE GUJIYA NDAGA JIAVULA
Tala mukunda natshi idi nu ndando ha gusala ya gujinginyina gudi Yehowa ngatshima athu adi gutusagesa, nu gubonga mbagutuhana muene.
4. Wajiya gukolesela gula enya fami yaye agusagesa
Yesu wamonesele egi, matangua ako enya fami yetu ajiyilego gutshigina egi tukombelele Yehowa. Tanga Matayo 10:34-36, gungima zuelelenu muhu owu:
Itshi yajiya gubua gula muenya fami mumoshi wazula desizio dia gukombelela Yehowa?
Ha gumona gifezegeselo gia ndaga eyi, tala VIDEO, gungima zuelelenu muhu owu walandula.
Itshi wajiya gutshita gula futa diaye nga muenya fami yaye udi gugukanga njila ha gukombelela Yehowa?
Tanga Ngimbo 27:10 nu Mako 10:29, 30. Gungima dia gutanga verse yagasue, zuelelenu muhu owu:
Luholo lutshi ndaga jidi mu verse eji jiajiya gugukuatesa gula muenya fami yaye nga mafuta aye agukanga njila ha gukombelela Yehowa?
5. Landula gukombelela Yehowa ikhale udi mutagana nu usageshi
Yana toga gukhala nu gikhesa ha gukombelela Yehowa gula athu ako adi gutukanga njila ha gumukombelela. Tala VIDEO, gungima zuelelenu muhu owu walandula.
Luholo lutshi ifezegeselo ya athu tuamona mu video eyi idi guguhana gikhesa?
Tanga Makalegelo 5:27-29 nu Hebelu 10:24, 25. Gungima dia gutanga verse yagasue, zuelelenu muhu owu:
Mukunda natshi idi nu ndando ha gulandula gukombelela Yehowa ikhale mafumu a leta atutunyisa gulongesa lukuma luabonga nu guya mu gudibungisa gua mu hungu?
6. Yehowa mbawugukuatesa ha gukolesela
Matemue a Yehowa a ivo ya gudisha nu ifutshi ya gudisha ana landula gukombelela Yehowa ikhale ana tagana nu usageshi. Ha gumona ndaga yana guakuatesa, tala VIDEO. Gungima zuelelenu muhu owu walandula.
Mu video eyi tuatala, itshi yakuatesele Matemue a Yehowa ha gukolesela?
Tanga Roma 8:35, 37-39 nu Filiphi 4:13. Gungima dia gutanga verse yagasue, zuelelenu muhu owu:
Luholo lutshi verse eji jidi gugutshiginyisa egi wajiya gukolesela mu malamba agasue wajiya gutagana nawo?
Tanga Matayo 5:10-12, gungima zuelelenu muhu owu:
Mukunda natshi wajiya gukhala nu gusuanguluga ngatshima udi mutagana nu usageshi?
Matemue a Yehowa avula ana landula gukombelela Yehowa nu gujinginyina guagasue ikhale adi mutagana nu usageshi. Aye nji wajiya gukolesela!
ATHU AKO ANA ZUELA EGI: “Ngajiyilego gukolesela gula ngatagana nu usageshi.”
Verse jitshi jiajiya guahana gikhesa?
NDAGA WALONGUGA
Yehowa wana suanguluga tangua tuana tshita ngolo ha gumukombelela ikhale tudi mutagana nu usageshi. Wajiya gutukuatesa ha gukolesela!
Mihu ya Guvutugila
Mukunda natshi Aklisto adi naye gusagesewa?
Itshi wajiya gutshita sendese mangino ha gudilondega mukunda nu usageshi mbawutagana nawo mu masugu adi muza?
Itshi yajiya gugukuatesa ha gukhala nu gikhesa gia gukombelela Yehowa ikhale watagana nu malamba?
NDAGA JIKO JIA NDANDO
Tala luholo muvuala mumoshi wa yala udi mukotelesa luholo Yehowa wamukuatesele ha gukolesela hambiwe muene mu bologo handaga watunyile mudimo wa gisuta.
Tala ndaga yakuatesele phangi mumoshi nu mukaji’enji ha gulandula gukombelela Yehowa ivo yavula ikhale atagenele nu usageshi.
Tala luholo wajiya gukolesela mu usageshi nu gikhesa giagasue.
“Dilondege ha Gulua nu Umbalagaji Sendese Mangino” (Inzo Yaleha ya Mutaledi ya Juillet 2019)
Luholo lutshi tuajiya gutadila usageshi wa enya fami yetu? Itshi tuajiya gutshita ha gubamba guhuima nu gusala ya gujinginyina gudi Yehowa?