LONGO DIA 35
Yehowa Wana Guzula Akombeledi Enji a Gudibulumuisa nu Ndando
‘Yehowa . . . wana gumona athu a gudibulumuisa.’—NGI. 138:6.
LUNGIMBO 48 Wenda nu Yehowa Lusugu nu Lusugu
NDAGA JIDI MU LONGO EDIa
1. Luholo lutshi Yehowa ana gudivua mukunda nu athu a gudibulumuisa? Kotelesa.
YEHOWA wana gutshigina athu a gudibulumuisa. Phamba athu adi nu gudibulumuisa gua giamatshidia ajiya gukhala nu ufuta wabonga n’enji. Uvi ‘athu a lulendo wana guatalela gualeha.’ (Ngi. 138:6) Mukut’etu agasue tuana gutshigina gusuanguluisa Yehowa nu tuana gutshigina egi atuzumbe. Hene, tudi naye gukudisa khadilo dia gudibulumuisa.
2. Itshi tuza muzuelela mu longo edi?
2 Mu longo edi, tuza muheta mvutu gu mihu eyi: (1) Gudibulumuisa gudi itshi? (2) Mukunda natshi tudi naye gukudisa khadilo edi? (3) Ndaga jitshi jiajiya gulola gudibulumuisa guetu? Luholo tuza guyimona, gula tuakudisa khadilo dia gudibulumuisa, mbatusuanguluisa Yehowa nu mbatuheta gubonga guavula.—Ish. 27:11; Yesh. 48:17.
GUDIBULUMUISA GUDI ITSHI?
3. Gudibulumuisa gudi itshi?
3 Muthu wa gudibulumuisa ganago gutangiza egi wabalega athu ako ndando, gakhalago nu lulendo. Biblia idi mumonesa egi muthu wa gudibulumuisa wana gujiya egi Yehowa wamubalega gukoma nu wana gumona egi athu ako amubalega. Nu wana gujiya egi athu ako ana gutshita ndaga jiabonga gubalega muene.—Fili. 2:3, 4.
4-5. Mukunda natshi tuajiya guzuela egi gudibulumuisa guanago gumonega gu meso?
4 Athu ako ana gumonega gu meso egi akhala athu a gudibulumuisa, uvi mu giamatshidia ashigo ngenyi. Yajiya gukhala egi akhala sonyi sonyi. Nga ndo, ana gunemesa athu handaga idi khadilo dia gumbo diawo. Uvi mu mitshima yawo akhala enya lulendo luakola. Lusugu luko, mbaamonesa diago haphelo ndaga jiakhala mu mitshima yawo.—Luka 6:45.
5 Uvi, gula muthu gashigo nu musonyi nu udi muzuela ndaga yagasue gadi mutangiza, ishigo mukotelesa egi udi nu lulendo. (Yone 1:46, 47) Athu anyi ashigo nu musonyi adi naye gutema hagula ahagigo mutshima gu ndunge jiawo. Ikhale tudi enya musonyi nga ndo, tudi naye gutshita ngolo ha gukudisa khadilo dia gudibulumuisa gua giamatshidia.
Mupostolo Phaula wakhalele muthu wa gudibulumuisa, gakhalelego mutangiza egi udi nu ndando yavula (Tala paragrafe 6)d
6. Luholo 1 Kolinto 15:10 idi guyimonesa, longo ditshi tuajiya guzula mu gifezegeselo gia Phaula?
6 Tutadile gifezegeselo gia mupostolo Phaula. Yehowa wamuhanele inemo yavula ha gukangula mahungu ahe-ahe mu membo avula. Wakalegele ndaga jiavula mu mudimo wenji gubalega apostolo ako a Yesu Klisto. Uvi, Phaula gatangijilego nga hazonda egi wabalega apostolo ako. Wazuelele nu gubulumuisa guagasue egi: ‘Mukatshi dia apostolo agasue, ame ngabalega guzonda, ngushigo watagana ha gutamegewa egi mupostolo, handaga ame ngasagesele hungu dia Nzambi.’ (1 Kol. 15:9) Hene, Phaula wazuelele egi wakhalele nu ufuta wabonga nu Yehowa handaga Yehowa wamumonesele khenda jienji jiakoma, uvi ishigo egi handaga wakhalele nu makalegelo abonga. (Tanga 1 Kolinto 15:10.) Phaula udi gifezegeselo giabonga giatadila khadilo dia gudibulumuisa. Tangua gasonegele Aklisto a gu Kolinto mukanda, gakhalelego gudikanduisa, ngatshima athu ako mu hungu akhalele gumulelula!—2 Kol. 10:10.
Karl F. Klein, phangi mumoshi wa gudibulumuisa wakhalele mu Hunji dia Akulu Atuameji (Tala paragrafe 7)
7. Luholo lutshi phangi mumoshi wa gujiyiwa muabonga mu tangua dietu wamonesele khadilo dia gudibulumuisa?
7 Matemue a Yehowa avula ahetele gikhesa (ngolo) gu lumene lua phangi Karl F. Klein, yonu wakhelele mutshita gu Hunji dia Akulu Atuameji. Mu lumene luenji, Phangi Klein wazuelele nu gudibulumuisa guagasue ndaga jiavula jiabola gakalegele nu gataganele najio mu lujingu luenji. Halongesele muene giphungu giathomo inzo nu inzo mu 1920, wamonele egi yakhalele diago lamba, hene gabembele gulongesa inzo nu inzo ivo mbadi. Ndaga iko, hakhalele muene gu Betele, phangi mumoshi wamuhanele longo uvi wavidile phangi muene khabu. Luko, wakatele misongo ya matangi (dépression), gungima wavile muabonga. Uvi wakhalele musuanguluga nu inemo yenji ya ndando. Phangi Klein wakhalele diago muthu wa gudibulumuisa luholo gatele lumene lua ndaga jienji jiabola nu jia lamba, ngatshima wakhalele mujiyiwa muabonga! Aphangi avula ana gutangiza diago phangi Klein nu luholo gazuelele giamatshidia mu lumene luenji.b
MUKUNDA NATSHI TUDI NAYE GUKUDISA KHADILO DIA GUDIBULUMUISA?
8. Luholo lutshi 1 Phetelo 5:6 idi gutukuatesa ha gumona egi gudibulumuisa guana gusuanguluisa Yehowa?
8 Ndaga yabalega ndando tuana gumonesela gudibulumuisa idi egi khadilo edi diana gusuanguluisa Yehowa. Mupostolo Phetelo wayimonesele haphelo. (Tanga 1 Phetelo 5:6.) Mukunda nu mbimbi jia Phetelo, mukanda “Viens, suis-moi” udi muzuela egi: “Lulendo luakhala gifua puazo. Luajiya gugushiya. Muthu nga udi genji nu ndunge jia luholo lutshi, gula muene udi muenya lulendo, gu meso a Nzambi udi muthu wa gituhu. Uvi, muthu wazonda wajiya gubua nu ndando yavula gu meso a Yehowa gula udi wa gudibulumuisa. . . . [Muene] mbawugushimbiga mukunda nu gudibulumuisa guaye.”c Yadiago, ndaga ya gubalega ndando tuajiya gutshita, idi gusuanguluisa Yehowa.—Ish. 23:15.
9. Luholo lutshi khadilo dia gudibulumuisa diana gutukuatesa ha gukuata ufuta nu athu ako?
9 Gula tudi nu gudibulumuisa, mbatuheta gubonga nu mbatusuanguluisa Yehowa. Gula tudi nu gudibulumuisa, athu avula ajiya gubua mafuta etu. Yakotelesa itshi? Tangiza gula athu a luholo lutshi wana gutshigina gukhala nawo. (Mat. 7:12) Tuanago gusuanguluga gukhala nu muthu wana gutshigina egi athu avue phamba ndaga jienji uvi muene guvua ndo jia athu ako. Idi ndaga ya gusuanguluga gukhala nu aphangi’etu, gula adi ‘gudihaga ha fundo dia athu ako, adi nu guzumba, nu gisemo nu gudibulumuisa.’ (1 Phet. 3:8) Gula tuakamba gukhala nu athu a luholo elu, ene mbaabua mafuta etu—gula tudi ya gudibulumuisa.
10. Luholo lutshi gudibulumuisa guana gubongesa lujingu luetu?
10 Gudibulumuisa guana gutukuatesa ha gukhala nu lujingu luabonga. Matangua ako, tuajiya gutagana nu ndaga jiabola nga jishigo jiatagana mu lujingu. Fumu Solomo wazuelele egi: “Ngamuenele ahiga muwenda holu dia tubalu, uvi athu a lutumbu muwenda ha malu gifua ahiga.” (Mulo. 10:7) Matangua ako, athu akhala nu ndunge jia gutshita ndaga, ana guhanewa ndo lutumbu. Uvi athu anyi ashigo nu ndunge jiavula, ana guhanewa lutumbu luavula. Ikhale ngenyi, Solomo wakotelesele egi idi ndaga yabonga ha gutshigina ndaga jia lujingu gifua luholo jidi uvi gulaba ndo gudisagesa gula ndaga jishigo muyila muabonga. (Mulo. 6:9) Gula tudi agudibulumuisa, mbayikhala yaleba ha gutshigina lujingu gifua luholo ludi—uvi ndo gifua luholo tudi mutangiza egi ludi naye gukhala.
TANGUA DITSHI YAJIYA GUKHALA LAMBA HA GUDIBULUMUISA?
Mukunda natshi yajiya gukhala lamba ha gumonesa khadilo dia gudibulumuisa mu ndaga eyi? (Tala paragrafe 11-12)e
11. Itshi tudi naye gutshita gula atuhana lubelo?
11 Masugu agasue, gudi nu ndaga tuajiya gukalagala ha gumonesa egi tudi athu a gudibulumuisa. Tutadilenu phamba ndaga jiazonda. Gula atuhana lubelo. Tudi naye gujiya egi gula muthu wazula tangua dia gutubela, idi mumonesa egi gudi nu ndaga imoshi tuakalagala uvi tushigo mujiya egi idi yabola. Mu ndaga ya luholo elu, matangi a thomo ajiya gukhala egi tutune lubelo luene. Tuajiya gumona egi muthu muene gashigo watagana ha gutuhana lubelo, nga ndo luholo luenji lua guzuela lushigo luabonga. Uvi gula tudi athu a gudibulumuisa, mbatutshigina lubelo luene.
12. Ha gutadila Ishima 27:5, 6, mukunda natshi tudi naye guhana mersi gudi muthu watuhana lubelo? Fezegesa.
12 Muthu wa gudibulumuisa wana gutshigina lubelo. Tufezegese gale. Tangiza gale egi udi mu gudibungisa gua mu hungu. Gungima dia guta maga nu aphangi avula, mungoshi mukatshi diawo wagutegula, waguwambela egi ima yagukuategena mu mazo. Idi yadiago egi ndaga yene yajiya guguhana musonyi. Uvi mbawuhana phangi muene mersi luholo gaguwambela, ishigo ngenyi ba? Wajiya guzuela egi nga muthu muko wangudijiga gutuama, nga yakhadi yabonga diago. Luholo lumoshi nji, gula phangi mumoshi waza gutuhana longo, tudi naye gumuhana mersi nu gutshigina longo diene nu gudibulumuisa guagasue. Tushigo naye gumona phangi muene gifua mbalagaji yetu, uvi tudi naye gumuzula gifua futa dietu.—Tanga Ishima 27:5, 6; Gal. 4:16.
Mukunda natshi gudibulumuisa gudi nu ndando tangua athu ako aheta inemo mu hungu? (Tala paragrafe 13-14)f
13. Gula aphangi ako aheta inemo mu hungu, luholo lutshi tuajiya gumonesa khadilo dia gudibulumuisa?
13 Gula aphangi ako aheta inemo mu hungu. Mukulu mumoshi mu jina dia Jason, udi muzuela egi: “Tangua aphangi ako ana guheta inemo mu hungu, ngana zuela egi mukunda natshi ame ndo?” Aye nji wana gudivua ngenyi ba? Gula muthu udi ‘mukalagala ngolo’ ha guheta inemo mu hungu, ishigo ndaga yabola ndo. (1 Tim. 3:1) Uvi, tudi naye gutema mu ndaga tudi mutangiza. Handaga gula tuatemenego, tuajiya gusendesa gukudisa khadilo dia lulendo mu mitshima yetu. Phangi mumoshi wa yala wajiya gusendesa gutangiza egi, muene udi watagana gubalega aphangi agasue mu hungu ha gutagenesa ginemo gimoshi ngenyi. Nga ndo, phangi mumoshi wa mukhetu wajiya gutangiza egi, ‘Mulumi’ami udi watagana ha gutagenesa ginemo egi muabonga gubalega aphangi agasue mu hungu!’ Uvi, gula tudi lume athu a gudibungulumuisa tuajiyilego gutangiza luholo elu.
14. Khadilo diamonesele Moize tangua athu ako ahetele inemo didi gutulongesa itshi?
14 Khadilo diamonesele Moize tangua athu ako ahetele inemo diajiya gutukuatesa muavula. Moize wakhalele musuanguluga nu ginemo gienji gia gutuameza enya Isalele. Tangua Yehowa ahanele athu ako luendu lua gutshita midimo iko yakhalele mutshita Moize, muene wadivile luholo lutshi? Moize gavuilego ginjongo. (Lutang. 11:24-29) Moize wakhalele muthu wa gudibulumuisa, watshiginyile egi athu ako amukuatese ha gutshita mudimo wa gusophesa athu. (Guz. 18:13-24) Ngenyi, enya Isalele ahetele manzuji avula a gusophesa milonga. Ndaga eyi idi gutumonesa egi, Moize wakhalele gudisagesa ha gukuatesa athu, uvi gakhalelego gukamba gukhala nu inemo yavula. Idi diago gifezegeselo giabonga tudi naye gulandula! Tujiyenu egi gula tuatshigina egi Yehowa atuhane inemo, tuhagigo matangi gu ndunge jietu, uvi tukhalenu athu a gudibulumuisa. ‘Yehowa udi gosa gualeha, uvi wana gumona athu a gudibulumuisa.’—Ngi. 138:6.
15. Ndaga jitshi aphangi avula ataganele najio?
15 Gula ndaga jietu jiasombegesa. Mu ivo eyi yabalega, aphangi avula atshitshile gale ivo yavula mu mudimo wa Yehowa, midimo yawo yasombegesele. Mu 2014, ulondegi wazudile desizio egi mbagukhadigo luko nu atadi awendji a distrike. Hene, aphangi awa nu akajiawo akhalele naye gutshigina gusombegesa midimo yawo. Mu givo giene, organizasio wazuelele luko egi gula mutadi muwendji wataganesa ivo 70, gajiyilego gukhala luko mutadi muwendji. Luko egi phangi wagasue udi nu ivo 80 gajiyilego gukhala luko mutuameji wa hunji dia akulu mu hungu. Luko, mu ivo yabalega, aphangi avula a gu Betele atumiwe ha gubua avundji a muhola. Aphangi ako akhalele naye gubemba mudimo wawo wa tangua diagasue ha gukuatesa fami jiawo, nga mukunda nu misongo yawo, nga ndaga jiko.
16. Luholo lutshi aphangi a mala nu a akhetu amonesele gudibulumuisa tangua midimo yawo yasombegesele?
16 Yakhalele lamba gudi aphangi awa ha gusombegesa midimo yawo. Avula mukatshi diawo akhalele muzumba muavula midimo yawo, handaga akhalele guyitshita ivo yavula. Idi yadiago egi ako avuile “gikenene” luholo abembele midimo eyi ha gutshigina midimo ihe-ihe. Uvi gungima, ajidile nu midimo yene. Mukunda natshi? Gima giaakuatesele gidi guzumba guawo mukunda nu Yehowa. Akhalele mujiya egi adihanelego gu mudimo, uvi adihanele gudi Nzambi. (Kol. 3:23) Aphangi ene adi musuanguluga gutshita mudimo wagasue wa Yehowa nu gudibulumuisa guagasue. Ana ‘guwambela Yehowa ndaga jiagasue jidi guaasagesa,’ handaga ana gujiya egi wana guakuatesa.—1 Phet. 5:6, 7.
17. Mukunda natshi tudi naye gusuanguluga luholo Biblia yana gutukuatesa ha gukhala athu a gudibulumuisa?
17 Tudi nu gusuanguluga guavula luholo Biblia yana gutukuatesa ha gukhala athu a gudibulumuisa. Gula tudi athu a gudibulumuisa, mbatukhala nu gusuanguluga, athu ako nji mbaasuanguluga gukhala mafut’etu. Mbayitukuatesa nji ha gukolesela gula tuatagana nu malamba. Ndaga yabalega ndando idi egi gudibulumuisa mbagutukuatesa ha gusuena hehi nu Sh’etu wa mu dilu. Tudi nu gusuanguluga ha gumona egi Yehowa udi “Nzambi wa Gudinyinyiga nu wa Gijila,” uvi wana guzumba akombeledi enji adi a gudibulumuisa, nu wana guazula nu ndando.—Yesh. 57:15.
LUNGIMBO 45 Matangi a Moshi’a Mutshima Wami
a Gudibulumuisa gudi mukatshi dia makalegelo a gubalega ndando tudi naye gukudisa. Gudibulumuisa gudi itshi? Mukunda natshi tudi naye gukudisa khadilo edi? Gula midimo yetu yasombegesa, luholo lutshi gudibulumuisa guetu guajiya gulolewa? Longo edi diza muhana mvutu gu mihu eyi.
b Tala longo ‘Jéhovah m’a traité d’une manière salutaire’ mu Inzo Yaleha ya Mutaledi ya 1er mai 1985 diyiji 20, ya français.
c Tala Mukh. 3, par. 23.
d UKOTELESHI WA IFUANESA: Mupostolo Phaula udi gu inzo ya phangi mumoshi. Udi mukombelela nawo nu gudibulumuisa guagasue hamoshi nu ana azonda.
e UKOTELESHI WA IFUANESA: Phangi mumoshi wa gukula watshigina lubelo ludi gumuhana phangi muko wa muvuala.
f UKOTELESHI WA IFUANESA: Phangi mumoshi wa gukula gashigo muvua gijiongo gia phangi muko wa muvuala udi nu ginemo mu hungu.