Landula Nganyo jia Maprofete—Habakuka
1. Mukunda natshi tuajiya gudivua luholo Habakuka akhadile gudivua?
1 Hatudi gumona gubola guavula ha mavu, tuajiya gudivua luholo lumoshi nu Habakuka, wahudile Yehowa egi: ‘Mukunda natshi aye udi mungumuenesa ndaga jiabola? Muho’tshi aye udi mutshigina gutala gusagesewa gu’athu?’ (Hab. 1:3; 2 Tim. 3:1, 13) Gutangiza ndaga jiasonegele Habakuka nu khadilo dienji diagutshigina, guajiya gutukuatesa ha gunengenena lusugu Yehowa mbaasophesa mavu.—2 Phet. 3:7.
2. Luholo lutshi tuajiya gumonesa mangino egi tuakhala nu gutshigina mu lujingu luetu?
2 Khala nu Gutshigina mu Lujingu Luaye: Habakuka alebeleko muila mukunda nu ndaga akhadile gumona, uvi wakhadile nu ngolo mu nyuma. (Hab. 2:1) Yehowa wakuatesele profete wenji, wamuwambelele egi Ndaga azuelele mbayitagana lume, wamuwambelele luko egi ‘muthu wabonga mbawukhala nu lujingu mukunda nu gutshigina guenji.’ (Hab. 2:2-4) Ndaga yene yakotelesa itshi mukunda nu Aklisto adi mujinga mu masugu agisugishilo? Gutshigina nu mutshima ungoshi egi suga mbayiza gudi nu ndando gubalega gujiya tangua suga yene mbayiza. Gukhala nu gutshigina guana gutukuatesa ha gukhala yaguphaphumuga nu ha guhaga mudimo wa Nzambi ha fundo diathomo.—Heb. 10:38, 39.
3. Mukunda natshi tudi naye gubamba gusuanguluga guetu mu mudimo wa Yehowa?
3 Suanguluga Mukunda nu Yehowa: Tangua Goga fumu wa koma mbauluisa athu a Yehowa, gutshigina guetu mbagulolewa. (Ezek. 38:2, 10-12) Ita yana gubata lamba, ikhale gua athu ana gubalega ako ngolo. Nzala yajiya gukobela, ima yetu yagasue yajiya gutambudiwa, lujingu luetu luajiya gubalumuga. Gila lamba diene diatubuila mbatukalagala gima gitshi? Habakuka wakhadile gujiya egi malamba ajiya gumubuila, hene azudile desizio dia gubamba gusuanguluga guenji mu mudimo wa Yehowa. (Hab. 3:16-19) ‘Gusuanguluga Yehowa ana guhana’ mbagutukuatesa ha gukolesela mu matangua a malamba.—Neh. 8:10; Heb. 12:2.
4. Gusuanguluga gutshi tuajiya guheta sendesa mangino uu nu masugu adi guza?
4 Lusugu Yehowa mbasophesa mavu, athu agasue mbasala nu lujingu mbaalandula gulongesewa mu mbimbi yenji. (Hab. 2:14) Nu Athu mbaafuzumuga mbaalonguga nji ndaga jiatadila Yehowa. Mangino, tudi naye guzuelela ndaga jiatadila Yehowa nu midimo yenji ya gushimana mu tangua dia agasue!—Ngi. 34:1; 71:17.