MAKALEGELO A UKLISTO
Suanguluga nu Mudimo wa Gulongesa Lukuma Luabonga
Wana gumona egi gulongesa mbimbi ya Nzambi gudi mudimo wakola? Aphangi avula ajiya guzuela egi ayi, udi mudimo wakola. Mukunda natshi? Yajiya gukhala egi athu a mu terituare yetu ana gutuna gututegelela, akhala nu umbalagaji nga ndo tuana guvua woma wa gulongesa ngenji. Yadiago, ndaga eji jiajiya gutotesa gusuanguluga guetu. Uvi, tuana gukombelela Nzambi wa gusuanguluga wago wana gutshigina egi tumukalegele nu gusuanguluga guagasue. (Ngi 100:2; 1Tim 1:11) Ndaga jitshi thatu jiabonga jidi naye gututuma ha gusuanguluga nu mudimo wa gulongesa?
Ya thomo, tuana gulongesa lukuma ludi muhana felela. Mangino, athu avula ashigo nu felela, hene tuajiya guzalesa mitshima yawo nu “lukuma luabonga, mene jia guhuima.” (Yesh 52:7) Luko, lukuma luabonga luatadila Ufumu wa Nzambi luajiya gutusuanguluisa muavula. Hakiene, gutuama dia guya gulongesa, tangiza thomo gubonga Ufumu wa Nzambi mbawutubatela ha mavu.
Ya mbadi, lukuma luabonga tuana gulongesa luana gubatela athu gubonga mu muila nu mu nyuma. Athu ene ana gulonguga ha gubemba makalegelo abola, hagula ahete luendu lua gujinga ivo nu ivo. (Yesh 48:17, 18; Lomo 1:16) Tudi diago nu luendu lua gukalagala mudimo wa guhuluisa athu. Ikhale athu ako atuna gawo guhuluishiwa, tudi naye gulandula gukamba athu atshigina guhuluishiwa.—Mat 10:11-14.
Ndaga ya thathu, ya ndando idi egi mudimo wetu wa gulongesa wana gutumbuisa Yehowa. Yehowa wana guzula diago mudimo wetu nu ndando yavula. (Yesh 43:10; Heb 6:10) Luko, wana gutuhana nyuma yenji yabonga hagula tukalagale mudimo wene kiawaha. Hene, toga Yehowa aguhane gusuanguluga handaga gusuanguluga gudi gitshinyi gia bundu dia nyuma yabonga. (Gal 5:22) Yehowa wajiya gutukuatesa ha gubinga malamba a lujingu nu gulongesa nu gikhesa giagasue. (Makal 4:31) Hakiene, nga athu a mu terituare yetu asuangulugilego nu lukuma luabonga, mbatusuanguluga diago nu mudimo wetu wa gulongesa.—Ezek 3:3.
Khadilo ditshi mbawutshigina gukhala nadio mu mudimo wa gulongesa? Luholo lutshi wajiya gumonesa gusuanguluga?
TALENU VIDÉO RETROUVE DE LA JOIE GRÂCE À L’ÉTUDE ET À LA MÉDITATION, GUNGIMA, HANENU MVUTU GU MIHU EYI:
Mukunda natshi tudi naye guhaga ulongugi wetu wa Biblia ha fundo dia thomo, ikhale tudi mubalegesa matangua avula mu mudimo wa gulongesa mbeji yagasue?
Luholo lutshi tudi naye gulandula khadilo dia Mariya?
Tangua ditshi wana guzula kumbi dia gutangigiza Mbimbi ya Nzambi?
Itshi yana gugusuanguluisa tangua wana gulongesa lukuma luabonga?