“Gumuanga Lukuma Luabonga nu Gulongesa Gudi nu Ndando ha Gubuisa Athu Alandudi”

Yesu watumine alandudi enji ha guya mubuisa athu alandudi. (Mat 28:19) Yakotelesa egi, gumuanga lukuma luabonga nu gulongesa. Tangua diagasue tudi naye gudihula egi, ‘Luholo lutshi ngajiya gukudisa maluholo awa a mudimo wa gubuisa athu alandudi?’

GUMUANGA LUKUMA LUABONGA

Hafundo dia gunengena egi athu ene aze gudi esue, tudi naye gukalagala ngolo ha guya mukamba athu “atagana.” (Mat 10:11, NWT) Tangua tudi mu mudimo wa gulongesa, tuana gukalegela okazio jia guta maga nu athu ‘tuana gutagana nawo’ ba? (Makal 17:17) Mupostolo Pholo walongesele nu gikhesa giagasue, hene Lidia wabuile mulandudi wa Yesu.​—Makal 16:13-15.

TALENU VIDEO: LANDULA GULONGESA, ‘UBEMBIGO’​—TANGUA TUAHETA OKAZIO WA GUZUELELA LUKUMA LUABONGA (PRÉDICATION INFORMELLE), NU MU INZO NU INZO. GUNGIMA, HANENU MVUTU GU MIHU EYI:

• Khadilo ditshi diakhalele nadio Samuel diakhalele mumonesa egi wakhalele nu gikhesa gia gukuna khenyi jia giamatshidia?

• Mukunda natshi tudi naye gufubidila mu maluholo agasue a gulongesa?

• Akuatshi wajiya gulongesa lukuma lua Ufumu tangua udi gu mudimo waye wana gukalagala?

GULONGESA

Ha gubuisa athu alandudi, tushigo naye guaabembela phamba mazulunalu. Ha guaakuatesa hagula akule mu nyuma, tudi naye guaavutugila nu guaalongesa Biblia. (1Kol 3:6-9) Uvi, itshi tuajiya gutshita gula muthu tudi mulongesa giamatshi gia Ufumu gashigo mutshigina ndo? (Mat 13:19-22) Tudi naye gulandula gukamba athu adi nu mitshima gifua “mavu abonga.”​—Mat 13:23; Makal 13:48.

TALENU VIDEO: LANDULA GULONGESA, ‘UBEMBIGO’​—MU MAFUNDO A ATHU AVULA, NU GUBUISA ATHU ALANDUDI. GUNGIMA, HANENU MVUTU GU MIHU EYI:

• Luholo lutshi Solomon nu Mary ambidile khenyi jia giamatshidia meya mu mutshima wa Ezekiel nu Abigail?

• Mu maluholo etu agasue a gulongesa, ikhale mu mafundo a athu avula, felela dietu didi naye gukhala itshi?

• Luholo lutshi tuajiya gudihana muavula diago ha gulongesa athu ako giamatshidia?