‘Phaula Wahanele Nzambi Mersi nu Wahetele Ngolo’

Tangua aphangi a mu hungu dia Roma avile egi Phaula wakhalele muza, atumine aphangi ako ha guya gumutagana mu njila; aphangi ene awendele ba kilometre 64. Luholo lutshi guzumba guawo gua giamatshidia guakuatele diago mutshima wa Phaula? Biblia idi muzuela egi: ‘Tangua Phaula gaamonele, wahanele Nzambi mersi nu wahetele ngolo.’ (Makal 28:15) Phaula wakhalele mujiyiwa gifua muthu wana guhana athu ako ngolo, uvi mu tangua dinyi gakhalele mu bologo, muene nji wakhalele nu funu ya ngolo.​—2Kol 13:10.

Mangino, atadi awendji ana guwenda mu mahungu a gudisha mukunda nu guhana an’etu a mala nu a akhetu ngolo mu nyuma. Uvi ene nji adi athu gifua esue. Matangua ako, ana guhuila, ana gutagana nu malamba, ana guleba nji muila. Hene, mu masugu adi muza, gula mutadi muwendji nu mukaji’enji aza mutala hungu dienu, itshi wajiya gukalagala ha guaahana ngolo, hagula ‘mudikolese hamoshi’?​—Lomo 1:11, 12.

• 

  Guya mu gudibungisa gua mudimo wa gulongesa. Mutadi muwendji wana guheta ngolo gula alongeshi akalagala ngolo ha gulandula muabonga malongo agasue a phoso ya sipesiale. (1Tes 1:2, 3; 2:20) Mu mbeji ya phoso yenu ya sipesiale, wajiya gukalagala mudimo wa muvundji wa njila wa tangua diazonda. Wajiya guhana jina hagula ulongese hamoshi nu mutadi muwendji nga nu mukaji’enji. Nga ndo, wajiya guya nenji ha gutala muthu mumoshi wana gulongesa Biblia. Mutadi muwendji nu mukanji’enji ana gusuanguluga ha gulongesa nu alongeshi a maluholo agasue, ikhale anyi ashigo nu eksperianse yavula mu mudimo wa gulongesa.

• 

  Gumonesa khadilo dia guhana. Wajiya guhana fundo dia gubanda nga ima ya gudia mukunda nu mutadi muwendji nu mukaji’enji ba? Gula watshita ngenyi, mbayimonesa diago egi wana guaazumba. Anago gutoga egi waayambe nu ima ya ndando yavula-vula.​—Luka 10:38-42.

• 

  Gutegelela utuameji nu conseil jienji nu gujitumagela. Mutadi muwendji wana gutukuatesa nu guzumba guagasue ha gumona luholo lutshi tuajiya gukudisa mudimo wetu wa Yehowa. Matangua ako, wajiya gutuwambela haphelo ndaga tudi naye gulondega. (1Kol 5:1-5) Mutadi muwendji wana gusuanguluga gula tudi athu atumaga.​—Heb 13:17.

• 

  Gumushimana mukunda nu mudimo wenji. Wambela mutadi muwendji nu mukaji’enji gubonga wana guheta luholo ana guza gumitala mu hungu. Ha guyitshita, wajiya gumuwambela nayo gu kano, nga ndo, wajiya gumusonegela mukanda.​—Kol 3:15.