Khala Gudisha ha Fundo dia Athu Ako

Khadilo dia gudisha ha fundo dia athu ako didi mumonesa, gukotelesa matangi awo, ndaga adi najio funu nu luholo adi gudivua. Diana kotelesa nji gunemesa ndaga jia ikombelelo yawo nu gukotelesa ndaga adi najio funu. Athu ana gutukotelesa muabonga tangua tuana gudisha ha fundo diawo, hene gula tudi mutshigina guakuatesa tudi naye gutshita ngenyi. Gula tudi gudisha ha fundo dia athu mu mudimo wa gulongesa, mbatumonesa egi tudi mulandula khadilo dia Yehowa dia guzumba nu gudisagesa mukunda nu athu ako. Gutshita ngenyi mbagukuatesa athu ha gumujiya.​—Fili 2:4.

Khadilo dia gudisha ha fundo dia athu ako dishigo phamba metode tuana kalegela mu mudimo wa gulongesa, uvi diana gutukuatesa nji ha gutegelela athu muabonga nu guamonesela gisemo. Tuana monesa egi tudi gudisha ha fundo dia athu ako mu luholo luetu lua guzuela, nga mu ba jeste etu. Tuana monesa nji khadilo diene tangua tuana guamonesela guzumba. Tuana kamba gujiya ndaga jiana guasunguluisa, gikombelelo giawo nga ndaga adi mutagana najio. Tuana gualongesa malongo ajiya guakuatesa, uvi tushigo naye guashinjiga ha gusombegesa. Tuana khala nji nu gusuanguluga guavula mu mudimo wa gulongesa gula athu adi mutshigina ukuateshi wetu.

TALENU VIDEO IDI MUZUELA EGI: HETA GUSUANGULUGA MU MUDIMO WA GUBUISA ATHU ALANDUDI—KUDISA LUHOLO LUAYE LUA GULONGESA—GUDISHA HA FUNDO DIA ATHU AKO. GUNGIMA, HANENU MVUTU GU MIHU EYI:

• 

  Luholo lutshi phangi Neeta wadihagi ha fundo dia Jade, tangua Jade anemeselego tangua?

• 

  Luholo lutshi phangi Neeta wadihagi ha fundo dia Jade, tangua Jade wamuwambela egi gashigo gudivua muabonga ha gulonguga?

• 

  Luholo lutshi phangi Neeta wadihagi ha fundo dia Jade, tangua Jade wamuwambela egi gashigo mujiya luholo lua gulondega ima?