LONGO DIA 14
Ita idi Muza gu Khanda ya gu Nord!
‘Gifutshi gimoshi gia ngina gu ngolo mu mavu ami.’—YOW. 1:6.
LUNGIMBO 95 La lumière s’intensifie
NDAGA JIDI MU LONGO EDIa
1. Metode atshi phangi Russell nu alongogi ako a Biblia akalegele ha gulonguga Biblia, nu mukunda natshi yakhalele metode abonga?
IVO YAVULA yabalega, phangi C. T. Russell nu ndambo ya alongogi ako a Biblia asendesele gudibungisa hamoshi. Akhalele mutshigina gulonguga ndaga Biblia yana longesa diago mukunda nu Yehowa Nzambi, mukunda nu Yesu, mukunda nu athu a gufua nu mukunda nu gibawu gia Yesu. Ba metode awo a gulongugila akhalelego akola. Muthu mumoshi wakhalele muhula muhu, gungima mukut’awo agasue akhalele mukamba verse jidi muzuelela ndaga yene. Gungima, akhalele musonega mvutu akhalele muheta. Yehowa wakuatesele Aklisto awa ha gukotelesa malongo a giamatshidia a Biblia. Malongo ene adi nji nu ndando uu nu mangino.
2. Tangua tudi mukamba gukotelesa profesi ya Biblia, ndaga itshi yajiya gukalagala egi tuyikotelese mu luholo luabola?
2 Alongogi ene a Biblia ajiyile egi yakhalago lamba ha gukotelesa malongo a Biblia, uvi yakhala lamba ha gujiya ukoteleshi wa profesi jia Biblia. Mukunda natshi? Handaga, tuana gukotelesa muabonga profesi jia Biblia phamba tangua jidi mutagana nga gungima dia gutagana gua profesi jiene. Uvi gudi nji nu ndaga iko. Ha gukotelesa profesi muabonga, tudi naye gutadila ndaga jia sonegewa gutuama nu gungima dia profesi yene. Handaga gula tuatadila phamba ndaga imoshi ya profesi yene iko tuabemba, tuajiyilego guyikotelesa muabonga. Tuataganele nu ndaga ya luholo elu mu profesi idi mu mukanda wa Yowele. Henyaha, tutadilenu luko profesi yene, ha gujiya mukunda natshi idi mutoga egi tusombegese luholo lua guyikotelesa.
3-4. Sendese mualeha, luholo lutshi tuakhalele mukotelesa profesi idi mu Yowele 2:7-9?
3 Tanga Yowele 2:7-9. Yowele wazuelele gutuama gamba thundu ya matulu mbayizangela mavu a Isalele. Matulu ene adi nu mazo nu mbanga gifua khoshi, nu mbaadia mitshi yagasue ya mu dimbo dia Isalele! (Yow. 1:4, 6) Ivo yavula yabalega, tuakhalele mumona egi profesi yene yakhalele muzuelela mudimo wa gulongesa akombeledi a Yehowa ana kalagala gifua matulu, nu gushigo nga muthu wajiya guakanga njila. Tuakhalele mukotelesa egi mudimo wene udi mubolesa “mavu” a athu adi mu utuameji wa mafumu a mangumba.b
4 Gula tuasuga phamba ha gutanga Yowele 2:7-9, tuajiya gumona gifua ukoteleshi wene udi wabonga. Uvi, gula tuatadila ndaga jidi gungima nu guphala ya profesi yene, idi mumonega diago egi tudi naye gusombegesa luholo lua guyikotelesa. Tutadilenu ndaga nguana jidi gututuma ha gusombegesa ukoteleshi wene.
NDAGA NGUANA JIDI GUTUTUMA HA GUSOMBEGESA UKOTELESHI WA PROFESI YENE
5-6. Muhu utshi tuajiya gudihula tangua tudi mutanga (a) Yowele 2:20? (b) Yowele 2:25?
5 Tutadilenu ndaga ya thomo yalayele Yehowa mukunda nu thundu ya matulu ene: ‘Mbangukaya [matulu] adi mujila gu khanda ya gu nord.’ (Yow. 2:20) Gula matulu ene adi mumonesa Matemue a Yehowa anyi adi mutumagela mukhuala wa Yesu wa gulongesa, nu gubuisa athu alandudi, mukunda natshi Yehowa gadi muzuela egi mbawaakaya? (Ezek. 33:7-9; Mat. 28:19, 20) Idi yadiago egi, Yehowa gashigo mukaya akombeledi enji a gujinginyina, uvi gima gimoshi ngenyi nga muthu wabola.
6 Ndaga ya mbadi, tutadile mbimbi jidi mu Yowele 2:25. Yehowa udi muzuela gamba: ‘Mbangumivutudila mbuto jia mu ivo yabalegele jiadiwe gudi matulu adi nu masala, gudi matulu ashigo nu masala, gudi ikhululu nu gudi ngongo. Ame ngamitumine ima yene yagasue ha gumisagesa.’ Jiya egi Yehowa udi mulaya egi ‘mbawuvutula’ ima yagasue yazangelele matulu. Gula matulu ene adi alongeshi a Ufumu wa Nzambi, idi mukotelesa egi mbimbi adi mulongesa jidi muzangela ima. Uvi, lukuma luabonga ludi muhana athu avula monyo wa ivo nu ivo nu ludi mutuma athu abola ha gubalumuna mutshima. (Ezek. 33:8, 19) Idi diago ndaga yawaha mukunda nu athu ene!
7. Mu Yowele 2:28, 29, mbimbi eji: “Gungima dia ndaga eji” jidi mukotelesa itshi?
7 Tanga Yowele 2:28, 29, NWT.c Tutadilenu ndaga ya thathu: Gudilandula gua ndaga jidi mu profesi yene. Yehowa udi muzuela egi: “Gungima dia ndaga eji, mbangubunduila muthu yagasue nyuma yami”; ndaga eyi idi naye gukalegewa gula matulu amana mudimo wawo. Gila matulu ene adi alongeshi a Ufumu wa Nzambi, mukunda natshi Yehowa mbagaabunduila nyuma yenji gungima dia gumanesela mudimo wawo? Ndaga ya giamatshidia idi egi, gula Nzambi gatukuateselego nu nyuma yenji, tuajiyilego gulandula gulongesa gula tuatagana nu malamba nga umbalagaji.
Phangi J. F. Rutherford nu Aklisto ako ambiwe maji mu nyuma alongesele nu gikhesa giagasue mbimbi ya Nzambi ya guza musophesa mavu awa abola a Satana (Tala paragrafe 8)
8. Matulu adi muzuelewa mu Yatuwuwe 9:1-11 adi mumonesa akuatshi? (Tala gifuanesa holu dia gizula.)
8 Tanga Yatuwuwe 9:1-11. Henyaha, tutadilenu ndaga ya nguana. Thomo, tuakhalele mutangiza egi matulu a profesi ya Yowele adi mumonesa mudimo wetu wa gulongesa, handaga profesi yene idi luholo lumoshi nu profesi idi mu mukanda wa Yatuwuwe. Profesi yene idi muzuelela matulu adi nu phala jia athu, gu mito yawo gudi nu ‘ima gifua ipho ya gutumbuga ya utadi wa wolo.’ (Yat. 9:7) Adi musagesa ‘athu (mbalagaji jia Nzambi) anyi ashigo nu njimbu ya Nzambi ha mbombo jiawo’ mu mbeji thano, guvula gua masugu matulu ene ana gujinga. (Yat. 9:4, 5) Ndaga eji jidi mumonesa Aklisto ambiwe maji mu nyuma gudi Yehowa. Adi mulongesa nu gikhesa lukuma luatadila gusophesewa gua mavu awa abola, hene, athu abola a ha mavu awa adi muvua woma.
9. Gudisha gutshi gudi mukatshi dia matulu amonele Yowele nu anyi amonele Yone?
9 Idi yadiago egi, profesi ya mukanda wa Yatuwuwe yakhala nu ndaga jia gudifuana nu profesi ya mukanda wa Yowele. Uvi, profesi jiene jiakhala jia gudisha. Tutadile ndaga eyi: Matulu a mu profesi ya Yowele adi mubolesa mbuto. (Yow. 1:4, 6, 7) Uvi, mu vizio ya Yone, matulu ‘awambelewe egi ashigo naye gubolesa mbuto jia ha mavu.’ (Yat. 9:4) Matulu amonele Yowele akhalele muza gu khanda ya nord. (Yow. 2:20) Uvi, anyi amonele Yone akhalele muzoga mu wina waleha. (Yat. 9:2, 3) Matulu anyi Yowele gadi muzuelela adi naye gukayewa. Anyi adi muzuelewa mu Yatuwuwe, ashigo mukayewa uvi ahanewa njila ya gumanesela mudimo wawo. Gushigo nga gima gimoshi mu Biblia gidi mumonesa egi Yehowa gashigo musuanguluga nawo.—Tala galuanda “Profesi Jiatadila Matulu: Jia Gudifuana Uvi Ukoteleshi wa gudisha.”
10. Hana gifezegeselo gidi mumonesa egi matulu azuelela Yowele nu anyi azuelela Yone ajiya gukotelesa ndaga jia gudisha.
10 Gudisha gudi mukatshi ba profesi awa mbadi gudi gutukuatesa ha gujiya egi, jishigo muzuelela ndaga imoshi. Idi mukotelesa egi matulu adi mu mukanda wa Yowele, ashigo luholo lumoshi nu matulu adi mu mukanda wa Yatuwuwe ba? Ayi. Mu Biblia, ndaga imoshi ya gifuanesa yajiya gukhala nu ukoteleshi wavula gula ayikalegela mu luholo luko. Ha gufezegesa, mu mukanda wa Yatuwuwe 5:5, Yesu udi mutamegewa egi “Khoshi ya giphuta gia Yuda,” uvi mu 1 Phetelo 5:8, adi mutamega Diabulu egi “khoshi yabala.” Ndaga nguana tuazuelela gutuama jidi gutumonesa egi profesi ya Yowele idi nu ukoteleshi uko. Ukoteleshi wene wajiya gukhala itshi?
PROFESI YENE IDI MUKOTELESA ITSHI?
11. Ndaga jitshi jidi mu Yowele 1:6 nu Yowele 2:1, 8, 11 jidi gutukuatesa ha gujiya gula matulu akhalele mukotelesa itshi?
11 Tangua tuatadila muabonga verse jiko jidi gutuama nu gungima dia profesi ya Yowele, tuakotelesa diago egi profesi yene yakhalele muzuelela ita ya masuta. (Yow. 1:6; 2:1, 8, 11) Yehowa udi muzuela egi mbawutuma ‘masuta avula’ (masuta a gu Babilona) ha guhana disipline gudi enya Isalele anyi akhalelego gumutumagela. (Yow. 2:25) Masuta ene akhalele mutamegewa egi ‘enya gu nord’ handaga enya gu Babilona ajidile gu khanda ya nord ha guluisa enya Isalele. (Yow. 2:20) Masuta ene, akhalele a gudilondega muabonga gifua thundu ya matulu. Yowele wazuelele mukunda nu masuta ene egi: ‘Suta diagasue didi mulandula njila yenji. . . . Adi mungina muphushi mu dimbo, adi munginyinyina mu ibayi. Adi mukhalata gosa inzo, adi munginyina ha madidishi gifua nzangi.’ (Yow. 2:8, 9) Tangiza gale ndaga eyi! Dimbo diagasue dia guzala nu masuta pha. Gushigo nga fundo dia gudisuegela. Gushigo nga muthu wajiya gudihuluisa ha mago a masuta a gu Babilona!
12. Luholo lutshi profesi ya Yowele yatadila matulu yatagenesewe?
12 Mu 607 G.T.D., enya gu Babilona (enya gu Kaldeya) anginyile nu abolesele dimbo dia Yelusalema gifua matulu. Biblia idi muzuela egi: ‘Fumu wa gu Babilona washiyile an’awo a mala gu phogo . . . , gakhalelego nu khenda gudi mavuala a mala nga a akhetu, gudi athu a gukola nga ikata (ikalaba). Nzambi wahanele ima yagasue ha mago enji. Wakondele inzo ya Nzambi wa giamatshidia, wamuangele ibayi ya Yelusalema, wakondele jinzo jiagasue jialeha nu tshuya, nu wakuluile ima yagasue ya ndando.’ (2 Gudi. 36:17, 19) Tangua enya gu Babilona abolesele dimbo, gungima athu azuelele egi: ‘Mavu awa asala temu diene-diene gushigo nga muthu nga shitu hene, mavu awa ahenewa gudi enya Babilona.’—Yel. 32:43.
13. Mukanda wa Yelemiya 16:16, 18 udi mukotelesa itshi?
13 Hazuelele Yowele profesi yene, gungima dia ivo 200 Yehowa watumile Yelemiya ha guzuela ndaga iko yatadila ita yene. Wazuelele egi masuta ene mbaakamba muabonga enya Isalele agasue ana tshita ndaga jiabola nu mbaakuata agasue. Yehowa udi muzuela egi: “‘Mbangutuma athu avula ha guakuata gifua mudi mayanga mukuata jishui. Ha ngima mbangutuma athu avula ha guya nu guatomba mukatshi dia milundu yakoma nu yazonda nu mu mbua jia seso gifua mudi mayanga muya nu gutomba jishitu. . . . Mbanguahana lufuto lua gujimbila guawo nu lua gubola guawo.’” Guakhalelego nga muta wakoma nga gishitu giakhalele naye gusuega enya Isalele anyi atunyile gubalumuna mitshima gudi masuta a enya Babilona.—Yel. 16:16, 18.
GULONDEGEWA GUA NDAGA
14. Tangua ditshi profesi idi mu Yowele 2:28, 29 yatagenele?
14 Yowele udi nu lumene luabonga lua gulondegewa gua ndaga. Mavu mbaazola luko mbuto jiavula. (Yow. 2:23-26) Mu masugu adi muza, ima ya gudia mu nyuma mbayikhala yavula. Yehowa udi muzuela egi: ‘Mbangubunduila muthu wagasue nyuma yami, nu an’enu a mala nu a akhetu mbaazuela ndaga jidi khenji jiabuile ndo . . . Nga enya mudimo a mala nu a akhetu, mbanguabunduila nyuma yami.’ (Yow. 2:28, 29) Gubundudiwa gua nyuma ya Nzambi guakalegewe ndo mu tangua enya Isalele akatugile mu uhiga gu Babilona ha guvutuga mu gifutshi giawo. Uvi, guakalegewe mu Pantekote ya givo 33 gia T.D. Tuayijiya gikuatshi?
15. Ha gutadila Makalegelo 2:16, 17, usombegeshi utshi wakalegele Phetelo mu Yowele 2:28, nu idi mumonesa itshi?
15 Mu njila ya nyuma yabonga, mupostolo Phetelo watangele ndaga jidi mu Yowele 2:28, 29 ha guzuelela ndaga jia gushimana jiakalegewe mu lusugu lua Pentekote. Mu 9:00 mu gimenegena, ndaga imoshi ya gushimana yakalegewe: Nzambi wabunduile yuma yenji, athu anyi ayihetele asendesele guzuela “ndaga jiakoma jia gushimana jia Nzambi.” (Makal. 2:11) Mu njila ya nyuma yabonga, Phetelo wasombegesele hazonda mbimbi jiko tangua gakhalele muzuelela profesi ya Yowele. Udi mujiya ndaga yasombegesele muene ba? (Tanga Makalegelo 2:16, 17.) Ha fundo dia gusendesa nu mbimbi eji, “gungima dia ndaga eji,” Phetelo wazuelele egi: “Mu masugu a gisugishilo,” yakotelesa egi gisugishilo gia ndaga jia enya Yuda, Nzambi wabunduile nyuma yenji gudi “muthu yagasue.” Ndaga eyi idi mumonesa egi, tangua diavula diabalegele gutuama egi profesi ya Yowele itagenesewe.
16. Itshi nyuma ya Nzambi yakalegele mukunda nu mudimo wa gulongesa mu siekle ya thomo nu mangino?
16 Tangua Nzambi gabunduile nyuma yenji mu siekle ya thomo, alandudi asendesele mudimo wa gulongesa, owu wamuanganele ha mavu agasue. Tangua mupostolo Phaula gasonegele mukanda gudi Aklisto a gu Kolosai mu givo 61 gia T.D., wazuelele egi lukuma luabonga luakhalele lualongesewa gale ‘gudi ima yagasue yafugiwe goshi’a dilu.’ (Kol. 1:23) Tangua Phaula gazuelele mbimbi eji, “ima yagasue yafugiwe”, wakhalele muzuelela ifutshi ya ha mavu, inyi muene nu alandudi ako akhalele muya mulongesa. Nyuma yabonga ya Yehowa yakuatesele hagula mudimo wa gulongesa umuangagane muavula mu masugu etu, ‘uu nu gu gisugishilo gia mavu’!—Makal. 13:47; tala galuanda “Mbanguabunduila Nyuma Yami.”
NDAGA ITSHI YASOMBEGESA?
17. Luholo lutshi ukoteleshi watadila profesi ya Yowele idi muzuelela matulu wasombegesele?
17 Ndaga itshi yasombegesa? Henyaha tudi nu ukoteleshi wa giamatshidia watadila profesi idi mu Yowele 2:7-9. Ya diago, verse eji jishigo muzuelela mudimo wetu wa gulongesa, uvi jidi muzuelela mudimo wa masuta a gu Babilona anyi ashiyile dimbo dia Yelusalema mu givo 607 G.T.D.
18. Ndaga itshi yasombegeselego mukunda nu akombeledi a Yehowa?
18 Ndaga itshi yasombegeselego? Akombeledi a Yehowa ana landula gulongesa lukuma luabonga mafundo agasue, nu ana kalegela ba metode agasue ha gulongesa. (Mat. 24:14) Gushigo nga nu guvernema umoshi wajiya gutukanga njila ha gulongesa lukuma luabonga. Yehowa wana gutukuatesa, hene tuana longesa muavula nu gikhesa lukuma luabonga lua Ufumu! Tuana landula (lunduga) gukamba ukuateshi wa Yehowa nu gudibulumuisa guagasue ha gukotelesa profesi jia Biblia, handaga tuana haga mutshima egi, muene mbawututuameza “gu ndaga jia giamatshidia” mu tangua diatagana!—Yone 16:13.
LUNGIMBO 97 La Parole de Dieu, essentielle à ta vie
a Ivo yavula yabalega, tuakhalele mutangiza egi profesi idi mu mukanda wa Yowele mukhapho wa 1 nu Yowele mukhapho wa 2 yakhalele muzuelela mudimo wa gulongesa wa mu masugu etu. Uvi, gudi nu ndaga nguana jidi gututuma ha gusombegesa luholo luetu lua gukotelesa profesi idi mu mukanda wa Yowele. Tutadilenu ndaga jiene nguana.
b Ha gufezegesa, tala longo “La création manifeste la sagesse de Jéhovah” mu Inzo Yaleha ya Mutaledi ya 15 Avril 2009, diyiji 18 par. 14-16.
c Mu Biblia ya Giphende, verse eji jidi mu Yowele 3:1, 2.