Mihu Yana Guhula Athu Ana Gutanga Mikanda Yetu

‘Itshinyi ya bundu dia nyuma’ yakhala phamba mu mukanda wa Galatiya 5:22, 23 nga guakhala nu iko?

Verse eji jiana tanga makalegelo a Aklisto divua: ‘Bundu dia nyuma yabonga didi guzumba, gusuanguluga, guhuima, guhuiminyina, gisemo, mutshima wabonga, gutshigina, gutuluga, nu gudikanda.’ Tuajiyilego gutangiza egi makalegelo awa abonga tuatanga phamba ene nyuma ya Nzambi yajiya gutukuatesa ha gukudisa.

Tala ndaga jiasonegele mupostolo Phaula gu verse jidi gutuama: ‘Midimo ya muila . . . idi uthambi, usala wa mutshima, ndaga jia musonyi, gukombelela isongo, wanga, gikembe, gumana, fuwa, khabu, umbalagaji, gukhaphumuga, lutondo, ngina yabola, gukuatewa gua matombe, lushigo lua gudia, nu ndaga jiko jiadifuana nu jieji.’ (Gal. 5:19-21) Mupostolo Phaula udi musugisa nu mbimbi eji: “Ndaga jiko jiadifuana nu jieji,” gifua eji jidi muzuelewa mu Kolosai 3:5. Luholo lumoshi, gungima dia gutanga makalegelo abonga divua, wazuelele egi: ‘Gushigo nu mukhuala udi mutunyisa ndaga gifua eji.’ Phaula gatangelego makalegelo agasue abonga anyi tuajiya gukudisa mu ukuateshi wa nyuma yabonga.

Yana monega ha phelo gula tuafuanesa ndaga jiatangele Phaula tangua gasonegele Aklisto a gu Efeso mukanda egi: ‘Bundu dia muanya diana zola mutshima wabonga nu nduedi nu giamatshidia.’ (Ef. 5:8, 9) Ayi, “mutshima wabonga” nu nduedi nu giamatshidia idi mukatshi dia “bundu dia muanya,” uvi idi nji gitshinyi gia “bundu dia nyuma.”

Luholo lumoshi nji, Phaula udi mutoga Timote ha ‘gulandula nduedi, gujinginyina gudi Nzambi, gutshigina, guzumba, gukolesela, nu gutuluga’—makalegelo abonga asamano. (1 Tim. 6:11) Phamba makalegelo awa thathu (gutshigina, guzumba, nu gutuluga) adi mutangewa mukatshi dia itshinyi ya ‘bundu dia nyuma.’ Timote wakhalele nji nu funu ya ukuateshi wa nyuma yabonga ha gukudisa makalegelo ako gifua: nduedi, gujinginyina gudi Nzambi, nu gukolesela.—Fuanesa nu Kolosai 3:12; 2 Phetelo 1:5-7.

Hene, Galatiya 5:22, 23 gashigo mutanga makalegelo agasue anyi Aklisto adi naye gukudisa. Nyuma ya Nzambi yajiya gutukuatesa ha gukudisa itshinyi divua ya ‘bundu dia nyuma yabonga.’ Uvi gudi nu makalegelo ako tudi naye gukudisa ha gubua Aklisto a gukula mu nyuma nu ha ‘gusudiga umuthu uhe-uhe wafugiwe mu gutshigina gua Nzambi mu nduedi ya giamatshidia nu gujinginyina.’—Ef. 4:24.