Gufuzumuga Guana Monesa Guzumba, Gutema, nu Guhuiminyina gua Nzambi

1. Mukunda natshi Yehowa wafugile ima iko?

THOMO Yehowa wakhalele hakhenji. Uvi ndaga yene yakhalelego gumusagesa. Gakhalelego nu funu ya muthu muko hagula akhale nu gusuanguluga. Uvi, Nzambi watshiginyile egi ima iko ikhale mu lujingu nu gusuanguluga. Khadilo dia guzumba diamutumine ha gufuga ima.—Ngi. 36:9; 1 Yone 4:19.

2. Luholo lutshi Yesu nu anjelo adivuile tangua Yehowa gafugile ima iko?

² Yehowa wafugile thomo Mun’enji Yesu. Gungima, mu njila ya Mun’enji muene, Yehowa wafugile “ima iko yagasue.” Mukatshi dia ima yene, tuajiya gutanga anjelo agasue. (Kol. 1:16) Yesu wasuangulugile ha gutshita mudimo nu Sh’enji. (Ish. 8:30) Anjelo a Nzambi asuangulugile nji. Akhalele hene tangua Yehowa nu Yesu, Gaphita genji ga Mudimo, akhalele mufuga dilu nu mavu. Luholo lutshi anjelo amonesele gusuanguluga guene? ‘Asendesele gumba miyelele’ tangua Yehowa gafugile mavu. Idi yadiago egi alanduile gumba miyelele hafugile Yehowa ima iko nu athu. (Yobo 38:7; Ish. 8:31) Ima eyi yagasue Yehowa gafugile yana monesa guzumba nu gutema guenji.—Ngi. 104:24; Lomo 1:20.

3. Ha gutadila 1 Kolinto 15:21, 22, gubonga gutshi gibawu gia mulambu wa Yesu mbawutubatela?

³ Felela dia Yehowa diakhalele egi athu ajinge ivo nu ivo ha mavu afugile muene. Uvi tangua Adama nu Eva amulumbugidile, gubola nu gufua guanginyile ha mavu agasue. (Lomo 5:12) Itshi Yehowa gakalegele? Mu tangua diene, wamonesele luholo mbagahuluisa athu. (Gis. 3:15) Wahanele Mun’enji Yesu gifua mulambu wa gibawu ha gukatula ana a Adama nu Eva mu uhiga wa gubola nu gufua. Gungima, Yehowa mbawuhana monyo wa ivo nu ivo gudi muthu wagasue wana gutomba ha gumukombelela.—Yone 3:16; Lomo 6:23; tanga 1 Kolinto 15:21, 22.

4. Mihu itshi tuza muzuelela mu longo edi?

⁴ Laji dia Yehowa diatadila gufuzumuna athu diana gututuma ha gudihula mihu yavula. Ha gufezegesa, yajiya gukhala egi gufuzumuga mbagukalegewa luholo lutshi? Mbatujiya luko aphangi’etu tuakhalele muzumba anyi afuile tangua mbaafuzumuga ba? Mu maluholo tshi gufuzumuga mbagutubatela gusuanguluga? Luholo lutshi gutangigiza laji edi dia gufuzumuga guajiya gututuma ha guhana Yehowa mersi mukunda nu khadilo dienji dia guzumba, dia gutema nu dia guhuiminyina? Tuzuelelenu giwa mihu yene.

YAJIYA GUKHALA EGI GUFUZUMUGA MBAGUKALEGEWA LUHOLO LUTSHI?

5. Mukunda natshi tuajiya gudifelela egi athu agasue mbaashigo mufuzumuga mu tangua dimoshi?

⁵ Tangua Yehowa mbagafuzumuna bamilio a athu mu njila ya Mun’enji, tuajiya gudifelela egi mbaashigo mufuzumuga mukut’awo agasue mu tangua dimoshi. Mukunda natshi tuazuela ngenyi? Handaga, yajiya gukhala egi gula athu afuzumuga avula mu tangua dimoshi, ndaga mbajibalegago muabonga. Luko, Yehowa ganago gutshita ndaga jienji muamua-muamua. Wana jiya egi ndaga jidi naye gubalega muabonga hagula athu ajinge mu guhuima. (1 Kol. 14:33) Yehowa Nzambi wamonesele khadilo dia gutema nu dia guhuiminyina tangua diakhalele muene mutshita mudimo nu Yesu ha gulonda mavu mukunda nu athu. Yesu mbawumonesa nji makalegelo awa mu Uhinyinyi wenji wa Ivo 1 000, tangua mbagakalagala mudimo nu athu anyi mbahuluishiwa gu Alemagedona ha gulondela athu anyi mbaafuzumuga fundo dia gukhala nu ima iko mbaakhala naye funu.

6. Hagutadila Makalegelo 24:15, athu a luholo lutshi mbaafuzumuiwa gudi Yehowa?

⁶ Ndaga yabalega ndando idi egi, athu anyi mbahuluga gu Alemagedona mbaakuatesa athu anyi mbaafuzumuga ha gualongesa ndaga yatadila Ufumu wa Nzambi nu ma felela enji. Mukunda natshi? Handaga mukatshi dia athu mbaafuzumuga, avula akalegele ndaga jiabola, handaga ahetelego luendu lua gulongesewa. (Tanga Makalegelo 24:15.) Mbayitoga egi asombegese makalegelo awo ha guheta gubonga gua mulambu wa Klisto. Tangiza mudimo mbatukhala nawo wa gulongesa giamatshidia giatadila Nzambi gudi ba milio a athu anyi khenji ajiyilego Yehowa. Muthu wagasue mbawukhala nu mulongeshi wenji wa Biblia gifua luholo tuana kalagala mangino ba? Athu mbaafuzumuga gutuama, mbaahanewa inemo mu hungu ha gulongesa athu anyi mbaafuzumuga gu ngima diawo ba? Tunengenenu mbatumona. Ndaga tuana gujiya idi gamba, gu gisugishilo gia uhinyinyi wa ivo 1 000 wa Klisto, ‘mavu mbazala pha nu ujiyi wa Yehowa.’ (Yesh. 11:9) Mu uhinyinyi wene, mbatukhala nu mudimo wakola uvi mbawutusuanguluisa!

7. Mukunda natshi akombeledi a Yehowa mbaamonesa khadilo dia khenda tangua mbaalongesa athu anyi mbaafuzumuga?

⁷ Mu Uhinyinyinyi wa Klisto wa Ivo 1 000 akombeledi a Yehowa agasue mbaalandula gusombegesa makalegelo awo ha gumusuanguluisa. Mukuta awo agasue mbaakhala nu gusuanguluga ha gukuatesa athu anyi mbaafuzumuga ha gusombegesa makalegelo awo abola, ha gujinga mugudivua nu mikhuala ya Yehowa. (1 Phet. 3:8) Idi yadiago egi athu anyi mbaafuzumuga mbaamona egi akombeledi a Yehowa adi nu gudibulumuisa nu adi mulandula gusombegesa makalegelo awo ha gusuanguluisa Yehowa. Ene nji, mbasuanguluga gumukombelela hamoshi nu ene. —Fili. 2:12.

MBATUJIYA LUKO ATHU ANYI MBAAFUZUMUGA BA?

8. Mukunda natshi tuajiya guzuela egi mbatujiya luko aphangi etu aguzumba anyi mbaafuzumuga?

⁸ Gudi nu ndaga jidi mumonesa egi mbatujiya luko a phangi etu aguzumba anyi mbaafuzumuga. Tufezegese gale; ha gutadila luholo Yehowa afuzumuile athu mu ginono, ludi mumonesa gamba muene mbawufuzumuna athu ene nu luholo lua gutala, lua guzuela, lua gutangiza, gifua luholo akhalele thomo gutuama dia gufua. Jiya egi Yesu wafuanesele gufua nu tulo, gufuzumuga nu guzuga gu tulo. (Mat. 9:18, 24; Yone 11:11-13) Tangua athu ana zuga gu tulo, ana tala, ana guvua nu ana tangiza luholo lumoshi gifua luholo akhadi gutuama egi abande. Tutadilenu gifezegeselo gia Lazalo. Masugu nguana abalegele gungima dia gufua guenji, muila wenji wasendesele gubola. Uvi tangua Yesu amufuzumuile, aphangi enji a akhetu amujiyile giphungu gimoshi, nu muene Lazalo waajile nji.—Yone 11:38-44; 12:1, 2.

9. Mukunda natshi athu anyi mbaafuzumuga mbaashigo mufuzumuga mbala imoshi athu atagana?

⁹ Yehowa watendelele egi, mu uhinyinyi wa Klisto, gushigo nga muthu mbawuzuela egi: “Ngudi mukata.” (Yesh. 33:24; Lomo 6:7) Athu anyi mbaafuzumuga gu gufua, mbaakhala nu muila wabonga. Uvi mbaashigo mubua athu atagana giphungu gimoshi. Handaga gula afuzumuga athu atagana mbala imoshi, enya fami jiawo nu mafuta awo mbaashigo guajiya. Idi mumonesa egi athu agasue mba abua athu atagana mu uhinyinyi wa Klisto wa Ivo 1 000. Phamba gu gisugishilo gia ivo 1 000 Yesu mbagavutula Ufumu gudi Shenji. Ngenyi, Ufumu mbawutagenesa ndaga jiagasue jia layele Yehowa, nu gubuisa athu agasue atagana.—1 Kol. 15:24-28; Yat. 20:1-3.

LUHOLO LUTSHI GUFUZUMUGA MBAGUTUBATELA GUSUANGULUGA?

10. Felela dia gufuzumuga mbadigutuma ha gudivua luholo lutshi?

¹⁰ Tangiza gale luholo mbawudivua tangua mbawumona luko aphangi aye aguzumba. Mbawulela nga mbawudila? Gusuanguluga mbagugutuma ha tumbuisa Yehowa nu ngimbo ba? Ndaga ya giamatshidia idi egi mukut’etu agasue, mbatumonesa guzumba gudi Sh’etu wamu dilu nu Mun’enji mukunda nu kado ga ndando ga gufuzumuga.

11. Ha gutadila mbimbi jia Yesu jidi mu Yone 5:28, 29, ndaga itshi mbayibuila athu ana gutumagela Nzambi?

¹¹ Tangiza gusuanguluga mbagukhala nago athu anyi mbaafuzumuga ha gusombegesa makalegelo awo abola nu gujinga mugudivua nu mikhuala ya Nzambi. Athu anyi mbaasombegesa makalegelo awo, mbaajinga mayilago mu phaladiso. Yehowa mbagashigo mutshigina egi athu anyi ashigo musombegesa makalegelo awo ajinge mu phaladiso ha gukatula guhuima mbagukhala muene.—Yesh. 65:20; tanga Yone 5:28, 29.

12. Mu luholo lutshi Yehowa mbaashimbiga athu anyi mbaajinga ha mavu?

¹² Athu mbatuamezewa gudi Ufumu wa Nzambi mbaakotelesa giamatshidia gidi mu Ishima 10:22 gidi muzuela egi: ‘Gusuanguluga gua Yehowa guana gubuisa muthu mumonyi nu guanago gulunda lamba.’ Nyuma ya Yehowa mbayibuisa akombeledi enji amonyi mu nyuma, ha gubua athu atagana gifua Klisto. (Yone 13:15-17; Ef. 4:23, 24) Mbaakhala nu muila wabonga lusugu nu lusugu nu mbaakhala athu abonga. Mbalukhala lujingu luabonga diago! (Yobo 33:25) Luholo lutshi gutangigiza mu felela dia gufuzumuga guajiya gugukuatesa mangino?

LONGO DITSHI TUAZULA MU GUZUMBA GUA YEHOWA?

13. Hagudivua nu Ngimbo 139:1-4, luholo lutshi felela dia gufuzumuga diana monesa egi Yehowa wana gutujiya?

¹³ Gifua luholo tuayimonyi gutuama, tangua Yehowa mbaafuzumuna athu, muene mbawafuzumuna nu matangi amoshi gifua akhalele nawo thomo gutuama dia gufua. Yakotelesa itshi? Yehowa wana gutuzumba muavula, muene wana jiya ndaga jiagasue tuana tangiza, tuana zuela, nu tuana kalagala. Hene, gula watufuzumuna, mbayikhadigo lamba gudi muene ha gutufuzumuna mu luholo tuakhalele thomo. Fumu Davidi wakhalele mujiya egi Yehowa wana jiya muthu wagasue mukatshi dietu. (Tanga Ngimbo 139:1-4.) Luholo lutshi tuana gudivua tangua tuana jiya egi Yehowa watujiya muabonga?

14. Luholo lutshi tuajiya gudivua gula tudi mutangigiza luholo Yehowa gana gutujiya?

¹⁴ Gula tudi mutangigiza luholo Yehowa ana gutujiya, tuajiyilego gudisagesa. Mukunda natshi? Jiya egi Yehowa wana bamba muthu wagasue mukatshi dietu. Wana guzula muthu wagasue nu ndando. Wana gudisagesa muavula mu ndaga jia lamba jiana gutubuila mu lujingu. Ndaga yene idi gutuhana diago gikhesa! Tuajiyilego gudivua gamba tudi hakhetu. Yehowa wana khala nu esue tangua diagasue ha gutukuatesa.—2 Gudi. 16:9.

SUANGULUGA NU GUTEMA GUA YEHOWA

15. Luholo lutshi felela dia gufuzumuga diana monesa gutema gua Yehowa?

¹⁵ Gula athu adi muvua woma wa gufua, mbalagaji jiawo jiajiya guashinjiga ha gutshita ndaga yabola idi ajiyilego gutshita. Athu adi mutuamezewa gudi Satana, ana kalegela woma wene ha gushinjiga athu ha guzuela ndaga jiabola mukunda nu mafutawo nga gukalagala ndaga jiabola. Uvi ajiyilego gutushinjiga gungolo ha gukalagala ngenyi. Tudi mujiya egi gula mbalagaji jietu jiatushiya, Yehowa mbawutufuzumuna. (Yat. 2:10) Gushigo nga gima giajiya gutukanga njila ya gukhala mafuta a Yehowa. (Lomo 8:35-39) Yehowa wamonesele gutema guenji luholo gatuhanele felela dia gufuzumuga! Tuajiyilego guvua woma gula mbalagaji jietu jidi mukamba gutushiya handaga tuakalegelego ndaga adi gututoga ha gutshita, uvi idi gutuhana ngolo nu gikhesa giagusala agujinginyina gudi Yehowa.

16. Mihu itshi wajiya gudihula? Luholo lutshi mvutu jia mihu yene jiajiya gugukuatesa ha gujiya gula wana shila Yehowa mutshima?

¹⁶ Gula mbalagaji jia Yehowa jidi mukamba gugushiya, mbawusha mutshima waye egi Yehowa mbawugufuzumuna ba? Luholo lutshi wajiya gutangiza mutangua diene? Wajiya gudihula egi: ‘Ba desizio azonda-zonda ngana zula lusugu nu lusugu ana monesa diago egi ngana shila Yehowa mutshima ba?’ (Luka 16:10) Luko, ‘Luholo luami luagujinga luana monesa diago egi ngana sha mutshima gu mafelela a Yehowa atadila gutagenesa nzala jiami gula ngudi musha Ufumu wenji ha fundo dia thomo ba?’ (Mat. 6:31-33) Gula wazuela egi ayi, ngenyi mbawumonesa egi wana sha mutshima gudi Yehowa, nu mbawukhala hehi ha gudilondega gu lamba diagasue diajiya gugubuila.—Ish. 3:5, 6.

SUANGULUGA NU GUHUIMINYINA GUA YEHOWA

17. (a) Luholo lutshi felela dia gufuzumuga diana monesa guhuiminyina gua Yehowa? (b) Luholo lutshi tuajiya guhana merci mukunda nu khadilo dia guhuiminyina dia Yehowa?

¹⁷ Yehowa wazudile gale desizio dia gushiya mavu awa abola. (Mat. 24:36) Mbawukalagala ndaga yene phamba mutangua dia layele muene. Udi nu nzala yakola ya gufuzumuna athu gu gufua uvi, udi nu guhuiminyina. (Yobo 14:14, 15) Udi munengenena uu nu mutangua diatagana ha guyitshita. (Yone 5:28) Tudi nu ndaga jiabonga jidi gututuma ha guhana mersi mukunda nu khadilo dia guhuiminyina dia Yehowa. Tangiza gale ndaga eyi: Luholo Yehowa adi nu guhuiminyina, edi tangua diabonga mukunda nu esue ha “gubalumuna mutshima.” (2 Phet. 3:9) Yehowa udi mutshigina egi athu agasue ahete luendu lua gujinga mayilago. Tumonesenu egi tuana suanguluga nu khadilo dienji dia guhuimuinyina. Luholo lutshi? Gula tudi mukamba ‘athu adi hehi ha guheta monyo wa ivo nu ivo’ nu tudi guakuatesa ha guzumba Yehowa nu gumukalegela. (Makal. 13:48) Athu ene mbaaheta gubonga gua khadilo dia guhuiminyina dia Yehowa luholo lumoshi nu esue.

18. Mukunda natshi tudi naye gumonesa khadilo dia guhuiminyina gudi athu ako?

¹⁸ Yehowa mbawunengena uu nu gu gisugishilo gia uhinyinyi wa ivo 1 000 ha gutubuisa athu atagana. Uvi mangino, yowu mulandula gututotesela gubola. Yadiago, tuajiya gulandula gifezegeselo gienji gula tudi mumona makalegelo abonga a athu ako, nu tudi guakalegela ndaga nu guhuiminyina. Tutadilenu gifezegeselo gia phangi mumoshi wa mukhetu. Mulumienji wakhalele mukata misongo ya matangi nu wabembele guya mugudibungisa gua mu hungu. Udi muzuela egi: “Yakhalele diago ndaga ya lamba gudi ame. Lujingu luetu luasombegesele mbala imoshi, tuakhalelego naye gutshita ndaga luholo tuatangijile.” Phangi owu wa mukhetu, walanduile gumonesa khadilo dia guhuiminyina gudi mulumi’enji nu guzumba guagasue. Washile mutshima gudi Yehowa nu gabembelego. Walanduile khadilo dia Yehowa dia gubemba ndaga jia gungima, nu wahagele mutshima mu ndaga jiabonga jia mulumi’enji. Udi muzuela luko egi: “Mulumi’ami wakhalele nu makalegelo abonga, udi mukalagala yagasue ha gukatula gikenene gia misongo yenji mage-mage.” Idi ndanga yabonga, ha gumonesa guhuiminyina gudi enya fami, nga gudi aphangi a mu hungu adi mutagana nu malamba!

19. Tudi naye guzula desizio dia gukalagala itshi?

¹⁹ Yesu nu anjelo asuangulugile tangua Yehowa afugile mavu. Uvi tangiza gusuanguluga mbaakhala nago tangua mbaamona mavu azala pha nu athu atagana, ana guzumba Yehowa nu adi gumukombelela. Tangiza nji gusuanguluga mbaguvua athu anyi akhalele ha mavu, tangua mbaaya mu hinyina nu Yesu mu dilu ha mbaamona athu muheta gubonga gua mudimo wawo. (Yat. 4:4, 9-11; 5:9, 10) Tangiza gubonga mbatuheta tangua milolo ya gudila mbayisombegesa mu gusuanguluga, tangua misongo, mitataganyi, gufua mbagukhadigo luko. (Yat. 21:4) Zula desizio dia gulandula Yehowa Tata wetu wa guzumba, watema nu wa huiminyina. Gula wakalagala ngenyi, mbawubamba gusuanguluga guaye, ngatshima watagana nu malamba aluholo lutshi. (Yak. 1:2-4) Tudi naye guhana mersi gu mafelela a Yehowa hagujiya egi “gufuzumuga mbagukhala guene”!—Makal. 24:15.