BIBLIOTEKE YA MU INTERNET
Biblioteke
YA MU INTERNET
Kipende
  • BIBLIA
  • MIKANDA
  • GUDIBUNGISA
  • w20 Octobre mayiji 13-19
  • Luholo Wajiya Gukuatesa Muthu Wana Longesa Biblia ha Gubatijiwa—Gitshinyi gia Mbadi

Gushigo nga video mukunda nu paragrafe nga verse watombi.

Gudi nu erreur yakalegewa mu tangua dia gutanga video eyi.

  • Luholo Wajiya Gukuatesa Muthu Wana Longesa Biblia ha Gubatijiwa—Gitshinyi gia Mbadi
  • Inzo Yaleha ya Mutaledi Yana Gulongesa Ufumu wa yehowa (Ya Gulonguga)—2020
  • Tumito tua ndaga
  • Ndaga jia Luholo Lumoshi
  • KALEGELA BIBLIA TANGUA UDI MULONGESA
  • LONGESA NU GIKHESA
  • KUATESA MUTHU WANA LONGESA BIBLIA HA GUKUATA MAFUTA MU HUNGU
  • ZUELELA NDAGA YATADILA GUDIHANA NU GUBATIJIWA
  • KHALA GUDIHULA MATANGUA AKO GULA MUTHU WANA LONGESA BIBLIA UDI MUKULA MU NYUMA
  • Luholo Wajiya Gukuatesa Muthu Wana Longesa Biblia ha Gubatijiwa—Gitshinyi Gia Thomo
    Inzo Yaleha ya Mutaledi Yana Gulongesa Ufumu wa yehowa (Ya Gulonguga)—2020
  • Kuatesa Athu Wana Longesa Biblia ha Gubatijiwa
    Inzo Yaleha ya Mutaledi Yana Gulongesa Ufumu wa yehowa (Ya Gulonguga)—2021
  • Aphangi Agasue mu Hungu Ajiya Gukuatesa Athu ana Longuga Biblia ha Gubatijiwa
    Inzo Yaleha ya Mutaledi Yana Gulongesa Ufumu wa yehowa (Ya Gulonguga)—2021
  • ‘Ndenu, Mubuise Athu . . . Alandudi’
    Inzo Yaleha ya Mutaledi Yana Gulongesa Ufumu wa yehowa (Ya Gulonguga)—2020
Tala Ndaga Jiko
Inzo Yaleha ya Mutaledi Yana Gulongesa Ufumu wa yehowa (Ya Gulonguga)—2020
w20 Octobre mayiji 13-19

LONGO DIA 42

Luholo Wajiya Gukuatesa Muthu Wana Longesa Biblia ha Gubatijiwa—Gitshinyi gia Mbadi

‘Monesa gutema mu malongo udi mulongesa.’—1 TIM. 4:16.

LUNGIMBO 77 La lumière dans un monde enténébré

NDAGA JIDI MU LONGO EDIa

1. Luholo lutshi tudi mujiya egi mudimo wa gubuisa athu alandudi wana guhuluisa mionyo ya athu?

MUDIMO wa gubuisa athu alandudi wana huluisa mionyo ya athu! Luholo lutshi tuayijiya? Yesu wazuelele mbimbi jidi mu Matayo 28:19, 20 egi: ‘Ndenu, . . . mubuise athu alandudi . . . , muaabatize.’ Mukunda natshi gubatijiwa gudi nu ndando? Handaga, gula tuatshigina guheta monyo wa mayilago, tudi naye gubatijiwa. Muthu udi mutshigina gubatijiwa, udi naye gutshigina egi Yesu wafuile nu wafuzumugile hagula esue tuhete monyo wa mayilago. Gishina giene mupostolo Phetelo wawambelele Aklisto egi: ‘Gubatijiwa gudi gumihuluisa luenyelu mu njila ya gufuzumuga gua Yesu Klisto.’ (1 Phet. 3:21) Hene, gula mulandudi muhe-muhe wabatijiwa, wajiya gukhala nu felela dia monyo wa mayilago.

2. Mukanda wa 2 Timote 4:1, 2 udi muzuela egi tudi naye gukhala alongeshi a luholo lutshi?

2 Ha gubuisa athu alandudi, tudi naye ‘gukudisa luholo luetu lua gulongesa.’ (Tanga 2 Timote 4:1, 2.) Mukunda natshi? Handaga Yesu wazuelele egi: ‘Ndenu, . . . mubuise athu alandudi . . . , mualongese.’ Mupostolo Phaula wazuelele egi ‘landula’ gukalagala mudimo owu ‘handaga gutshita ngenyi mbaguguhuluisa nu mbaguhuluisa nji athu adi gugutegela.’ Gishina giene Phaula azuelele egi: ‘Monesa gutema mu malongo udi mulongesa.’ (1 Tim. 4:16) Tuana khala nu funu ya gujiya gulongesa muabonga ha gubuisa athu alandudi.

3. Itshi tuza muzuelela mu longo edi?

3 Tuana gulongesa bamilio a athu giamatshidia gidi mu Biblia. Luholo tuayimonyi mu longo dia balega, tuana suanguluga gukuatesa athu tuana longesa Biblia ha gubatijiwa. Mu longo edi, tuza muzuelela ndaga thano mulongeshi wagasue adi naye gukalagala ha gukuatesa muthu ana longesa Biblia ha gukula mu nyuma nu ha gubatijiwa.

KALEGELA BIBLIA TANGUA UDI MULONGESA

Foto: 1. Phangi wa mukhetu munu tuazuelela mu longo diabalega udi mulonguga Biblia nu muthu. Udi munyigisa mago muavula, wafulumiga Biblia holu dia mesa. Phangi mukhetu wa gukola nu muthu adi mulongesa Biblia ashigo mukotelesa nga gima gima gimoshi. 2. Gungima, tangua adi mu restora, phangi wa mukhetu udi mutegelela phangi wa mukhetu udi nu eksperianse hadi muene gumuhana malongo ha gukudisa luholo luenji lua gulongesa.

Toga ukuateshi gudi mulongeshi udi nu eksperianse yavula ha gugukua tsa ha gukudisa luholo luaye lua gukalegela Biblia tangua udi mulongesa (Tala paragrafe 4-6)f

4. Mukunda natshi mulongeshi ashigo naye guzuela muavula tangua adi mutuameza ulongogi wa Biblia? (Tala mbimbi goshi’a diyiji.)

4 Tuana zumba ndaga tuana longesa mu Mbimbi ya Nzambi. Hene, tuajiya gusendesa guzuela muavula tangua tudi gujizuelela. Uvi, gula phangi udi mutuameza ulongugi wa Inzo Yaleha ya Mutaledi, nga Gulonguga gua Biblia mu hungu, nga gulongesa muthu Biblia gu inzo, gashigo naye guzuela muavula. Mulongeshi wagasue wana zumba gukalegela Biblia muabonga tangua adi mulongesa. Uvi udi naye gumonesa gutema ha gutuna guzuela muavula nga gutanga verse jiavula-vula jiajiyile gale muene mu Biblia nga ndaga jiko.b (Yone 16:12) Tangiza gale guvula gua ndaga wakhalele mujiya tangua wabatijiwe nu guvula gua ndaga udi mujiya mangino. Idi yadiago egi tangua wabatijiwe, wakotelesele phamba ndaga jia ndando jiana longesa Biblia. (Heb. 6:1) Wabalegesele ivo yavula ha gujiya ndaga udi mujiya mangino. Hene, ushigo naye gulongesa muthu wana longuga n’enji Biblia ndaga jiavula-vula mu tangua dimoshi.

5. (a) Ha gudivua nu 1 Tesalonike 2:13, ndaga itshi tudi naye gukamba egi muthu tuana longesa Biblia akotelese? (b) Luholo lutshi tuajiya gukuatesa muthu tuana longesa Biblia ha guwambela athu ako ndaga jidi muene mulonguga?

5 Tuana tshigina egi athu tudi mulongesa Biblia akotelese egi ndaga adi mulonguga jidi mukatuga mu Biblia. (Tanga 1 Tesalonike 2:13.) Luholo lutshi tuajiya guyitshita? Kuatesa muthu wana longesa Biblia ha guwambela athu ako ndaga jidi muene mulonguga. Ha fundo dia gumukotelesela verse tangua diagasue, wajiya gumutoga ha gugukotelesela verse jiko. Mukuatese ha gukalegela ndaga adi mulonguga mu Mbimbi ya Nzambi. Muhule mihu yajiya gumutuma ha guzuela ndaga jidi mutangiza muene nu luholo adi gudivua mukunda nu verse jidi mutanga muene. (Luka 10:25-28) Wajiya gumuhula egi: “Luholo lutshi verse eyi idi gugukuatesa ha gumona makalegelo a Yehowa?” “Luholo lutshi ndaga eji udi mulonguga jiajiya gugukuatesa?” “Luholo lutshi udi gudivua mu ndaga udi mulonguga?” (Ish. 20:5) Ndaga ya gubalega ndando idi egi, muthu wana longesa Biblia udi naye guzumba ndaga adi mulonguga nu gujikalegela.

6. Mukunda natshi idi nu ndando egi tuye nu mulongeshi udi nu eksperianse tangua tudi mutuameza ulongogi wa Biblia?

6 Tangua wana tuameza ulongogi wa Biblia, wanaya nji nu alongeshi anyi adi nu eksperianse ba? Gula wana kalagala ngenyi, wajiya guhula matangi awo ha guguwambela luholo udi mutuameza ulongogi wa Biblia nu luholo udi mukalegela Biblia. Ha gukudisa luholo luaye lua gulongesa udi naye gukhala muthu wa gudibulumuisa. (Tala nji Makalegelo 18:24-26.) Gungima, hula mulongeshi udi nu eksperianse gula muthu udi mulongesa Biblia udi mukotelesa ndaga udi gumulongesa. Gula aye ushigo hene, wajiya nji gutoga mulongeshi muene ha gutuameza ulongogi wa Biblia nu muthu wana longesa Biblia phoso imoshi nga jiavula. Gutshita ngenyi mbagukalagala egi alandule gulonguga nu ha gumona diago ndando ya ulongogi wenji. Ushigo naye gutangiza egi udi phamba muthu waye, muthu muko gajiyilego gulonguga n’enji. Ndaga yabalega ndando idi egi, wana tshigina egi muthu wana longesa Biblia alandule gukula mu giamatshidia tangua adi mulonguga.

LONGESA NU GIKHESA

Foto: 1. Phangi wa mukhetu udi mutalesa muthu ana longesa Biblia video idi muzuelela eksperianse ya muthu mumoshi. 2. Mukhetu mumoshi wana gulonguga Biblia udi muwambela mulumi’enji ndaga jiana longuga muene mu Biblia.

Wambela muthu wana longesa Biblia ifezegeselo ya giamatshidia yajiya gumukuatesa ha gukalegela malongo a Biblia adi mulonguga muene (Tala paragrafe 7-9)g

7. Itshi mbayikuatesa muthu wana longesa Biblia ha guzumba ndaga adi mulonguga?

7 Muthu wana longesa Biblia udi naye gumona egi wana zumba nu wana tshigina giamatshidia gidi mu Biblia. (1 Tes. 1:5) Ngenyi, muene nji mbawuzumba ndaga jidi mulonguga muene. Gula luholo ludi guene wajiya gumuwambela luholo malongo a Biblia agukuatesele mu monyo waye. Mbawukotelesa egi Biblia yajiya nji gumukuatesa.

8. Itshi wajiya gukalagala ha gukuatesa muthu wana longesa Biblia? Mukunda natshi udi naye gukalagala ngenyi?

8 Tangua mudi mulonguga Biblia, wambela muthu wana longesa Biblia ifezegeselo ya aphangi atagenele nu ndaga jia lamba gifua muene nu luholo abingile malamba ene. Tangua mudi mulonguga, wajiya gutamega phangi muko wa mu hungu udi nu gifezegeselo giajiya gumukuatesa. Nga ndo wajiya gukamba eksperianse imoshi yajiya gukuata mutshima wenji mu jw.org ha fundo dia sonegewa egi “La Bible transforme des vies.”c Mikanda ya luholo elu nga bavideo yajiya gukuatesa muthu wana longesa Biblia ha gumona ndando ya gukalegela malongo a Biblia mu monyo wenji.

9. Luholo lutshi wajiya gukuatesa muthu wana longesa Biblia hagula alongese aphangi’enji nu mafuta’enji ndaga wana gumulongesa?

9 Gula muthu wana longesa Biblia wazudiwe gale mu ulo, mulumi’enji nga mukaji’enji wana longuga nji Biblia ba? Gula ishigo ngenyi, wajiya nji gumutamega ha guza mulonguga. Kuatesa muthu wana longesa Biblia ha guwambela enya fami yenji nga mafuta enji ndaga jidi mulonguga muene mu Biblia. (Yone 1:40-45) Luholo lutshi? Wajiya gumuhula egi: “Luholo lutshi wajiya gukotelesela enya fami yaye giamatshidia egi?” nga ndo, “Verse itshi wajiya gukalegela ha gukotelesela futa diaye giamatshidia giene?” Guhula mihu eyi gudi mumonesa egi udi muhana muthu muene formasio ha gubua mulongeshi wabonga. Gula muthu muene watagenesa ndaga jiana togewa, wajiya gubua mulongeshi udi khenji gabatijiwe ndo. Wajiya gumuhula gula udi mujiya muthu muko udi nu funu ya gulonguga Biblia. Gula waguhana jina dia muthu, hula muthu muene gula watshigina egi usendese gumulongesa Biblia. Mutalese video idi nu muto wa lumene egi Gulonguga gua Biblia Guana Gukalegewa Luholo Lutshi?d

KUATESA MUTHU WANA LONGESA BIBLIA HA GUKUATA MAFUTA MU HUNGU

Foto: 1. Phangi mumoshi wa mukhetu udi mudijiga phangi muko wa mukhetu muthu ana longesa muene Biblia gu Inzo ya Ufumu. 2. Phangi wa mukhetu nu muthu ana longesa Biblia nu mulumi’a muthu ana longesa Biblia adi musuanguluga gu mbodia phangi wa mukhetu mumoshi adimonyi nenji mu Inzo ya Ufumu.

Kuatesa muthu wana longesa Biblia ha gukuata mafuta mu hungu (Tala paragrafe 10-11)h

10. Luholo 1 Tesalonike 2:7, 8, idi guyimonesa, luholo lutshi mulongeshi wajiya gulandula gifezegeselo gia Phaula?

10 Alongeshi adi naye gumonesa athu ana longesa Biblia egi ana gudisagesa mukunda nu ene. Adi naye guazula gifua aphangi awo a mala nu a akhetu mu hungu. (Tanga 1 Tesalonike 2:7, 8.) Yanago gukhala ndaga yaleba gudi ene ha gubemba mafuta awo a ha mavu awa nu ha gusombegesa makalegelo awo mukunda nu gukombelela Yehowa. Tudi naye guakuatesa ha gukuata mafuta abonga mu hungu. Ukhadigo mubalegesa tangua nu muthu wana longesa Biblia phamba mu tangua udi gumulongesa Biblia, uvi udi naye gukhala futa dienji. Udi naye nji gubalegesa nenji tangua mu ndaga jiko. Wajiya gumutamega gu telefone, gumusonegela mesaje, nga guya gumutala matangua ako. Gutshita ngenyi, mbagumonesa egi wana gudisagesa mukunda nu muene.

11. Itshi tuana gutshigina egi athu tuana longesa Biblia ahete mu hungu nu mukunda natshi?

11 Gishima gimoshi giana zuela egi: “Muthu wagasue mu dimbo, wana tshita yagasue ha gukuatesa mona akule muabonga.” Esue nji tuajiya guzuela egi: “Yana toga ngolo jia muthu wagasue mu hungu ha gubuisa muthu mulandudi.” Gishina giene alongeshi adi naye gukuatesa athu ana longesa Biblia ha gujiya aphangi mu hungu handaga aphangi ene ajiya nji guakuatesa ha gukhala nu ufuta wabonga nu Yehowa. Gutshita ngenyi guajiya gukuatesa athu tuana longesa Biblia ha gukuata ufuta nu akombeledi a Nzambi, handaga ajiya guakuatesa ha gukula mu nyuma nu ha gulua nu malamba awo. Felela dietu didi egi muthu wagasue tuana longesa Biblia adivue egi udi mukatshi dia aphangi a mu hungu, udi muenya mu fami yetu ya mu nyuma nu ajiye nji guzumba tuana monesa gudi aphangi’etu. Ngenyi, mbayikhadigo lamba gudi muene ha gushiya ufuta nu athu anyi ashigo gumukuatesa ha guzumba Yehowa. (Ish. 13:20) Gula mafuta enji abola amutuna, muene mbawujiya egi wajiya guheta mafuta abonga mu ulondegi wa Yehowa.—Mako 10:29, 30; 1 Phet. 4:4.

ZUELELA NDAGA YATADILA GUDIHANA NU GUBATIJIWA

Mukhetu mumoshi wana longuga Biblia wazula desizio dia gubatijiwa. Mulumi’enji nu phangi wa mukhetu wakhalele gumulongesa Biblia nu aphangi ako avula a mu hungu adi mulela nu gusuanguluga guagasue, adi gumubundila mago.

Hangima, muthu wana longesa Biblia, wajiya gutagenesa felela dienji dia gubatijiwa! (Tala paragrafe 12-13)

12. Mukunda natshi tudi naye guwambela muthu tuana longesa Biblia ndaga yatadila gudihana nu gubatijiwa?

12 Zuelela gubonga mbaguheta muthu muene gula wadihana gudi Yehowa nu wabatijiwa. Felela dietu diana khala egi, tulongese muthu giamatshidia ha gubatijiwa nu gubua mulandudi wa Klisto. Gula tuasendesa gulongesa muthu Biblia gungima dia mbeji jiazonda, wasendesa guya mu gudibungisa gua mu hungu, muthu muene udi naye gukotelesa egi felela dietu didi dia gumukuatesa ha gubua Temue wa Yehowa.

13. Ndaga jitshi muthu tuana longesa Biblia udi naye gukalagala ha gubatijiwa?

13 Gudi nu ndaga jiavula muthu tuana longesa Biblia udi naye gujiya gutuama egi abatijiwe! Thomo, muthu muene udi naye gujiya Yehowa, gumuzumba nu gusha gutshigina guenji gudi Muene. (Yone 3:16; 17:3) Udi naye gukuata ufuta nu Yehowa nu aphangi a mu hungu. (Heb. 10:24, 25; Yak. 4:8) Udi naye gubemba gukalagala ndaga jiabola jiakhalele muene mukalagala nu gubalumuna mutshima gu gubola guenji. (Makal. 3:19) Ndaga iko idi egi, udi naye guwambela athu ako ndaga jia giamatshidia jidi mutshigina muene. (2 Kol. 4:13) Ngenyi, gubatijiwa guenji mbagumonesa egi wadihanyi gudi Yehowa. (1 Phet. 3:21; 4:2) Lusugu lua gubatijiwa, luana khala diago lusugu lua gusuanguluga mukunda nu muthu wagasue! Gula muthu wana longesa Biblia udi mukalagala yagasue ha gutagenesa ndaga jiana togewa ha gubatijiwa, udi naye gumushimana nu gumukuatesa ha gulandula gukalagala ngenyi.

KHALA GUDIHULA MATANGUA AKO GULA MUTHU WANA LONGESA BIBLIA UDI MUKULA MU NYUMA

14. Luholo lutshi mulongeshi wajiya gujiya gula muthu wana longesa muene Biblia udi mukula mu nyuma nga ndo?

14 Tudi naye gumonesa khadilo dia guhuiminyina tangua tudi mukuatesa muthu tuana longesa Biblia ha gudihana nu ha gubatijiwa. Uvi, matangua ako tudi naye gukamba gujiya gula muthu muene udi nu nzala ya gukalegela Yehowa Nzambi. Gudi nu ndaga wana mona gudi muthu wana longesa Biblia jiana monesa egi udi mutumagela mikhuala ya Yesu ba? Nga ndo, muthu muene wana zumba genji phamba gulonguga ndaga jiana gumusuanguluisa jidi mu Biblia ba?

15. Ndaga jitshi jiana tuma mulongeshi ha gumona egi muthu wana longesa muene Biblia udi mukula mu nyuma?

15 Khala mutala ndaga jidi mumonesa egi muthu wana longesa Biblia udi mulandula gukula mu nyuma. Ha gufezegesa, wana zumba Yehowa ba? Wana kombelela Yehowa ba? (Ngi. 116:1, 2) Wana suanguluga gutanga Biblia ba? (Ngi. 119:97) Wana guza mu gudibungisa gua mu hungu matangua agasue ba? (Ngi. 22:22) Wasendesa gale gusombegesa makalegelo ako mu monyo wenji ba? (Ngi. 119:112) Wasendesa gale gulongesa aphangi’enji nu mafuta enji ndaga jidi mulonguga muene mu Biblia ba? (Ngi. 9:1) Ndaga ya gubalega ndando idi egi, muthu muene udi gale mutshigina gubua Temue wa Yehowa ba? (Ngi. 40:8) Gula muthu muene gashigo musombegesa mu ndaga eji jiagasue tuatanga, kamba gujiya mukunda natshi, gungima, muwambele ndaga yene haphelo uvi nu gisemo giagasue.e

16. Tangua ditshi wajiya gubemba gulonguga nu muthu Biblia?

16 Khala gudihula matangua agasue gula wajiya gulandula gulongesa muthu Biblia. Dihule egi: ‘Muthu ngana longesa Biblia ganago gudilondega gutuama dia gulonguga ba? Ganago gusuanguluga guza mu gudibungisa gua mu hungu ba? Yowu genji nu makalegelo enji abola ba? Yowu genji mulandula gudibungisa nu ikombelelo ya mambo ba?’ Gula idi ngenyi, gulandula gulongesa muthu wa luholo elu idi gifua udi mulongesa muthu luholo lua gulowa jishui, uvi muthu muene udi mutuna genji! Gula muthu wana longesa Biblia gashigo muzumba ndaga jidi mulonguga muene nu gashigo hehi ha gusombegesa makalegelo enji, wajiya gubemba gulonguga n’enji.

17. Ha gutadila 1 Timote 4:16, ndaga itshi alongeshi a Biblia agasue adi naye gukalagala?

17 Tudi naye guzula ginemo gietu gia gubuisa athu alandudi nu ndando handaga tuana tshigina egi athu tuana longesa Biblia akule mu nyuma nu abatijiwe. Gishina giene, tudi naye gulongesa nu gikhesa nu gukadigila Biblia tangua tudi mulongesa. Tudi naye gukuatesa muthu tuana longesa Biblia ha gukuata ufuta nu aphangi a mu hungu. Tudi naye gumumonesa ndando ya gudihana nu gubatijiwa. Tudi naye nji gudihula matangua agasue gula muthu muene udi mukula mu nyuma. (Tala galuanda: “Ndaga Alongeshi a Biblia Adi Naye Gukalagala ha Gukuatesa Athu Ana Longesa Biblia ha Gukula mu Nyuma nu ha Gubatijiwa.”) Tudi nu gusuanguluga gua gukalagala mudimo owu wana guhuluisa mionyo ya athu! Tudi naye guzula desizio dia gudihana muavula ha gukuatesa athu tuana longesa Biblia ha gukula mu nyuma nu gubatijiwa.

Phangi mumoshi wa mukhetu udi mutuameza ulongogi wa Biblia nu gusuanguluga guagasue nu muthu wana longesa muene Biblia.

Ndaga Alongeshi a Biblia Adi Naye Gukalagala ha Gukuatesa Athu Ana Longesa Biblia ha Gukula mu Nyuma nu ha Gubatijiwa

  1. 1. Kalegela Biblia tangua udi mulongesa

    • Ukhadigo muzuela muavula

    • Toga ukuateshi gudi alongeshi anyi adi nu eksperianse ha gukudisa luholo luaye lua gulongesa

  2. 2. Longesa nu gikhesa, monesa egi udi nu gutshigina mu ndaga udi muzuela

    • Bemba egi muthu wana longesa Biblia, ajiye egi wana zumba giamatshidia gidi mu Biblia

    • Muhane ifezegeselo ya athu ako ana gukalegela ndaga ana gulonguga mu Biblia

    • Kuatesa muthu wana longesa Biblia ha guwambela athu ako ndaga jidi mulonguga muene mu Biblia

  3. 3. Kuatesa muthu wana longesa Biblia ha gukuata ufuta nu aphangi mu hungu

    • Monesa muthu wana longesa Biblia egi wana gudisagesa mukunda nu muene

    • Mukuatese ha gukuata ufuta nu athu anyi ajiya gumukuatesa ha gusala ya gujinginyina gudi Yehowa

    • Mukuatese ha gujiya egi tuana gumuzumba muavula mu hungu

  4. 4. Mumonese ndando ya gudihana nu gubatijiwa

    • Kuatesa muthu wana longesa Biblia ha gukula mu nyuma nu ha gubatijiwa

    • Khala mushimana muthu wana longesa Biblia nu gumuhana gikhesa

  5. 5. Matangua ako wajiya gudihula gula muthu wana longesa Biblia udi mukula mu nyuma

    • Kamba gujiya ndaga jidi mu monesa egi muthu wana longesa Biblia udi nu nzala ya gukalegela Yehowa mudimo

    • Gula muthu wana longesa Biblia ashigo mukula mu nyuma, muwambele ndaga yene haphelo nu gisemo giagasue

NDAGA ITSHI WALONGUGA?

  • Mukunda natshi mulongeshi gashigo naye guzuela muavula tangua adi mulonguga nu muthu Biblia?

  • Luholo lutshi tuajiya gukuatesa athu tuana longesa Biblia ha gukuata ufuta nu aphangi mu hungu?

  • Mukunda natshi tudi naye guwambela athu tuana longesa Biblia haphelo ndaga yatadila gudihana nu gubatijiwa?

LUNGIMBO 79 Qu’ils tiennent ferme dans la foi!

a Tangua tudi mulonguga Biblia nu athu, tuana khala nu luendu lua guaakuatesa ha gutangiza nu gukalagala ndaga mu luholo luana tshigina Yehowa. Longo edi diza gutukuatesa ha gujiya luholo tuajiya gubua alongeshi awaha.

b Tala longo, “Ndaga Tuajiyilego Gukalagala Tangua Tudi Mulonguga Biblia nu Muthu” diazolewe mu Mukanda wa Gukalegela mu Gudibungisa gua Lujingu nu Mudimo wa Uklisto mu septembre 2016.

c Mu jw. org, ngina ha QUI SOMMES-NOUS? > TÉMOIGNAGES ET ANECDOTES.

d Mu JW Library®, ngina ha MULTIMÉDIA > NOS RÉUNIONS ET NOTRE MINISTÈRE > OUTILS POUR LA PRÉDICATION.

e Tala malongo “Guzumba nu Guhana Yehowa Mersi Mbagugutuma ha Gubatijiwa” nu “Udi Hehi ha Gubatijiwa Ba?” mu Inzo Yaleha ya Yutaledi ya mars 2020.

f UKOTELESHI WA IFUANESA: Gungima dia gulonguga nu muthu Biblia, phangi wa mukhetu udi nu eksperianse udi mukuatesa phangi wa mukhetu wakhadi mutuameza ulongogi wa Biblia. Udi gumumonesa luholo lua gutuna guzuela muavula tangua adi mulongesa muthu Biblia.

g UKOTELESHI WA IFUANESA: Mukhetu mumoshi udi mulonguga luholo wajiya gukhala mukhetu wabonga. Gungima, udi muwambela mulumi’enji ndaga alonguga.

h UKOTELESHI WA IFUANESA: Mukhetu muene nu mulumienji, adi musuanguluga gubalegesa tangua gu mbodia futa dienji mumoshi adimonyi nenji gu Inzo ya Ufumu.

    Mikanda ya Kipende (2000-2025)
    Zoga
    Ngina
    • Kipende
    • tumina muthu muko
    • Tomba ndaga jia luholo nu luholo
    • Copyright © 2025 Watch Tower Bible and Tract Society of Pennsylvania
    • Luholo lua Gukalegela Site Yetu
    • Gunemesa Ndaga jia Athu Ako
    • Paramètres de confidentialité
    • JW.ORG
    • Ngina
    tumina muthu muko