Wana Gusha Mutshima Egi Yehowa Wana Kalagala Ndaga mu Luholo Luabonga Tangua Diagasue Ba?

1-2. (a) Mukunda natshi athu avula mangino anago gusha mutshima gudi athu ana guatuameza? (b) Itshi tuza muzuelela mu longo edi?

MANGINO athu avula anago gusha mutshima gudi athu ana guatuameza. Ana mona egi baguvernema nu mikhuala, yana bamba phamba enya umonyi nu athu adi nu ufumu, uvi yanago gukuatesa diago phutu. Biblia idi muzuela egi: ‘Muthu wana hinyina muthu n’a muko ha gumumonesa lamba.’ (Mulo. 8:9) Athu ako anago nji gushila Nzambi mutshima handaga mafumu a ikombelelo ana kalagala ndaga jiabola. Hene tangua tudi mulongesa muthu Biblia, tudi naye gumukuatesa ha gusha mutshima gudi Yehowa nu gudi athu atombele muene ha gutuameza ulondegi wenji ha mavu.

² Uvi ishigo phamba athu tuana longesa Biblia adi naye gusha mutshima gudi Yehowa nu gudi athu ana tuameza ulondegi wenji. Ikhale tuana kombelela gale Yehowa ivo yavula, tudi naye gulandula gumushila mutshima. Uvi matangua ako tuajiya gutagana nu milonga yajiya gututuma ha gutuna gumushila mutshima. Hene mu longo edi tuza mutadila ndaga thathu jiajiya gulola gutshigina guetu: (1) Tangua tudi mutanga mene jiko mu Biblia, (2) tangua tudi muheta malongo adi mukatuga gudi aphangi ana gututuameza (3) tangua mbatutagana nu malamba mu masugu adi muza.

KHALA MUSHILA YEHOWA MUTSHIMA TANGUA UDI MUTANGA BIBLIA

3. Luholo lutshi mene jiko jia Biblia jiajiya gulola gutshigina guetu?

³ Tangua tudi mutanga Biblia, tuajiya gudihula egi, mukunda natshi Yehowa wakalegele athu ndaga mu luholo elu? Nga ndo mukunda natshi Yehowa wazudile badesizio a luholo elu? Ha gufezegesa, Biblia idi muzuela mu mukanda wa Lutango egi Yehowa wahanele njila egi ashiye muenya Isalele mumoshi wayile mutshiaya khunyi mu Lusugu lua Guhululuga. Uvi mukanda wa 2 Samuele udi mumonesa egi ivo yavula gungima, tangua Davidi wakalegele uthambi nu washiyile muthu, Yehowa wamutotesele gubola guenji. (Lutang. 15:32, 35; 2 Sam. 12:9, 13) Tuajiya gudihula egi: ‘Mukunda natshi Yehowa watotesele gubola gua Davidi tangua diakalegele muene uthambi nu ashiyile muthu? Uvi mukunda natshi Yehowa wana hana ndola gudi muthu wakalegele genji gubola gudi mumonega gifua gudi guazonda?’ Ha guheta mvutu gu mihu eyi, tutadilenu ndaga thathu tushigo naye gujimbila tangua tudi mutanga Biblia.

4. Luholo lutshi ndaga jidi mu Gisendeselo 18:20, 21 nu Mikhuala 10:17 jiajiya gutukuatesa ha gusha mutshima egi Yehowa wana sophesa mu luholo luabonga?

⁴ Biblia yanago gumonesa ndaga jiagasue jiazonda-zonda tangua yana zuelela lumene lumoshi. Ha gufezegesa, tudi mujiya egi Davidi wabalumuine diago mutshima mukunda nu gubola guenji. (Ngi. 51:2-4) Uvi muthu washiyile mukhuala wa Lusugu lua Guhululuga wakhalele nu khadilo dia luholo lutshi? Wavile gikenene mukunda nu gubola guenji ba? Gakhalelego mutumagela mikhuala ya Yehowa sendese mualeha ba? Watunyile gunemesa mikhuala iko ya Yehowa nu mutshima umoshi ba? Biblia yanago guyizuelela. Uvi tudi mujiya diago egi: Yehowa wana tshita ndaga mu ‘luholo luabonga.’ (Mikh. 32:4) Gutuama dia guzula badesizio, Yehowa wana tadila ndaga jiagasue kiawaha. Ganago gusophesa ha gutadila phamba ndaga jiana zuela athu ako, nga gukhala nu khadilo dia gutomba-tomba, nga gukalagala ndaga jiko jiana tshita egi athu asophese mu luholo luabola. (Tanga Gisendeselo 18:20, 21; Mikhuala 10:17.) Gula tudi mulonguga ndaga jiavula jiatadila Yehowa nu mikhuala yenji, mbayitukuatesa ha gusha mutshima egi wana sophesa athu mu luholo luabonga. Ikhale mangino tuahetelego mvutu gu mihu tudi gudihula mukunda nu lumene tuatangi mu Biblia, tudi mujiya ndaga jiavula jiatadila Nzambi jidi gutukuatesa ha gusha mutshima egi ‘wana kalagala ndaga mu luholo luatagana.’—Ngi. 145:17.

5. Luholo tushigo athu atagana, yana gututuma ha gutadila ndaga mu luholo lutshi? (Tala nji galuanda “Luholo Tushigo Athu Atagana, Tuanago Gukotelesa Ndaga mu Luholo Luabonga Tangua Diagasue.”)

⁵ Luholo tushigo athu atagana, tangua diagasue tuajiyilego gusophesa mu luholo luabonga. Nzambi watufugile mu gifuanesa gienji. Hene tuana tshigina egi athu adikalegele ndaga mu luholo luabonga. (Gis. 1:26) Uvi luholo tushigo athu atagana, tuajiya gumona ndaga mu luholo luabola, ikhale tudi mutangiza egi tudi mujiya ndaga jiagasue. Tutadilenu gifezegeselo gia Yona. Yona gasuangulugilego nga hazonda tangua Yehowa wazudile desizio dia guvila enya gu Ninive khenda. (Yona 3:10–4:1) Uvi tangiza ndaga jiabuile gungima tangua Yehowa wavidile enya gu Ninive khenda. Athu gubalega 120 000 abalumuine mutshima nu ahuluishiwe! Idi mumonesa egi muthu wakhalele mutangiza mu luholo luabola udi Yona, uvi Yehowa ndo.

6. Mukunda natshi Yehowa gashigo naye gutukotelesela gishina giana gumutuma ha guzula badesizio?

⁶ Yehowa gashigo nu funu ya gukotelesela athu gishina giamutumi ha guzula desizio dimoshi ngenyi. Mu tangua dikulu, gula Yehowa wazula badesizio nga ndo watshigina gutshita ndaga imoshi ngenyi, wakhalele nji muhana akombeledi enji njila ha guhana matangi’awo. (Gis. 18:25; Yona 4:2, 3) Matangua ako nji wakhalele guakotelesela gishina giakhalele gumutuma ha guzula desizio dimoshi ngenyi. (Yona 4:10, 11) Uvi ishigo mukotelesa egi tangua diagasue Yehowa udi naye gutukotelesela gishina giana gumutuma ha guzula badesizio. Muene udi mufugi wetu, gashigo nu funu egi gutuama nga gungima dia guzula desizio dimoshi ngenyi tumuhane thomo njila ha guyitshita.—Yesh. 40:13, 14; 55:9.

KHALA MUSHILA YEHOWA MUTSHIMA TANGUA ADI GUGUHANA MALONGO

7. Ndaga itshi ya lamba tuajiya gutagana nayo? Mukunda natshi?

⁷ Tudi mujiya muabonga egi Yehowa wana kalagala ndaga jiawaha tangua diagasue. Uvi yajiya gukhala lamba ha gusha mutshima gudi athu atombele muene ha gututuameza. Tuajiya gudihula gula aphangi adi gututuameza mu ulondegi wa Yehowa, adi mukalagala diago ndaga mu utuameji wenji nga ndo mu luholo luawo. Yajiya gukhala egi athu ako a mu tangua dikulu akhalele nji mutangiza ngenyi. Tutadilenu ifezegeselo tuazuelela mu paragrafe 3. Yajiya gukhala egi muthu munu washiyile mukhuala wa Lusugu lua Guhuluguga wakhalele gudihula gula Moize wadiangele thomo guhula Yehowa gutuama egi amuwambele egi wakhalele naye gushiyiwa. Yajiya gukhala egi futa dia Uriya muenya gu Hiti yonu mukaji’enji wakalegele uthambi nu Davidi, watangijile egi Davidi gashiyiwego handaga wakhalele fumu. Yehowa wana gusha mutshima gudi athu atombele muene ha gutuameza ulondegi wenji. Hene, gula esue nji tushigo gushila athu ene mutshima, tuajiyilego guzuela egi tuana gushila Yehowa mutshima.

8. Gudivua gutshi gudi mukatshi dia ndaga jidi mu Makalegelo 16:4, 5 nu luholo hungu dia Uklisto didi mutuamezewa mangino?

⁸ Mangino Yehowa wana tuameza gitshinyi gia ulondegi wenji gia ha mavu mu njila ya ‘muhiga wafubidila nu watema.’ (Mat. 24:45) Luholo lumoshi nu hunji dia akulu atuameji dia mu siekle ya thomo, mangino muhiga wafubidila nu watema wana tuameza akombeledi a Nzambi a ha mavu a mudidi nu wana hana malongo gudi akulu. (Tanga Makalegelo 16:4, 5.) Gungima, akulu ana kalegela malongo ene mu mahungu. Hene tuana monesa egi tuana shila Yehowa mutshima gula tudi mutumagela malongo adi mukatuga gudi muhiga nu gudi akulu.

9. Tangua ditshi yajiya gukhala lamba ha gutumagela desizio dia akulu? Mukunda natshi?

⁹ Matangua ako, yajiya gukhala lamba ha gutumagela badesizio ana katuga gudi akulu. Ha gufezegesa, mu ivo yabalega, mahungu avula nu circonscriptions jiavula jiabungishiwe. Mu mafundo ako, akulu akhalele mutoga alongeshi ha guya mu mahungu ako hagula Jinzo jia Ufumu jiajiya gukalegewa mu luholo luabonga. Hene gula atutoga ha guya mu hungu dihe-dihe, yajiya gukhala lamba ha gubemba mafuta etu nu enya fami yetu. Nzambi wana wambela akulu fundo adi naye gutuma alongeshi agasue ba? Ndo. Ngenyi yajiya gukhala lamba ha gulandula utuameji wa akulu. Uvi Yehowa wana shila akulu mutshima tangua ana zula badesizio a luholo elu. Esue nji tudi naye guashila mutshima.b

10. Mukunda natshi tudi naye gutumagela akulu? (Hebelu 13:17)

¹⁰ Mukunda natshi tudi naye gutumagela badesizio a akulu ikhale badesizio ene ashigo gutusuanguluisa? Tudi naye guatumagela handaga gula tuatshita ngenyi mbayitukuatesa ha gukhala nu guhuima mukatshi dietu. (Ef. 4:2, 3) Gula aphangi agasue mu hungu adi mutumagela nu gudibulumuisa guagasue badesizio adi mukatuga gudi akulu, mahungu mbaakhala mu guhuima. (Tanga Hebelu 13:17.) Yadiago, gula tudi mutumagela athu Yehowa wana gushila mutshima ha gutubamba, mbatumonesa egi tuana gumushila nji mutshima.—Makal. 20:28.

11. Itshi yajiya gutukuatesa ha gutumagela badesizio ana guzula akulu?

¹¹ Gima giajiya gutukuatesa ha gushila akulu mutshima gidi gujiya egi, gutuama dia guzula desizio dimoshi diatadila hungu, ana gutoga thomo ukuateshi wa nyuma ya Nzambi. Gungima, ana tanga muabonga malongo a Biblia nu ana tadila mikanda idi mukatuga gudi muhiga wafubidila nu watema. Akulu ana tshigina gusuanguluisa Yehowa nu gubamba akombeledi enji mu luholo luabonga. Ana gujiya egi Yehowa wana guatala muabonga luholo ana bamba imeme yenji. (1 Phet. 5:2, 3) Tutangizenu gale ndaga eyi: Ha mavu awa, gudi nu ndaga jiavula jiana khaphumuna athu gifua ilema ya muila, ikombelelo nu ndaga jia politike. Uvi akombeledi a Yehowa ana kombelela Nzambi mumoshi wa giamatshidia, akhala nji nu gudivua guabonga mukatshi diawo. Phamba Yehowa wajiya guakuatesa ha gukalagala ndaga ya luholo elu!

12. Ndaga jitshi akulu adi naye gutadila muabonga ha gujiya gula muthu wakalagala gubola wabalumuna diago mutshima?

¹² Yehowa wahanele akulu ginemo giakola gia gubamba hungu hagula dikhale diaphelegeta. Gula Muklisto wakalagala gubola guakoma, Yehowa wana tshigina egi akulu azule desizio dia gutala gula muthu muene wajiya gusala mu hungu nga ndo. Ana kalagala ndaga jiavula; mukatshi dia ndaga jiene ana kamba gujiya gula muthu muene wabalumuna diago mutshima gu gubola guenji. Muthu muene wajiya gumonesa gifua wabalumuna mutshima, uvi udi mukotelesa diago egi ndaga yakalagala muene idi yabola ba? Wazudi desizio dia gutuna gukalagala luko gubola guene ba? Gula mafuta abola amushinjiga ha gukalagala gubola guene, wazudi desizio dia gutuna mafuta ene ba? Akulu ana tshita gisambu, gungima ana tadila gubola guakalagala muthu muene nu ndaga Biblia yana zuela mukunda nu mulonga wene. Ana kamba nji gujiya gula muthu muene wabalumuna diago mutshima. Gungima, ana zula desizo dia gujiya gula muthu muene wajiya gusala mu hungu nga ndo. Uvi mu ndaga jiko, muthu wakalagala gubola udi naye guzolewa mu hungu.—1 Kol. 5:11-13.

13. Lamba ditshi tuajiya gutagana nadio gula futa dietu nga muenya fami yetu wazolewa mu hungu?

¹³ Mukunda natshi matangua ako yajiya gukhala lamba ha gushila akulu mutshima? Gula muthu wazolewa mu hungu gashigo muenya fami yetu nga futa dietu, yakhalago lamba ha gutshigina desizio diazudi akulu. Uvi gula muthu muene udi muenya fami yetu nga futa dietu, tuajiya gutangiza egi akulu atadilego mulonga wene mu luholo luabonga, nga ndo tuajiya gudihula gula desizio diawo didi diago gudivua nu matangi a Yehowa. Itshi yajiya gutukuatesa ha gutshigina desizio dia akulu?

14. Itshi yajiya gutukuatesa gula akulu azula desizio dia guzola muenya fami yetu nga futa dietu mu hungu?

¹⁴ Tudi naye gujiya egi desizio dia guzola muthu mu hungu gula wakalagala gubola, diakatugile gudi Yehowa. Gutshita ngenyi guana gubamba hungu nu guajiya nji gukuatesa muthu wakalagala gubola. Gula muthu wakalagala gubola uvi gabalumuinego mutshima, gula gazolewego mu hungu, wajiya gutuma aphangi ako ha gukalagala nji gubola. (Gal. 5:9) Muthu muene wajiya nji gumona egi gubola guakalagala muene gushigo diago guakoma, ngenyi yajiya gukhala lamba ha gusombegesa matangi nu makalegelo enji hagula Yehowa amutshigine. (Mulo. 8:11) Tudi naye gujiya egi gutuama egi akulu azule desizio dia guzola muthu mu hungu, ana tangigiza diago muabonga. Ana gujiya egi luholo lumoshi nu manzuji a mu tangua dikulu, ene nji ‘anago gusophesa mukunda nu athu, uvi mukunda nu Yehowa.’—2 Gudi. 19:6, 7.

GULA TUDI MUSHILA YEHOWA MUTSHIMA MANGINO, MBATUMUSHILA NJI MUTSHIMA MU MASUGU ADI MUZA

15. Mukunda natshi tudi naye gushila Yehowa mutshima mangino muavula diago?

¹⁵ Luholo gisugishilo gia mavua awa giasuena hehi, tudi naye gushila Yehowa mutshima muavula diago. Mukunda natshi? Handaga mu tangua dia lamba diakola, ajiya gutuhana malongo anyi ajiya gukhala lamba ha gukotelesa nga ha gutumagela. Tudi naye gujiya egi Yehowa mbagashigo mukatuga mu dilu ha guza gutuwambela ndaga. Uvi mbawukalegela athu atombele muene ha gututuameza nu ha gutuhana malongo. Mbayishigo mukhala luko tangua dia gusha giphapha nga dia gudihula egi: ‘Malongo awa akatuga diago gudi Yehowa nga ndo adi matangi a aphangi adi gututuameza?’ Mu tangua diene, mbawushila Yehowa nu ulondegi wenji mutshima ba? Ha guheta mvutu gu mihu eyi, udi naye gudihula luholo lutshi wana tadila malongo ana gutuhana aphangi ana gututuameza mangino. Gula tudi mutumagela malongo adi gutuhanewa mangino nu mutshima umoshi, mbatuatumagela nji mu tangua dia lamba diakola.—Luka 16:10.

16. Luholo lutshi gutshigina guetu guajiya gulolewa mu masugu adi muza tangua Yehowa mbawusophesa athu?

¹⁶ Tudi naye nji gutangiza muabonga ndaga mbatukalagala tangua Yehowa mbawusophesa athu gu gisugishilo gia mavu awa abola. Tudi musha mutshima egi athu avula anyi anago gukombelela Yehowa, nu enya fami yetu anyi ashigo matemue, mbaazula desizio dia gumukombelela gutuama egi gisugishilo gia mavu awa gize. Uvi mu tangua dia ita ya Alemagedona, Yehowa mbawukalegela Yesu ha guzula desizio dia gujiya gula athu ene adi naye gusala nu monyo nga ndo. (Mat. 25:31-33; 2 Tes. 1:7-9) Ishigo esue mbatutomba egi muthu owu Yehowa mbawumuvuila khenda uvi muthu munu ndo; phamba Yehowa udi mujiya. (Mat. 25:34, 41, 46) Mu tangua diene, mbatushila Yehowa mutshima mu luholo luenji lua gusophesa, nga ndo mbatubemba getu gumukombelela handaga badesizio enji ashigo gutusuanguluisa? Yadiago, tudi naye gushila Yehowa mutshima sendese mangino. Ngenyi mbayitukuatesa ha gumushila nji mutshima muavula gubalega mu masugu adi muza.

17. Gubonga gutshi mbatuheta tangua Yehowa mbawusophesa athu gu gisugishilo gia mavu awa?

¹⁷ Tangiza gale luholo mbatudivua mu mavu ahe-ahe tangua mbatumona egi Yehowa wasophesele ndaga mu luholo luabonga. Ikombelelo ya mambo mbayishigo mukhala luko guene. Enya mungenda ana guhuiga athu, nu baguvernema ana monesa athu lamba, mbaashigo mukhala luko guene. Misongo nu gukola nu gufua mbayishigo mukhala luko. Satana nu bademo enji mbaambiwa mu bologo ivo 1000. Malamba agasue tuana gumona mukunda nu ndaga jiawo jiabola, mbaashigo mukhala luko guene. (Gum 20:2, 3) Mbatusuanguluga diago luholo tuashile mutshima gudi Yehowa mu luholo luenji lua gukalagala ndaga!

18. Malongo atshi tuajiya guzula mu gifezegeselo gia enya Isalele gidi mu Lutango 11:4-6 nu 21:5?

¹⁸ Mu mavu ahe-ahe mbatutagana nji nu malamba anyi ajiya gulola khadilo dietu dia gushila Yehowa mutshima mu luholo luenji lua kalagala ndaga ba? Tutadilenu gale ndaga yabuidile enya Isalele matangua azonda gungima dia guzoga gu Ejipitu. Athu ako mukatshi diawo asendesele gutangiza ima ya gudia inyi akhalele musuanguluga nayo gu Ejipitu, hene aseguluile mana akhalele guahana Yehowa. (Tanga Lutango 11:4-6; 21:5.) Esue nji mbatukalagala ndaga gifua enya Isalele tangua mbatuheta gu gisugishilo gia lamba diakola ba? Tushigo mujiya gula mudimo wa luholo lutshi mbatukalagala ha gulondega luko mavu ha guabuisa phaladiso. Mbayishigo mukhala ndaga yaleba handaga mbatukhala diago nu mudimo wakola. Mbatudisagesa mukunda nu ima mbayituhana Yehowa mu tangua diene ba? Ndaga ya ndando idi egi: Gula tudi musuanguluga nu ima yana gutuhana Yehowa mangino, mbatusuanguluga nji muavula nu ima mbayituhana muene mu masugu adi muza.

19. Zuelela mu mbimbi jiazonda ndaga tuamona mu longo edi.

¹⁹ Yehowa wana kalagala ndaga mu luholo luatagana tangua diagasue. Tudi naye gutshigina egi ndaga eyi idi ya giamatshidia. Tudi naye nji gusha mutshima gudi athu anyi Yehowa watombele ha gututuameza. Tujimbilago mbimbi jiazuelele Yehowa mu njila ya profete Yeshaya egi: ‘Mbamukhala nu ngolo gila muahena tedie nu muasha mutshima gudi Nzambi.’—Yesh. 30:15.