Luholo Tuajiya Gukhala mu Guhuima nu Gusuanguluga Ngatshima Tudi nu Gikenene Giavula

GIKENENE giajiya gukhala gifua ginemo giakola gidi mu mutshima wetu. (Ish. 12:25) Wataganele gale nu ndaga jiaguhanele gikenene mu monyo waye ba? Wamonele egi wajiyilego gukolesela mu ndaga jiene ba? Gula idi ngenyi, jiye egi ushigo hakhaye. Yajiya gukhala egi athu avula mukatshi dietu ana guvua gikenene handaga, akhalele mukuatesa muthu wakhalele nu ukhashi, afuishile muthu akhalele muzumba, ako gikudi giakola gia bundile fundo ana khala, nga ataganele nu malamba ako. Uvi itshi yajiya gutukuatesa ha gukhala mu guhuima nu gusuanguluga gula tudi nu gikenene?a

Gifezegeselo gia Fumu Davidi giajiya gutukuatesa muavula ha gujiya luholo tuajiya gukolesela gula tudi nu gikenene giavula. Wataganele nu malamba akola mu monyo wenji, akambele nji gumushiya. (1 Sam. 17:34, 35; 18:10, 11) Itshi yakuatesele Davidi ha gukolesela hakhalele muene nu gikenene giavula? Luholo lutshi tuajiya gulandula gifezegeselo gienji?

NDAGA YAKUATESELE DAVIDI HA GUKOLESELA HAKHALELE MUENE NU GIKENENE GIAVULA

Davidi wataganele nu malamba avula mu tangua dimoshi. Ha gufezegesa, tutadilenu ndaga yakalegewe tangua diakhalele muene mulenga Fumu Saula. Davidi nu athu enji ayile mulua ita, tangua avutugile asangele mbalagaji jiawo jiazudi gale ima yawo, akondi gale dimbo, akuatshi gale akaji’awo nu ana nawo. Ndaga yene yaahanele gikenene giavula. Itshi Davidi wakalegele? ‘Davidi nu athu enji asendesele gudila muavula uu nu tangua diahuidile ene.’ Davidi wavuile luko gikenene giavula handaga athu enji akhalele gumukanena ha ‘gumushiya nu jiseso.’ (1 Sam. 30:1-6) Davidi wataganele nu malamba thathu akola mu tangua dimoshi, dia thomo fami yenji yakhalele mu gingoza, dia mbadi wakhalele muvua woma egi athu enji ajiya gumushiya, dia thathu Fumu Saula wakhalele nji mukamba gumushiya. Tangiza luholo Davidi wadivile!

Itshi Davidi wakalegele gungima? Wakambele ‘ukuateshi gudi Yehowa Nzambi wenji.’ Luholo lutshi? Davidi watogele Yehowa mu gisambu ha gumukuatesa nu watangigijile luholo Yehowa wamukuatesele gale mu ndaga jiko. (1 Sam. 17:37; Ngi. 18:2, 6) Davidi wakambele utuameji wa Yehowa, wahudile Yehowa hagujiya ndaga yajiya muene gukalagala. Tangua diahetele Davidi utuameji wa Yehowa wakalegele ndaga mu gudivua nu utuameji wene. Yehowa wakuatesele Davidi nu athu enji, ahuluishile fami jiawo nu atambudile ima yawo. (1 Sam. 30:7-9, 18, 19) Wamonyi ndaga thathu jiakalegele Davidi? Watogele ukuateshi gudi Yehowa mu gisambu, watangigijile luholo Yehowa wamukuatesele mu ndaga jiko, nu wakalegele ndaga mugudivua nu utuameji wa Yehowa. Tutadilenu maluho thathu tuajiya gulandula gifezegeselo gia Davidi.

LANDULA GIFEZEGESELO GIA DAVIDI GULA UDI NU GIKENENE GIAVULA

1. Gisambu. Gula tuasendesa guvua gikenene giavula, tuajiya gutshita gisambu gudi Yehowa ha gumutoga ukuateshi nu ndunge. Tuajiya guwambela Yehowa mu gisambu ndaga jiagasue jidi gutusagesa mu mutshima. Nga ndo tuajiya gutshita gisambu giahihia, gia mosha mutshima gula idi mutoga egi tutshite ngenyi. Tangua diagasue tuana toga ukuateshi gudi Yehowa tuana tshita gifua muazuelele Davidi egi: ‘Yehowa udi seso diami nu ngolo jiami, muene muhuluishi wami. Nzambi wami muene seso diami, fundo diami dia gulengela.’ (Ngi. 18:2) Gisambu giana gutukuatesa diago ba? Phangi wa mukhetu Kahlia udi muvundji wa njila udi muzuela egi: “Gungima dia gutshita gisambu ngana gudivua mu guhuima. Gisambu giana gungukuatesa ha gutangiza gifua Yehowa nu ha gumushila diago mutshima.” Idi yadiago egi, gisambu giana gutuhana ngolo jiana katuga gudi Yehowa hagula tuajiya gukhala mu guhuima nu gusuanguluga tangua tudi nu gikenene.

2. Gutangigiza. Gula watangigiza malamba wataganele nawo mu masugu abalega, udi muwunguluga luholo Yehowa wagukuatesele ha gukolesela mu malamba ene? Tangua tuana tangigiza luholo Yehowa wana gutukuatesa gifua muakuatesele muene akombeledi enji a mu tangua dikulu, yana gutuhana ngolo nu yana gutukuatesa nji ha gumushila diago mutshima. (Ngi. 18:17-19) Mukulu mumoshi mu jina dia Joshua udi muzuela egi: “Ngana khala nu liste ya mvutu jiana hana Yehowa mu isambu yami. Gutshita ngenyi guana gungukuatesa ha guwunguluga tangua ngatogele Yehowa gima gimoshi ngenyi nu luholo lua nguhanele muene gima ngakhalele nagio funu.” Gula tudi mutangigiza luholo Yehowa watukuatesele gale, yajiya gutukuatesa ha gukolesela tangua tudi nu gikenene.

3. Gukalegela ndaga. Gutuama dia guzula desizio dimoshi ngenyi, tudi naye gukamba utuamaji wa Yehowa mu Mbimbi yenji. (Ngi. 19:7, 11) Athu avula ana mona egi tangua ana atshita recherche mu verse imoshi ngenyi, ana kotelesa muabonga luholo ajiya gukalegela verse yene mu monyo wawo. Mukulu mumoshi mu jina dia Jarrod udi muzuela egi: “Gutshita ba recherche guana gungukuatesa ha gujiya verse yene muabonga nu ha gukotelesa ndaga jidi gunguwambela Yehowa. Ngenyi yana gungutuma ha gulandula utuameji wa Yehowa.” Gula tudi mukamba utuameji wa Yehowa mu Biblia nu tudi mulandula utuameji wene, mbayitukuatesa ha gukhala mu guhuima nu gusuanguluga tangua tudi nu gikenene.

YEHOWA MBAWUGUKUATESA HA GUKOLESELA

Davidi wakotelesele egi wakhalele nu funu ya ukuateshi wa Yehowa ha gukhala mu guhuima nu gusuanguluga tangua diakhalele muene nu gikenene. Wasuangulugile muavula nu ukuateshi wa Yehowa, hene wazuelele egi: ‘Mu ngolo jia Nzambi ngajiya gukanduga gibayi gialeha. Nzambi wa giamatshidia muene wana gunguhana ngolo.’ (Ngi. 18:29, 32) Tuajiya gutangiza egi malamba etu adi gifua ibayi yaleha inyi yajiyilego gukandugiwa. Uvi, mu ukuateshi wa Yehowa tuajiya gukolesela mu malamba adi gifua ibayi yaleha. Gula tudi mutoga ukuatetshi gudi Yehowa mu gisambu, tudi mu tangigiza ndaga jiatukalegele muene mu masugu a balega, nu tudi mukalagala ndaga mugudivua nu utuameji wenji, mbawutuhana ngolo nu ndunge jiajiya gutukuatesa ha gukhala mu guhuima nu gusuanguluga tangua tudi nu gikenene.