LONGO DIA 33
Yehowa Wana Gudisagesa Mukunda nu Akombeledi Enji nu Wana Guabamba
‘Meso a Yehowa ana khala gudi athu ana gumuvila woma.’—NGI. 33:18.
LUNGIMBO 4 “Jéhovah est mon Berger”
NDAGA JIDI MU LONGO EDIa
1. Mukunda natshi Yesu watogele Yehowa ha gubamba alandudi enji?
MU PHIPHA ya gisugishilo gutuama egi Yesu afue, watogele Sh’enji wa mu dilu ndaga imoshi ya ndando. Wamuwambelele ha gubamba alandudi enji. (Yone 17:15, 20) Idi yadiago egi Yehowa wana gudisagesa mukunda nu akombeledi enji nu wana guabamba. Uvi, Yesu wakhalele mujiya egi Satana mbawusagesa alandudi enji muavula. Wakotelesele egi mbaakhala nu funu ya ukuateshi wa Yehowa ha gukolesela mu usageshi wene.
2. Ha gutadila Ngimbo 33:18-20, mukunda natshi tushigo naye guvua woma tangua tudi mutagana nu malamba?
2 Mangino, akombeledi a Yehowa ana tagana nu malamba avula ha mavu awa a Satana. Tuana tagana nu ndaga jiajiya gutulebesa muila nu jiajiya gutshita egi tukhadigo ya gujinginyina gudi Yehowa. Uvi gifua luholo tuza guyimona mu longo edi, tushigo naye guvua woma nga hazonda. Yehowa wana gudisagesa mukunda nu esue, wana mona malamba agasue tuana tagana nawo nu wana khala hehi ha gutukuatesa ha gukolesela mu malamba ene. Tuzuelelenu ifezegeselo mbadi ya Biblia idi mumonesa egi ‘meso a Yehowa ana khala gudi athu ana gumuvila woma.’—Tanga Ngimbo 33:18-20.
YEHOWA WANA GUTUKUATESA GULA TUDI GUDIVUA HAKHETU
3. Ndaga jitshi jiajiya gututuma ha gudivua hakhetu?
3 Ikhale tudi mu fami yakoma ya akombeledi a Yehowa, matangua ako tuajiya gudivua gifua tudi hakhetu. Ha gufezegesa, mavuala ajiya gudivua hakhawo tangua adi muzuelele gutshigina guawo gutuama dia mafut’awo a khalasa nga gula aya mu hungu dihe-dihe. Athu ako mukatshi dietu ajiya guleba muila nga guvua gikenene giavula. Mu tangua diene tuajiya gutangiza egi gushigo nu muthu wajiya gutukuatesa ha gukolesela. Tuajiya gutangiza egi gula tuawambela athu ako luholo tudi gudivua, mbaashigo gutukotelesa. Matangua ako tuajiya gutangiza egi athu ako ashigo gudisagesa mukunda nu ndaga tudi mutagana najio. Gula tudi gudivua gifua tudi hakhetu ikhale mukunda nu mulonga utshi, tuajiya guvua gikenene nga guleba muila. Yehowa ganago gutshigina egi tudivue ngenyi. Mukunda natshi?
4. Mukunda natshi profete Eliya wazuelele egi: ‘Phamba ame hakhami ngasala nu monyo.’?
4 Tuzuelelenu gifezegeselo gia Eliya mukombeledi wa Yehowa wa gujinginyina. Yezabele wakhalele mukamba gumushiya, hene walengele masugu 40 ha guhuluisa monyo wenji. (1 Maf. 19:1-9) Hakhalele muene hakhenji mu wina wa seso, wawambelele Yehowa egi: ‘Phamba ame hakhami [profete] ngasala nu monyo.’ (1 Maf. 19:10) Uvi guakhalele nu ba profete ako mu gifutshi giene, handaga Obadia wahuluishile ba profete 100 anyi Yezabele wakhalele mutshigina gushiya. (1 Maf. 18:7, 13) Mukunda natshi Eliya wadivuile hakhenji? Wakhalele mutangiza egi ba profete anyi Obadia wahuluishile akhalele afui gale mukut’awo agasue? Yajiya gukhala egi wadivuile hakhenji handaga ba profete ako ajilego ha gukombelela n’enji hamoshi Yehowa gu Mulundu wa Kalemele? Yajiya gukhala egi wajiyile egi mbalagaji jienji jiakhalele mukamba gumushiya uvi guakhalelego nga muthu wakhalele gudisagesa mukunda nu muene? Biblia yanago guzuelela ndaga jiagasue jiakhalele mutangiza Eliya. Uvi tudi mujiya egi, Yehowa wakotelesele luholo Eliya wakhalele gudivua nu wakhalele mujiya muabonga luholo lua gumukuatesa.
Longo ditshi tuajiya guzula, mu luholo Yehowa wakuatesele Eliya gula tudi gudivua egi tudi hakhetu? (Tala paragrafe 5-6)
5. Luholo lutshi Yehowa wamonesele Eliya egi gakhalelego hakhenji?
5 Yehowa wakuatesele Eliya mbala jiavula. Watogele Eliya ha guzuela ndaga jiagasue jiakhalele gumusagesa. Wahudile Eliya mbala mbadi egi: “Itshi udi mutshita haha?” (1 Maf. 19:9, 13) Tangua Eliya wakhalele muzuela ndaga jiakhalele gumusagesa, Yehowa wakhalele gumutegelela muabonga. Yehowa wahanele Eliya mvutu hadimonesele muene gutuama dienji nu luholo wamumonesele ngolo jienji. Wawambelele nji Eliya egi gudi nu akombeledi ako avula a gujinginyina adi mulandula gumukombelela. (1 Maf. 19:11, 12, 18) Idi yadiago egi Eliya wadivuile muabonga tangua diawambelele muene Yehowa ndaga jiagasue jiakhalele gumusagesa, nu luholo luahetele muene mvutu. Yehowa wahanele Eliya midimo yavula ya ndando. Wamuwambelele ha gumba Hazaele maji ha gubua fumu wa Siliya nu ha gubuisa Yehu fumu wa enya Isalele nu ha gubuisa Elisha profete. (1 Maf. 19:15, 16) Yehowa wahanele Eliya midimo eyi yagasue ha gumukuatesa ha gusha matangi mu ndaga jiabonga. Nzambi wamuhanele nji futa diabonga, jina dienji Elisha. Luholo lutshi wajiya guheta ukuateshi wa Yehowa gula udi gudivua hakhaye?
6. Ndaga jitshi wajiya gutoga mu gisambu gula udi gudivua hakhaye? (Ngimbo 62:8)
6 Yehowa udi gugutoga ha gumukombelela. Wana mona malamba udi mutagana nawo nu udi guguwambela egi mbawutegelela isambu yaye tangua diagasue. (1 Tes. 5:17) Wana suanguluga gutegelela isambu ya akombeledi enji. (Ish. 15:8) Ndaga jitshi wajiya gutoga mu gisambu tangua udi gudivua hakhaye? Wambela Yehowa luholo udi gudivua gifua luholo luatshitshile Eliya. (Tanga Ngimbo 62:8.) Khala gumuwambela ndaga jidi gugusagesa nu luholo udi gudivua. Toga Yehowa agukuatese ha gujiya ndaga udi naye gukalagala tangua udi gudivua hakhaye. Ha gufezegesa, gula udi gudivua hakhaye nga udi muvua woma ha gulongesa lukuma luabonga gu khalasa, toga Yehowa aguhane gikhesa. Wajiya gumutoga nji ndunge jiajiya gugukuatesa ha guzuelela gutshigina guaye muabonga. (Luka 21:14, 15) Gula muila waguleba, wajiya gutoga Yehowa ha gugukuatesa ha guta maga nu phangi mumoshi wa gukula mu nyuma mukunda nu ndaga yene. Wajiya gutoga Yehowa ha gukuatesa phangi muene hagula agutegelele muabonga nu akotelese luholo udi gudivua. Khala muwambela Yehowa ndaga jiagasue jidi gugusagesa, muene mbawuhana mvutu gu isambu yaye; khala nji mutshigina ukuateshi wa aphangi ako, gula watshita ngenyi mbawushigo gudivua hakhaye.
Wana kamba maluholo wajiya gulongesa muavula lukuma luabonga nu aphangi ako ba? (Tala paragrafe 7)
7. Longo ditshi wazula mu gifezegeselo gia phangi Mauricio?
7 Mukut’etu agasue, Yehowa watuhanele mudimo wabonga wa gukalagala. Khala musha mutshima egi muene wana mona nu wana suanguluga nu mudimo wana kalagala mu hungu nu mu mudimo wa gulongesa. (Ngi. 110:3) Luholo lutshi gudihana muavula mu midimo yene guajiya gugukuatesa hagula udivuigo hakhaye? Tuzuelelenu gifezegeselo gia phangi mumoshi wa muvuala mu jina dia Mauricio.b Matangua azonda gungima dia gubatijiwa guenji, futa dienji mumoshi wasendesele gutuna giamatshidia. Mauricio udi muzuela egi: “Gumona luholo futa diami wakhalele mutuna Yehowa guangusagesele muavula. Ngakhalele gudihula gula mbangulandula gutagenesa ndaga ngalayele Yehowa tangua ngadihanele gudi muene nu gula mbangusala mu ulondegi wenji. Ngakhalele gudivua gifua ngudi hakhami, ngakhalele nji mutangiza egi gushigo nga muthu wajiya gukotelesa luholo ngakhalele gudivua.” Itshi yakuatesele phangi Mauricio? Udi muzuela egi: “Ngadihanele muavula mu mudimo wa gulongesa. Gutshita ngenyi guangukuatesele ha gubemba matangi abola. Gutshita mudimo wa gulongesa nu aphangi ako, guangukuatesele ha gukhala nu gusuanguluga, ngakhalelego nji gudivua luko hakhami.” Ikhale tushigo nu luholo lua guya mulongesa hamoshi nu aphangi’etu, tuajiya guheta gikhesa gula tudi mulongesa nawo mu maluholo ako gifua, gusonega mikanda nga gukalegela telefone. Ndaga itshi iko yakuatesele phangi Mauricio? Udi muzuela egi: “Ngadihanele muavula ha gukuatesa hungu. Ngakhalele mutshita yagasue ha gudilondega muabonga ha gutshita ba devuare mu gudibungisa. Gutshita ngenyi guangukuatesele ha gumona egi Yehowa nu aphangi ako ana suanguluga nu ame.”
YEHOWA WANA GUTUKUATESA GULA MALAMBA ATULEBESA MUILA
8. Luholo lutshi tuajiya gudivua gula tudi mutagana nu malamba?
8 Tuana tagana nu malamba avula mu masugu awa a gisugishilo. (2 Tim. 3:1) Uvi tuajiyilego gujiya gula lamba dia luholo lutshi mbaditubuila. Matangua ako tuajiya gutagana nu lamba dia makuta, misongo yakola nga gufuisa muthu tuakhalele muzumba. Gula malamba ene agasue atubuila mu tangua dimoshi, tuajiya guvua gikenene nga guleba muila muavula. Ujimbilago egi Yehowa wana mona ndaga jiagasue jiana gutubuila. Mu ukuateshi wenji wajiya gukolesela mu malamba agasue udi mutagana nawo.
9. Tanga malamba Yobo wataganele nawo.
9 Tutadilenu luholo Yehowa wakuatesele Yobo mukombeledi wenji wa gujinginyina. Yobo wataganele nu malamba avula mu tangua dimoshi. Lusugu lumoshi amuwambelele egi shitu jienji jiagasue jiakuyiwe, ashiyile enya mudimo enji nu an’enji agasue afuile. (Yobo 1:13-19) Gungima dia gutagana nu malamba awa, Yobo wakatele misongo yakola. (Yobo 2:7) Lamba dienji diakhalele diago diakola hene wazuelele egi: ‘Monyo wami wangusegela; Ngushigo nu funu ya gulandula gukhala nu monyo.’—Yobo 7:16.
Ha gutshiginyisa Yobo egi wana gumuzumba, Yehowa udi gumuwambela luholo luana gudisagesa muene mukunda nu ima ya fugile muene (Tala paragrafe 10)
10. Luholo lutshi Yehowa wakuatesele Yobo ha gukolesela mu malamba enji? (Tala gifuanesa holu dia gizula.)
10 Yehowa wakhalele mumona malamba agasue Yobo wakhalele mutagana nawo. Luholo Yehowa wakhalele muzumba Yobo, wamukuatesele ha gukolesela nu ha gusala ya gujinginyina gudi muene. Yehowa watele maga nu Yobo, wamuwuguluishile ndunge jienji jiavula nu luholo luana bamba muene ima yafugile muene. Wazuelele nji ndaga yatadila shitu jiavula jia gushimana. (Yobo 38:1, 2; 39:9, 13, 19, 27; 40:15; 41:1, 2) Yehowa wakalegele Elihu ha guhana Yobo gikhesa nu ha gumukolesa. Elihu wakuatesele Yobo ha gujiya egi Yehowa wana kuatesa akombeledi enji gula adi mukolesela mu malamba. Yehowa watumile Elihu ha guhana Yobo malongo abonga. Elihu wawuguluishile Yobo egi Yehowa Mufugi wa ima yagasue udi wabalega gukoma, ngenyi wamukuatesele ha gutuna gutangigiza muavula malamba amubuidile. (Yobo 37:14) Yehowa wahanele nji Yobo ginemo gia gukombelela mukunda nu mafut’enji thathu anyi akalegele gubola. (Yobo 42:8-10) Luholo lutshi Yehowa wana gutukuatesa mangino gula tuatagana nu malamba akola?
11. Luholo lutshi Biblia yana gutukuatesa tangua tudi mutagana nu malamba?
11 Yehowa ganago guta maga nu esue gifua luholo muatshitshile muene gudi Yobo, uvi wana gutuwambela ndaga mu njila ya Biblia. (Roma 15:4) Wana gutuhana felela mukunda nu masugu adi muza ha gutuhana gikhesa. Tuzuelelenu ndaga jiazonda Biblia yana zuela jinyi jiajiya gutuhana gikhesa gula tudi mutagana nu malamba. Yehowa wana gutuwambela mu Biblia egi gushigo nga gima ikhale malamba a luholo lutshi, ajiya “gutukhaphumuna mu guzumba [guenji].” (Roma 8:38, 39) Wana gutuwambela nji egi ‘wana khala hehi nu athu agasue ana gumutamega’ mu gisambu. (Ngi. 145:18) Yehowa udi gutuwambela egi gula tudi gumushila mutshima, tuajiya gukolesela nu gukhala nu gusuanguluga ngatshima tudi mumona malamba. (1 Kol. 10:13; Yak. 1:2, 12) Biblia idi gutuwunguluisa egi malamba tudi mutagana nawo adi azonda, adi mukunda nu tangua diazonda gula tuaafuanesa nu gubonga mbatuheta ivo nu ivo mu masugu adi muza. (2 Kol. 4:16-18) Yehowa wana gutulaya egi mbawushiya Satana Diabulu muthu wana gutubatela malamba, nu athu agasue adi gumulandula. (Ngi. 37:10) Wakuatele gale mu muto verse jia Biblia jiana hana gikhesa, jinyi jiajiya gugukuatesa ha gukolesela mu malamba mbaatubuila mu masugu adi muza ba?
12. Itshi Yehowa wana tshigina egi tutshite ha guheta gubonga gua ndaga jidi mu Biblia?
12 Yehowa wana tshigina egi tukhale mutanga Biblia lusugu nu lusugu nu gutangigiza ndaga tudi mutanga. Gula tudi mukalegela ndaga tudi mutanga, mbatukhala nu gutshigina guakola nu mbatukolesa ufuta wetu nu Shi’etu wa mu dilu. Gula tuatshita ngenyi, mbatuheta ngolo jia gukolesela mu malamba. Yehowa wana hana nji nyuma yenji gudi athu ana sha mutshima mu ndaga Biblia yana zuela. Nyuma yene yajiya gutuhana “ngolo jiabalega ngolo jia athu” ha gukolesela mu malamba agasue.—2 Kol. 4:7-10.
13. Luholo lutshi ima ya gudia ya mu nyuma yana gutuhana “muhiga wa fubidila nu watema” yana gutukuatesa ha gukolesela mu malamba?
13 Yehowa, wana kuatesa “muhiga wafubidila nu watema,” ha guzola mikanda yavula nu ba video nu ngimbo hagula tukolese gutshigina guetu nu ha gusala ya gujinginyina gudi muene. (Mat. 24:45) Tudi naye gutshita yagasue ha gukalegela ima yene yana gutuhana Yehowa. Phangi mumoshi gu États-Unis wamonesele egi wana suanguluga muavula nu ima eyi ya mu nyuma tuana heta. Wazuelele egi: “Ngataganele nu malamba avula akhalele naye gulebesa gutshigina guami mu ivo 40 ngudi nayo mu giamatshidia.” Phangi muene watagenele nu malamba avula, khakha wenji washiyiwe gudi shofer mumoshi wa gamiyo wakhalele wagukuatewa matombe. Mvuaji jienji jiakatele misongo yakola gungima afuile gawo. Muene hakhenji wakatele misongo ya cancer mbala jiyadi. Itshi yamukuatesele ha gukolesela? Wazuelele egi: “Yehowa wakhalele gungubamba tangua diagasue. Ima ya gudia ya mu nyuma yana gutuhana muhiga wa fubidila nu watema ya ngukuatesele ha gukolesela. Hene, ngajiya guzuela gifua Yobo egi: ‘Mbangusala ya gujinginyina uu nu gu gufua guami!’”—Yobo 27:5.
Luholo lutshi tuajiya gukuatesa aphangi ako mu hungu? (Tala paragrafeh 14)
14. Luholo lutshi Yehowa wana kalegela aphangi’etu a mala nu a akhetu ha gutukuatesa mu tangua dia lamba? (1 Tesalonike 4:9)
14 Yehowa wana longesa akombeledi enji ha gudizumba nu gudihana gikhesa mu tangua dia lamba. (2 Kol. 1:3, 4; tanga 1 Tesalonike 4:9.) Aphangi’etu a mala nu a akhetu ana landula gifezegeselo gia Elihu, luholo ana gutukuatesa ha gusala yagujinginyina mu tangua dia lamba. (Makal. 14:22) Tutadilenu luholo aphangi a mu hungu dia phangi Diane a mu hanele gikhesa nu a mukuatesele ha gusala ya gujinginyina gudi Yehowa, tangua mulumi’enji wakatele misongo yakola. Udi muzuela egi: “Yakhalele diago lamba diakola. Uvi Yehowa watuhanele ngolo, tuamonele nji koko dienji mu sungi yene. Aphangi a mu hungu dietu akalegele ndaga jiavula ha gutukuatesa. Akhalele muza gututala, akhalele gututamega gu telefone, akhalele nji gutuhana ima tuakhalele nayo funu. Ikhale ngakhalelego luko nu luholo lua guwendesa gamiyo, aphangi akhalele gungukuatesa ha guya mu gudibungisa nu ha guya mu mudimo wa gulongesa gula ngudi nu ngolo.” Idi diago luendu luakoma ha gukhala mu katshi dia aphangi a guzumba!
KHALA MUHANA YEHOWA MERSI LUHOLO WANA GUTUBAMBA NU GUZUMBA GUAGASUE
15. Itshi idi gututshiginyisa egi tuajiya gukolesela mu malamba?
15 Mukut’etu agasue mbatutagana nu malamba ako mu maluholo a gudisha. Gifua luholo tuayimona, mbatushigo mulua nu malamba ene mu ngolo jietu hakhetu. Gifua tata wa guzumba, Yehowa wana gudisagesa mukunda nu ndaga jiagasue jiana gutubuila. Wana khala hehi nu esue, wana gututegelela, wana khala nji hehi ha gutukuatesa. (Yesh. 43:2) Tuana sha mutshima egi tuajiya gubinga malamba ene handaga Yehowa wana gutuhana ima yagasue tuana khala nayo funu ha gukolesela. Watuhanele luendu lua gumukombelela mu gisambu, Biblia, ima yavula ya gudia ya mu nyuma nu aphangi’etu a mala nu a akhetu ha gutukuatesa mu tangua dia malamba.
16. Itshi tudi naye gutshita ha gusala mu ubambi wa Yehowa?
16 Tudi naye guhana Tata wetu wa mu dilu mersi avula luholo wana gutubamba! ‘Mitshima yetu idi nu gusuanguluga mukunda nu muene.’ (Ngi. 33:21) Gula tudi mukalegela ndaga jiagasue jiana gutuhana Yehowa ha gutukuatesa, mbatumonesa egi tuana suanguluga nu ukuateshi wenji. Tudi naye nji gutshita yagasue ha gusala mu ubambi wa Yehowa. Mu guzuela guko, gula tudi mulandula gutumagela Yehowa nu gutshita ndaga jiabonga gu meso enji muene mbawutubamba mayilago!—1 Phet. 3:12.
LUNGIMBO 30 Mon Ami, mon Dieu, mon Père
a Tuana khala nu funu ya ukuateshi wa Yehowa ha gukolesela mu malamba tuana tagana nawo mangino. Mu longo edi tuza mumona egi Yehowa wana gudisagesa diago mukunda nu akombeledi enji nu wana guabamba. Wana jiya malamba tuana tagana nawo nu wana gutuhana ima tuana khala nayo funu ha gukolesela mu malamba ene.
b Mu longo edi, majina ako asombegesewe.