‘Landula Guwenda mu Giamatshidia’

1. Gubonga gutshi tuana heta tangua tuana zuelela luholo tuajiyile “giamatshidia”?

“LUHOLO lutshi wajiyile giamatshidia?” Idi yadiago egi wahanele gale mvutu gu muhu owu mbala jiavula. Udi muhu wa thomo tuana guhula phangi wa yala nga wa mukhetu gula tudi mutshigina gumujiya muabonga. Tuana tshigina gujiya luholo aphangi’etu a mala nu a akhetu ajiyile Yehowa nu luholo asendesele gumuzumba. Esue nji tuana tshigina guawambela ndaga jiana gututuma ha gukombelela Yehowa. (Roma 1:11) Maga a luholo elu ana gutukuatesa ha gujiya egi giamatshidia gidi diago nu ndando yavula. Gutshita ngenyi guana gutukuatesa nji ha gutshita yagasue ha ‘gulandula guwenda mu giamatshidia’ yakotelesa egi gukalagala ndaga jiana suanguluisa Yehowa.—3 Yone 4.

2. Itshi tuza mulonguga mu longo edi?

² Mu longo edi tuza mulonguga mu guhihia ndaga jiko jiana gututuma ha guzumba giamatshidia. Gungima tuza mumona luholo tuajiya gulandula gumonesa guzumba guetu mukunda nu kado gaga ga ndando. Ndaga jiene jiza gutukuatesa ha gusuanguluga luko muavula luholo Yehowa watunanele mu giamatshidia. (Yone 6:44) Mbayitukuatesa nji ha gulandula gulongesa athu ako giamatshidia nu gikhesa giagasue.

MUKUNDA NATSHI TUANA ZUMBA “GIAMATSHIDIA”?

3. Ndaga itshi ya ndando yana gututuma ha guzumba giamatshidia?

³ Gudi nu ndaga jiavula jiana gututuma ha guzumba giamatshidia. Ndaga yabalega ndando idi egi tuana zumba Yehowa Nzambi handaga muene wana gutulongesa giamatshidia. Biblia yana gutukuatesa ha gujiya egi muene gashigo phamba Nzambi wa ngolo jiagasue, Mufugi wa dilu nu mavu, uvi udi nji Tata wetu wa mu dilu wana gutuzumba nu wana gudisagesa diago mukunda nu esue. (1 Phet. 5:7) Tudi mujiya egi, Nzambi wetu udi ‘wazala pha nu khenda, nu gisemo, gana guvua ndo khabu muphushi, wakhala nu guzumba guavula nu giamatshidia.’ (Guz. 34:6) Yehowa wana sophesa ndaga mu luholo luatagana. (Yesh. 61:8) Tangua tuana mona lamba yana gumusagesa, uvi gualeha ndo mbawumanesela malamba agasue mu tangua diatombele muene. (Yel. 29:11) Tudi diago munengena gutagenesewa gua ndaga yene! Idi nji ndaga yana gututuma ha guzumba Yehowa muavula!

4-5. Mukunda natshi mupostolo Phaula wafuanesele felela dietu nu longo dia masuwa?

⁴ Ndaga itshi iko yana gututuma ha guzumba giamatshidia? Giamatshidia giana gutubatela gubonga guavula. Tutadilenu gifezegeselo gimoshi. Giamatshidia gidi mu Biblia giana gutuhana felela mukunda nu masugu adi muza. Ha gumonesa egi felela diene didi nu ndando, mupostolo Phaula wasongele egi: “Felela tuana khala nadio didi gifua longo dia masuwa diana kuata monyo. Didi dia diago nu diakola.” (Heb. 6:19) Gifua luholo longo diana magenesa masuwa, felela dia Biblia diana gutuhana ngolo jia gukolesela tangua tudi mutagana nu malamba.

⁵ Mupostolo Phaula wakhalele muzuelela felela dia guya mu dilu dia Aklisto ambiwe maji mu nyuma . Uvi ndaga yene idi mutadila nji Aklisto adi nu felela dia gujinga mayilago mu phaladiso ha mavu. (Yone 3:16) Felela dia monyo wa ivo nu ivo diana gutukuatesa ha gukhala nu gusuanguluga mu monyo wetu.

6-7. Gubonga gutshi phangi Yvonne wahetele ha jiyile muene giamatshidia giatadila masugu adi muza?

⁶ Tuzuelelenu gifezegeselo gia phangi Yvonne. Gavualewego mu fami ya Matemue a Yehowa. Hakhalele muene mona wazonda, wakhalele muvua woma wa gufua. Phangi Yvonne udi muwunguluga luko ndaga yatangele muene inyi yamusagesele mu matangi, yakhalele muzuela egi: “Gudi nu lusugu mbatushigo mukhala luko guene.” Udi muzuela egi: “Ngakhalelego mubanda tulo muabonga, ngakhalele gudisagesa muavula mukunda nu masugu adi muza. Ngakhalele gudihula egi, ‘Mukunda natshi tuana jinga phamba masugu azonda gungima tufui? Ngakhalelego mukotelesa mukunda natshi tuana jinga?’ Ngakhalelego mutshigina gufua!”

⁷ Habuile muene muvuala, wataganele nu Matemue a Yehowa. Udi muezuela egi: “Ngasendesele gutshigina egi ngajiya gujinga mayilago ha mavu mu phaladiso.” Luholo lutshi gujiya giamatshidia guakuatesele phangi Yvonne? Udi muzuela luko egi: “Ngana zuga luko ndo mu phipha ha gudisagesa mukunda nu masugu adi muza nga mukunda nu gufua.” Idi yadiago egi, phangi Yvonne wana zula giamatshidia nu ndando, wana khala nji nu gusuanguluga gua guwambela athu ako giamatshidia giene.—1 Tim. 4:16.

8-9. (a) Mu gifezegeselo gia Yesu, itshi yatshitshile yala mumoshi ha gumonesa egi umonyi wamonele muene wakhalele nu ndando? (b) Luholo lutshi wana tadila giamatshidia mu monyo waye?

⁸ Giamatshidia gidi mu Biblia, giana zuelela nji lukuma luabonga lua Ufumu wa Nzambi. Yesu wafuanesele Ufumu wene nu umonyi wasuegewe. Wazuelele mu Matayo 13:44 egi: “Ufumu wa mu dilu udi gifua umonyi wasuegewe mu dihia. Muthu wawumona nu wawusuega luko. Muene udi nu gusuanguluga guavula, hene waya musumbisa ima yenji yagasue hagula asumbe dihia diene.” Muthu muene gakhalelego mukamba umonyi. Uvi tangua diamonele muene umonyi wene, watshitshile yagasue ha guwuheta. Wasumbishile ima yenji yagasue. Mukunda natshi? Handaga wakhalele mujiya ndando ya umonyi wene. Wakhalele diago nu ndando yavula gubalega ima yagasue yabembele muene.

⁹ Aye nji wana zula giamatshidia nu ndando yavula ba? Ayi, idi ngenyi! Tudi mujiya egi gushigo nga gima ha mavu awa, gidi nu ndando yavula gubalega gusuanguluga tuana khala nago gua gukombelela Yehowa nu felela dia gujinga mayilago mu masugu adi muza mu Ufumu wa Nzambi. Gushigo nga gima tuabembele gidi nu ndando yavula gubalega luendu tudi nalo lua gukhala nu ufuta wakola nu Yehowa. Ndaga yana gutuhana gikhesa giavula idi egi, tuana ‘gumusuanguluisa diago.’—Kol. 1:10.

10-11. Itshi yakuatesele Michael ha gusombegesa mu monyo wenji?

¹⁰ Athu avula mukatshi dietu akalegele ndaga jiavula ha gusuanguluisa Yehowa. Aphangi avula abembele midimo yawo ya ndando yavula. Ako abembele gutshita ngolo ha gubua enya umonyi. Athu ako nji asombegesele makalegelo awo abola tangua ajiyile giamatshidia. Tuzuelelenu ndaga yakalegele phangi Michael. Gavualewego mu fami ya Matemue a Yehowa. Hakhalele muene muvuala, wakhalele mutshita karate (gulonguga gulua). Udi muzuela egi: “Ngakhalele mutshita yagasue ha gukhala nu ngolo jiavula. Matangua ako ngakhalele mumona egi muthu gajiyilego gungubeta.” Uvi tangua Michael wasendesele gulonguga Biblia, wakotelesele egi Yehowa ganago gutshigina umbundudi. (Ngi. 11:5) Michael udi mutangiza phangi wa yala nu mukaji’enji anyi amulongesele giamatshidia, udi muzuela egi: “Anguwambelelego nga lusugu lumoshi egi bemba gutshita karate, uvi alanduile gungulongesa giamatshidia gidi mu Biblia.”

¹¹ Luholo Michael walanduile gulonguga ndaga jia Yehowa, wasendesele nji gumuzumba muavula. Gujiya egi Yehowa wana vuila akombeledi enji khenda, guakuatele diago mutshima wenji. Gungima, Michael wakotelesele egi udi naye guzula desizio dia gusombegesa ndaga mu monyo wenji. Udi muzuela egi: “Ngakhalele mujiya egi gubemba gutshita karate mbayikhadigo yaleba mukunda nu ame. Uvi ngakhalele mujiya egi ngudi naye gusuanguluisa Yehowa. Ngakhalele nji nu gutshigina egi gukombelela Yehowa gudi nu ndando gubalega ima yagasue.” Michael wazudile diago giamatshidia nu ndando yavula, hene yamukuatesele ha gusombegesa mu monyo wenji.—Yak. 1:25.

12-13. Luholo lutshi giamatshidia gidi mu Biblia giakuatesele Mayli?

¹² Biblia yana monesa ndando ya giamatshidia, tangua yana gufuanesa giamatshidia nu muenda udi mulema mu phipha. (Ngi. 119:105; Ef. 5:8) Phangi Mayli gu Azerbaijan, wana suanguluga muavula nu ukuateshi wahetele muene mu Biblia. Mvuaji jienji jiakhalele nu ikombelelo ya gudisha. Sh’enji wakhalele muenya musulman, gin’enji muenya Yuda. Udi muzuela egi: “Ngakhalele mujiya egi Nzambi wana khala guene uvi ngakhalele nu mihu yavula. Ngakhalele gudihula egi: ‘Mukunda natshi Nzambi wafugile athu? Mukunda natshi muthu udi naye gubishidiwa nu monyo mu kianga gia tshuya ha gumona lamba mayilago?’ Athu ana zuela egi ndaga jiagasue jiana gutubuila jiana khala gutshigina gua Nzambi. Hene ngadihudile egi: ‘Nzambi wana suanguluga genji ha gumona luholo athu ana mona malamba ba?’”

¹³ Phangi Mayli walanduile gukamba mvutu gu mihu yenji. Gungima walongugile Biblia, wabuile Temue wa Yehowa. Udi muzuela egi: “Biblia yangukuatesele ha gukhala nu gusuanguluga mu monyo wami. Ndaga jia giamatshidia ngamonele mu Biblia jiangukuatesele ha gukhala mu guhuima gua diago.” Luholo lumoshi nji, mukut’etu agasue tuana tumbuisa Yehowa “muthu [watukatudile] mu phipha ha [gutunginyisa] mu muanya wenji watagana.” —1 Phet. 2:9.

14. Luholo lutshi tuajiya gukolesa guzumba guetu mukunda nu giamtshidia? (Tala galuanda “Ima iko Tuajiya Gufuanesa nu Giamatshidia Gidi mu Biblia.”)

¹⁴ Tuazuelela phamba ndaga jiazonda jidi mumonesa egi giamatshidia gidi nu ndando. Idi yadiago egi aye nji udi mujiya ndaga jiko jiavula. Wajiya guzula desizio dia gukamba gujiya ndaga jiko jidi mumonesa egi giamatshidia gidi diago nu ndando tangua udi mulonguga Biblia hakhaye. Gula tudi muzumba giamatshidia muavula, mbatukalagala ndaga jiavula jidi mumonesa egi tuana zumba giamatashidia giene.

LUHOLO LUTSHI TUAJIYA GUMONESA EGI TUANA ZUMBA GIAMATSHIDIA?

15. Itshi tuajiya gutshita ha gumonesa egi tuana zumba giamatshidia?

¹⁵ Tuajiya gumonesa egi tuana zumba giamatshidia gula tudi mutanga Biblia lusugu nu lusugu nu mikanda yetu iko. Ngatshima tuataganesa gale ivo yavula mu giamatshidia, tudi nu ndaga jiavula tudi naye gulandula gulonguga. Inzo ya leha ya mutaledi ya thomo yazogele mu juillet 1879 mu Anglais yazuelele egi: “Giamatshidia gidi gifua giyaji giazonda gidi mu monyo wa athu, gidi hakatshi dia mayiji abola yakotelesa malongo a mambo. Udi naye gutshita ngolo ha gugimona. . . . Udi naye gulandula gutshita ngolo ha gugiheta. Ukhadigo musuanguluga phamba nu giyaji gimoshi gia giamatshidia. . . . Uvi, landula gukamba iyaji yavula ya giamatshidia.” Gulonguga gushigo ndaga yaleba, uvi gula tualandula gutshita ngolo ha gulonguga, mbatuheta gubonga guavula gubalega.

16. Metode atshi wana kalegela ha gulonguga Biblia? (Ishima 2:4-6)

¹⁶ Athu agasue anago guzumba gutanga nu gulonguga. Uvi Yehowa udi gututoga ha ‘gulandula gukamba’ nu ‘gutshita ngolo ha gukamba’ guheta ujiyi wa diago wa giamatshidia. (Tanga Ishima 2:4-6.) Gula tudi mutshita ngenyi, mbatuheta gubonga. Phangi Corey udi muzuela egi, tangua diana tanga muene Biblia hakhenji, wana zula tangua diavula dia gutangigiza verse imoshi. Udi muzuela egi: “Ngana tanga mbimbi jiagasue jidi goshi’a dijiyi, nu ba referanse, gungima ngana tshita ba recherche. . . . Gutshita ngenyi guana gungukuatesa ha gujiya ndaga jiavula!” Ikhale tuana kalegela metode awa nga ndo, mbatumonesa egi tuana zula giamatshidia nu ndando gula tudi mutshita ngolo ha guzula tangua dia gulonguga Biblia muabonga.—Ngi. 1:1-3.

17. Gukhala mu giamatshidia gudi mukotelesa itshi? (Yakoba 1:25)

¹⁷ Tuana jiya egi tushigo naye gusuga phamba ha gulonguga giamatshidia. Handaga ha guheta gubonga guavula, tudi naye gukalegela ndaga tudi mulonguga mu monyo wetu. Gula tudi mutshita ngenyi, giamatshidia mbagitubatela diago gusuanguluga. (Tanga Yakoba 1:25.) Luholo lutshi tuajiya gujiya egi tudi diago mu giamatshidia? Phangi mumoshi wazuelele egi, tudi naye gukamba gujiya gula tuana kalegela ndaga tuana longuga, nu gukamba gujiya ndaga tudi naye gusombegesa. Mupostolo Phaula wazuelele egi: “Ikhale tuakudile gale luholo lutshi, tubembigo guwenda mu luholo luatagana mu njila yene imoshi.”—Fili. 3:16.

18. Mukunda natshi tudi naye gutshita yagasue ha “guwenda mu giamatshidia”?

¹⁸ Tangiza gubonga mbatuheta gula tudi mutshita yagasue ha “guwenda mu giamatshidia”! Mbatukudisa makalegelo etu, mbatusuanguluisa Yehowa muavula nu aphangi’etu a mala nu a akhetu. (Ish. 27:11; 3 Yone 4) Yadiago, eji ndaga jiabalega ndando jiana gututuma ha guzumba giamatshidia nu gukhala mu giamatshidia!