“Khalenu Gudikolesa”

1. Ha gutadila 1 Tesalonike 5:11, mudimo utshi mukut’etu agasue tudi naye gukalagala?

MU HUNGU dienu muatungile gale Inzo ya Ufumu nga ndo muayilondele gale ba? Gula idi ngenyi, yajiya gukhala egi aye muwunguluga lusugu lua thomo muatshitshile gudibungisa mu Inzo ya Ufumu ihe-ihe. Idi yadiago egi wahanele Yehowa mersi avula. Yajiya gukhala egi wakhalele nu gusuangula guavula hene yagutumile ha guyimba lungimbo lua gisendeselo mu dijui diakola. Jinzo jietu jia Ufumu jiana tungiwa muabonga ha gutumbuisa Yehowa. Uvi tuana tumbuisa nji Yehowa muavula tangua tuana gudihana mu mudimo wa gutunga wa luholo luko. Mudimo wene udi nu ndando yavula gubalega mudimo wa gutunga jinzo. Handaga udi mudimo wa gukolesa athu ana gudibungisa mu Jinzo jia Ufumu. Mupostolo Phaula watangijile mudimo wa gutunga mu luholo lua gifuanesa tangua diasonegele muene mbimbi jidi mu 1 Tesalonike 5:11, verse yakuata longo edi.—Tanga.

2. Itshi tuza muzuelela mu longo edi?

² Mupostolo Phaula udi diago gifezegeselo giabonga handaga wakhalele mujiya luholo lua gukolesa aphangi’enji Aklisto muabonga. Wakhalele gudisha ha fundo diawo. Mu longo edi, tuza mumona luholo Phaula wakuatesele aphangi a mala nu a akhetu (1) ha gukolesela mu malamba, (2) ha gukhala mu guhuima nu athu ako nu (3) ha gukolesa gutshigina guawo gudi Yehowa. Henyaha tutadilenu luholo tuajiya gulandula gifezegeselo gia Phaula ha gukolesa aphangi’etu mangino.—1 Kol. 11:1.

PHAULA WAKUATESELE APHANGI’ENJI AKLISTO HA GUKOLESELA MU MALAMBA

3. Itshi idi mumonesa egi Phaula wakhalele mutadila mudimo mu luholo luabonga?

³ Phaula wakhalele diago muzumba aphangi’enji muavula. Wataganele nu malamba avula, hene wakhalele muvuila aphangi’enji Aklisto khenda nu wakhalele gudisha ha fundo diawo tangua akhalele mutagana nu malamba a luholo lumoshi. Mu tangua dimoshi ngenyi, Phaula gakhalelego nu makuta hene wakalegele mudimo ha guheta ima muene nu mafut’enji akhalele nayo funu. (Makal. 20:34) Wakhalele mutshita mudimo wa gutunga matenta. Tangua diahetele muene gu Kolinto, watshitshile thomo mudimo wene nu Akila nu mukaji’enji Prisile. Uvi “mu lusugu luagasue lua guhuluguga” wakhalele mulongesa enya Yuda nu enya Greke lukuma luabonga. Gungima tangua Silase nu Timote ahetele guene, “Phaula wasendesele gudihana muavula ha gulongesa mbimbi ya Nzambi.” (Makal. 18:2-5) Phaula wakhalele mujiya egi gukombelela Yehowa guakhalele nu ndando yavula mu monyo wenji. Luholo Phaula wakhalele mutshita mudimo muavula, wakhalele watagana ha gukolesa aphangi’enji Aklisto. Waakuatesele ha gujiya egi ashigo naye gubemba egi malamba akhalele mutagana nawo nu gukamba gutagenesa nzala jia enya fami jiawo jiaatume ha gubemba “ndaga jiabalega ndando,” jinyi tuana kalagala ha gukombelela Yehowa.—Fili. 1:10.

4. Luholo lutshi Phaula nu Timote akuatesele aphangi ha gukolesela mu usageshi?

⁴ Tangua diazonda gungima dia gukangula hungu gu Tesalonike, Aklisto ahe-ahe ataganele nu usageshi wakola. Mbalagaji jiakhalele mukamba Phaula nu Silase uvi a amonelego. Hene akuatele aphangi ako “ayile nu guanana uu nu gudi mafumu a dimbo,” akhalele muzuela mu dijui diakola egi: “Athu awa agasue ashigo munemesa mikhuala ya Sezale.” (Makal. 17:6, 7) Tangiza gale luholo Aklisto ahe-ahe adivile tangua akotelesele egi mbalagaji jiene jiasendesele nji guakamba ha guakuata! Yakhalele naye gualebesa muila, uvi Phaula gatshiginyilego egi ndaga yene ikalegewe. Ngatshima muene nu Silase akhalele naye gukatuga mu dimbo diene, uvi atshitshile yagasue ha gukuatesa Aklisto ahe-ahe. Phaula wawambelele aphangi a gu Tesalonike egi: “Tuamitumidile phangi’etu Timote . . . , ha gumikolesa nu ha gumikuatesa ha gukhala nu gutshigina guakola, hagula malamba akola mudi mutagana nawo alebesago nga muthu mumoshi mukatshi dienu.” (1 Tes. 3:2, 3) Timote wataganele thomo nu usageshi wa luholo lumoshi mu dimbo diawo dia Liseta. Wamonele luholo Phaula wakolesele aphangi a mu dimbo diene. Timote wamonele luholo Yehowa wakuatesele aphangi a mu dimbo diene, ndaga yene yamukuatesele ha gukolesa aphangi a gu Tesalonike ha gusha mutshima egi Yehowa mbawaakuatesa nji.—Makal. 14:8, 19-22; Heb. 12:2.

5. Luholo lutshi mukulu mumoshi wakuatesele phangi Bryant?

⁵ Luholo lutshi Phaula wakolesele luko aphangi’enji Aklisto? Tangua Phaula nu Barnabase avutugile gu Liseta, gu Ikoniome nu gu Antiokia, “atombele akulu mu mahungu agasue.” (Makal. 14:21-23) Idi yadiago egi akulu ene amonesele egi akhalele atagana ha gukolesa mahungu, gifua muana tshita akulu mangino. Tutalenu ndaga jiatagenele najio phangi Bryant, udi muzuela egi: “Tangua ngakhalele nu ivo 15, tata watubembele, mama wazolewe nji mu hungu. Ndaga yene yangulebesele muila nu ngadivuile diago hakhami.” Itshi yakuatesele Bryant ha gukolesela mu tangua diene dia lamba? Udi muzuela luko egi: “Mukulu mumoshi mu jina dia Tony wakhalele muta maga nu ame mu gudibungisa gua mu hungu nu mu matangua ako. Wanguwambelele mene jia athu anyi ataganele nu malamba uvi gungima akhalele nu gusuanguluga. Wangutangele Ngimbo 27:10 nu wangutele lumene lua Ezekiase munu wakhalele mukombelela Yehowa nu gujinginyina guagasue ngatshima sh’enji gakhalelego gifezegeselo giabonga.” Luholo lutshi ndaga jiene jiakuatesele Bryant? Udi muzuela egi: “Gikhesa gianguhanele phangi Tony giangukuatesele ha gusendesa gusuanguluga nu mudimo wa tangua diagasue.” Akulu, khalenu mukuatesa aphangi adi mutagana nu malamba gifua Bryant, handaga ajiya gukhala nu funu ya “mbimbi jiabonga” jidi muhana gikhesa.—Ish. 12:25.

6. Itshi Phaula wakalegele ha gukolesa aphangi’enji Aklisto?

⁶ Phaula wawambelele aphangi enji Aklisto egi Yehowa wakuatesele “matemue avula adi gifua tuta diakoma” ha gukolesela mu malamba akola. (Heb. 12:1) Wakotelesele egi mene jia akombeledi a Yehowa a mu tangua dikulu anyi a kolesele mu malamba, jiajiya guhana aphangi’enji gikhesa nu guakuatesa ha gulandula guhaga matangi awo mu “dimbo dia Nzambi wa monyo.” (Heb. 12:22) Idi nji luholo lumoshi nu mangino. Tuana heta diago gikhesa nu ngolo tangua tuana tanga mu Biblia luholo Yehowa wakuatesele Gideona nu Balaka nu Davidi nu Samuele nu athu ako avula. (Heb. 11:32-35) Tuana heta nji gikhesa mu ifezegeselo ya gutshigina gua aphangi a mu tangua dietu. Gu biro diakoma dia Matemue a Yehowa (siège mondiale), tuana heta mikanda ya aphangi anyi gutshigina guawo guakolele tangua atangele mene jia akombeledi a Yehowa anyi ana sala yagujinginyina mangino.

PHAULA WAKUATESELE APHANGI’ENJI AKLISTO HA GUKHALA MU GUHUIMA NU ATHU AKO

7. Longo ditshi wazula mu ndaga jiazuelele Phaula jidi mu Roma 14:19-21?

⁷ Tuana kolesa aphangi’etu a mala nu a akhetu tangua tuana tshita yagasue ha gubamba guhuima mu hungu. Tuana bembago egi matangi agudisha abate ukhaphumunyi mukatshi dietu. Tuana khalago enya ndaga jiakola gula ndaga imoshi ishigo mushiya mukhuala wa Biblia. Tutadilenu gifezegeselo gimoshi. Mu hungu dia Roma, muakhalele nu enya Yuda nu enya ifutshi iko. Tangua Mukhuala wa Moise wakatudiwe, akombeledi a Yehowa akhalelego luko naye gutumagela mikhuala yakhalele mutadila ima iko ya gudia. (Mako 7:19) Mu tangua diene, enya Yuda ako asendesele gawo gudia ima yagasue akhalele mutshigina. Uvi ako atunyile gutshita ngenyi. Ndaga yene yabatele ukhaphumunyi mu hungu. Phaula wakotelesele egi idi nu ndando ha gubamba guhuima, hene wazuelele egi: “Idi ndaga yabonga gula watuna gudia mbiji nga gunua matombe, nga gukalagala ndaga itshi yajiya gutuma phangi’aye ha gubua mu gubola.” (Tanga Roma 14:19-21.) Phaula wakuatesele aphangi’enji Aklisto ha gujiya egi ndaga yene yajiya gubatela aphangi agasue malamba. Wakhalele nji hehi ha gusombegesa khadilo dienji ha gutuna gukhakhuisa athu ako. (1 Kol. 9:19-22) Esue nji, tuajiya gukolesa athu ako nu gubamba guhuima gula tushigo mukamba egi ndaga tudi mutshigina phamba yene idi naye gukalegewa.

8. Itshi Phaula watshitshile tangua ndaga imoshi ya ndando yakhalele naye guzola nguma mu hungu?

⁸ Phaula wahanele gifezegeselo giabonga mu ndaga yatadila gubamba guhuima mukatshi dia athu anyi adi nu matangi agudisha mu ndaga imoshi ya ndando. Ha gufezegesa, mu hungu dia mu siekle ya thomo Aklisto ako azuelele egi enya ifutshi iko anyi abuile Aklisto, akhalele naye gumbiwa gumukanda hagula athu ako azuedigo ndaga jiabola mukunda nu ene. (Gal. 6:12) Phaula gatshiginyilego diago ndaga yene, uvi ha fundo dia gukamba egi athu alandule phamba matangi’enji, khadilo dia gudibuluimuisa diamukuatesele ha gubata ndaga yene gudi apostolo nu gudi akulu a gu Yelusalema. (Makal. 15:1, 2) Gutshita ngenyi guakuatesele aphangi ene ha gubamba gusuanguluga nu guhuima mu hungu.—Makal. 15:30, 31.

9. Luholo lutshi tuajiya gulandula gifezegeselo gia Phaula?

⁹ Gula ndaga imoshi yazola nguma, mbatubamba guhuima gula tuakamba utuameji gudi athu Yehowa watombele ha gutuameza hungu. Tuajiya nji guheta utuameji wa Biblia mu mikanda yana zola ulondegi wa Yehowa. Ha fundo dia gukamba egi athu alundule phamba matangi’etu, tudi naye gulandula muabonga malongo ana gutuhana ulondegi wene ha gubamba guhuima mu hungu.

10. Ndaga itshi iko Phaula watshitshile ha gubamba guhuima mu hungu?

¹⁰ Phaula wabambele nji guhuima, handaga wakhalele muhaga matangi’enji mu makalegelo abonga a aphangi ha fundo dia gutala phamba makalegelo awo abola. Ha gufezegesa, gu gisugishilo gia mukanda wasonegele muene enya Roma, watangele athu avula mu majina awo nu wazuelele ndaga jiabonga mukunda nu ene. Gula tudi muzuelela makalegelo abonga a aphangi’etu, mbatulandula gifezegeselo gia Phaula. Gula tuatshita ngenyi, mbayitukuatesa ha gukhala mu ufuta wakola nu aphangi’etu, mbatukhala nji nu guzumba guakola mukatshi dietu.

11. Gula nguma jiazoga mukatshi dietu luholo lutshi tuajiya gukamba guhuima?

¹¹ Matangua ako, nguma jiajiya nji guzoga mukatshi dia Aklisto a gukula mu nyuma. Ndaga yene yabuidile nji Phaula nu futa dienji Barnabase. Aphangi awa mbadi akhalelego gudivua mu ndaga yatadila guya mu vuayaje yawo ya gimisionere nu Mako. “Amanele mangololo,” hene adikhaphele. (Makal. 15:37-39) Uvi Phaula nu Barnabase nu Mako alondele mulonga wene ha gukamba guhuima, amonesele egi gubamba guhuima nu gukhala hamoshi mu hungu idi nu ndando yavula. Gungima Phaula wazuelele ndaga jiabonga mukunda nu Barnabase nu Mako. (1 Kol. 9:6; Kol. 4:10) Esue nji gula mulonga wazoga mukatshi dietu, tudi naye gutshita yagasue ha guwulondega nu gulandula guhaga matangi’etu phamba mu makalegelo abonga a aphangi’etu. Gula tuatshita ngenyi, mbatubamba guhuima mu hungu nu mbatukhala hamoshi.—Ef. 4:3.

PHAULA WAKUATESELE APHANGI’ENJI AKLISTO HA GUKOLESA GUTSHIGINA GUAWO

12. Malamba atshi aphangi’etu ana tagana nawo?

¹² Tuana kolesa aphangi’etu tangua tuana guakuatesa ha gukolesa gutshigina guawo gudi Yehowa. Ako ana sagesewa gudi enya fami jiawo anyi ashigo Matemue a Yehowa, gudi mafut’awo a mudimo nga a khalasa. Ako adi nu ukhashi wakola nga ndo adi mutshita ngolo ha gubemba matangi abola. Uvi ako abatijiwe gale mualeha nu ana nengenena sendese mualeha gisugishilo gia mavu awa. Ndaga eji jiajiya gulola gutshina gua Aklisto mangino. Aklisto a mu hungu dia mu siekle ya thomo ataganele nji nu malamba a luholo lumoshi. Isthi Phaula watshitshile ha gukolesa aphangi’enji a mala nu a akhetu?

13. Luholo lutshi Phaula wakuatesele Aklisto anyi akhalele musagesewa gudi enya fami jiawo?

¹³ Phaula wakhalele mukalegela Mbimbi ya Nzambi ha gukolesa gutshigina gua aphangi’enji. Ha gufezegesa, yajiya gukhala egi enya Yuda anyi akhalele Aklisto akhalelego mumona ndaga yaguzuela tangua enya fami jiawo akhalele muzuela egi, gikombelelo gia enya Yuda giakhalele nu ndando yavula gubalega gikombelelo gia Uklisto. Idi yadiago egi mukanda wasonegele Phaula gudi enya Hebelu wakolesele diago Aklisto ene. (Heb. 1:5, 6; 2:2, 3; 9:24, 25) Ndaga jiazuelele muene nu gutema guagasue jiaakuatesele ha gujiya ndaga akhalele naye guwambela mbalagaji jiawo. Mangino, tuajiya nji gukuatesa aphangi’etu adi mutagana nu usageshi ha gukalegela mikanda yetu yana kotelesa Biblia ha guzuelela gutshigina guawo. Gula athu adi musegulula mavuala handaga ana tshigina egi gudi nu mufugi, tuajiya gukuatesa mavuala ene ha guheta malongo adi mu gamukanda, La vie a-t-elle été créée ? nu Cinq questions à se poser sur l’origine de la vie ha gumonesa mukunda natshi ana tshigina egi mufugi wakhala guene.

14. Itshi Phaula watshitshile ngatshima wakhalele mubalegesa tangua diavula mu mudimo wa gulongesa?

¹⁴ Phaula wakolesele aphangi’enji Aklisto ha gumonesa guzumba mu “midimo yabonga.” (Heb. 10:24) Waakuatesele ha gumonesa guzumba mu guzuela nu mu makelegelo awo. Ha gufezegesa, tangua nzala yakola yanginyile gu Yudea, Phaula watshitshile yagasue ha gukuatesa aphangi a mu dimbo diene nu ima akhalele nayo funu. (Makal. 11:27-30) Ngatshima Phaula wakhalele mubalegesa tangua diavula mu mudimo wagulongesa uvi wakhalele mukamba maluholo a gukuatesa aphangi akhalele nu funu ya ukuateshi. (Gal. 2:10) Gutshita ngenyi guakuatesele aphangi’enji ha gusha diago mutshima egi Yehowa mbawaakuatesa. Mangino, gula tudi mukalegela tangua dietu, ngolo jietu nu ndunge jietu ha guhana mago mu mudimo wagukuatesa aphangi ana buila malamba, mbatukolesa gutshigina gua aphangi’etu. Mbatukolesa nji gutshigina guawo gula tudi muhana misomonyi muavula ha gukuatesa mudimo wana kalegewa ha mavu agasue. Gula tuatshita ndaga eji jiagasue tuazuelela nu ndaga jiko, mbatukuatesa aphangi’etu ha gusha diago mutshima egi Yehowa mbagashigo guabemba.

15-16. Luholo lutshi tuajiya gukuatesa aphangi anyi ashigo luko nu gutshigina guakola?

¹⁵ Phaula walanduile gukuatesa aphangi anyi akhalelego luko nu gutshigina guakola. Wakhalele gudisha ha fundo diawo nu guawambela ndaga nu gisemo. (Heb. 6:9; 10:39) Ha gufezegesa, mu mukanda wasonegele muene enya Hebelu, wakalegele muavula mbimbi “esue” handaga wakotelesele egi muene nji wakhalele naye gukalegela malongo ene. (Heb. 2:1, 3) Tudi naye gulandula gukuatesa aphangi anyi ashigo luko nu gutshigina guakola gifua muatshitshile Phaula. Uvi, ha guahana gikhesa tudi naye gumonesa egi tuana gudisagesa mukunda nu ene. Gutshita ngenyi mbagumonesa diago egi tuana guazumba. Gula tudi muzuela nu gisemo mbayikolesa diago athu adi gututegelela.

¹⁶ Phaula wakuatesele aphangi’enji ha gusha mutshima egi Yehowa wana jiya midimo yawo yabonga. (Heb. 10:32-34) Tuajiya nji gutshita gifua Phaula gula tudi mukuatesa phangi munu gashigo luko nu gutshigina guakola. Tuajiya gumuhula ha gutuwambela luholo luajiyile muene giamatshidia nu gumukolesa ha gutangigiza luholo Yehowa wamukuatesele gale mu ndaga jiko. Tuajiya gumukuatesa ha gusha mutshima egi Yehowa khenji gajimbidilego ndaga jiakalegele muene nu guzumba guagasue nu mbagashigo gumubemba nga hazonda mu masugu adi muza. (Heb. 6:10; 13:5, 6) Maga a luholo elu ajiya diago gukuatesa phangi muene ha gulandula gukombelela Yehowa.

“KHALENU GUDIHANA GIKHESA”

17. Itshi tuajiya gulandula gukudisa?

¹⁷ Gifua luholo muthu wana tunga jinzo wana landula gukudisa mudimo wenji, esue nji tuajiya gulandula gukudisa luholo luetu lua gukolesa athu ako. Tuajiya gukuatesa athu ako ha gukolesela mu malamba gula tudi guatela mene jia athu anyi akolesele mu tangua dikulu. Tuajiya gubamba guhuima gula tudi muzuelela makalegelo abonga a aphangi’etu nu gula tudi mutshita yagasue ha gukamba guhuima tangua tudi nu mulonga nu phangi’etu. Tuajiya nji gulandula gukolesa gutshigina gua aphangi’etu gula tudi guatangela ndaga jia giamatshidia jidi mu Biblia, tudi guahana ima adi nayo funu nu gula tudi mukuatesa aphangi anyi ashigo luko nu gutshigina guakola.

18. Desizio ditshi wazula?

¹⁸ Aphangi ana hana mago mu mudimo wa gutunga jinzo jia Ufumu ana khala nu gusuanguluga. Tuajiya guheta gusuanguluga guavula gula tudi mukuatesa aphangi’etu ha gukolesa gutshigina guawo. Jinzo jiana tunga athu jiajiya gubola gungima dia ivo yavula, uvi gubonga tuajiya guheta gula tudi mukolesa athu ako guajiya gukhala mayilago! Mukut’etu agasue tulandulenu “gudihana gikhesa nu gudikolesa.”—1 Tes. 5:11.