Akombeledi a Yehowa ana Zumba Ndaga Jiabonga

1. Lamba ditshi Yozefe wataganele nadio nu itshi yakalegele muene?

YOZEFE mun’a Yakoba, wataganele nu lamba diakola. Mukhetu mumoshi wamuwambelele egi: ‘Iza tubungise muila.’ Wakhalele mukaji’a fumu’enji Potifale. Yozefe watunyile. Mangino muthu muko wajiya gudihula egi: ‘Mukunda natshi Yozefe watunyile?’ Potifale gakhalelego guene. Luholo Yozefe wakhalele muhiga monzo ya Potifale; idi yadiago egi mukhetu muene wakhalele naye gumumonesa lamba luholo Yozefe watunyile. Ikhale ngenyi Yozefe wakhalele mutuna gubungisa n’enji muila. Mukunda natshi? Wazuelele egi: ‘Luholo lutshi ngajiya gukalagala gubola guakoma ngegi? Luholo lutshi ngajiya gukalagala disumu gu meso a Nzambi?’—Gis. 39:7-12.

2. Luholo lutshi Yozefe wajiyile egi gukalagala uthambi idi disumu gu meso a Nzambi?

² Luholo lutshi Yozefe wajiyile egi gumeso a Nzambi wenji gukalagala uthambi idi “gubola guakoma”? Mukhuala wa Moize wakhalele muzuela egi: “Ushigo naye gukalagala uthambi,” wasonegewe gungima dia ivo 200. (Guz. 20:14) Uvi Yozefe wakhalele mujiya Yehowa muabonga, hene wakotelesele luholo Yehowa wana tadila uthambi. Ha gufezegesa, wakhalele mujiya muabonga egi Yehowa walondele egi ulo udi naye gubungisa phamba yala mumoshi nu mukhetu mumoshi. Yajiya gukhala egi wavile luholo Yehowa wakuatesele khakha wenji Sara ha gusala yagujinginyina gudi mulumi’enji iphungu mbadi tangua mala ako akhalele mukamba gubungisa n’enji muila gu ngolo. Nzambi wakuatesele nji Rebeka mukaji’a Izake. (Gis. 2:24; 12:14-20; 20:2-7; 26:6-11) Tangua Yozefe watangigijile ndaga eji, wakotelesele ndaga jiakhalele jiabonga nu jiabola gu meso a Yehowa. Luholo Yozefe wakhalele muzumba Yehowa, wakhalele hehi ha gutshita ndaga yagasue yakhalele musuanguluisa Nzambi.

3. Itshi tuza muzuelela mu longo edi?

³ Idi yadiago egi wana zumba ndaga jiabonga. Uvi mukut’etu agasue tushigo athu atagana, gula tuatemelego, tuajiya gulandula luholo athu a ha mavu awa ana tadila ndaga jiabonga. (Yesh. 5:20; Roma 12:2) Hene tuza mumona gula gukalagala ndaga jiabonga gudi mukotelesa itshi nu gubonga tuajiya guheta gula tudi muzumba ndaga jiene. Tuza nji mumona ndaga thathu tudi naye gutshita ha gukudisa guzumba guetu mukunda nu mikhuala ya Nzambi.

GUKALAGALA NDAGA JIABONGA GUDI MUKOTELESA ITSHI?

4. Matangi atshi abola athu ako ana khala nawo mu ndaga yatadila gukalagala ndaga jiabonga?

⁴ Athu avula ajiya gutangiza egi gula muthu udi mukalagala ndaga jiabonga, udi muenya lulendo nu wana mona egi wabalega athu ako. Uvi Nzambi gana zumba ndo makalegelo a luholo elu. Tangua Yesu wakhalele ha mavu, mafumu a ikombelelo akhalele gudimona egi adi athu abonga. Uvi Yesu gasuangulugilego nawo handaga akhalele musegulula athu ako nu gulezela mikhuala yawo yatadila ndaga jiabonga nu jiabola. (Mulo. 7:16; Luka 16:15) Muthu wana kalagala ndaga jiabonga jinyi Yehowa wana tshigina, gana tangizago egi wabalega athu ako.

5. Ha gutadila Biblia, gukalagala ndaga jiabonga gudi mukotelesa itshi? Hana gifezegeselo.

⁵ Gukalagala ndaga jiabonga gudi nu ndando yavula. Idi mukotelesa egi tudi naye gukalagala ndaga jidi jiabonga gu meso a Yehowa. Mu Biblia mbimbi gukalagala ndaga jiabonga, jidi mukotelesa gutumagela mikhuala ya Yehowa mu monyo wetu. Ha gufezegesa, Yehowa wazuelele egi enya mungenda adi naye gukalegela ‘izongelo yabonga.’ (Mikh. 25:15) Hene Muklisto udi mutshigina gukhala muthu wabonga gu meso a Nzambi, udi naye gukalagala ndaga nu giamatshidia mu mudimo wenji. Muthu wana zumba gukalagala ndaga jiabonga, gana tshiginago egi athu akalegele muthu muko ndaga jiabola. Ha ‘gusuanguluisa diago Yehowa,’ muthu wabonga udi naye gudihula ha gujiya gula Yehowa mbawusuanguluga nu ba desizio adi muzula muene nga ndo.—Kol. 1:10.

6. Ha gutadila Yeshaya 55:8, 9, mukunda natshi tudi naye gusha mutshima mu mikhuala ya Yehowa yatadila ndaga jiabonga nu jiabola?

⁶ Biblia yana monesa egi Yehowa wana kalagala diago ndaga mu luholo luataga. Gishina giene wana tamegewa egi, ‘fundo diana khala ndaga jiabonga.’ (Yel. 50:7) Yehowa udi mufugi wa ima yagasue, phamba muene udi watagana ha guhaga mikhuala yatadila ndaga jiabonga nu jiabola. Luholo tushigo athu atagana, tuajiyilego gujiya diago ndaga jiabonga nu jiabola gifua Yehowa handaga muene udi watagana. (Ish. 14:12; Tanga Yeshaya 55:8, 9.) Uvi luholo tuafugiwe mu gifuanesa gia Nzambi, tuajiya gulandula mikhuala yenji yatadila ndaga jiabonga. (Gis. 1:27) Tuana zumba gukalagala ngenyi. Luholo tuana zumba Tata wetu wa mu dilu, tuana tshita ngolo ha gulandula gifezegeselo gienji.—Ef. 5:1.

7. Mukunda natshi tudi naye gulandula mikhuala ya Nzambi? Fezegesa.

⁷ Tuana heta gubonga guavula tangua tuana tumagela mikhuala ya Yehowa yatadila ndaga jiabonga nu jiabola. Mukunda natshi tudi muzuela ngenyi? Tangiza gale ndaga yajiya gukalegewa gula athu ana tunga jinzo adi mulandula mikhuala yawo hakhawo tangua adi mutunga. Idi yadiago egi ndaga mbajikhala tutu-tutu. Gula minganga ashigo mulandula mikhuala ya mudimo wawo tangua adi musaga athu, akhashi ako ajiya gufua. Gula athu adi mukalagala ndaga mugudivua nu mikhuala, ana gudibamba. Luholo lumoshi nji, mikhuala ya Nzambi yatadila ndaga jiabonga nu jiabola yana gutubamba.

8. Gubonga gutshi athu ana zumba gutshita ndaga jiabonga mbaaheta?

⁸ Yehowa wana shimbiga athu ana jinga mu gudivua nu mikhuala yenji. Walayele egi: ‘Athu abonga mbaakhala ha mavu nu mbaajinga hene ivo nu ivo.’ (Ngi. 37:29) Tangiza guhuima nu gusuanguluga mbatukhala nago tangua athu agasue mbaalandula mikhuala ya Yehowa! Yehowa wana tshigina egi tukhale nu lujingu lua luholo elu. Mukut’etu agasue tuana khala diago nu ndaga jiana gututuma ha guzumba ndaga jiabonga! Luholo lutshi tuajiya gukudisa guzumba guetu mukunda nu ndaga jiabonga? Tutadilenu ndaga thathu tuajiya gukalagala.

KUDISA GUZUMBA GUAYE MUKUNDA NU MIKHUALA YA YEHOWA

9. Itshi mbayitukuatesa ha guzumba ndaga jiabonga?

⁹ Ndaga ya thomo: Khala muzumba muthu wana haga mikhuala. Ha guzumba ndaga jiabonga, tudi naye gukudisa guzumba guetu mukunda nu muthu wana haga mikhuala yatadila ndaga jiabonga nu jiabola. Gula tudi muzumba Yehowa muavula, mbayitukuatesa ha gujinga mu gudivua nu mikhuala yenji. Ha gufezegesa: Gula nga Adama nu Eva akhalele muzumba Yehowa akhalelego naye gushiya mukhuala wenji.—Gis. 3:1-6, 16-19.

10. Ndaga itshi Abalahama wakalegele ha gukotelesa matangi’a Yehowa muabonga?

¹⁰ Tuana tshiginago gukalagala gubola gifua gunu guatshitshile Adama nu Eva. Tuajiya gutuna gutshita gubola guene, gula tudi mulandula gulonguga ndaga jiatadila Yehowa, tudi musuanguluga nu makalegelo enji nu tudi mutshita yagasue ha gukotelesa matangi’enji. Gula tuatshita ngenyi, mbatukudisa guzumba guetu mukunda nu Yehowa. Tutadilenu gifezegeselo gia Abalahama. Wakhalele muzumba diago Yehowa. Ngatshima matangua ako yakhalele lamba gudi Abalahama ha gukotelesa badesizio a Yehowa uvi gamulumbugilego. Watshitshile yagasue ha gujiya Yehowa muabonga. Ha gufezegesa, tangua Abalahama wajiyile egi Yehowa udi naye gushiya dimbo dia Sodoma nu Gomola, wavile woma egi ‘Nzuji wa athu agasue a ha mavu’ mbawushiya athu abonga hamoshi nu athu abola. Abalahama wakhalele mutangiza egi ndaga yene yajiyilego gukalegewa ngenyi, hene wahudile Yehowa mihu nu gudibulumuisa guagasue. Yehowa wamuhanele mvutu nu guhuiminyina guagasue. Gungima Abalahama wakotelesele egi, Yehowa wana tala mu mitshima ya athu agasue nu ganago guhana ndola gudi athu abola hamoshi nu athu abonga.—Gis. 18:20-32.

11. Luholo lutshi Abalahama wamonesele egi wana zumba Yehowa nu wana gumushila mutshima?

¹¹ Maga Abalahama watele nu Yehowa mukunda nu dimbo dia Sodoma nu Gomola akuatele diago mutshima wenji. Abalahama wasendesele guzumba Yehowa nu gumunemesa muavula gubalega ha thomo. Gungima dia ivo, gutshigina guenji gudi Yehowa gualolewe diago muavula. Yehowa wamutogele ha guhana mun’enji Izake gifua mulambu. Uvi mutangua diene Abalahama gahudilego Yehowa nga muhu handaga wakhalele gumujiya muabonga. Watshiginyile gukalagala ndaga yamutogele Yehowa. Tangiza lamba diakhalele nadio Abalahama hakhalele gudilondega muene ha guhana mun’enji gifua mulambu! Yajiya gukhala egi watangijile muabonga ndaga jialongugile muene mukunda nu Yehowa. Wajiyile egi Yehowa gajiyilego gukalagala ndaga yabola nga ya khuta. Gifua luholo mupostolo Phaula wamonesele, Abalahama wakotelesele egi Yehowa mbawufuzumuna mun’enji Izake. (Heb. 11:17-19) Yehowa walayele egi Izake mbawubua tata wa gifutshi, uvi mu tangua diene Izake gakhalelego nu ana. Abalahama wakhalele muzumba Yehowa, washile mutshima egi Sh’enji wa mu dilu mbawutshita ndaga mu luholo luatagana. Ngatshima yakhalele lamba mukunda nu muene, uvi gutshigina guamukuatesele ha gutumagela Yehowa.—Gis. 22:1-12.

12. Luholo lutshi tuajiya gulandula gifezegeselo gia Abalahama? (Ngimbo 73:28)

¹² Luholo lutshi tuajiya gulandula gifezegeselo gia Abalahama? Tudi naye gulandula gulonguga ndaga jiatadila Yehowa gifua muatshitshile Abalahama. Gula tuatshita ngenyi, mbatusuena hehi nu Yehowa nu mbatumuzumba muavula. (Tanga Ngimbo 73:28.) Mbayitukuatesa ha gukalagala ndaga gifua muana tshigina Nzambi. (Heb. 5:14) Ngenyi gula muthu mumoshi udi mutshita yagasue hagula tukalagale ndaga yabola, mbatushigo mutshigina. Mbatutuna nji gukalagala ndaga yagasue yajiya gusagesa Tata wetu wa mu dilu nga gubolesa ufuta wetu n’enji. Ndaga itshi iko tuajiya gutshita ha gumonesa egi tuana zumba ndaga jiabonga?

13. Luholo lutshi tuajiya gulandula gukalagala ndaga jiabonga? (Ishima 15:9)

¹³ Ndaga ya mbadi: Lusugu nu lusugu khala mutshita yagasue ha gukudisa guzumba mukunda nu ndaga jiabonga. Tuajiya gukudisa guzumba mukunda nu mikhuala ya Yehowa gifua luholo athu ana kalagala ngolo ha gutshita saga jia gukolesa muila lusugu nu lusugu. Ishigo diago ndaga yakola gudi esue ha gulandula gukudisa guzumba guetu mukunda nu ndaga jiabonga. Yehowa gana khalago muenya ndaga jiakola, gajiyilego gututoga ndaga jinyi tuajiyilego gutshita. (Ngi. 103:14) Biblia yana zuela egi Yehowa ‘wana zumba athu ana landula gutshita ndaga jiabonga.’ (Tanga Ishima 15:9.) Gula tuazula desizio ha gutshita ndaga imoshi mu mudimo wa Yehowa, tuana tshita yagasue ha guditagenesa. Idi nji luholo lumoshi tangua tuana tshita yagasue ha gulandula gukalagala ndaga jiabonga. Yehowa mbawutukuatesa ha gukudisa guzumba guetu mukunda nu ndaga jiabonga lusugu nu lusugu.—Ngi. 84:5, 7.

14. “Gazawu ga ita ha thulo,” gana monesa itshi nu mukunda natshi tudi naye gukhala nago?

¹⁴ Yehowa wana gutuwunguluisa egi gukalagala ndaga jiabonga ishigo ginemo. (1 Yone 5:3) Uvi yana gutubamba nu tuana khala nu funu ya ubambi wene lusugu nu lusugu. Tudi mujiya muabonga iluilo ya mu nyuma inyi yamonesele mupostolo phaula. (Ef. 6:14-18) Giluilo gitshi giakhalele mubamba mutshima wa suta? Yakhalele “gazawu ga ita ha thulo,” gana monesa mikhuala yatagana ya Yehowa. Gifua luholo gazawu ga ita ha thulo gana bamba mutshima wa suta, mikhuala yatagana ya Yehowa yana bamba mutshima waye wa gifuanesa, yakotelesa umuthu waye wa mukatshi. Ndaga yene idi mumonesa diago egi idi nu ndando ha gukhala nu gazawu ga ita ha thulo mukatshi dia iluilo yaye!—Ish. 4:23.

15. Luholo lutshi wajiya gusudiga gazawu ga ita ha thulo?

¹⁵ Luholo lutshi wajiya gusudiga gazawu ga ita ha thulo? Wajiya gutshita ngenyi gula udi mutangigiza ndaga jiana tshigina Nzambi gutuama dia guzula badesizio. Tangua udi mutomba ndaga udi naye guzuela, miziki udi naye gutegelela, saga udi naye gutala, nga mikanda udi naye gutanga dihule egi: ‘Ndaga jitshi ngudi muzalesa mu mutshima wami? Ndaga jiene jiana suanguluisa Yehowa ba? Nga ndo jiana kudisa makalegelo abola gifua uthambi, khuta, nzala ya ima ya ngane, gukamba phamba gubonga guaye hakhaye, ndaga jidi jiabola gu meso a Yehowa ba?’ (Fili. 4:8) Gula udi muzula badesizio mu gudivua nu gutshigina gua Yehowa, mbawubamba mutshima waye mu ndaga jiabola.

16-17. Luholo lutshi Yeshaya 48:18 idi gutukuatesa ha gujiya egi tuajiya gujinga mu gudivua nu mikhuala ya Yehowa?

¹⁶ Wana gudisagesa ha gujiya gula mbawulandula gujinga mu gudivua nu mikhuala ya Yehowa masugu agasue ba? Tutadilenu ndaga jiazuelele Yehowa mu Yeshaya 48:18. (Tanga.) Yehowa walayele egi ndaga jiabonga tuana tshita mbajikhala ‘gifua matshipha-tshipha a muta wakoma.’ Tangiza gale egi udi ya gumagana gu khulo ya muta wakoma, udi mutala luholo matshipha-tshipha adi muthuphuga holu dia muta. Tangua udi ha fundo diene, wajiya gudisagesa egi gudi nu lusugu matshipha-tshipha mbaabemba guthuphuga holu dia muta? Ndo sha! Handaga udi mujiya egi matshipha-tshipha ana tshita ngenyi sendese mualeha nu mbaalandula gutshita ngenyi.

¹⁷ Ndaga jiabonga wana kalagala jiajiya gukhala gifua matshipha-tshipha a muta! Luholo lutshi? Gula udi mutshigina guzula desizio, kamba thomo gujiya ndaga Yehowa wana tshigina egi ukalagale. Gungima tshita ndaga yene. Ngatshima idi lamba ha guzula desizio diene, Yehowa Tata waye wa guzumba mbawuguhana ngolo nu mbawugukuatesa ha gulandula gutumagela mikhuala yenji lusugu nu lusugu.—Yesh. 40:29-31.

18. Mukunda natshi tushigo naye gusophesa athu ako?

¹⁸ Ndaga ya thathu: Bembenu egi Yehowa hakhenji a sophese. Ngatshima tuana tshita yagasue ha gujinga mu gudivua nu mikhuala ya Yehowa tushigo naye gusophesa athu ako nga gutangiza egi tuana kalagala ndaga jiabonga gubalega athu ako. Ishigo ginemo gietu ha gukamba gujiya gula athu ako ana kalagala ndaga jiana toga Yehowa nga ndo. Tudi naye guwunguluga egi Yehowa udi ‘Nzuji wa athu agasue a ha mavu.’ (Gis. 18:25) Gatuhanelego ginemo gia gusophesa. Yesu wazuelele egi: “Bembenu gusophesa athu hagula enue nji musophesewago.”—Mat. 7:1.b

19. Luholo lutshi Yozefe wamonesele egi wakhalele musha mutshima mu usopheshi wa Yehowa?

¹⁹ Tutadilenu luko gifezegeselo gia Yozefe. Gakhalelego musophesa athu ako, nga anyi a mukalegele gubola. Aphangi’enji amukalegele ndaga jiabola, amusumbishile mu uhiga nu awambelele sh’awo egi washiyiwe. Gungima dia ivo, Yozefe wadimonele luko nu aphagi’enji. Mu tangua diene wakhalele fumu, ngenyi wakhalele naye guakalegela ndaga nu khuta nu guavutudila gubola. Aphangi’enji avile woma egi wajiya guakalegela ndaga mu luholo elu ngatshima adisagesele diago mukunda nu ndaga akalegele. Uvi Yozefe wawambelele egi: “Muvuigo woma. Ame ngudi ha fundo dia Nzambi ba?” (Gis. 37:18-20, 27, 28, 31-35; 50:15-21) Wakotelesele nu gudibulumuisa guagasue egi, phamba Yehowa wakhalele naye gusophesa aphangi’enji.

20-21. Mukunda natshi tushigo naye gutangiza egi tudi athu abonga gubalega athu ako?

²⁰ Tuana bemba ndaga jiagasue ha mago a Yehowa gifua muatshitshile Yozefe. Ha gufezegesa, tuana kambago gujiya ndaga yatumi phangi’etu ha gukalagala ndaga imoshi ngenyi. Tuajiyilego gujiya ndaga jidi mu mitshima ya athu ako; phamba ‘Yehowa wana jiya itshi yana tuma muthu ha gutshita ndaga.’ (Ish. 16:2) Yehowa wana zumba athu a maluholo agasue, a mafundo agasue nu a ifutshi yagasue. Wana gutuwambela ha ‘gukangula diago mitshima yetu.’ (2 Kol. 6:13) Tuana tshita yagasue ha guzumba aphangi’etu agasue ha fundo dia guasophesa.

²¹ Idi nji mukotelesa egi tushigo naye gusophesa athu anyi ashigo Matemue a Yehowa. (1 Tim. 2:3, 4) Wajiyilego guzuela mukunda nu muenya fami yenu mumoshi egi, “Muthu yowu mbagashigo mubua Temue wa Yehowa!” Gutshita ngenyi gushigo ndaga yabonga, mbatumomesa gifua esue tudi athu abonga gubalega athu ako. Yehowa wana hana “athu a mu mafundo agasue” luendu lua gubalumuna mutshima. (Makal. 17:30) Tushigo naye gujimbila egi gutangiza egi tudi athu abonga gubalega athu ako idi khadilo diabola.

22. Mukunda natshi udi naye guzula desizio dia guzumba ndaga jiabonga?

²² Guzumba guetu mukunda nu mikhuala ya Yehowa yatadila ndaga jiabonga, guana gutubatela gusuanguluga nu guana kuatesa athu ako ha gukuata ufuta nu esue nu Nzambi. Tubembigo guvua “nzala nu luhungu lua ndaga jiabonga.” (Mat. 5:6) Jiya egi Yehowa wana suanguluga luholo wana tshita ngolo ha gukalagala ndaga jiabonga. Khala nu gikhesa, handaga ha mavu awa athu adi mutshita ndaga jiabola muavula! Ujimbilago egi ‘Yehowa wana zumba athu abonga.’—Ngi. 146:8.