Yehowa Watotesele Gubola Guakalegele Athu mu Tangua Dikulu

Phamba mulambu wa Yesu wakhalele naye gutotesa gubola guetu. (Ef. 1:7) Uvi Biblia idi muzuela egi: “Nzambi watotesele gubola guakalegele athu mu tangua dikulu,” gutuama egi Yesu ahane monyo wenji gifua mulambu. (Roma 3:25, mbimbi goshiʼa diyiji) Yehowa wana kalagala ndaga mu luholo lua tagana, na luholo lutshi wadiangele gutotesa gubola gua athu gutuama egi gibawu gihanewe?

Yehowa walayele egi “vungu” dia mukhetu mbadihuluisa athu ana monesa gutshigina gudi muene nu mu ndaga jiana laya muene. Tangua diazuelele muene ndaga yene, yakhalele gifua mulambu wene wahanewa gale. (Gis. 3:15; 22:18) Nzambi wakhalele mujiya egi gushigo nga gima gimoshi mbagikanga Mun’enji njila ha guhana mulambu mu tangua diatombele muene. (Gal. 4:4; Heb. 10:7-10) Tangua Yesu wakhalele ha mavu, Yehowa wamuhanele ufumu wa gutotesela athu gubola gutuama egi mulambu wuhanewe. Yesu wakhalele mutotesela athu akhalele musha gutshigina gudi muene handaga wakhalele mujiya egi mulambu wenji mbawuza mutotesa gubola guawo.​—Mat. 9:2-6.