LONGO DIA 2
LUNGIMBO 132 Désormais, nous ne faisons qu’un
Aphangi a Mala, Khalenu Munemesa Akaji’enu
“Enue mala, . . . khalenu muhana akhetu ginemua.”—1 PHET. 3:7.
MU GUHIHIA
Tuza mumona luholo mala ajiya gunemesa akaji’awo mu ndaga adi muzuela nu jinyi adi mukalagala.
1. Mukunda natshi Yehowa watuhanele khapho dia ulo?
YEHOWA udi “Nzambi wa gusuanguluga,” wana tshigina nji egi tukhale nu gusuanguluga. (1 Tim. 1:11) Watuhanele ima yavula hagula tukhale nu gusuanguluga. (Yak. 1:17) Ulo udi mukatshi dia ima yene. Tangua yala nu mukhetu ana gudizula mu ulo, ana gudiloga egi mbaadizumba nu mbaadinemesa. Gula yala nu mukhetu adi gudizumba muavula ana khala nu gusuanguluga.—Ish. 5:18.
2. Luholo lutshi mala avula ana kalegela akaji’awo ndaga?
2 Ndaga ya lamba idi egi, mangino athu avula ana buita mutshima mu ndaga adilayele mu lusugu lua ulo wawo. Gishina giene ana khalago nu gusuanguluga. Rapore ihe-ihe ya Organisation Mondiale de la Santé idi mumonesa egi, mala avula ana beta akaji’awo, ana guawambela mbimbi jiabola nu ana guasagesa mu matangi. Mala ana kalagala ndaga jia luholo elu, ana monesa gu meso a athu gifua ana zumba akaji’awo uvi mu jinzo ana guamonesa lamba. Ma ulo avula ana bola gula mala adi mutala pornografi.
3. Mukunda natshi mala avula ana kalegela akaji’awo ndaga mu luholo luabola?
3 Mukunda natshi mala avula ana kalegela akaji’awo ndaga mu luholo luabola? Yajiya gukhala egi ash’awo akhalele mukalegela a mama awo ndaga mu luholo luabola, hene ana mona egi ishigo ndaga yabola gula ene nji atshita ngenyi. Yajiya nji gukhala egi fundo ana khala, athu ana zuela egi ha gumonesa egi udi “diago yala” udi naye gukalegela mukhetu ndaga jidi mumonesa egi udi fumu. Ako alongesewego luholo lua gudikanda nga lua gutulula khabu jiawo. Mala ako ana tala pornografi lusugu nu lusugu, gishina giene ana tadila akhetu nu gubungisa muila mu luholo luabola. Rapore imoshi idi mumonesa egi mu tangua dia misongo ya Corona virus mala avula akhalele musagesa akaji’awo muavula mu ndaga yatadila gubungisa muila nga mu ndaga jiko. Uvi ndaga eji jiagasue tuatanga jishigo naye gutuma yala nga hazonda ha gukalegela mukaji’enji ndaga nu khuta.
4. Mu ndaga itshi Aklisto a mala adi naye gumonesa gutema? Mukunda natshi?
4 Mala ana kombelela Yehowa ashigo naye gutangiza gifua luholo mala a ha mavu awa ana tangiza.a Mukunda natshi? Handaga ndaga yana tangiza muthu, yene yana tshita muene. Mupostolo Phaula watemesele Aklisto a gu Roma anyi ambiwe maji mu nyuma egi: “Mubembigo egi ndaga jia ha mavu awa jimituameze.” (Roma 12:1, 2) Tangua Phaula wasonegele Aklisto a gu Roma mukanda owu, Aklisto ene akhalele atagenesa gale ivo yavula mu ulondegi wa Yehowa. Yadiago, mbimbi jia Phaula jidi mumonesa egi Aklisto ako mukatshi diawo akhalele mutangiza nu gutshita ndaga gifua enya ha mavu awa. Gishina giene Phaula waakuatesele ha gusombegesa luholo luawo lua gutangiza nu lua gutshita ndaga. Malongo ene adi nji mutadila aphangi a Aklisto a mala. Uvi ndaga ya gikenene idi egi ako mukatshi diawo ana landula matangi abola a enya ha mavu awa nu ana kalegela akaji’awo ndaga mu luholo luabola.b Luholo lutshi Yehowa wana tshigina egi yala akalegele mukaji’enji ndaga? Mvutu ya muhu owu idi mu verse yakuata muto wa lumene wa longo edi.
5. Ha gutadila 1 Phetelo 3:7 luholo lutshi yala udi naye gukalegela mukaji’enji ndaga?
5 Tanga 1 Phetelo 3:7. Yehowa wana toga mala ha gunemesa akaji’awo. Yala udi munemesa mukaji’enji wana gumukalegela ndaga nu guzumba nu gisemo giagasue. Mu longo edi tuza mumona luholo yala wajiya gumonesa egi wana nemesa mukaji’enji. Uvi thomo tutadilenu ndaga jiana monesa egi yala gashigo muzumba nga gunemesa mukaji’enji.
UKALAGALAGO NDAGA JIAJIYA GUSAGESA MUKAJI’AYE
6. Luholo lutshi Yehowa wana tadila mala ana beta akaji’awo? (Kolosai 3:19)
6 Yala gashigo naye gubeta mukaji’enji. Yehowa ganago gutshigina muthu wana kalagala ndaga nu khuta. (Ngi. 11:5) Wana tuna mala anyi ana kalegela akaji’awo ndaga nu khuta. (Mal. 2:16; tanga Kolosai 3:19.) Ha gutadila mukanda wa 1 Phetelo 3:7, gula yala udi mukalegela mukaji’enji ndaga mu luholo luabola, ufuta wenji nu Yehowa mbawushigo mukhala wabonga. Nga yene isambu yenji Yehowa gajiyilego guyivua.
7. Ha gutadila Efeso 4:31, 32 mbimbi jia luholo lutshi yala gashigo naye guwambela mukaji’enji? (Tala nji “Ukoteleshi wa Mbimbi.”)
7 Yala gashigo naye gubalela (kudingila) mukaji’enji nga gumuwambela mbimbi jiabola. Mala ako ana gubalela akaji’awo nu ana guawambela mbimbi jiabola. Uvi Yehowa wana tuna “khabu nu gubundumuga nu matululu nu mbimbi jiabola.”c (Tanga Efeso 4:31, 32.) Muene wana guvua ndaga jiagasue. Yehowa wana guvua ndaga yala wana wambela mukaji’enji ikhale tangua adi muyadi’awo gu inzo. Yala udi muwambela mukaji’enji mbimbi jiabola, wana bolesa wulo wenji nu ufuta wenji nu Yehowa.—Yak. 1:26.
8. Luholo lutshi Yehowa wana tadila pornografi? Mukunda natshi?
8 Yala gashigo naye gutala pornografi. Luholo lutshi Yehowa wana tadila pornografi? Wana guyituna. Hene yala udi mutala ifuanesa ya usala, wana bolesa ufuta wenji nu Yehowa nu gana nemesa ndo mukaji’enji.d Yehowa wana tshigina egi yala akhale yagujinginyina gudi mukaji’enji mu makalegelo nu mu matangi. Yesu wazuelele egi yala wagasue udi mulandula gutala mukhetu munu gashigo mukaji’enji nu matangi a gubungisa n’enji muila, wakalagala gale n’enji uthambi mu “mutshima wenji.”e—Mat. 5:28, 29.
9. Mukunda natshi Yehowa ganago gutshigina egi yala abungisa muila nu mukaji’enji gu ngolo?
9 Yala gashigo naye gushinjiga mukaji’enji ha gubungisa nenji muila gu ngolo. Mala ako ana shinjiga akaji’awo ha gubungisa nawo muila mu luholo ashigo mutshigina. Yehowa wana tuna khadilo edi diabola nu wana tuna athu ana kamba phamba gubonga guawo. Yehowa wana tshigina egi yala azumbe mukaji’enji, amukalegele ndaga nu gisemo nu anemese matangi enji. (Ef. 5:28, 29) Ndaga itshi Muklisto udi naye gutshita gula wakalegele mukaji’enji ndaga mu luholo luabola gifua gubungisa n’enji muila gu ngolo nga gutala pornografi? Itshi yajiya gumukuatesa ha gusombegesa matangi nu makalegelo enji?
NDAGA JIAJIYA GUKUATESA YALA HA GUBEMBA MAKALEGELO ABOLA
10. Gubonga gutshi mala ajiya guheta mu gifezegeselo gia Yesu?
10 Itshi yajiya gukuatesa yala ha gutuna gukalegela mukaji’enji ndaga mu luholo luabola nu gutuna khadilo dia gubungisa n’enji muila gu ngolo? Udi naye gutshita ngolo ha gulandula gifezegeselo gia Yesu. Ikhale Yesu gakhalelego nu mukhetu, uvi wahanele gifezegeselo giabonga mu luholo luakhalele muene mukalegela alandudi enji ndaga. Hene aphangi a mala adi naye gulandula gifezegeselo gienji. (Ef. 5:25) Ha gufezegesa, tutadilenu malongo mala ajiya guzula mu luholo Yesu wakhalele mukalegela apostolo enji ndaga nu luholo luakhalele guawambela muene ndaga.
11. Luholo lutshi Yesu wakhalele mukalegela apostolo enji ndaga?
11 Yesu wakhalele mukalegela apostolo enji ndaga nu gisemo giagasue nu wakhalele guanemesa. Gakhalelego guawambela mbimbi jiabola nga gudimona gifua waabalega. Yesu wakhalele nu ngolo jiavula gubalega alandudi enji, uvi gakalegelego ngolo jiene ha guamonesa egi ashigo nu ngolo nga guahana woma. Uvi wakhalele guakalegela ndaga nu gudibulumuisa guagasue. (Yone 13:12-17) Wawambelele alandudi enji egi: “Ame mbangumilongesa handaga ngudi muthu wahuima nu wa gudibulumuisa.” (Mat. 11:28-30) Yesu wakhalele muthu wahuiminyina nu wa gudibulumuisa. Gukhala muthu wahuiminyina gushigo mukotelesa egi ushigo nu ngolo. Yesu wakhalele nji nu khadilo dia gudikanda. Tangua athu akhalele muzuela ndaga jiabola mukunda nu muene, wakhalele muhena tedie nu gudikanda.
12. Luholo lutshi Yesu wakhalele muwambela athu ako ndaga?
12 Yesu wakhalele muhana athu ako gikhesa mu mbimbi jienji. Gakhalelego muwambela alandudi enji mbimbi jiabola. (Luka 8:47, 48) Tangua athu akhalele gumushingana nu gumuhana khabu, “muene gavutudilego mashingo.” (1 Phet. 2:21-23) Mu matangua ene, Yesu wakhalele muhena tedie ha fundo dia guahana mvutu yabola. (Mat. 27:12-14) Wabembele diago gifezegeselo giabonga gudi mala a Aklisto!
13. Luholo lutshi yala wajiya gusala ‘yagujinginyina’ gudi mukaji’enji? (Matayo 19:4-6) (Tala nji gifuanesa.)
13 Yesu walongesele mala ha gusala ya gujinginyina gudi akaji’awo. Wavutugile ndaga jiazuelele Shi’enji egi yala udi naye ‘gudibungisa nu mukaji’enji.’ (Tanga Matayo 19:4-6.) Mbimbi ya Greke yakalegewa haha ha guzuelela ‘gudibungisa’ idi mumonesa “gujinginyina.” Idi mumonesa egi yala nu mukaji’enji adi naye gukhala bobobo mu guzumba guawo. Gula muthu mumoshi wakalagala ndaga idi musagesa muko, mukut’awo agasue mbaatagana nu malamba. Yala wana zumba mukaji’enji muavula diago wana tuna gutala pornografi mu maluholo agasue. Wana katula mu phushi meso enji hagula egi atadigo ‘ima ya gituhu.’ (Ngi. 119:37) Wana tshita yagasue hagula atadigo akhetu ako nu matangi agubungisa nawo muila gifua muatshitshile Yobo.—Yobo 31:1.
Yala mumoshi wa gujinginyina gudi mukaji’enji watuna gutala pornografi (Tala paragrafe 13)g
14. Ndaga jitshi yala munu wana kalegela mukaji’enji ndaga nu khuta udi naye gutshita ha gulondega ufuta wenji nu Yehowa nu mukaji’enji?
14 Yala udi mubeta mukaji’enji nga gumuwambela ndaga jiabola, udi naye gutshita ndaga jiavula ha gulondega luko ufuta wenji nu Yehowa nu mukaji’enji. Ndaga jiene jidi itshi? Thomo, udi naye gujiya egi ndaga yakalagala muene idi mulonga wakoma diago handaga gumeso a Yehowa gushigo nga nu ndaga ya gisuegi. (Ngi. 44:21; Mulo. 12:14; Heb. 4:13) Ya mbadi, udi naye gubemba gukalegela mukaji’enji ndaga jiabola nu gusombegesa makalegelo enji. (Ish. 28:13) Ya thathu, udi naye gutoga mukaji’enji nu Yehowa ha gumutotesela. (Makal. 3:19) Udi naye nji gububila Yehowa ha gumukuatesa ha gusombegesa matangi enji nu makalegelo nu mbimbi jienji. (Ngi. 51:10-12; 2 Kol. 10:5; Fili. 2:13) Ya nguana, udi naye gutshita ndaga mu gudivua nu isambu yenji nu gutuna ndaga jiakhuta nu mbimbi jiabola. (Ngi. 97:10) Ya thano, udi naye guya mbala imoshi gudi akulu ha gumukuatesa. (Yak. 5:14-16) Ya samano, udi naye gutshita ndaga jiajiya gumukuatesa ha gutuna makalegelo abola mu masugu adi muza. Yala wana tala pornografi udi naye nji gutshita ndaga eji tuazuelela. Yehowa mbawumushimbiga mukunda nu gikhesa gidi mutshita muene ha gusombegesa makalegelo enji. (Ngi. 37:5) Yala muene gashigo naye phamba gubemba makalegelo awa abola, uvi udi naye nji gunemesa mukaji’enji. Mu luholo lutshi?
NDAGA WAJIYA GUTSHITA HA GUNEMESA MUKAJI’AYE
15. Luholo lutshi yala wajiya gumonesa egi wana zumba mukaji’enji?
15 Khala gumumonesa egi wana gumuzumba. Lusugu nu lusugu aphangi a mala anyi ana khala nu gusuanguluga mu ulo wawo, ana kalegela akaji’awo ndaga ha guamonesa egi ana guazumba diago. (1 Yone 3:18) Yala wajiya gumonesela mukaji’enji guzumba mu ndaga jiazonda-zonda gifua, gumukuata gu koko nga gumuhana beze. Wajiya gumutumina mesaje mu lusugu ha gumuwambela egi “ngumuvua uhote waye” nga gumuhula egi “mudimo udi mubalega muabonga ba?” Wajiya nji gutomba mbimbi jiabonga ha gumusonegela mukanda udi mumonesa egi wana gumuzumba muavula. Gula yala udi mutshita ndaga eji, mbawumonesa egi wana nemesa mukaji’enji nu mbawukolesa ufuta wawo.
16. Mukunda natshi phangi wa yala udi naye gushimana mukaji’enji?
16 Khala gumuhana mersi. Yala wana zumba mukaji’enji wana gumuwambela ndaga jiana gumutuma ha gumunemesa nu wana gumushimana. Wajiya guyitshita gula udi muhana mersi mukunda nu ndaga jiana tshita mukaji’enji ha gumukuatesa. (Kol. 3:15) Gula yala udi muwambela mukaji’enji ndaga jiana gumutuma ha gumuzumba, mukaji’enji mbawudivua mu ubambi nu mbawudivua egi mulumi’enji wana gumuzumba nu wana gumunemesa.—Ish. 31:28.
17. Luholo lutshi yala wajiya gumonesa egi wana nemesa mukaji’enji?
17 Khala gumumonesela gisemo nu gumunemesa. Yala wana zumba mukaji’enji wana gumuzula nu ndando nu wana gumubamba muabonga. Wana gumuzula gifua kado ga ndando gakatuga gudi Yehowa. (Ish. 18:22; 31:10) Ngenyi wana gumukalegela ndaga nu gisemo giagasue nu ginemua ikhale tangua adi mubungisa muila. Gajiyilego nji gushinjiga mukaji’enji ha gubungisa nenji muila mu luholo ludi gumusagesa, ludi gumuhana musonyi nga ludi gumusagesa mu matangi.f Yala udi naye nji gutshita ngolo ha gubamba mutshima waphelegeta gutuama dia Yehowa tangua adi mubungisa muila nu mukaji’enji.—Makal. 24:16.
18. Aphangi a mala adi naye guzula desizio dia gutshita itshi? (Tala nji galuanda, “Ndaga Nguana Aphangi a Mala Ajiya Gutshita ha Gumonesa egi ana Nemesa Akaji’awo.”)
18 Aphangi a mala, muajiya gusha mutshima egi Yehowa wana mona nu wana suanguluga muavula luholo muana tshita ngolo ha gunemesa akaji’enu mu ndaga muana zuela nu jinyi muana tshita. Tshitenu ngolo ha gutuna gukalagala nga ndaga imoshi yajiya gusagesa akaji’enu. Uvi khalenu guakalegela ndaga nu gisemo, nu ginemua nu guamonesa egi muana guazumba. Gula muatshita ngenyi, mbamumonesa egi muana guazumba nu muana guazula nu ndando. Yala udi munemesa mukaji’enji mbawubamba ufuta wenji wabalega ndando, yakotelesa egi ufuta wenji nu Yehowa.—Ngi. 25:14.
LUNGIMBO 131 “Nzambi Waabungisa Hamoshi”
a Aphangi a mala adi naye gutanga longo didi muzuela egi: “Wana Kalegela Aphangi a Akhetu Ndaga Gifua Luholo Yehowa Wana Guakalegela ba?” mu Inzo Yaleha ya Mutaledi ya Janvier 2024.
b Gula mulumi’aye nga mukaji’aye wa gukalegela ndaga mu luholo luabola, wajiya guheta gubonga gula watanga longo didi muzuela egi: “De l’aide pour les victimes de violences conjugales” ha fundo dia sonegewa egi “Divers” mu jw.org nu mu JW Library.
c UKOTELESHI WA MBIMBI: Guzuela “mbimbi jiabola” gudi mukotelesa guzuela mbimbi jia khuta nga gushingana muthu hagula adivue egi ashigo muthu wabonga. Yajiya nji gumonesa gulandula guwunguluisa muthu ndaga yanago gugusuanguluisa gu muila wenji. Ndaga yagasue yala wawambela mukaji’enji ha gumusagesa nga ha gumushingana idi mbimbi jiabola.
d Tala longo didi muzuela egi, “La pornographie peut briser votre couple.” mu jw.org nu mu JW Library.
e Phangi wa mukhetu munu udi nu yala wana tala pornografi wajiya guheta gubonga gula watanga longo didi muzuela egi: “Itshi Wajiya Gutshita Gula Mulumi’aye nga Mukaji’aye Wana Tala Pornografi?” mu Inzo Yaleha ya Mutaledi ya Aout 2023.
f Biblia yanago guzuelela ndaga jiazonda-zonda jidi mumonesa luholo luabonga nga luabola yala nu mukaji’enji adi naye gulandula ha gubungisa muila. Hene tangua Aklisto adizudile gale mu ulo adi mutshigina gubungisa muila, adi naye gukalagala ndaga jidi mumonesa egi ana tumbuisa Yehowa, adi naye nji gutshita ngolo ha gudisuanguluisa nu gubamba mutshima waphelegeta. Mu guzuela guabonga, aphangi adizudile gale mu ulo ashigo naye guwambela athu ako ndaga eji jia gisuegi jiatadila ulo wawo.
g UKOTELESHI WA GIFUANESA : Athu ana tshita mudimo nu phangi mumoshi wa yala adi mukamba gumutalesa pornografi gu mukanda umoshi.