LONGO DIA 34
LUNGIMBO 3 Nzambi udi Ngolo Jiami, Felela Diami, Gutshigina Guami
Khala Musha Mutshima egi Yehowa Wana Gugutotesela
‘Aye wangutotesele gubola guami.’—NGI. 32:5.
MU GUHIHIA
Tuza mutadila verse jia Biblia jiana monesa egi Yehowa wana gututotesela gula tuabalumuna mutshima; tuza nji mumona mukunda natshi tudi naye gutshigina ndaga yene.
1-2. Itshi Yehowa wana tshita gula tuabalumuna mutshima mu gubola guetu? (Tala nji gifuanesa holu dia gizula.)
FUMU Davidi wavuile gikenene giavula mukunda nu gubola guakalegele muene. (Ngi. 40:12; 51:3; nu mbimbi jidi holu dia mukhapho) Uvi wabalumuine mutshima, gungima Yehowa wamutotesele. (2 Sam. 12:13) Davidi wasuangulugile tangua diakotelesele muene egi Yehowa wamutotesela.—Ngi. 32:1.
2 Esue nji tuajiya gukhala nu gusuanguluga gula tuakotelesa egi Yehowa watuvuila khenda nu watutotesela, gifua mutshitshile muene nu Davidi. Tuana khala nu gusuanguluga ha gujiya egi gula tuabalumuna mutshima, tuawambela akulu gubola tuakalagala nu tuatshita yagasue ha gutuna guvutugila gubola guene, Yehowa wana khala hehi ha gututotesela ikhale gubola guene gudi guakoma luholo lutshi! (Ish. 28:13; Makal. 26:20; 1 Yone 1:9) Tuana khala nji nu gusuanguluga ha gujiya egi gula Yehowa watutotesela, gajiyilego luko gutuhana ndola mukunda nu gubola guene!—Ezek. 33:16.
Fumu Davidi wasonegele ngimbo jiavula jiana monesa luholo Yehowa wana gututotesela (Tala paragrafe 1-2)
3-4. Luholo lutshi phangi mumoshi wa mukhetu wadivuile gungima dia gubatijiwa guenji? Itshi tuza muzuelela mu longo edi?
3 Matangua ako, yajiya gukhala lamba gudi athu ako ha gutshigina egi Yehowa waatotesela. Yene ndaga yakhalele mutangiza phangi Jennifer. Mvuaji jienji jiamulongesele giamatshidia; uvi hakhalele muene muvuala, wasendesele guwenda kulu mu njila kulu mu foto. Uvi ivo yavula gungima, wasombegesele makalegelo enji, gungima wabatijiwe. Udi muzuela egi: “Ngakhalele mutshita uthambi, gukolewa matombe, ngakhalele nji muvua khabu muphushi; mukunda nu ame, makuta akhalele nu ndando yavula mu monyo wami. Ngakhalele mujiya egi Biblia yana zuela egi Yehowa wana gututotesela gubola guetu mu njila ya mulambu wa Yesu. Uvi ngakhalelego mutshigina egi Yehowa wajiya gungutotesela gubola guami.”
4 Matangua ako, yana khala nji lamba gudi aye ha gutshigina egi Yehowa wagutotesele gale gubola guaye ba? Gula udi gudivua ngenyi, wunguluga luholo Davidi wadivuile mukunda nu khenda jia Yehowa. Wakhalele mujiya egi Yehowa wamutotesele gubola guenji handaga wakhala Nzambi wa khenda. Yehowa wana tshigina egi esue nji tudivue ngenyi. Mu longo edi, tuza muzuelela gishina tudi naye gutshigina egi Yehowa wana gututotesela nu ndaga jiajiya gutukuatesa ha gutshigina ndaga yene.
MUKUNDA NATSHI TUDI NAYE GUTSHIGINA EGI YEHOWA WANA GUTUTOTESELA?
5. Itshi Satana wana kamba gututshiginyisa? Hana gifezegeselo.
5 Gula tudi mutshigina egi Yehowa wana gututotesela, mbayitukuatesa ha gutuna gubua mu miheto ya Satana. Tujimbilago egi Satana wana tshigina gutukanga njila ha gukombelela Yehowa. Ha gufezegesa, Satana wana tshigina gututshiginyisa egi Yehowa gajiyilego gututotesela gubola guetu. Tangiza ndaga yabuidile yala mumoshi wa gu Kolinto wakalegele uthambi nu wazolewe mu hungu. (1 Kol. 5:1, 5, 13) Habalumuine muene mutshima, Satana watshiginyile egi aphangi a mu hungu diene atune gumutotesela nu gumuyamba luko mu hungu. Wakhalele nji mutshigina egi yala muene atangize egi Yehowa gajiyilego gumutotesela nu alandule ‘guvua gikenene giavula gubalega’ hagula abembe gukombelela Yehowa. Satana wana landula gukalegela miheto nu bametode a luholo elu uu nu mangino. Uvi esue tuana ‘jiya muabonga matangi’enji.’—2 Kol. 2:5-11.
6. Itshi yajiya gutukuatesa gula tudi mulandula gudisagesa mukunda nu ndaga yabola tuakalegele?
6 Gula tudi mutshigina egi Yehowa wana gututotesela, yajiya gutukuatesa ha gukhala luko nu gusuanguluga. Tangua tuana kalagala gubola, tuana guvua gikenene mukunda nu ndaga yene. (Ngi. 51:17) Gudivua ngenyi gudi ndaga yabonga. Gikenene giene giajiya gututuma ha gusombegesa makalegelo etu nu gutshita ndaga jiabonga. (2 Kol. 7:10, 11) Uvi gula tualandula guvua gikenene, yajiya gututuma ha guleba muila nu gubemba gukombelela Yehowa. Gula tudi musha mutshima egi Yehowa wana gututotesela, mbayitukuatesa ha gukhala luko nu gusuanguluga. Mbayitukuatesa nji ha gulandula gumukombelela nu mutshima waphelegeta nu gusuanguluga handaga Yehowa wana tshigina egi tudivue ngenyi. (Kol. 1:10, 11; 2 Tim. 1:3) Itshi yajiya gutukuatesa ha gutshigina egi Yehowa wana gututotesela?
ITSHI YAJIYA GUTUKUATESA HA GUTSHIGINA EGI YEHOWA WANA GUTUTOTESELA?
7-8. Ndaga jitshi Yehowa wana gutuwambela? Mukunda natshi tudi naye gusha mutshima mu ndaga jiene? (Guzoga 34:6, 7)
7 Khala mutangiza ndaga jiana zuela Yehowa. Ha gufezegesa, tala ndaga Yehowa wawambelele Moize gu Mulundu wa Sinayi.a (Tanga Guzoga 34:6, 7.) Yehowa wana khala nu makalegelo avula abonga, uvi wamonele egi idi ndaga yabonga ha guwambela Moize egi udi “Nzambi wa khenda nu wa gisemo.” Udi mutangiza egi Nzambi wa luholo elu wajiya gukanga mutshima ha gutuna gutotesela muthu wabalumuna diago mutshima ba? Ndo sha! Yehowa gajiyilego gukalagala ndaga yabola ya luholo elu.
8 Tuajiya gusha mutshima egi tangua Yehowa wana zuela egi udi Nzambi wa khenda wana zuela giamatshidia handaga muene ganago gumba mambo. (Ngi. 31:5) Tudi naye gutshigina ndaga jiagasue jiana zuela muene. Gula udi gudisagesa mukunda nu gubola wakalegele, dihule egi: ‘Ngana tshigina egi Yehowa Nzambi wa khenda nu wa gisemo gajiyilego gukanga mutshima ha gutuna gutotesela muthu wagasue wabalumuna diago mutshima ba?’ Gula idi ngenyi, wajiya gusha mutshima egi wagutotesele gale gubola guaye.
9.Ngimbo 32:5 idi gutulongesa itshi mu luholo Yehowa wana gututotesela gubola guetu?
9 Khala mutangiza ndaga jiana zuela Biblia jiatadila luholo Yehowa wana totesela athu. Ha gufezegesa, tala ndaga jiasonegele Davidi mukunda nu khadilo dia gutotesela dia Yehowa. (Tanga Ngimbo 32:5.) Wazuelele egi: ‘Aye wangutotesele gubola guami.’ Mbimbi ya Hebelu yana balumuiwa egi “gutotesela” yajiya nji gukotelesa egi “guzangula,” “gukatula,” nga “gubata.” Hene, tangua Yehowa watotesele Davidi, yakhalele gifua wamukatudile ginemo gianema giakhalele mubata muene. Davidi wasuangulugile handaga wakhalele mujiya egi Yehowa wamutotesele diago gubola guenji. (Ngi. 32:2-4) Esue nji tuajiya nji gukhala nu gusuanguluga gua luholo elu. Gula tuabalumuna diago mutshima, tushigo luko naye gubata ginemo gia gubola tuakalegele handaga Yehowa watutotesele gale.
10-11. Mbimbi ‘wana khala hehi ha gutotesela athu’ jidi gutulongesa itshi mukunda nu Yehowa? (Ngimbo 86:5)
10 Tanga Ngimbo 86:5. Mu verse eyi, Davidi udi muzuela egi Yehowa ‘wana khala hehi ha gutotesela athu.’ Yakotelesa egi Yehowa ganago guvua khabu muphushi gula tuakalagala ndaga yabola, wana khala nji hehi ha gututotesela gula tuabalumuna diago mutshima. Mukunda natshi Yehowa wana khala ngenyi? Gitshinyi gia mbadi gia verse yene gidi muzuela egi: ‘Wana monesa guzumba gua giamatshidia gudi athu agasue ana gugutamega.’ Gifua luholo tuayimonyi mu longo diabalega, Yehowa wana monesa guzumba gua giamatshidia gudi athu ana gumuzumba nu mbagashigo guabemba nga hazonda. Hene, gula akalagala gubola uvi abalumuna mutshima, Yehowa mbawulandula guamonesela guzumba gua giamatshidia nu mbawatotesele nu mutshima umoshi. (Yesh. 55:7.) Gula idi lamba ha gutshigina egi Yehowa wajiya gugutotesela, dihule egi: ‘Ngana tshigina diago egi Yehowa wana khala hehi ha gutotesela athu agasue ana balumuna mutshima nu ana gumutoga ha guavuila khenda ba? Gula idi ngenyi, ngajiya diago gusha mutshima egi wangutotesele tangua ngamutogele ha gunguvuila khenda nu gungutotesela.’
11 Tuajiya nji gukhala nu gusuanguluga gula tudi mujiya egi Yehowa wana jiya egi tushigo athu atagana nu tuana tshita nji ndaga jiabola matangua ako. (Ngi. 139:1, 2) Tutadilenu ndaga yazuelele Davidi mu mukhapho uko wa mukanda wa Ngimbo nu luholo ndaga yene yajiya gutukuatesa ha gusha mutshima egi Yehowa wana tshigina gututotesela.
NDAGA JITSHI YEHOWA WANA JIYA MUKUNDA NU ESUE?
12-13. Ha gutadila Ngimbo 103:14, ndaga itshi Yehowa wana jiya mukunda nu esue? Ndaga yene yana gumutuma ha gutshita itshi?
12 Tanga Ngimbo 103:14. Davidi wazuelele egi Yehowa ‘wana jiya egi tudi fuluguta dia mavu.’ Mu verse yene, Davidi udi mumonesa egi ndaga yana tuma Yehowa ha gukhala hehi ha gutotesela akombeledi enji abalumuna mutshima idi handaga wana jiya egi tushigo athu atagana nu tuana tshita nji gubola matangua ako. Ha gukotelesa ndaga yene muabonga, tukambenu gujiya ndaga iko Davidi wakhalele mutshigina guzuela hasonegele muene mbimbi jiene.
13 Davidi wasonegele egi Yehowa wana ‘jiya muabonga luholo tuafugiwe.’ Wafugile Adama “nu fuluguta dia mavu,” wana jiya muabonga egi ikhale ene athu atagana ana khala nji nu funu ya ima iko gifua gudia, gubanda nu guhuima. (Gis. 2:7) Uvi tangua Adama nu Eva akalegele gubola, gukhala fuluguta dia mavu guasendesele nji gukotelesa ndaga iko. Luholo tudi ajigulu awo, tuana khala fuluguta dia mavu handaga tuana vualewa athu ashigo atagana, ndaga yene yana gututuma ha gutshita ndaga jiabola. Yehowa wana jiya ndaga yene muabonga. Uvi tangua Davidi wazuelele egi Yehowa ‘wana jiya’ egi tudi fuluguta dia mavu, wakhalele nji mutshigina guzuela egi Yehowa wana jiya egi tushigo athu atagana nu wana gutukalegela ndaga tangua diagasue nu khenda nu gisemo. Mu guhihia, tuajiya gukotelesa mbimbi jia Davidi mu mu luholo elu: Yehowa wana jiya egi matangua ako tuana kalagala ndaga jiabola; uvi gula tuabalumuna mutshima, wana gutuvuila khenda nu wana gututotesela.—Ngi. 78:38, 39.
14. a) Ndaga itshi iko yazuelele Davidi yatadila luholo Yehowa wana gututotesela? (Ngimbo 103:12) b) Malongo atshi tuajiya guzula mu luholo Yehowa watotesela Davidi? (Tala galuanda “Luholo Yehowa Wana Totesela Athu Gubola nu Wana Buita Gubola Guene Mutshima.”)
14 Ndaga itshi iko yajiya gututuma ha gutshigina egi Yehowa wana gututotesela? (Tanga Ngimbo 103:12.) Davidi wazuelele egi tangua Yehowa wana gututotesela, wana bishila gubola guetu gualeha ‘gifua luholo mazogelo a kumbi [est] ana khala gualeha nu mayilo a kumbi [ouest].’ Fundo diana zogela kumbi diakhala gualeha diago nu fundo diana yila kumbi; mafundo ene mbadi ajiyilego gudita nga hazonda. Ndaga yene idi gutulongesa itshi mukunda nu gubola gunu Yehowa wana gututotesela? Mukanda umoshi wana kotelesa verse yene wana zuela egi, Nzambi wana bishila gubola guene gualeha nu esue gifua luholo vumba dia gima diana tota gula gima giene gishigo luko hene. Muene mbagashigo luko mutangiza ndaga yene nga gutuwunguluisa nayo. Matangua ako, vumba dia gima gimoshi ngenyi diajiya gutuwunguluisa ndaga imoshi yakalegewe mualeha. Uvi gula Yehowa watotesela muthu gubola, gushigo nga gima gimoshi giajiya gumutuma ha guwunguluga luko gubola guene nga ha guzula desizio dia gumuhana ndola mukunda nu gubola guenji.—Ezek. 18:21, 22; Makal. 3:19.
15. Itshi tuajiya gutshita gula tudi mulandula gudisagesa mukunda nu gubola tuakalegele?
15 Luholo lutshi ndaga jiasonegele Davidi mu mukanda wa Ngimbo mukhapho 103 jiajiya gutukuatesa ha gutshigina egi Yehowa wana gututotesela? Tangiza ndaga jiana jiya Yehowa mukunda nu esue. Wana jiya egi tushigo athu atagana, wana totesela athu agasue ana gudibela mukunda nu gubola akalegele nu ana balumuna diago mutshima gifua luholo aye nji wayikalegele. Jiya nji egi gula Yehowa wagutotesela gubola gumoshi ngenyi, muene gana tangizago luko gubola guene nu mbagashigo guguwunguluisa nga guguhana ndola mukunda nu gubola guene. Yehowa gana landulago gutangiza gubola tuakalegele mu masugu abalega. Esue nji tushigo naye gutshita ngenyi. (Ngi. 130:3) Gula tudi musha mutshima egi Yehowa wana gututotesela, mbayitukuatesa ha gubemba gudisagesa mukunda nu gubola tuakalegele nu ha gulandula gumukombelela nu gusuanguluga guagasue.
16. Itshi yajiya gutubuila gula tudi mulandula gudisagesa mukunda nu gubola tuakalegele? Hana gifezegeselo. (Tala nji gifuanesa.)
16 Tutadilenu gifezegeselo egi. Gula muthu udi muwendesa gamiyo, matangua ako wajiya gutala mu rétroviseur ha gumona gula nanyi udi muza gungima dienji. Uvi gula udi mulandula gutala tangua diagasue gungima, wajiya gukalagala aksida handaga gashigo mutala guma gudi muya muene. Gula udi mutshigina guwendesa gamiyo gene muabonga, udi naye gutala gu matuama. Luholo lumoshi nji, ishigo ndaga yabola gula matangua ako tudi mutangiza gubola tuakalegele; gutshita ngenyi guajiya gutukuatesa ha gutuna guvutugila luko gubola guene. Uvi gula tudi mulandula gudisagesa muavula mukunda nu gubola tuakalegele, yajiya gutshita egi tukhadigo luko nu gusuanguluga, yajiya nji gutukanga njila ha gudihana muavula mu mudimo wa Yehowa. Ha fundo dia gutshita ngenyi, tulandulenu gukombelela Yehowa nu gutangigiza ndaga jiatulayele muene mukunda nu masugu adi muza tangua ‘mbatushigo luko muwunguluga ndaga jia mualeha.’—Yesh. 65:17; Ish. 4:25.
Gifua luholo muthu udi muwendesa gamiyo udi naye gutala guma gudi muya muene ha fundo dia gutala muavula mu rétroviseur, esue nji tudi naye gutangiza muavula ishimbigo mbatuheta mu masugu adi muza ha fundo dia gutangiza ndaga jiabola tuakalegele (Tala paragrafe 16)
LANDULA GUSHA MUTSHIMA EGI YEHOWA WANA GUGUTOTESELA
17. Mukunda natshi tudi naye gulandula gusha mutshima egi Yehowa wana gutuzumba nu wana gututotesela?
17 Tudi naye gulandula gusha mutshima egi Yehowa wana gutuzumba nu wana gututotesela. (1 Yone 3:19) Mukunda natshi? Handaga Satana mbawulandula gutshita yagasue ha gututuma ha gutshigina egi Yehowa ganago gutuzumba nu ganago gututotesela. Felela dienji diakhala dia gututuma ha gubemba gukombelela Yehowa. Luholo gisugishilo gia mavu awa giasuena hehi, Satana mbawulandula guvudisa miheto yenji handaga udi mujiya egi tangua diamusala didi diazonda. (Gumo. 12:12) Tulandulenu guluisa Satana nu gukombelela Yehowa nu gujinginyina guagasue!
18. Itshi wajiya gutshita gula udi mutshigina gukolesa gutshigina guaye egi Yehowa wana guguzumba nu wana gugutotesela?
18 Gula udi mutshigina gukolesa gutshigina guaye egi Yehowa wana guguzumba, kalegela malongo tualongugile mu longo diabalega. Uvi gula udi mutshigina gukolesa gutshigina guaye egi Yehowa wana gugutotesela, landula gutangigiza ndaga jiana zuela muene. Khala nji mutangigiza ndaga Biblia yana zuela mukunda nu khadilo dienji dia gutotesela. Ubuitshigo mutshima egi Yehowa wana jiya muabonga egi ushigo muthu watagana nu mbawulandula gugukalegela ndaga nu khenda jiagasue nu gisemo. Ujimbilago nji egi gula Yehowa wagutotesela, wana guyikalagala nu mutshima wagasue. Ngenyi, aye nji mbawukhala nu gusuanguluga handaga udi mujiya egi Yehowa wana guguvuila khenda nu mbawuzuela gifua Davidi egi: “Mvudi yavula Yehowa handaga wangutotesele ‘gubola guami’!”—Ngi. 32:5.
LUNGIMBO 1 Makalegelo a Yehowa
a Tala longo “Approchez-vous de Dieu : Quand Jéhovah s’est décrit aux humains” mu Inzo Yaleha ya Mutaledi ya 1 Mai 2009 ya français.
UKOTELESHI WA GIFUANESA Holu dia gizula: Fumu Davidi wasonegele ngimbo jiavula jiana monesa luholo Yehowa wana gututotesela.