Mukanda wa Mbadi wa Mafumu
1 Gungima dia gufua gua Ahaba, enya gu Moaba alumbugidile enya Isalele.
2 Mu tangua diene, Ahaziya wakhalele gu Samaliya. Wabuile ha hulu diakhalele ha yangi dia sugu yenji ya gosa fundo atshuigile mabaya, wanamenele. Watumile athu, waawambelele egi: “Ndenu muhule Bale-Zebuba, nzambi wa gu Ekrone, ha gujiya gula mbanguvua muabonga nga ndo.” 3 Uvi muanjelo wa Yehowa wawambelele Eliya* muenya gu Tishebe egi: “Zuga, nda utagane nu athu atumi fumu wa gu Samaliya. Ahule egi: ‘Gushigo nu Nzambi gu Isalele hene mudi muya ha guhula Bale-Zebuba, nzambi wa gu Ekrone ba? 4 Gishina giene Yehowa wazuela egi: “Mbawushigo muzuga ha gitanda udi ya gubanda, mbawudi mufua.”’” Gungima Eliya wayile.
5 Tangua athu ene avutugile gudi Ahaziya, waahudile mbala imoshi egi: “Muavutuga mukunda natshi?” 6 Amuvutudile egi: “Tuatagana nu muthu mumoshi, watuwambela egi: ‘Vutugenu gudi fumu wamitumi, muwambelenu egi: “Yehowa wazuela egi: ‘Gushigo nu Nzambi gu Isalele hene watuma athu ha guya muhula Bale-Zebuba, nzambi wa gu Ekrone ba? Gishina giene, mbawushigo muzuga ha gitanda udi ya gubanda, mbawudi mufua.’”’” 7 Waahudile egi: “Muthu muene muatagana n’enji munu wamiwambela mbimbi eji wakhadi luholo lutshi?” 8 Amuwambelele egi: “Muthu muene wakhadi wa gusudiga mulele wa uvuji wa shitu nu mukaba wa gilema gia shitu ha kete.” Ahaziya wazuelele mbala imoshi egi: “Idi Eliya muenya gu Tishebe.”
9 Fumu Ahaziya watumile fumu wa masuta 50 nu masuta enji 50 gudi Eliya. Tangua diayile muene, Eliya wakhalele ya gukhala gu songi ya mulundu. Wawambelele Eliya egi: “Muthu wa Nzambi wa giamatshidia, fumu wazuela egi: ‘Bulumuga.’” 10 Uvi Eliya wavutudile fumu wa masuta 50 egi: “Gula ngudi muthu wa Nzambi, tshuya tukatuge mu dilu, tugukonde aye nu masuta aye 50.” Tshuya tuakatugile mu dilu, tuamukondele nu masuta enji 50.
11 Fumu Ahaziya watumile fumu muko wa masuta 50 nu masuta enji 50. Fumu muene wayile muwambela Eliya egi: “Muthu wa Nzambi wa giamatshidia, fumu wazuela egi: ‘Bulumuga muphushi.’” 12 Uvi Eliya wamuvutudile egi: “Gula ngudi muthu wa Nzambi wa giamatshidia, tshuya tukatuge mu dilu, tugukonde aye nu masuta aye 50.” Tshuya tua Nzambi tuakatugile mu dilu, tuamukondele nu masuta enji 50.
13 Gungima Ahaziya watumile fumu wa thathu wa masuta 50 nu masuta enji 50. Uvi hayile fumu wa thathu wa masuta 50, wafugamele gutuama dia Eliya, wasendesele gumububila ha gumuvuila khenda. Wazuelele egi: “Muthu wa Nzambi wa giamatshidia, ngabuba, monyo wami nu monyo wa enya mudimo aye wawa 50 ukhale nu ndando gu meso aye. 14 Tshuya tuakatuga gale mu dilu, tuakondi mafumu mbadi a masuta 50 nu mahunji awo a masuta 50. Uvi henyaha ngabuba, monyo wami ukhale nu ndando gu meso aye.”
15 Muanjelo wa Yehowa wawambelele Eliya egi: “Bulumuga n’enji. Umuvuilago woma.” Hene Eliya wazugile, wabulumugile n’enji gudi fumu. 16 Eliya wawambelele fumu egi: “Yehowa wazuela egi: ‘Watumi athu ha guya muhula Bale-Zebuba, nzambi wa gu Ekrone. Watshitshi ngenyi handaga gushigo nu Nzambi gu Isalele ba? Mukunda natshi watunyi gumuhula? Gishina giene, mbawushigo muzuga ha gitanda udi ya gubanda, mbawudi mufua.’” 17 Gungima Ahaziya wafuile gifua luholo luazuelele Yehowa mu njila ya Eliya. Ahaziya gakhalelego nu mona wa yala, hene Yolama* wabuile fumu ha fundo dienji mu givo gia mbadi gia uhinyinyi wa Yolama mun’a Yosafata, fumu wa gu Yuda.
18 Ndaga jiko jiakalegele Ahaziya nu ima yatshitshile muene, idi ya gusonega mu mukanda wa mene jia mafumu a gu Isalele.