Yesu Wasendesa Gubuisa Athu Alandudi

Yesu watshitshile masugu 40 mu mavu a luselenga. Gutuama dia guvutuga gu Galile, Yesu wavutugile gudi Yone Mubatiji. Tangua gakhalele muza, Yone wamumonele nu wazuelele egi: “Tadienu Mon’a Gimeme wa Nzambi udi mukatula gubola gua ha mavu. Muen’you ungakhalele muzuela egi: ‘Muthu udi muza gungima diami wangubalega gukoma ndaga ya muene wadiangele gukhala gutuama diami ame khenji nguvualewa gale ndo.’” (Yone 1:29, 30, NW) Yone wakhalele mukulutu wa Yesu, uvi wakhalele mujiya egi Yesu wadiangele gujinga mu dilu gutuama dienji, nu muila wa mu nyuma.

Phoso jiazonda gutuama, Yesu wayile gudi Yone hagula amubatize, uvi Yone gatshiginyilego diago egi Yesu wakhalele Masiya. Yone wazuelele egi, ‘Ame ngamujiyilego, uvi ngajile mubatiza athu nu meya hagula muene ajiyishiwe gudi enya Isalele.’—Yone 1:31.

Yone wawambelele athu akhalele gumutegelela ndaga jia kalegewe tangua gakhalele muene mubatiza Yesu: “Ngamonele nyuma ya Nzambi mubulumuga mu dilu gifua yembe, yamaganele holu dienji. Ngakhalelego mujiya egi wakhalele nanyi. Uvi Nzambi wago wangutumine ha gubatiza athu nu meya wanguwambelele egi: ‘Muthu wagasue mbawumona nyuma ya Nzambi mubulumuga holu dienji, muene muthu mbawubatiza athu nu nyuma ya Nzambi.’ Ngamonele ndaga yene. Ngajiyishile athu egi muthu yowu, udi mun’a Nzambi.”—Yone 1:32-34, NW.

Mu lusugu lualanduile, Yone wakhalele nu alandudi enji mbadi, wamonele luko Yesu yowu muza. Wazuelele egi: “Tadienu, Mon’a Gimeme wa Nzambi!” (Yone 1:36) Tangua alandudi enji mbadi avile mbimbi eji, alanduile Yesu. Mumoshi jina dienji André. Yajiya gukhala egi mulandudi muko munu muene wasonegele ndaga eji, jina dienji Yone. Yone wakhalele mun’a Zebede nu Salome, phangi’a Mariya. Hene, yajiya gukhala egi wakhalele gisonyi gia Yesu.

Yesu wabalumugile, wamuenene André nu Yone adi gumulandula, waahudile egi: ‘Itshi mudi mukamba?’

Ene amuhudile egi: ‘Rabi, wana khala gui?’

Yesu wawambelele egi: “Ijienu mumone.”—Yone 1:37-39.

Mu kumbi dia nguana gungima dia midi, André nu Yone akhalele nu Yesu lusugu lua mudidi. André wakhalele nu gusuanguluga guavula, hene wayile phushi mukamba phangi’enji Simona, wana tamegewa luko egi Phetelo. Wamuwambelele egi: “Tuamona Masiya.” (Yone 1:41) André wabatele Phetelo gudi Yesu. Ndaga jia kalegewe gungima jia monesele egi Yone nji wayile musanga phangi’enji Yakoba, enji wamubatele gudi Yesu. Uvi, tangua gasonegele muene mukanda wa Yone, gasonegelego ndaga jia kalegele muene lusugu lunu.

Mu lusugu lua landuile, Yesu wamonele Filipho wa gu dimbo dia Betesayida. Dimbo diene diakhalele hehi nu nordi ya bungu dia Kianga gia Galile. André nu Phetelo akhalele nji enya gu dimbo dia Betesayida. Yesu watamegele Filipho, wamuwambelele egi: ‘Ngulandule.’—Yone 1:43.

Gungima, Filipho wasangele Natanaele, wana gutamegewa luko egi Bartelemi, wamuwambelele egi: ‘Tuamona muthu wago wazuelele Moise mu mikhuala nu wasonegele ngambi jia Nzambi egi: Yesu, mun’a Yozefe, wa gu dimbo dia Nazaleta.’ Natanaele washile giphapha, hene wahudile Filipho egi: “Gima giabonga giajiya guzoga mu Nazaleta ba?”

Filipho wamuwambelele egi: “Za gale umone.” Hamuenene Yesu Natanaele muza gudi muene, wazuelele egi: ‘Tala, muenya Isalele wa diago, yonu gashigo nu mambo nga azonda.’

Natanaele wamuhudile egi: “Wangujiya luholo lutshi?”

Yesu wamuvutudile egi: ‘Gutuama egi Filipho agutamege, ngagumonyi tangua wakhadi ha mushin’a mutshi wa figi.’

Natanaele wadihudile, wazuelele egi: ‘Rabi, aye udi Mun’a Nzambi, aye udi Fumu wa Isalele.’

Yesu wamuhudile egi: ‘Watshigina handaga ngagudijiga egi ngagumonyi tangua wakhadi ha mushin’a mutshi wa figi? Mbawumona ndaga jiko jiabalega ndaga eyi gukoma.’ Gungima, Yesu walayile egi: “Ngudi gumiwambela giamatshidia egi, mbamumona dilu dia gutuwuga nu anjelo mukanduga nu mubulumuga holu dia Mun’a Muthu.”—Yone 1:45-51.

Matangua azonga gungima, Yesu nu alandudi enji ahe-ahe akatugile gu baba dia Yordani, ayile gu Galile.