Ndaga Itshi idi Naye Gukalegewa mu Lusugu lua Guhuluguga?

Mu lusugu luko lua Guhuluguga, Yesu wayile mu Sinagoga, yajiya gukhala gu Galile. Wasangele yala mumoshi guene; koko dienji dia madia diakhalele dia gumigina. (Luka 6:6) Alongeshi a mikhuala nu Afalese akhalele mutala Yesu muabonga diago. Mukunda natshi? Matangi awo amonegele haphelo tangua ahudile Yesu egi: ‘Mukhuala udi mutuhana njila ha gusaga muthu mu Lusugu lua Guhuluguga ba?’—Matayo 12:10.

Mafumu a mangumba a enya Yuda akhalele mujiya egi mukhuala ushigo muhana njila ha gusaga muthu mu Lusugu lua Guhuluguga; wajiya gusagewa phamba gula lujingu luenji ludi mu gingonza. Gula muthu wasaga gifuwa gia muthu udi wa guboga nga wakanga mulele ha phuta yenji mu Lusugu lua Guhuluguga, wakhalele mushiya mukhuala, handaga ndaga eji jia khalelego mumba lujingu lua muthu mu gingonza. Idi yadiago egi alongeshi a mikhuala nu Afalese ahudilego Yesu handaga akhalele muvua gikenene mukunda nu Yala munu wakhalele nu koko dia gumigina. Akhalele mukamba luholo lua gumushiya.

Uvi, Yesu wajiyile matangi awo abola. Wakotelesele egi akhalele nu matangi abola, akhalelego gudivua nu mbimbi ya Nzambi mu ndaga yatadila gushiya mukhuala wakhalele mutunyisa gukalagala mudimo mu Lusugu lua Guhuluguga. (Guzoga 20:8-10) Watagenele gale luko nu umbalagaji wa luholo elu mukunda nu midimo yenji yabonga. Gungima, Yesu wazuelele ndaga ya tumine mbalagaji jienji ha gumumonesa luko lamba diavula. Wadijigile yala wakhalele nu koko dia gumigina egi: ‘Zuga, magana mukhatshi.’—Mako 3:3.

Yesu wabalumugine gudi alongeshi a mikhuala nu Afalese, waadijigile egi: ‘Muthu mutshi mukatshi dienu gula udi nu gimeme gimoshi, enji giabua mu wina mu Lusugu lua Guhuluguga, muene gatunyi genji gugikuata ha gugizola?’ (Matayo 12:11) Gimeme giakhalele muta makuta. Hene, ajiyilego gugibemba egi gibande mu wina uu nu hamene; gula ndo giajiya gufua mu phipha, enji adifudi makuta. Luko, mukanda wa Nzambi wana guzuela egi: ‘Muthu wabonga wana gutala muabonga shitu jienji gana gufuga.’—Ishima 12:10.

Ha gumonesa diago egi ndaga eji mbadi jidi jia gudivua, Yesu wazuelele egi: “Ndando ya muthu yabalega ya gimeme gukoma! Ngenyi mukhuala wetu udi mutuhua njila ya gutshita ndaga yabonga mu Lusugu lua Guhuluguga.” (Matayo 12:12) Luholo lumoshi nji, Yesu gashiyilego mukhuala tangua gasagele muthu mu Lusugu lua Guhuluguga. Mafumu a mangumba amonelego luholo lua gutuna matangi abonga a luholo elu adi mumonesa khenda. Ahenele tedie.

Yesu wavile gikenene giavula mu mutshima mukunda nu matangi awo abola, hene waatalele nu jikhabu. Gungima, wawambelele yala wakhalele nu koko dia gumigina egi: ‘Sununa koko diaye.’ (Matayo 12:13) Tangua muthu muene gasunuine koko dienji, wasagewe. Wasuangulugile diago. Uvi itshi mbalagaji jia Yesu jia kalegele mukunda nu ndaga eyi?

Ha fundo dia gusuanguluga luholo koko dia muthu muene diasagewe, Afalese azogele, ayile giphungi ‘nu enya Helode ha gushiya Yesu.’ (Mako 3:6) Mukatshi dia enya politiki awa, muakhalele nji nu enya mangumba ana gutamegewa egi Asadoke. Asadoke nu Afalese akhalelego gudivua nga hazonda, uvi mu tangua dinyi, adibungishile diago ha gushiya Yesu.