Referanse jia Mukanda wa Gukalegela mu Gudibungisa gua Lujingu nu Mudimo wa Uklisto
MAI 6-12
UMONYI UDI MU MBIMBI YA NZAMBI | 2 KOLINTO 4-6
“Tushigo Mubemba Ndo”
(2 Kolinto 4:16, NWT) Hene, tushigo mubemba ndo. Uvi, ikhale mila yetu ya uthu idi muya nu gubola, uthu wetu wa mukatshi udi mubuishiwa uhe-uhe lusugu nu lusugu.
w04-F 15/8 diyiji 25 par. 16-17
Tulebigo Muila nga Tuahuila
16 Gula tudi muzula ndaga jia mu nyuma nu ndando, idi ndaga yabalega gubonga. Ngatshima tudi nu ufuta wawaha nu Yehowa Nzambi, matangua ako tuajiya guleba muila nga guhuila. Uvi tuajiyilego guhuila ha gumukombelela. Yehowa, muene ‘wana guhana ngolo gudi muthu udi waguleba nu gudi athu adi aguhuila.’ (Yeshaya 40:28, 29) Mupostolo Phaula wakotelesele egi mbimbi eji jia Yeshaya jidi jia giamatshidia. Hene, wasonegele egi: “Tushigo mubemba ndo. Uvi, ikhale mila yetu ya uthu idi muya nu gubola, uthu wetu wa mukatshi udi mubuishiwa uhe-uhe lusugu nu lusugu.”—2 Kolinto 4:16, NWT.
17 Mbimbi eji “lusugu nu lusugu” jidi mumonesa egi Yehowa wana gutuhana ima tudi nayo funu lusugu nu lusugu. Phangi mumoshi wa mukhetu wakhalele mu mudimo wa gimisionere ivo 43. Mu tangua dimoshi ngenyi, wahuidile nu muila wamulebele. Uvi gabembelego ndo. Phangi muene udi muzuela gamba: “Ngakhalele muzuga nu gimenegena ha gukombelela Yehowa nu gutanga Biblia, gutuama egi ngutshite midimo iko. Gukalagala ngenyi lusugu nu lusugu, guangukuatesele ha gukolesela uu nu mangino.” Gula tudi mukombelela Yehowa “lusugu nu lusugu,” nu tudi mutangigiza makalegelo enji nu ndaga jiatulayile muene, mbayitukuatesa ha gumushila mutshima egi mbawutuhana ngolo.
(2 Kolinto 4:17, NWT) Handaga ngatshima lamba didi mukunda nu tangua diazonda nu dishigo dianema, diana gutuhana lutumbu ludi mulandula gukoma nu ludi musala ivo nu ivo;
it-1-F diyiji 759-760
Endurance
Idi luko nu ndando egi tutotesago felela dietu dia uklisto dia gukatuga mu uhiga wa gubola nu gukhala nu monyo wa ivo nu ivo. Ikhale mbalagaji jietu jidi mukamba gutushiya, tushigo naye gutotesa felela dietu. (Lomo 5:4, 5; 1Tes 1:3; Yat 2:10) Malamba tudi mutagana nawo mangino adi azonda diago gula tuafuanesa nu gubonga mbatuheta tangua felela edi mbaditagana. (Lomo 8:18-25) Muthu udi nu felela dia monyo wa ivo nu ivo, ikhale watagana nu lamba diakola luholo lutshi, wana gumona egi lamba diene “didi mukunda nu tangua diazonda nu dishigo dianema.” (2Kol 4:16-18) Muthu udi mujiya egi malamba adi mutagana nawo adi mukunda nu tangua diazonda, nu muene udi wagujinginyina mu felela dia Aklisto, gajiyilego gutotesa felela dienji, nu gajiyilego gushiya mikhuala ya Yehowa Nzambi.
(2 Kolinto 4:18) tangua tuana guhaga meso etu mu ima idi mumonega, uvi ndo mu ima idi ishigo mumonega. Handaga ima idi mumonega idi mukhala tangua diazonda, uvi ima idi ishigo mumonega idi mukhala ivo nu ivo.
Kamba Ndaga Jiko jia Ndando jia mu Nyuma
(2 Kolinto 4:7, NWT) Uvi esue tudi mubata umonyi owu mu nzungu jia uma, hagula ngolo jinyi jiabalega ngolo jia athu, jikhale jia Nzambi uvi jietu ndo.
w12-F 1/2 diyiji 28-29
“Suanguluisa Yehowa”
Phangi David Splane, wa mu Hunji dia Akulu Atuameji, wakotelesele verse ya muto wa lumene. (2 Kolinto 4:7) Umonyi adi muzuelela mu verse eyi udi itshi? Udi gutema? Ndunge? Phangi Splane wazuelele egi: “Ndo. Umonyi wakhalele muzuelela mupostolo Phaula udi ‘mudimo owu wa gulongesa’ wa ‘gujiyisa giamatshidia.’” (2 Kolinto 4:1, 2, 5) Phangi Splane walezele ana khalasa egi mbeji thano abalegesele ene mu khalasa dia Galadi, jiakhalele ha guakuatesa ha gudilondega muabonga mukunda nu mudimo wa gulongesa. Mudimo wene udi gima gimoshi gia ndando yavula.
Phangi Splane wamonesele luko egi “nzungu jia uma” jidi mumonesa muila wetu wa uthu. Wamonesele gudisha gudi mukatshi dia nzungu jia kalegewe nu uma nu nzungu jia kalegewe nu wolo. Nzungu jia wolo anago gujikalegela muavula. Uvi nzungu jia uma, athu ana gujikalegela muavula diago. Gula tuamba umonyi mu nzungu ya wolo, matangi a athu ajiya gukhala phamba gu gubonga gua nzungu yene, uvi ndo gu umonyi udi mukatshi. Phangi Splane wazuelele gamba: “Enue ana khalasa, mukambigo egi athu ahage matangi awo gudi enue. Luholo mudi bamisionere, mudimo wenu udi wa gukuatesa athu ha guhaga matangi awo gudi Yehowa. Mudi nzungu jia uma.”
(2 Kolinto 6:13, NWT) Hene, ngudi muzuela gifua ngudi muwambela an’ami, nu enue nji kangulenu diago mitshima yenu.
w09-F 15/11 diyiji 21 par. 7
Landulenu Gukudisa Guzumba Guenu gua Uphangi
7 Esue giwa? Luholo lutshi tuajiya “gukangula diago mitshima” yetu ha gumonesa guzumba gudi aphangi’etu? Matangua avula, athu ana gukamba gukuata ufuta phamba nu athu adi nawo gindongo gimoshi, nga ndo anyi akatugile nawo dimbo dimoshi. Athu ako nji, ana gubalegesa tangua hamoshi phamba nu athu anyi ana guzumba nawo saga jimoshi jia gudikenesa. Uvi, gula ufuta wetu nu aphangi tudi nawo gindongo gimoshi, nga dimbo dimoshi, udi gutukanga njila ya gukuata ufuta nu aphangi ako a Aklisto, idi mutoga egi ‘tukangule diago mitshima yetu.’ Hene, tuajiya gudihula egi: ‘Yakhala lamba egi ngulongese nga ngubalegese tangua hamoshi nu aphangi anyi ashigo mafuta ami ba? Tangua tudi mu Inzo ya Ufumu, ngana gunengena egi aphangi akatuga guza mu hungu dietu, ene adi naye guza gungukamba ha gukuata nawo ufuta ba? Ngana gumenega athu a gukola nu mavuala a mu hungu dietu ba?’
MAI 13-19
UMONYI UDI MU MBIMBI YA NZAMBI | 2 KOLINTO 7-10
“Mudimo wa Gukuatesa Aphangi’etu Anyi Abuidile Lamba”
(2 Kolinto 8:1-3, NWT) Henyaha an’etu, tuatshigina ha enue mujiye gabalu ga khenda ga Nzambi gamonesele muene mahungu a gu Maseduane. 2 Mu sungi ya gulolewa guakola mu tangua dia lamba, gusuanguluga guawo guavula nu uphutu wawo wakola yakalegele egi amonese muavula khadilo diawo dia guhana. 3 Handaga, yakhalele gifua mu gudivua nu ima yawo, ayi, ngumuzuela egi ene ahanene ima gubalega yinyi akhalele nayo,
w98-F 1/11 diyiji 25 par. 1
“Nzambi Wana Guzumba Muthu Wana Guhana nu Gusuanguluga”
Phaula wasendesele thomo guzuelela khadilo diawaha dia Aklisto a gu Maseduane dia gukuatesa aphangi’awo. Wasonegele gamba: “Mu sungi ya gulolewa guakola mu tangua dia lamba, gusuanguluga guawo guavula nu uphutu wawo wakola yakalegele egi amonese muavula khadilo diawo dia guhana.” Aklisto a gu Maseduane ashinjigiwego gu ngolo ha guhana. Phaula wazuelele egi: “Handaga mu gutshigina guawo, akhalele gutububila muavula ha guheta luendu luabonga lua guhana.” Khadilo dia Aklisto a gu Maseduane dia guhana nu gusuanguluga guagasue didi mukuata diago mitshima yetu, handaga ene akhalele “nu uphutu wakola.”—2 Kolinto 8:2-4.
kr-F diyiji 209 par. 1
Mudimo wa Gukuatesa Aphangi’etu Anyi Abuidile Lamba
TUDI mu givo 46 gia tangua dietu. Mu givo giene, dimbo dia Yudea diakhalele nu nzala yakola. Ima ya gudia yakandugile ndando. Alandudi a klisto akhalelego nu falanga jia gusumba ima ya gudia. Akhalele nu nzala yakola diago. Uvi mutangua diene, amonele ukuateshi wa Yehowa akhalele khenji amonele galego.
(2 Kolinto 8:4, NWT) handaga mu gutshigina guawo, akhalele gutububila muavula ha guheta luendu luabonga lua guhana, nu lua gudibungisa mu mudimo wa gukuatesa athu a gijila.
kr-F diyiji 209-210 par. 4-6
Mudimo wa Gukuatesa Aphangi’etu Anyi Abuidile Lamba
4 Mu mukanda wa mbadi mupostolo Phaula wasonegele hungu dia Kolinto, wamonesele egi Aklisto akhala nu midimo mbadi ya ndando ya gutshita. Mukanda wene wasonegewe mukunda nu Aklisto ambiwe gale maji mu nyuma. Uvi mangino, mbimbi jidi mu mukanda wene jidi mutadila nji “imeme iko” ya Klisto. (Yone 10:16) Gitshinyi gia thomo gia mudimo wene gidi “mudimo wa guvutula luko athu gudi [Nzambi],” yakotelesa egi, mudimo wetu wa gumuanga nu gulongesa lukuma luabonga. (2 Kol. 5:18-20; 1 Tim. 2:3-6) Gitshinyi gia mbadi gia mudimo wene gidi mutadila mudimo tuana gutshita mukunda nu gubonga gua aphangi’etu Aklisto. Phaula watamegele mudimdo wene egi ‘mudimo wa gukuatesa aphangi’etu anyi abuidile lamba.’ (2 Kol. 8:4) Mu mbimbi eji mbadi “mudimo wa guvutula luko athu gudi [Nzambi]” nu “mudimo wa gukuatesa aphangi’etu anyi abuidile lamba,” mbimbi “mudimo” yakatuga mu mbimbi jia zuelelo dia Greki diakonia. Idi gutulongesa itshi?
5 Luholo Phaula wakalegele mbimbi imoshi ya zuelelo dia Greki ha guzuelela midimo eyi mbadi, wabungishile mudimo wa gukuatesa athu nu midimo iko yakhalele mutshitshiwa mu hungu dia Uklisto. Muene wadiangele guzuela egi: ‘Midimo ya gukuatesa athu idi ya luholo nu luholo, uvi Fumu udi phamba mumoshi; luko midimo idi ya luholo nu luholo, . . . Uvi [midimo] yene idi mukalegewa gudi nyuma imoshi.’ (1 Kol. 12:4-6, 11) Hene, Phaula wabungishile midimo eyi yakhalele mukalegewa mu hungu nu “mudimo wa gijila.” (Lomo 12:1, 6-8) Tuajiyilego gudihula ha gumona egi wahanele tangua dienji “ha gukuatesa athu a gijila”!—Lomo 15:25, 26, NWT.
6 Mupostolo Phaula wakuatesele Aklisto a gu Kolinto ha gujiya mukunda natshi mudimo wa gukuatesa athu, wakhalele mukatshi dia midimo yawo ya Uklisto nu mu gikombelelo giawo. Matangi enji akhalele egi: Aklisto akhalele mukuatesa aphangi’awo mukunda nu ‘gutumagela lukuma luabonga lua Klisto.’ (2 Kol. 9:13) Yakotelesa egi akhalele mukuatesa aphangi’awo handaga akhalele mutshigina gutumagela malongo a Klisto. Phaula wazuelele gamba ndaga jiabonga jiatshitshile Aklisto mukunda nu gukuatesa aphangi’awo, jiakhalele jiazonda ‘gubalega khenda jiaavuidile Nzambi.’ (2 Kol. 9:14; 1 Phet. 4:10) Mukunda nu mudimo wa gukuatesa aphangi’etu adi mutagana nu malamba, Inzo Yaleha ya Mutaledi ya 1 décembre 1975 yazuelele egi: “Tushigo giphapha (maya) egi Yehowa Nzambi nu mun’enji Yesu Klisto ana guzula mudimo owu nu ndando yavula lume.” Yadiago, mudimo wa gukuatesa aphangi’etu anyi abuidile lamba wakhala lume mudimo wa gijila.—Lomo 12:1, 7; 2 Kol. 8:7; Heb. 13:16.
(2 Kolinto 9:7, NWT) Muthu nu muthu ahane gifua muatangiza muene mu mutshima wenji. Ikhadigo nu mitshima mbadi nga nu gushinjigiwa gu ngolo handaga Nzambi wana guzumba muthu wana guhana nu gusuanguluga.
kr-F diyiji 196 par. 10
Falanga Tuana Gukalegela Midimo Yetu ya Ufumu Jiana Gukatuga Gui?
10 Thomo, tuana guhana misomonyi handaga tuana guzumba Yehowa, nu tuana gutshigina gukalagala ndaga jidi ‘gumusuanguluisa.’ (1 Yone 3:22) Yadiago, Yehowa wana gusuanguluga nu akombeledi enji ana guhana nu mutshima wagasue. Tutadilenu mbimbi jiazuelele mupostolo Phaula mukunda nu khadilo dia Aklisto dia guhana. (Tanga 2 Kolinto 9:7.) Muklisto wa giamatshidia ganago guhana musomonyi nu mitshima mbadi, nga ndo ganago gushinjigiwa gu ngolo ha guhana. Uvi, wana guhana handaga wana ‘gutangiza mu mutshima wenji’ ha gutshita ngenyi. Yakotelesa egi, muene wana gutangiza thomo gishina adi naye guhanela musomonyi, hangima atangiza luholo lua guyikalagala. Muthu wana guhana luholo elu wana gusuanguluisa Yehowa, handaga “Nzambi wana guzumba muthu wana guhana nu gusuanguluga.” Biblia iko idi muzuela egi: “Nzambi wana guzumba athu ana guzumba guhana.”
Kamba Ndaga Jiko jia Ndando jia mu Nyuma
(2 Kolinto 9:15, NWT) Tuhanenu Nzambi mvudi yavula mukunda nu guhana guenji gua khenda gutuajiyilego gukotelesa.
w16.01-F diyiji 12 par. 2
Bemba egi ‘Guhana gua Nzambi gua Khenda Gutuajiyilego Gukotelesa’ Gututume ha Gutshita Ndaga
2 Mupostolo Phaula wajiyile egi ndaga jiagasue jiawaha jialayile Nzambi, jiakhalele naye gutagenesewa mu njila ya mulambu watagana wa Klisto. (Tanga 2 Kolinto 1:20.) ‘Guhana gua Nzambi gua khenda gutuajiyilego gukotelesa’ guakhalele mutadila nji gubonga nu guzumba guagasue guatumonesele Yehowa mu njila ya Yesu. Yadiago, guhana guene gudi guabalega gukoma handaga esue athu tuajiyilego gukotelesa. Guhana ogu gua Nzambi gua khenda gudi naye gututuma ha gukalagala itshi? Gudi naye gututuma ha gutshita ndaga jitshi ha tudi gudilondega ha Guwunguluga Gufua gua Klisto, mu lusugu lua thathu 23 mars 2016?
(2 Kolinto 10:17, NWT) “Uvi, muthu udi gudisunzula, adisunzule mukunda nu Yehowa.”
g99-F 8/7 diyiji 20-21
Gudisunzula Gudi Ndaga Yabola Ba?
Mu Écritures grecques chrétiennes, mbimbi adi mukalegela ha guzuelela “gudisunzula” idi kaukhaomaï. Uvi, gudisunzula guakhala mu maluholo mbadi: guawaha nu guabola. Mupostolo Phaula wazuelele egi, tudi naye ‘gudisunzula ha guzegemena mu felela dietu dia lutumbu lua Nzambi.’ Wazuelele luko gamba: “Muthu udi gudisunzula, adisunzule mukunda nu Yehowa.” (Lomo 5:2; 2 Kolinto 10:17, NWT) Yakotelesa egi tudisunzule luholo Yehowa adi Nzambi wetu. Ngenyi mbayitutuma ha guditumbuisa mukunda nu lukuma luenji nu jina dienji diawaha.
MAI 20-26
UMONYI UDI MU MBIMBI YA NZAMBI | 2 KOLINTO 11-13
“‘Misongo Yakola’ ya Phaula”
(2 Kolinto 12:7) Ngenyi ame ngudikanduisago muavula gubalega, mukunda nu guvula gua ndaga jia gushimana jia ngudijigiwe. Mu muila wami mudi misongo yakola yangujile gifua mutumiwi wa Satana ha gungubeta nu gungujitshiga hagula ame ngudikanduisago muavula gubalega.
w08-F 15/6 diyiji 3-4
Akhalele nu Ngolo Ngatshima Akhalele Athu Aleba
Mukombeledi muko wa Nzambi watogele Yehowa ha gumukuatesa mu ndaga imoshi yakhalelego muhua mu phushi. Wayitamegele egi, “misongo yakola.” Mupostolo Phaula wabubidile Nzambi mahugo thathu ha gumukuatesa mu lamba diene. Ikhale lamba diene diakhalele luholo lutshi, gifua misongo yakola, diamanesele gusuanguluga guenji mu mudimo wa Yehowa. Phaula wamonesele egi lamba diene diakhalele gifua muthu adi mulunduga gubeta. Yehowa wamulezele gamba: “Gabalu ga khenda ngamonesa mukunda nu aye, gadi gatagana; handaga ngolo jiami jidi mubua jiatagana ha udi waguleba.” Yehowa gakatudilego misongo yene mu muila wa Phaula. Mupostolo Phaula wakhalele naye gulua nu misongo yene. Uvi wazuelele luko egi: “Ha ngudi waleba, hene ngudi wakola.” (2 Kol. 12:7-10) Yakotelesa itshi?
(2 Kolinto 12:8, 9, NWT) Ngatogele Fumu mahugo thathu ha muene gungukatula mu lamba edi. 9 Uvi muene wanguwambelele egi: “Gabalu ga khenda ngamonesa mukunda nu aye, gadi gatagana, handaga ngolo jiami jidi mubua jiatagana ha udi waguleba.” Hene, ngudi nu gusuanguluga ha gudisunzula mu guleba guami, hagula ngolo jia Klisto jingubambe gifua tenta.
w06-F 15/12 diyiji 24 par. 17-18
Yehowa Wana Guhana “Nyuma Yenji Gudi Athu Ana Guyitoga”
17 Ha guhana mvutu gu gutoga gua Phaula, Nzambi wamuwambelele gamba: “Gabalu ga khenda ngamonesa mukunda nu aye, gadi gatagana, handaga ngolo jiami jidi mubua jiatagana ha udi waguleba.” Wazuelele luko egi: “Hene, ngudi nu gusuanguluga ha gudisunzula mu guleba guami, hagula ngolo jia Klisto jingubambe gifua tenta.” (2 Kolinto 12:9; Ngimbo 147:5) Mupostolo Phaula wamonele egi mu njila ya Klisto, ngolo jia Nzambi jiamubambele gifua tenta. Mangino nji, Yehowa wana gutuhana mvutu gu isambu yetu mu luholo lumoshi luatagana. Yehowa wana gubamba akombeledi enji gifua luholo mutshi wa vule wana gubamba athu mu tangua dia muanya.
18 Yadiago, tenta yanago gukanga mvula ha gunoga, yanago gukanga muhehe ha gubalega. Uvi yana gubamba athu mu tangua dia mvula nu muhehe. Luholo lumoshi nji, “ngolo jia Klisto” jiana gutubamba gifua mutshi wa vule. Uvi jianago gukanga njila egi malamba atubuile. Jiana gutubamba mu nyuma hagula uluishi wa Satana nu mavu enji, itukalagalago gubola. (Yatuwuwe 7:9, 15, 16) Hene, gula udi mulua nu lamba dishigo ‘gugubemba,’ jiya egi Yehowa udi mujiya ita udi mulua. Muene wana guvua ‘gudila guaye.’ (Yeshaya 30:19; 2 Kolinto 1:3, 4) Phaula wasonegele egi: “Nzambi wana gutagenesa gutendelela guenji. Muene mbagabembigo egi mutagane nu gulolewa gudi mubalega ngolo jienu. Tangua mudi mulolewa, muene mbawulondega njila hagula muajiya gukolesela gulolewa guene.”—1 Kolinto 10:13; Filiphi 4:6, 7.
(2 Kolinto 12:10, NWT) Hene, ngana gusuanguluga tangua ngudi wa guleba, mu mashingana, tangua ngudi nu funu ya ukuateshi, mu usageshi nu mu malamba mukunda nu Klisto. Handaga tangua ngudi waguleba, mu tangua diene ngana gukhala nu ngolo.
w18.01-F diyiji 9 par. 8-9
“Nzambi Wana Guhana Ngolo Gudi Athu Adi Aguhuila”
8 Tanga Yeshaya 40:30. Ikhale tudi nu ndunge jia luholo lutshi, ngolo jietu jia gutshita najio midimo jiana gusuga. Mukuta wetu agasue tudi naye gutshigina ndaga eyi. Mupostolo Phaula wakhalele watagana ha gutshita ndaga, uvi gakhalelego nu ngolo jia gukalagala ndaga jiagasue akhalele mutshigina. Wawambelele Nzambi lamba diene mu gisambu, uvi Nzambi wamulezele gamba: “Ngolo jiami jidi mubua jiatagana ha udi waguleba.” Phaula wakotelesele ndaga yene muabonga. Hene, wazuelele egi: “Tangua ngudi waguleba, mu tangua diene ngana gukhala nu ngolo.” (2 Kol. 12:7-10) Itshi atshiginyile guzuela?
9 Mupostolo Phaula wakotelesele egi gakhalelego nu ngolo jia gukalagala ndaga jiagasue. Wakhalele nu funu ya ukuateshi wa muthu udi nu ngolo jiavula gubalega. Hene, Nzambi mu njila ya nyuma yenji, wajiyile gumukuatesa tangua diakhalele muene waguleba. Wajiyile nji gumuhana ngolo jia gukalagala ndaga gajiyilego gutshita muene hakhenji. Idi luholo lumoshi nu esue mangino. Nyuma ya Yehowa yajiya gutuhana diago ngolo!
Kamba Ndaga Jiko jia Ndando jia mu Nyuma
(2 Kolinto 12:2-4, NWT) Ngudi mujiya muthu mumoshi mu gudivua nu Klisto, ivo 14 yabalega—ikhale mu muila nga gonze a muila, ame ngushigo mujiya; uvi Nzambi udi mujiya—ayile nenji mu dilu dia thathu. 3 Ayi, ngudi mujiya muthu wa luholo luene—ikhale mu muila nga gonze a muila, ame ngushigo mujiya; uvi Nzambi udi mujiya— 4 ayile nenji mu phaladiso, wavuile ndaga jiajiyilego guzuelewa, jinyi muthu ashigo naye guzuela.
w18.12-F diyiji 8 par. 10-12
Mihu yana Guhula Athu ana Gutanga Mikanda Yetu
Yajiya gukhala egi “dilu dia thathu” adi muzuelela mu 2 Kolinto 12:2 didi Ufumu wa Masiya udi mutuamezewa gudi Yesu Klisto nu Aklisto 144 000. Ufumu wene wana gutamegewa luko egi “dilu dihe-dihe.”—2 Phet. 3:13.
Mukunda natshi adi guwutamega egi “dilu dia thathu”? Idi handaga Ufumu wene udi Uhinyinyi umoshi wabalega uhinyinyi wagasue.
“Phaladiso ayile” nu Phaula mu vizio yajiya gukhala (1) phaladiso ha mavu mu masugu adi muza, (2) phaladiso ya mu nyuma, yinyi mbayibalega phaladiso ya mu nyuma ya mangino, nu (3) “phaladiso ya Nzambi” mu dilu.
(2 Kolinto 13:12, NWT) Dimenegenu nu beze ya gijila.
it-1-F diyiji 753
Baiser
“Beze ya Gijila.” Aklisto a mu siekle ya thomo akhalele gudihana “beze ya gijila” (Lomo 16:16; 1Kol 16:20; 2Kol 13:12; 1Tes 5:26) nga ndo “beze ya guzumba” (1Phet 5:14, NWT). Yajiya gukhala egi beze yene yakhalele guhanewa mala nu mala, nga ndo akhetu nu akhetu. Luholo elu lua gudimenega gua Aklisto a mu siekle ya thomo, luajiya gudivua nu khadilo diakhalele nadio enya Yuda a mu tangua dikulu dia gudimenega nu beze. Ngatshima Biblia ishigo muzuelela muavula ndaga yene, “beze ya gijila” nga ndo “beze ya guzumba” yakhalele gumonesa guzumba guawaha nu gujinga hamoshi guakhalele mu hungu dia Uklisto.—Yone 13:34, 35.
MAI 27–JUIN 2
UMONYI UDI MU MBIMBI YA NZAMBI | GALATIYA 1-3
“Ngamuwambele ha Meso a Athu”
(Galatiya 2:11-13, NWT) Uvi, hajile Sefase gu Antioka, ngamuwambele ha meso a athu, handaga muene wabuile mu gujimbila. 12 Ha thomo, hakhalele athu ako atumiwe gudi Yakoba khenji aza galego, Phetelo wakhalele mudia nu athu a ifutshi; uvi hajile ene, wabembele gudia nawo nu wadikhaphumuine nawo, handaga wavuile woma wa athu anyi ambiwe gale gu mukanda. 13 Enya Yuda ako alanduile nji mambo enji, ngenyi Banaba walanduile nji mambo awo.
w17.04-F diyiji 27 par. 16
Wana Gulandula Nduedi ya Yehowa Ba?
16 Tanga Galatiya 2:11-14. Phetelo wavile woma wa athu. (Ish. 29:25) Phetelo wakhalele mujiya muabonga matangi a Yehowa mukunda nu athu a ifutshi, uvi wavile woma wa enya Yuda ambiwe gu mukanda, akhalele mu hungu dia gu Yelusalema. Mupostolo Phaula wakhalele nji mu gudibungisa guakalegewe gu Yelusalema mu givo 49 gia tangua dietu. Hene, wabalediele Phetelo gu Antioka, wamonesele mambo enji haphelo. (Makal. 15:12; Gal. 2:13, mbimbi goshi’a diyiji.) Aklisto a ifutshi anyi amonele mambo a Phetelo haphelo, itshi akhalele naye gukalagala? Abembele ndaga yene egi yabuise mu gubola ba? Phetelo watotesele inemo akhalele nayo mu hungu mukunda nu gubola ogu gakalegele ba?
(Galatiya 2:14, NWT) Uvi tangua ngamonele egi akhalelego muwenda njila imoshi nu giamatshidia gia lukuma luabonga, ngawambelele Sefase ha meso awo agasue egi: “Gula aye, muenya Yuda, udi mujinga gifua athu a ifutshi, luholo lutshi wajiya gushinjiga athu a ifutshi ha gujinga gifua enya Yuda?”
w13-F 15/3 diyiji 5 par. 12
Athu Ana Guzumba Yehowa, ‘Gushigo nga Gima Giajiya Guabuisa mu Gubola’
12 Phetelo wavile woma wa athu, hene matangua ako wabuile mu gubola. Uvi, wasalele wagujinginyina gudi Yesu nu gudi Yehowa. Tudi mujiya egi, Phetelo watunyine Fumu wenji ha meso a athu, hugo dimoshi ndo uvi mahugo thathu. (Luka 22:54-62) Hangima, Phetelo gatshitshilego ndaga gifua Muklisto, wakhalele mutadila athu a ifutshi anyi abuile Aklisto gifua ashigo athu awaha, handaga akhalele khenji ambiwa galego gu mukanda. Uvi mupostolo Phaula wamonele mulonga wabola wakhalele mukalegewa: hungu diakhalelego naye gukhala nu ukhaphumunyi mukatshi. Khadilo dia Phetelo diakhalele diabola lume. Gutuama egi khadilo dia Phetelo dibolese aphangi mu hungu, Phaula wamudijigile ndaga haphelo, ha meso a athu agasue. (Gal. 2:11-14) Phetelo wabembele egi lulendo lumuhinyine, nu lumutume ha gubemba njila ya monyo ba? Ndo. Watshiginyile ndaga jiazuelele Phaula, wajitumagele, enji walanduile guwenda mu njila ya monyo.
Kamba Ndaga Jiko jia Ndando jia mu Nyuma
(Galatiya 2:20, NWT) Ame ngakhokhewe ha mutshi wa lamba nu Klisto. Ishigo luko ame ngudi nu monyo, uvi Klisto udi mujinga hamoshi nu ame. Yadiago, monyo owu ngudi nawo henyaha mu muila, ngudi nawo mukunda nu gutshigina guami gudi Muna Nzambi, wago wanguzumbile nu wadihanene mukunda nu ame.
w14-F 15/9 diyiji 16 par. 20-21
Kombelela Nzambi nu Gujinginyina Guagasue Ikhale ‘Malamba Adi Avula’
20 Itshi tuajiya guzuela mukunda nu uluishi wanago gumonega haphelo? Luholo lutshi tuajiya gukolesela gula tuatagana nu ndaga jidi gutulebesa muila? Gima giawaha giajiya gutukuatesa ha gukolesela gidi gutangigiza gibawu gia Yesu. Mupostolo Phaula nji wakhalele mutshita ngenyi. Matangua ako, wakhalele gudivua gifua muenya lamba. Uvi, watangijile egi Klisto gafuilego mukunda nu athu atagana, uvi mukunda nu enya gubola. Yadiago, Phaula wakhalele nji muenya gubola. Hene, wasonegele egi: “Monyo owu ngudi nawo henyaha mu muila, ngudi nawo mukunda nu gutshigina guami gudi Muna Nzambi, wago wanguzumbile nu wadihanene mukunda nu ame.” (Gal. 2:20) Yadiago, Phaula watshiginyine gibawu gia Yesu. Wakotelesele egi gibawu giahanele Yesu, giakhalele nji gumutadila muene.
21 Nu aye nji khala mutangigiza gibawu gia Yesu luholo elu. Gizule gifua Yehowa wagihanele mukunda nu aye. Ngenyi, mbawuheta ngolo jia gukolesela mu malamba. Uvi ishigo mukotelesa egi ndaga jiana gutulebesa muila mbajitota. Yajiya gukhala egi athu ako mukatshi dietu, mbalandula gulua nu ndaga jiana gutulebesa muila uu nu tangua mavu mbabua ahe-ahe. Uvi ubuitshigo mutshima egi athu anyi mbakolesela uu nu gu gisugishilo, mbaheta gishimbigo. Tuaheta diago hehi nu lusugu luakoma tangua Ufumu wa Nzambi mbawuhana guhuima ha mavu nu mbawukuatesa athu agasue adi a gujinginyina gudi Nzambi ha gubua athu atagana. Hene, zula desizio dia gungina mu Ufumu wa Nzambi, ikhale mukatshi dia malamba avula.
(Galatiya 3:1) Enue enya Galatiya muaheya! Nanyi wamidimbile, enue muadimuenene haphelo gufua gua Yesu Klisto ha mutshi wa lamba.
it-1-F diyiji 940
Galates (Lettre aux)
Tangua Phaula gazuelele egi: “Enue enya Galatiya muaheya,” gushigo nga gima gimoshi gidi mumonesa egi, wakhalele mutangiza giphuta gimoshi giakatugile gu Gaule, giakhalele gu khanda ya nordi ya Galatiya. (Gal 3:1) Uvi, Phaula wakhalele mubalela athu a mu mahungu akhalele mu mafundo anyi akhalele mulandula matangi abola a enya Yuda akhalele mujinga mukatshi diawo. Ha fundo dia gulandula ndaga jia ‘nduedi yakatuga mu gutshigina’ gua gikotelo gihe-gihe, enya Yuda ene akhalele gudihagela nduedi yawo mu njila ya mukhuala wa Moise. (2:15–3:14; 4:9, 10) Ha gutadila gilema gia muila, “mahungu a gu Galatiya” (1:2), anyi Phaula asonegele mukanda, akhalele nu enya Yuda nu athu akhalelego enya Yuda. Mukatshi dia athu akhalelego enya Yuda, guakhalele nu athu a ifutshi ambiwe gale gu mukanda nu anyi akhalele khenji ambiwa galego gu mukanda. Idi yadiago egi ako mukatshi diawo akatugile gu khanda ya westi ya Eropa. (Makal 13:14, 43; 16:1; Gal 5:2) Mukuta wawo agasue atamegewe egi Aklisto a gu Galatiya handaga fundo diakhalele mujinga ene akhalele guditamege egi Galatiya. Ndaga jidi mu mukanda wa Galatiya jidi mumonesa egi, Phaula wakhalele musonegela athu akhalele muene mujiya muabonga gu sudi ya provense ya enya Roma, uvi ndo gudi athu gakhalelego mujiya, anyi akhalele gu khanda ya nordi, fundo gahetelego.