Yehowa Ganago Guzumba Enya Usala

“Khala muweva mago aye. Khala mukomba inzo yenu, nu luphango luenu. Khala mubishila mvindu ha shita.” Mvuaji jiavula jiana gulongesa an’awo luholo lua gutuna gukhala usala mu muila. Uvi, malongo atadila gutuna gukhala enya usala ana gukatuga gudi Nzambi wetu wa gijila. (Guz 30:18-20; Mikh 23:14; 2Kol 7:1) Gula muila wetu nu ima yetu ishigo usala, ngenyi tudi mutumbuisa Yehowa. (1Phet 1:14-16) Itshi tuajiya guzuela mukunda nu inzo nu luphango luetu? Aklisto ana gutshita ngolo hagula jinzo jiawo nu mafundo ana gujinga akhale aphelegeta. Ngenyi ana gumonesa egi adi agudisha nu athu ana gubishila mvindu mu njila nu mu mafundo a athu avula. (Ngi 115:16; Yat 11:18) Ikhale mu ndaga jiazonda, gifua fundo tuana gubishila sashe jia bombo, indundu ya meya a gunua, nga sashe jia biscuit jiajiya gumonesa gula tudi athu aphelegeta nga ndo. Mu ndaga jiagasue jia mu lujingu luetu, tudi naye ‘gumonesa egi tudi akombeledi a Nzambi.’​—2Kol 6:3, 4.

TALENU VIDEO NZAMBI GANAGO GUZUMBA ENYA USALA. GUNGIMA, HANENU MVUTU GU MIHU EYI:

• Itshi yajiya gutuma athu ako ha gubemba ima yawo usala?

• Luholo lutshi Mukhuala wa Moize wakhalele mumonesa matangi a Yehowa mu ndaga yatadila gutuna gukhala usala?

• Luholo lutshi tuajiya gutumbuisa Yehowa ngatshima tuazuelelego nga gima?