LONGO 2

Guzuela Muabonga

2 Kolinto 2:17

NDAGA UDI NAYE GUKALAGALA: Zuela luholo wana guzuela masugu agasue, zuelelo diaye didi naye gumonesa matangi aye mukunda nu ndaga udi muzuelela nu mukunda nu athu adi gugutegelela.

LUHOLO LUA GUYIKALAGALA:

Kalagala gisambu, dilondege nji muabonga. Tshita gisambu hagula udihagelago mutshima uvi uhage mutshima waye mu ndaga udi naye gulongesa. Jiya muabonga ndaga jia ndando udi naye guzuelela. Zuelela ndaga jiene mu mbimbi jiaye hakhaye; ukhadigo gujitanga gifua luholo jidi jiagusonega gu plan yaye.

Gula watshigina gutanga ndaga imoshi idi mu Biblia nga mu mukanda uko, jiya ndaga yene muabonga hagula mbawuyitange muabonga. Gula udi mutanga ndaga jiazuelele athu ako, jitange hagula athu akotelese matangi a athu ene, uvi ujitangigo mukunda nu gulelesa athu.
Zuela nu mutshima umoshi. Tangigiza mukunda n’atshi athu adi naye gutegelela ndaga udi muzuela. Gila wahaga matangi’aye gudi athu ene, luholo mbawukalegela mago nu phala yaye mbalumonesa egi udi muzuela nu mutshima wagasue nu gisemo.

Guzuela luholo wana guzuela masugu agasue guakoteleselego egi uzuele gifua ushigo munemesa athu. Kalegela mbimbi jiatagana, jidi mutuma athu ha gunemesa lukuma luabonga.
Tala athu adi gugutegelela. Khala mutala athu adi gugutegelela. Tangua udi mukalagala diskur, khala mutala muthu mumoshi mumoshi, uvi utadigo athu agasue mu tangua dimoshi.