Malongo Atshi Tuajiya Guheta Gudi Aklisto Ana Kombelela Yehowa Sendese Mualeha?

Mu mahungu etu, tudi nu aphangi a mala nu a akhetu ana gukombelela gale Yehowa ivo yavula. Khadilo diawo dia gushila Yehowa mutshima diajiya gutulongesa ndaga jiavula. Tuajiya guaahula ha gutuwambela luholo organizasio wasendesele, nu malamba atagenele nawo, nu luholo Yehowa gaakuatesele ha guaabinga. Mu tangua dia Gukombelela guenu gua mu Fami, muajiya gutamega phangi mumoshi wa gukola ha gumitela mene jienji.

Gula wana kombelela gale Yehowa sendese mualeha, wambela mavuala luholo Yehowa agukuatesele. Yakobo nu Yozefe awambelele an’awo nu ajigulu awo luholo Yehowa gaakuatesele. (Gis 48:21, 22; 50:24, 25) Ivo yavula gungima, Yehowa watogele mafumu a fami ha gulongesa an’awo ndaga jiagasue jia gushimana jiakalegele muene. (Mikh 4:9, 10; Ngi 78:4-7) Mangino nji, mvuaji nu aphangi ako mu hungu, ajiya gutela mavuala mene jia ndaga jia gushimana amonele Yehowa mutshita mu njila ya organizasio wenji.

TALENU VIDEO TUKHALENU NU GUDIVUA GUABONGA IKHALE MUDIMO WETU WATUNYISHIWA. GUNGIMA, HANENU MVUTU GU MIHU EYI:

• Luholo lutshi filiale ya gu Australie yakuatesele aphangi a mu ifutshi inyi mafumu a leta atunishile mudimo wetu?

• Luholo lutshi aphangi’etu a mu ifutshi yene abambele gutshigina guakola?

• Mukunda natshi alongeshi avula a gu Roumanie adizolele mu organizasio wa Yehowa? Uvi luholo lutshi avutugile luko?

• Luholo lutshi ndaga jiataganele najio aphangi awa jiajiya gukolesa gutshigina guaye?