Luholo Tudi Naye Gukalegela Gitshinyi Luholo lua Guta Maga nu Athu

Sendese mu Janvier 2018, gitshinyi luholo lua guta maga nu athu giana zoga ha diyiji dia thomo dia Mukanda wa gukalegela mu gudibungisa gua Lujingu nu Mudimo wa Uklisto. Luholo lutshi tuajiya gukalegela gitshinyi giene?

Tangua Udi Mukalagala Devuare: Udi naye guhula muhu, watanga verse ya Biblia, gungima wabembela muthu muhu mbamutadila nenji gungima. Uvi, tangua udi mutshita devuare diaye, ushigo naye guzuela mbimbi jia luholo lumoshi gifua luholo idi mu video. Wajiya gukalegela maluholo agudisha ha gusendesa guta maga nu athu nu ha gutangigiza nawo. Luko, wajiya guhana muthu mukanda udi mu Ikadigilo ya Gulongesela Biblia, ikhale agutogelego ha gutshita ngenyi mu devuare diaye.

Tangua Udi mu Mudimo wa Gulongesa: Gitshinyi luholo lua guta maga nu athu, gialondewe ha gukuatesa alongeshi hagula ahete matangi a guzuela mu mudimo wa gulongesa. Gula muthu wasuanguluga nu giamatshidia nu watshigina gujiya ndaga jiavula, wajiya gulandula guta nenji maga nu gumuvutugila luko. Wajiya gusombegesa luholo lua guta maga nu athu nga gukalegela metode ako. Muto wa lumene nga verse jia Biblia muakalegela mu mbeji yabalega, jiasuanguluishile athu a mu terituare yenu ba? Ha fundo wana jinga, athu ana suanguluga muavula guzuelela ndaga jidi mubua mu mafundo ako nga mu dimbo dienu ba? Ikhale tuakalegela metode atshi ha guta maga nu athu, felela dietu didi naye gukhala dia ‘gutshita ndaga jiagasue mukunda nu lukuma luabonga ha gulongesa lukuma luene gudi athu ako.’—1 Kol 9:22, 23.