Ha Gulandula Khadilo dia Yesu. . .

KHALA MUTHU WANA GUVUILA ATHU AKO KHENDA

Luholo Yesu wakhalele muthu watagana, gakhalelego mumona lamba nu gudisagesa gifua athu agasue. Ikhale ngenyi, wakhalele muvuila athu khenda muavula. Wakhalele guakalegela ndaga gubalega eji adi naye guaakalegela. Khenda jiakhalele mutuma Yesu ha gukuatesa athu ako. Idi gudivua nu ifezegeselo yenji idi mu Mikhapho 32, 37, 57, 99.

KHALA GUTA MAGA NU ATHU

Athu a ivo yagasue—ikhale ana azonda nga akulutu—akhalele musuena hehi nu Yesu ha guta nenji maga, handaga muene gakhalelego gudimonesa gifua udi nu ndaga jiavula jia gutshita nga ndo egi, udi nu funu yavula gubalega. Luholo Yesu wakhalele gudihana gudi ene, athu akhalele gudivua diago muabonga ha guta nenji maga. Ha gumona ndaga yene, tala Mikhapho 25, 27, 95.

KHALA MUKALAGALA GISAMBU

Yesu wakhalele mukalagala gisambu gudi Shenji wa mudilu tangua diagasue. Wakhalele mukombelela tangua gakhalele muene hakhenji nga mu tangua gakhalele nu akombeledi ako a giamatshidia. Wakhalele mukalagala gisambu matangua agasue, ishigo phamba mu matangua a gudia. Wakhalele mukalagala gisambu ha guhana Shenji mersi, ha gumutumbuisa nu ha gukamba utuameji wenji gutuama dia guzangula desizio. Tala ifezegeselo idi mu Mikhapho 24, 34, 91, 122, 123.

UKHADIGO MUKAMBA PHAMBA GUBONGA GUAYE

Matangua ako, Yesu wakhalele nu funu ya guhuluguga, uvi wakhalele muhaga gubonga gua athu ako ha fundo dia thomo. Gakhalelego mukamba phamba gubonga guenji. Ha ndag’eyi nji, wahanele gifezegeselo giabonga tuajiya gulandula. Tala khadilo diene mu Mikhapho 19, 41, 52.

KHALA MUTOTESELA ATHU GUBOLA

Yesu galongeselogo phamba funu ya gutotesela athu gubola. Muene hakhenji wamonesele khadilo diene luholo wakhalele mutotesela alandudi enji nu athu ako. Tangiza ifezegeselo idi mu Mikhapho 26, 40, 64, 85, 131.

KHALA MUENYA GIKHESA

Mbimbi ya Nzambi yadiangele guzuela egi enya Yuda avula mbatuna Masiya, luko egi mbalagaji jienji mbajimushiya. Yesu wakhalele nu luholo lua gutuna gudihana muavula ha gukuatesa athu ako. Hafundo dia gukalagala ngenyi, wadihanele nu gikhesa giagasue mu ndaga jia gikombelelo gia giamatshidia. Ngenyi, wahanele gifezegeselo giabonga gia gikhesa gudi alandudi enji adi mutagana nu usageshi nga umbalagaji. Tala Mikhapho 16, 72, 103.

KHALA MUTHU WA GUDIBULUMUISA

Yesu wakhalele mujiya ndaga jiavula gubalega athu agasue ashigo atagana. Luholo Yesu wakhalele muthu watagana, wakhalele nu ujiyi nu ndunge jiavula gubalega athu agasue. Uvi, wakhalele mukalegela athu ndaga nu gudibulumuisa guagasue. Wajiya guzula malongo mu khadilo dienu mu Mikhapho 10, 62, 66, 94, 116.

KHALA MUTHU WA HUIMINYINA

Tangua apostolo a Yesu nu athu ako akhalelego mulandula gifezegeselo gienji nu ndaga gakhalele mulongesa, Yesu wakhalele guaamonesela khadilo dia guhuiminyina. Nu guhuiminyina guagasue, Yesu wakhalele muvutugila malongo akhalele nawo apostolo funu, hagula a akuatese ha gusuena hehi nu Yehowa. Tala ifezegeselo idi mumonesa khadilo dia Yesu dia guhuiminyina mu Mikhapho 74, 98, 118, 135.