Shigu jidi mu Biblia jia jiya gutukuatesa luholo lutshi?

1. Mukunda na tshi esue athu tudi nu funu ya gutuamezewa?

Mufugi wetu udi watema gutubalega. Udi Tata wa guzumba, wanagututangiza. Ndaga iko, watufugilego ha gudituameza etue hakhetu. (Yelemiya 10:23) Luholo ana azonda anakhala nu funu ya utuameji wa mvuaji jiawo, etue agasue nji tudi nu funu ya utuameji wa Nzambi. (Yeshaya 48:17, 18) Shigu jia Biblia jianagutuhua matangi akatuga gudi Nzambi ha gututuameza.​—Tanga 2 Timote 3:16.

Mikhuala nu shigu jia Yehowa jiana gutulonga luholo luabonga lua gujinga mangino enji jiana gutudijiga luholo lutshi lua guheta gubonga gua ivuo nu ivuo mu masugu adi muza. Luholo Nzambi watufugile, idi yabonga esue ha guhata utuameji wenji.​—Tanga Lungimbo 19:7, 11; Yatuwuwe 4:11.

2. Shigu jia Biblia jidi itshi?

Shigu jia Biblia jidi matangi agishina amatshidia. Uvi mikhuala yajiya guhanewa mukunda nu mulonga ungoshi. (Mikhuala 22:8) Ha gujiya luholo lutshi lua gukitshila shigu mu mulonga ungoshi ngenyi, udi naye gutangiza muavula. (Ishima 2:10-12) Gifua, Biblia yanalonga egi monyo udi kabu diakatuga gua Nzambi. Shigu yene yidi nu funu ha gututuameza tangua tudi mukita mudimo, mu inzo nu mu tangua tudi mu wenda. Yanagututuma hagujiya gudibamba.​—Tanga Makalegelo 17:28.

3. Shigu jitshi jiyadi jia thomo?

Yesu watangele shigu jiyadi jia thomo jia gubalega ndando. Shigu ya thomo yadijiga gikuma diago gia monyo wa muthu: gujiya Nzambi, gumuzumba, enji gumukitshila ya gumujinginyina. Tudi naye guhata shigu yene mu ndaga jiagasue tuanatomba. (Ishima 3:6) Athu agasue anaguyibamba mu mitshima yawo anabua mafuta a’Nzambi, anaheta gusuanguluga gua diago enji monyo wa ivuo nu ivuo.​—Tanga Matayo 22:36-38.

Shigu ya ngiadi yanagutukuatesa ha gujinga mu guhuima nu athu ako. (1 Kolinto 13:4-7) Ha gukitshila shigu yene ya ngiadi, yanutoga guhata luholo Nzambi anukitshila athu jindaga.​—Tanga Matayo 7:12; 22:39, 40.

4. Shigu jidi mu Biblia jia jiya gutukuatesa luholo lutshi?

Shigu jia Biblia jianalonga fami luholo lutshi guzumba guajiya guabungisa. (Kolosai 3:12-14) Mbimbi ya Nzambi nji yanabamba fami mukunda yanagualonga shigu iko eyi: wulo udi naye gukhala tangua dia gasue.​—Tanga Gisendeselo 2:24.

Shigu jia Biblia jianagutubamba mu muila nu matangi. Ha gutala, mafumu a midimo anatshigina muavula anamidimo ana mba mambo ndo enji anagudihana gu mudimo, mukunda anahata Mbimbi ya Nzambi. (Ishima 10:4, 26; Hebelu 13:18) Biblia idi gutulonga nji ha gusuanguluga phamba nu yima tudi nayo ya gujingila enji tuzangule ufuta wetu nu Nzambi nu ndando ya gubalega ikumba.​—Tanga Matayo 6:24, 25, 33; 1 Timote 6:8-10.

Gutumagela shigu jia Biblia jiana gutubamba ha gukhala nu muila wa bonga. (Ishima 14:30; 22:24, 25) Gifua, mukhuala wa Nzambi udi mutunyisa gukolewa wana gutubamba gu misongo yajiya gutushiya nu yijita. (Ishima 23:20) Yehowa watuhanele njila ha gunua matombe, uvi gubalegesa ndo. (Lungimbo 104:15; 1 Kolinto 6:10) Shigu jia Nzambi jidi gutukuatesa mukunda jidi gutulonga ha gudimbamba mu makalegelo enji nu mu matangi etu. (Lungimbo 119:97-100) Uvi, gula aklisto amatshidia adi mutumagela mikhuala ya Nzambi, gushi ndo mukunda adi nu funu phamba ya gubonga guawo hakhawo. Anakita ngenyi ha gutumbuisa Yehowa.​—Tanga Matayo 5:14-16.