Tangua Yesu nu alandudi enji akatugile gu Yeliko, abandele masugu thathu gu Betaniya. Gungima, mu gimenegena gia lusugu lua 10 Nizani, akhalele muya gu Yelusalema. Yesu wavuile nzala. Hene, tangua gamonele mutshi wa figi, wasuenele hehi ha guwutala gula wajiya gukhala nu mabundu a figi.

Yakhalele gu gisugishilo gia mbeji ya thathu, uvi mutshi wa figi wakhalele naye guhaga mabundu phamba mu mbeji ya samano. Ikhale ngenyi, mutshi wene wakhalele wazodi gale mayiji avula diago. Hene, watangijile egi wajiya gusanga mabundu a figi. Uvi gasangelego nga bundu dimoshi gu mutshi wene. Mayiji akhalele mumonesa gifua mutshi wene udi nu mabundu, uvi ndo. Hene, Yesu wazuelele egi: “Muthu gadigo luko mabundu aye uu ivo nu ivo.” (Mako 11:14) Mu tangua diene, mutshi wene wasendesele gumigina. Uvi alandudi ajile mukotelesa ndaga yene mu lusugu lua landuile.

Tangua diazonda gungima, Yesu nu alandudi enji ahetele gu Yelusalema. Wayile mu tempelo, yago gatalele mu lusugu lua balega gungima dia midi. Uvi mu lusugu lunu, wakalegele ndaga jiavula gubalega. Watshitshile ndaga gifua yinyi gakalegele ivo thathu yabalega gale, mu lusugu lua wano wa Pake ya givo 30 gia tangua dietu. (Yone 2:14-16) Mu tangua diene, Yesu wakayele ‘athu akhalele mudiga nu musumba ima mu tempelo.’ Luko, wasendumuine “mesa a asombegeshi a makuta nu nguasa jia adigi a tukhulumbia.” (Mako 11:15) Gabembelego nga muthu mumoshi wakhalele mubata ima yenji ha guya nayo gu khanda iko ya dimbo egi, abalegele mu luphango lua tempelo.

Mukunda natshi Yesu wakayele athu awa akhalele musombegesa makuta nu musumbisa shitu mu tempelo? Wazuelele egi: “Mukanda wa Nzambi udi muzuela egi, ‘Inzo yami mbayitamegewa gamba, inzo ya gukombelela ya ifutshi yagasue.’ Uvi enue muayibuisa ginangeno gia nzangi.” (Mako 11:17) Yesu watamegele athu ene egi nzangi handaga akhalele mudiga shitu mu ndando yakola, gudi athu akhalele mutshigina guhana milambu. Hene, Yesu wamonele egi gukalagala ngenyi guakhalele unzangi nu gutambula athu ima yawo gu ngolo.

Yadiago, mafumu a nganga-nzambi, nu alongeshi a mikhuala nu mafumu a athu avuile ndaga ya kalegele Yesu; hene akambele luko luholo lua gumushiya. Uvi akhalelego mumona luholo ajiya gumushiya, handaga athu akhalele muza avula ha gumutegelela.

Athu ajile mukunda nu wano wa Pake akhalelego phamba enya Yuda, guakhalele nji nu ba prozelite (yakotelesa egi, athu a ifutshi iko anyi anginyile mu gikombelelo gia enya Yuda). Mukatshi diawo, muakhalele nji nu enya Greki ajile ha gukombelela gu wano wene. Ayile gudi Filipho, amuwambelele egi akhalele nu funu ya gumona Yesu. Yajiya gukhala egi, ayile gudi Filipho handaga amonele egi jina dienji diakhalele mu zuelelo dia Greki. Filipho wamonele egi gudimona nu Yesu ngenyi guakhalelego diago ndaga yabonga, hene wadijigile Andre. Muyadi’awo ayile mumona Yesu. Idi mumonega egi mu tangua dinyi Yesu wakhalele mu tempelo.

Yesu wakhalele mujiya egi guasala masugu azonda hagula ashiyiwe, hene diakhalelego tangua dia gutagenesa nzala ya athu akhalele mukamba gujiya ndaga, nga gukamba egi athu amujiye. Ha guhana mvutu gudi alandudi enji anyi mbadi, wahanele gifezegeselo gimoshi. Wazuelele egi: ‘Kumbi diaheta hagula egi Mun’a muthu atumbuishiwe. Giamatshidia ngudi gumiwambela egi gula lumbale lua blé lushigo mufua tangua luabua luene mu mavu, ludi musala hakhalo. Uvi gula luene luafua, ludi muzola mbale jiko jiavula.’—Yone 12:23, 24.

Lumbale lumoshi lua blé luajiya gumonega gifua lushigo nu ndando yavula. Uvi gula luambiwa mu mavu nu “luafua,” luajiya guzoga, enji gungima lukudi, luzodi mbale jiavula diago. Luholo lumoshi nji, Yesu udi diago muthu mumoshi phamba udi watagana. Uvi, luholo gasalele wagujinginyina gudi Nzambi uu nu gu gufua guenji, athu avula anyi adi nu khadilo gifua dienji dia guditunyisa ndaga jiko mbaaheta monyo wa mayilago. Hene, Yesu wazuelele egi: ‘Muthu wagasue udi muzumba monyo wenji, mbawuwutotesa, uvi muthu udi umbalagaji nu monyo wenji wa ha mavu awa, muene mbawuwubamba mukunda nu monyo wa ivo nu ivo.’—Yone 12:25.

Yesu gakhalelego mutangiza mukunda nu muene hakhenji, handaga wazuelele egi: ‘Gula muthu watshigina gungutshitshila mudimo, udi naye ya gungulandula. Guagasue ngudi mukhala ame, guene nji gudi naye gukhala muenya mudimo wami. Muthu udi mungutstshila mudimo, Tata mbawumunemesa.’ (Yone 12:26) Gishimbigo giabonga diago! Athu awa ahanewa lutumbu gudi Tata wa Yesu, mbaahinyinya hamoshi nu Klisto mu Ufumu wenji.

Luholo Yesu wakhalele mutangiza lamba diakola nu gufua gua lamba guakhalele gumunengena, wazuelele egi: ‘Henyaha mutshima wami udi nu gikenene, itshi mbanguzuela? Tata, nguhuluise gu ndaga idi mukamba gungukuata ha kumbi edi.’ Uvi Yesu gakhalelego mukamba gutuna gutagenesa gutshigina gua Nzambi. Wazuelele luko egi: “Ikhale ngenyi, giene gishina ngajidile ame mu tangua edi.” (Yone 12:27, NW) Yesu watshiginyile ngaga jiagasue jidi mu felela dia Nzambi, nu gufua guenji gifua mulambu.

Mu lusugu lua thomo lua 10 Nizani, Yesu wazuelele egi gualeha ndo mbawushiyiwa. Wakhalele gudisagesa muavula mukunda nu musonyi gufua guenji mbaguhana jina dia Nzambi, wazuelele egi: “Tata, utumbuise jina diaye.” Dijui diakola diakatugile mu dilu, diazuelele egi: “Ngaditumbuishile gale, mbanguditumbuisa nji luko.”—Yone 12:27, 28.

Athu akhalele ha fundo diene adihudile muavula. Ako atangijile egi avuile matululu a muandu. Ako azuelele egi: “Muanjelo wazuela nenji.” (Yone 12:29) Uvi, yakhalele Yehowa hakhenji wazuelele mbimbi jiene. Luko, yakhalele giphungu gia thomo egi athu avue dijui dia Nzambi sendese Yesu gadi mulongesa lukuma luabonga.

Ivo thathu nu ndambo yabalega gale, mu tangua dia gubatijiwa gua Yesu, Yone Mubatiji wavuile Nzambi udi muzuela mukunda nu Yesu egi: ‘Yowu udi mun’ami, ngana guzumba muavula, ngamutshigina.’ Gungima, gu wano wa Pake wa givo 32 gia tangua dietu, Yesu wabalumugile gutuama dia Yakoba, Yone, nu Phetelo. Mala awa mutatu avuile dijui dia Nzambi. Wazuelele egi: ‘Yowu udi mun’ami, ngana guzumba muavula, ngamutshigina.’ (Matayo 3:17; 17:5) Uvi mu tangua dinyi, Yehowa wazuelele luko giphungu gia thathu mu luholo lua kalegele egi athu avula amutegelele!

Yesu wazuelele egi: ‘Mbimbi eyi yajilego mukunda nu ame, uvi mukunda nu enue.’ (Yone 12:30) Yamonesele diago egi Yesu udi mun’a Nzambi, Masiya watendelewe.

Luko, gujinginyina gua Yesu gudi Nzambi gudi khadilo diabonga athu adi naye gulandula. Gudi mumonesa nji egi Satana Diabulu, fumu wa ha mavu awa, udi naye gushiyiwa. Yesu wazuelele egi: ‘Henyaha, gusophesewa gua mavu awa gudi muza. Luenyelu fumu wa ha mavu awa udi mukayewa.’ Gufua gua Yesu guamonesele egi muene wabingile diago. Luholo lutshi? Wazuelele egi: ‘Uvi ame, tangua mbaangukanduisa, mbangunana athu a luholo luagasue gudi ame.’ (Yone 12:31, 32) Mu njila ya gufua guenji holu dia mutshi, Yesu wananele athu gudi muene, waakangudile njila ya guheta monyo wa mayilago.

Uvi athu akhalele gumutegelela adihudile, azuelele egi: ‘Tuavuile mu Mukhuala wetu gamba Klisto udi mukhala ivo nu ivo. Luholo lutshi wajiya guzuela egi mun’a muthu udi naye gukanduishiwa? Mun’a muthu muene udi nanyi?’ (Yone 12:34) Ngatshima athu awa amonelele ndaga jiavula jia tshitshile Yesu, nu mbimbi ya zuelele Nzambi hakhenji, avula mukatshi diawo atshiginyilego egi Yesu udi mun’a muthu wa diago, Masiya watendelewe.

Gifua luholo gayimonesele mu masugu abalega, Yesu wazuelele muene hakhenji egi udi “muanya.” (Yone 8:12; 9:5) Wawambelele athu ene egi: ‘Mudi mukhala nu muanya khuta gitshinyi giahihia. Wendjenu ha mudi nu muanya hagula phipha imibuilago . . . Ha mugidi mu muanya, shenu gutshigina guenu gudi muanya, hagula enue mubue ana a muanya.’ (Yone 12:35, 36) Gungima Yesu wayile gudisuega handaga lusugu lua 10 Nizani luakhalelego lusugu akhalele naye muene gufua. Gu wano wa Pake wa 14 Nizani Yesu, ‘wakanduishiwe,’ yakotelesa egi amukhokhele misumadi holu dia mutshi.—Galatiya 3:13.

Gula tuatala muabonga, sendese tangua Yesu wasendesele mudimo wenji wa gulongesa, enya Yuda amoneselego gutshigina gudi muene. Ngenyi, idi mumonega haphelo egi khadilo diawo edi diatagenesele profesi imoshi: Yesheya wadiangele guzuela egi meso a athu mbaafua, mitshima yawo mbayikhala yakola hagula asombegesago khadilo diawo hagula asagewe. (Yeshaya 6:10; Yone 12:40) Yadiago, enya Yuda avula atunyine diago nu mutshima umoshi ndaga jiakhalele mumonesa egi Yesu udi Muhuluishi wawo, njila ya monyo.

Nikodemo, nu Yozefe wa gu dimbo dia Alimataya, nu mafumu ako avula ‘amonesele diago gutshigina’ guawo gudi Yesu. Uvi gungima, amonesele diago gutshigina guene, nga avutugile gawo gungima handaga akhalele muvua woma egi mbaakayewa mu sinagoga, nga handaga akhalele muzumba ‘lukuma lua athu’?—Yone 12:42, 43.

Yesu wamonesele gula gusha gutshigina gudi muene guakotelesa diago itshi. Wazuelele egi: “Muthu udi mumonesa gutshigina guenji gudi ame, gashigo gugumonesa khuta gudi ame, uvi udi gugumonesa nji gudi muthu wangutumine.” Giamatshidia Nzambi wawambelele Yesu ha gulongesa, nu giakhalele mulandula muene gulongesa giakhalele nu ndando yavula. Hene, wazuelele egi: “Muthu wangutuna ame nu watuna mbimbi jiami, udi nu muthu mbawumusophesa. Ndaga jingazuelele, jiene mbajimusophesa mu lusugu lua gisugishilo.”—Yone 12:44, 45, 48, NW.

Gungima Yesu wasugishile egi: ‘Ngadizuelelego mu ngolo jiami, uvi tata wangutumine muene diago wanguhuile mukhuala wa ndaga ngudi naye guzuela nu ngudi naye gulongesa. Luko, ngudi mujiya egi mukhuala wenji udi mukotelesa monyo wa ivo nu ivo.’ (Yone 12:49, 50) Yesu wakhalele mujiya egi gualeha ndo mbawubundula mahatshi enji gifua mulambu mukunda nu athu ana gumonesa gutshigina guawo gudi muene.—Lomo 5:8, 9.