Inzo Yaleha ya Babele

Gungima dia mvula yakola, ana a Nowa nu akaji’awo avualele ana avula. Fami jiabuile jiavula ha mavu. Athu asendesele guya gudikhalela mu mafundo a gudisha ha mavu, gifua luholo Yehowa waawambelele.

Uvi fami jiko jiakhalelego mutumagela Yehowa. Azuelele egi: ‘Tutungenu dimbo, tukhale haha. Tutunge inzo imoshi yaleha idi muya uu nu mu dilu. Hagula jina dietu dijiyiwe muavula.’

Uvi Yehowa gasuangulugilego nu matangi yene. Watshitshile ndaga imoshi ha guakanga njila hagula atshitshigo luko mudimo wene. Aye mujiya ndaga Yehowa watshitshile? Watshitshile egi asendese guzuela mazuelelo a gudisha. Ndaga yene yatshitshile egi athu ene akhadigo luko gudikotelesa muabonga; hene abembele mudimo wa gutunga. Dimbo akhalele mutunga diana tamegewa egi Babele, Yakotelesa egi “Gubua tunga-tunga.” Athu asendele gumuangana ha guya mukhala mu mafundo ako ha mavu. Uvi akhalele mulandula gutshita ndaga jiabola mu mafundo ene. Na, guakhalelego nga muthu mumoshi mukatshi diawo wakhalele muzumba Yehowa ba? Mbatumona ndaga yene mu longo dialandula.