Guakhalele nu dimbo dimoshi hehi nu Babele, diakhalele mutamegewa egi Ure. Enya mu dimbo diene akhalele mukombelela nzambi jia isongo ha fundo dia gukombelela Yehowa. Uvi mu dimbo dia Ure guakhalele nu muthu mumoshi wakhalele mukombelela phamba Yehowa, jina dienji Abalahama.

Yehowa wawambelele Abalahama egi: ‘Bemba inzo yaye nu enya fami yaye, nda mu gifutshi ginyi mbangugudijiga.’ Gungima Nzambi wamulayele egi: ‘Mbangugubuisa gifutshi giakoma, mbangukalegela athu agasue a ha mavu ndaga jiabonga mukunda nu aye.’

Abalahama gakhalelego mujiya fundo diakhalele gumutuma Yehowa, uvi wamushidile mutshima. Gishina giene, Abalahama nu mukaji’enji Sara nu sh’enji Tera nu muehu wenji Lota, atumagele Nzambi, akangele ima yawo, asendesele gutshita vuayaje yaleha.

Abalahama wakhalele nu ivo 75 tangua muene nu enya fami yenji ahetele mu gifutshi ginyi Yehowa wakhalele mutshigina egi atale. Gifutshi giene giakhalele mutamegewa egi Kanana. Nzambi watele maga nu Abalahama guene, wamulayele egi: ‘Mbanguhana gifutshi gigi giagasue udi mumona gudi an’aye.’ Uvi Abalahama nu Sara akhalele athu agukola, akhalele khenji avualago nga mona. Luholo lutshi laji dia Yehowa diakhalele naye gutagenesewa?

Abalahama nu Sara akhalele atshitshi gale ivo yavula mu ulo wawo. Abembele inzo yawo yabonga gu Ure ha guya nu gubanda mu matenta. Uvi Sara gakhalelego muboguta, handaga wakhalele mushila Nzambi mutshima.

Sara wakhalele mutshigina guvuala mona, hene gawambelele Abalahama egi: ‘Gula muenya mudimo wami Agare wavuala mona, mona muene mbawukhala gifua mun’ami.’ Gungima, Agare wavualele mona wa yala. Jina dienji Ishemayele.

Lusugu lumoshi athu thathu ajile mutala Abalahama nu Sara. Mu tangua diene Abalahama wakhalele nu ivo 99, mukaji’enji Sara wakhalele nu ivo 89. Abalahama waatamegele ha mushin’a mutshi, waahanele ima ya gudia. Aye mujiya gula athu ene akhalele akhuatshi? Akhalele anjelo! Awambelele Abalahama egi: ‘Mu givo gidi muza, mu sungi yiyi, mukaji’aye mbawuvuala mona wa yala.’ Mu tangua diene Sara wakhalele mutegelela mu tenta. Sara wasendesele gudilelela hakhenji, wazuelele mu mutshima wenji egi: ‘Ngudi gale muthu wa gukola, ngajiya diago guvuala mona ba?’

Mu givo gialanduile, Sara wavualele mona wa yala, gifua luholo anjelo a Yehowa amulayele. Abalahama wamuhanele jina egi Izake, yakotelesa egi, “Gulela.”

Tangua Izake wataganesele ivo thano, Sara wamonele Ishemayele musagesa Izake. Wakhalele mutshigina gubamba mun’enji, hene wayile muwambela Abalahama ha gukaya Agare nu mun’enji Ishemayele. Thomo Abalahama watunyile. Uvi Yehowa wamuwambelele egi: ‘Tegelela ndaga jiazuela Sara. Mbangubamba Ishemayele. Uvi mbangutagenesa ndaga ngagulayele mu njila ya Izake.’