Lota wakhalele mujinga nu lemba dienji Abalahama mu gifutshi gia Kanana. Luholo Abalahama nu Lota abuile nu shitu jiavula, akhalelego luko nu luholo lua gukhala hamoshi handaga fundo diakhalele diazonda mukunda nu mukut’awo agasue. Abalahama wawambelele Lota egi: ‘Tuajiyilego gukhala fundo dimoshi. Wajiya gutomba fundo diagasue watshigina guya, ame nji ngudi mutomba ha guya gu khanda iko.’ Abalahama wakhalele diago mukamba gubonga gua athu ako.

Lota wamonele mavu abonga hehi nu dimbo dimoshi diakhalele mutamegewa egi Sodoma. Mavu ene akhalele nu mita nu muangu wavula. Lota wayile mukhala guene nu enya fami yenji.

Athu akhalele mu dimbo dia Sodoma nu mu dimbo diko diakhalele hehi diakhalele mutamegewa egi Gomola, akhalele diago athu abola. Gubola guawo guakhalele guavula diago, hene Yehowa wazudile desizio dia gushiya membo ene. Uvi wakhalele mutshigina guhuluisa Lota nu enya fami yenji. Hene watumile anjelo mbadi ha guawambela egi: ‘Zogenu muphushi mu dimbo edi handaga Yehowa udi mutshigina gudishiya.’

Uvi Lota gazogelego muphushi, wakhalele mushipha. Hene, anjelo akuatele Lota nu mukaji’enji nu an’enji a akhetu gu mago, a azolele gonze ya dimbo, awambelele egi: ‘Zulenu phushi! Lengenu hagula mudihuluise, mutadigo gungima. Gula muatala gungima, mudi mufua!’

Tangua ahetele mu dimbo dia Soale, Yehowa wanogesele tshuya nu sufre mu dimbo dia Sodoma nu Gomola. Membo ene mbadi ashiyiwe. Uvi mukaji’a Lota gatumagelego ndaga jiazuelele Yehowa, watalele gungima, wabuile kunji dia mungua! Lota nu an’enji a akhetu afilego handaga atumagele Yehowa. Idi naye gukhala egi Lota nu an’enji a akhetu avile gikenene giavula luholo mukaji’enji gatumagelego Yehowa. Uvi akhalele nu gusuaguluga handaga atumagele ndaga jiawambelele Yehowa ha gutshita.

Abalahama walongesele mun’enji Izake ha guzumba Yehowa nu ha gusha mutshima mu ndaga jiana laya muene. Uvi tangua Izake wataganele ivo 25, Yehowa watogele Abalahama ha gutshita ndaga imoshi yakhalele diago lamba ha gutshita. Wamutogele ha gutshita itshi?

Nzambi wawambelele Abalahama egi: ‘Ngabuba, zangula mun’aye mumoshi ha mumoshi wana zumba muavula, nda n’enji gu mulundu mu gifutshi gia Moria, unguhane n’enji gifua mulambu.’ Abalahama gakhalelego mujiya gishina Yehowa wamutogele ha gutshita ndaga yene. Uvi watumagele Yehowa.

Wazugile mu gimenegena, wazudile Izake nu enya mudimo enji mbadi ayile gu Moria. Awendele masugu thathu, gungima asendesele gumona mulundu wene gualeha. Abalahama wawambelele enya mudimo wenji ha gusala guanengenena, hagula muene nu mun’enji Izake aye ahane mulambu. Abalahama wahanele Izake khunyi ha gubata, uvi muene wazudile mun’a phogo ha mago. Izake wamuhudile egi: ‘Shitu tuya muhanela mulambu idi gui?’ Abalahama wamuwambelele egi: ‘Mun’ami, Yehowa hakhenji uza gutuhana shitu.’

Tangua ahetele gu mulundu, atungile giwotshielo. Gungima Abalahama wajitshigile Izake gu mago nu gu malu; wamuhagele holu dia giwotshielo.

Abalahama wathuphuile phogo. Mu tangua diene, Yehowa wamutamegele sendese mu dilu egi: ‘Abalahama! Ukalagalago mona gubola! Henyaha ngajiya giwa egi wana vuila Nzambi woma handaga watunyilego ha gunguhana mun’aye.’ Gungima Abalahama wamonele gimeme gia mulume; mbinga jienji jiakhalele jia gukuatagana gu gamutshi. Wajituluile Izake shinga, gungima wazudile gimeme, wahanele mulambu.

Mu lusugu luene, Yehowa watamegele Abalahama egi futa dienji. Aye mujiya mukunda natshi? Handaga Abalahama wakhalele mutshita ndaga jiagasue jiakhalele gumuwambela Yehowa, ikhale tangua gakhalelego mukotelesa gishina Yehowa wakhalele gumutoga ha gutshita ngenyi.

Yehowa wawunguluishile luko Abalahama laji diamuhanele muene egi: ‘Mbangugusuanguluisa diago, mbanguvudisa an’aye nu ajigulu aye.’ Yakotelesa egi athu agasue adi mutshita ndaga jiabonga mbaaheta gubonga mu njila ya fami ya Abalahama.