Izake wakhalele nu ivo 40 tangua diazudile muene Rebeka mu ulo. Wakhalele gumuzumba muavula. Avualele ana mbadi a maphasa.

Mona wa thomo jina dienji diakhalele Ezau, wa galenge jina dienji diakhalele Yakoba. Ezau wakhalele munanga mu foto handaga wakhalele yanga; wakhalele muzomba shitu. Uvi Yakoba wakhalele munanga genji hembo.

Mu tangua diene, akhalele muhana mona wa somi gitshinyi gia mavu nu makuta gula sh’enji wafua. Ima yene yakhalele mutamegewa egi khapho. Uvi mukunda nu fami ya Izake, muthu wakhalele naye guheta khapho diene, wakhalele naye nji guheta luendu luko lua ndando. Yehowa wakhalele naye gutagenesa ndaga jialayele muene gudi Abalahama mu njila yenji. Ezau gakhalelego muzula ndaga jiene nu ndando, uvi Yakoba wakhalele mujiya egi jiakhalele nu ndando yavula.

Lusugu lumoshi Ezau wazombele lusugu lua mudidi, wahuidile diago. Tangua diavutugile muene gu inzo wavile vumba diabonga dia ima yakhalele mutelega Yakoba, wazuelele egi: ‘Nzala ingushiya! Nguhane suphu inyi yabenga!’ Yakoba wamuwambelele egi: ‘Ngudi gami guguhana, uvi ngulaye gale egi udi gunguhana khapho diaye dia mona wa somi.’ Ezau wazuelele egi: Zula gaye khapho diene, ‘mbadingutshitshila itshi! Ngudi nu funu ya gudia.’ Udi mutangiza egi Ezau wazudile desizio diabonga ba? Ndo, yakhalele desizio diabola. Ezau watotesele khapho dienji dia ndando mukunda nu suphu yabenga.

Tangua Izake wabuile muthu wa gukola, wakhalele mutshigina guhana mun’enji wa somi khapho. Uvi Rebeka wakuatesele mun’enji wa galenge Yakoba ha guheta khapho diene. Tangua Ezau wajiyile ndaga yene, wavile khabu jiavula, wazuelele egi udi mushiya phangi’enji Yakoba. Izake nu Rebeka akhalele mutshigina gubamba Yakoba, amuwambelele egi: ‘Nda gumbo dia lemba diaye Labana gu Halana, ukhale gale guene uu nu tangua mbaditulula phangi’aye mutshima.’ Yakoba wavile ndaga jiamuwambele mvuaji jienji, walengele ha guhuluisa monyo wenji.

Yehowa walayele Yakoba egi mbawumubamba gifua luholo luabambele muene Abalahama nu Izake. Yakoba wakhalele mujinga mu dimbo dia Halana, wazudile akhetu mu ulo, wavualele ana avula. Wabuile nji nu umonyi wavula.

Gungima Yehowa wambelele Yakoba egi: ‘Vutuga mu gifutshi gia akhakh’aye.’ Hene, Yakoba nu enya fami yenji asendesele gutshita vuayaje yaleha ha guvutuga. Tangua akhalele mu njila, athu ajile muwambela Yakoba egi: ‘Phangi’aye Ezau yowu muza gugutagana nu athu enji 400!’ Yakoba wavile woma egi Ezau wajiya gumushiya nu enya fami yenji. Wakombelele Yehowa egi: ‘Ngabuba, nguhuluise ha mago a phangi’ami.’ Mu lusugu lualanduile, Yakoba watumidile Ezau bakado. Wamutumidile imeme, khombo, ngombe, shamo nu phunda.

Uvi mu phipha yene tangua Yakoba wakhalele hakhenji, wamonele muanjelo! Muanjelo wasendesele gulua n’enji. Aluile uu nu mu gimenegena. Ikhale kulu dia Yakoba diatshingumugile, uvi gabambelego muanjelo. Muanjelo wamuwambelele egi: ‘Ngubembe nguye.’ Uvi Yakoba wamuvutudile egi: ‘Ndo, ngushigo gugubemba gula wangushimbigilego.’

Gu gisugishilo muanjelo wamushimbigile. Yakoba wakotelesele egi Yehowa mbagashigo mubemba egi Ezau amutshite gubola.

Mu gimenegena Yakoba wamonele Ezau muza gualeha nu athu 400. Yakoba wabalegele gutuama dia enya fami yenji, wafugamele phala mu mavu gutuama dia phangi’enji mbala 7. Ezau wayile phushi gudi Yakoba, wamuyambele. Muyadi’awo asendesele gudila, gungima ahagele guhuima. Umutangiza egi Yehowa wadivile gikhuatshi tangua diamonele muene luholo Yakoba walondele mulonga nu phangi’enji?

Gungima Ezau wavutugile gumbo dienji, Yakoba nji wayile mu njila yenji. Yakoba wakhalele nu ana 12. Majina awo ene awa: Ribene, Simeone, Levi, Yuda, Dane, Nefetali, Gade, Asele, Isakale, Zabulona, Yozefe, nu Benjame. Yehowa wahuluishile akombeledi enji mu njila ya mona mumoshi mukatshi dia ana ene. Mona muene jina dienji Yozefe. Aye mujiya luholo lutshi? Tutale luholo yakalegewe.