Yozefe wakhalele mona wa 11 mu vumo dia Yakoba. Mambuta enji akotelesele egi sh’awo wakhalele gumuzumba muavula guabalega. Udi mutangiza egi akhalele gudivua gikhuatshi mukunda nu ndaga yene? Asendesele guvuila Yozefe giphi, akhalelego nji gumuzumba. Lusugu lumoshi Yozefe walotele nzoji, wawambelele aphangi’enji nzoji jiene. Uvi aphangi’enji ajiyile egi nzoji jiene jidi mukotelesa egi gudi nu lusugu mbaafugama gutuama dia Yozefe. Mu tangua diene, akhalelego luko gumuzumba nga hazonda!

Lusugu lumoshi, aphangi a Yozefe akhalele mubamba imeme hehi nu dimbo dia Shekeme. Yakoba watumile Yozefe ha guya guatala ha gujiya gula adi gikhuatshi. Tangua amumonele muza ndambo gualeha, asendesele guzuela egi: ‘Muenya nzoji yowu muza. Tumushiyenu!’ Amukuatele, amubishidile mu wina dia meya dialeha. Uvi phangi’awo mumoshi, jina dienji Yuda wazuelele egi: ‘Tumushiyigo! Tumudige mu uhiga.’ Hene adigile Yozefe gudi enya Madiana anyi akhalele muya gu Egipitu; amudigile mu makuta 20 a utadi.

Gungima, aphangi a Yozefe azudile mulele wenji, awukudile mahatshi a khombo, awutumile gudi sh’awo, azuelele egi: ‘Wuwu mulele wa mun’aye ba?’ Hene, Yakoba watangijile egi shitu yabala ya mu foto yashiyile Yozefe. Muila wamulebele. Guakhalelego nga muthu mumoshi wakhalele nu luholo lua gumuhana gikhesa.

Tangua ayile nu Yozefe gu Ejipitu, amudigile gudi fumu mumoshi wakoma, jina dienji Potifale. Uvi Yehowa wakhalele nu Yozefe. Potifale wamonele egi Yozefe wakhalele mutshita mudimo muabonga, wakhalele nji muthu wa gushila mutshima. Hene wamuhanele ginemo gia gutala ima yenji yagasue.

Mukaji’a Potifale wamonele egi Yozefe wakhalele wabonga, wakhalele nji nu ngolo jiavula. Lusugu nu lusugu, mukhetu muene wakhalele mutoga Yozefe ha gubungisa n’enji muila. Itshi Yozefe watshitshile? Watunyile, wazuelele egi: ‘Ndo! Gutshita ngenyi gudi ndaga yabola. Fumu wami wana gungushila mutshima, aye udi mukaji’enji. Gula ngabungisa naye muila, ngumukalagala gubola guakoma gu meso a Nzambi!’

Lusugu lumoshi mukaji’a Potifale wamukuatele ha gubungisa n’enji muila gu ngolo. Uvi Yozefe wabembele milele yenji ha mago a mukhetu muene, walengele. Tangua Potifale wajile muvutuga gu inzo, mukaji’enji wambidile Yozefe mambo egi watshiginyile gubungisa n’enji muila gu ngolo. Potifale wavuile khabu jiakola, wambile Yozefe mu bologo. Uvi Yehowa gajimbidilego Yozefe nga hazonda.

Tangua Yozefe wakhalele mu bologo, Farao fumu wa gu Ejipitu walotele nzoji inyi yakhalele lamba gudi athu ha gukotelesa. Muenya mudimo wenji mumoshi wamuwambelele egi Yozefe wajiya gumukotelesela nzoji yene. Farao watumile mbala imoshi athu ha guya mukamba Yozefe.

Farao wahudile Yozefe egi: ‘Wajiya gunguhana ukoteleshi wa nzoji ngalotshi ba?’ Yozefe wamuwambelele egi: ‘Mu ivo sambadi idi muza, ima ya gudia mbayikhala yavula mu gifutshi gia Ejipitu; uvi gungima, nzala mbayikhala guene ivo sambadi. Tomba muthu watema ha gubamba mbuto hagula athu mbaafuigo gu nzala.’ Farao wamuvutudile egi: ‘Ngudi gugutomba aye! Mbawukhala muthu wa mbadi gungima diami mu gifutshi giagasue gia Ejipitu!’ Aye mujiya muthu wakuatesele Yozefe ha gukotelesa nzoji ya Farao ba? Yehowa wamukuatesele.

Mu ivo sambadi yalanduile, Yozefe wakhalele mubungisa mbuto. Gungima, nzala yanginyile ha mavu a mudidi gifua luholo luazuelele muene. Athu akhalele mukatuga mu mafundo a gudisha ha guza musumba ima ya gudia gudi Yozefe. Sh’enji Yakoba wavile egi ima ya gudia yakhalele yavula gu Ejipitu, hene watumile an’enji kumi ha guya musumba ndambo ya ima guene.

An’a Yakoba ayile gudi Yozefe, muene waajiyile mbala imoshi, uvi ene amujiyilego. Afugamele gutuama dienji phala mu mavu, gifua luholo lualotele muene nzoji hakhalele muene mona wazonda. Yozefe wakhalele mukamba gujiya gula aphangi’enji asombegesele gale. Waawambelele egi: ‘Muaji mutala dimbo nu matangi abola. Muaza mutala dimbo dietu ha gujiya fundo muajiya gunginyina ha gutuluisa.’ Ene azuelele egi: ‘Ndo! Tuavualewe 12, tuana khala mu gifutshi gia Kanana. Phangi’etu mumoshi wafuile, uvi galenge getu muko wasadi nu tata.’ Gungima Yozefe waawambelele egi: ‘Ngubatelenu galenge genu muene hagula ngujiye egi mudi muzuela giamatshidia.’ Hene, avutugile gudi sh’awo gu Kanana.

Tangua ima ya gudia yahuile, Yakoba wavutuile luko an’enji gu Ejipitu ha guya musumba ima ya gudia. Mu mbala yene, ayile nu phangi’awo wa galenge Benjame. Yozefe wambile khopho dienji dia utadi wa siliva mu sagi ya Benjame ha gulola aphangi’enji, gungima waawambelele egi muakuyi khopho diami. Tangua enya mudimo a Yozefe amonele khopho diene mu sagi ya Benjame, aphangi’enji avile diago gikenene. Abubidile Yozefe ha guahana ndola ha fundo dia Benjame.

Ngenyi, Yozefe wakotelesele diago egi aphangi’enji asombegesele gale. Yozefe gakhalelego luko nu luholo lua gudikanda, wasendesele gudila. Waawambelele egi: ‘Ame phangi’enu Yozefe. Tata yowu nu monyo ba?’ Aphangi’enji adihudile diago muavula. Waawambelele egi: ‘Mudisagesago mukunda nu ndaga muangukalegele. Nzambi wangutumile ha fundo didi ha gumihuluisa. Henyaha, vutugenu muphushi, zangulenu tata muze n’enji.’

Avutugile mu gifutshi giawo ha guwambela sh’awo lumene luabonga; ayile n’enji gu Ejipitu. Gungima dia gudikhapha ivo yavula, Yozefe nu sh’enji ajingile luko hamoshi.