Guakhalele nu yala mumoshi wakhalele mukombelela Yehowa mu gifutshi gia Uze. Jina dienji Yobo. Wakhalele nu umonyi wavula, wakhalele nji nu fami yakoma. Wakhalele muenya gisemo, wakhalele mukuatesa phutu nu akhetu a gafunda nu ana a shiye. Na idi mukotelesa egi Yobo gakhalelego naye gutagana nu malamba handaga wakhalele mutshita ndaga jiabonga ba?

Satana Diabulu wakhalele mutala Yobo, uvi muene gakhalelego mujiya. Yehowa wahudile Satana egi: ‘Wamonyi muenya mudimo wami Yobo ba? Gushigo nga nu muthu mumoshi ha mavu gifua muene. Wana gunguvuila woma nu wana tshita ndaga jiabonga.’ Satana wamuvutudile egi: ‘Yobo wana gugutumagela, handaga wana gumubamba nu wana gumushimbiga. Wamuhanele mavu nu shitu jiavula. Mutambule naye tutale gula gashigo mubemba gugukombelela.’ Yehowa wamuwambelele egi: ‘Wajiya gumutambula nayo, uvi umushiyigo.’ Mukunda natshi Yehowa wabembele egi Satana alole Yobo? Handaga wakhalele musha mutshima egi Yobo mbawusala ya gujinginyina gudi muene.

Satana wasendesele gubatela Yobo malamba avula. Thomo watumile enya gu Seba ha gushiya enya mudimo a Yobo nu gutambula phunda jienji. Gungima tshuya tuazogele, tuakondele imeme yenji yagasue. Thundu iko ya nzangi jia enya Kaldea yakuatele shamo jienji jiagasue. Ashiyile athu akhalele mubamba shitu jiene. Gungima ndaga iko ya lamba yamubuidile. Lusugu lumoshi, tangua an’enji akhalele mukalagala wano, inzo yaabuidile, mukut’awo agasue afuile. Yobo watagenele nu malamba avula uvi gabembelego gukombelela Yehowa.

Satana watshiginyile egi Yobo amone malamba avula diago, hene wamulogele misongo. Ijimbo yamuzogele muila wagasue. Yakhalele diago lamba mukunda nu Yobo. Gakhalelego mujiya mukunda natshi ndaga eji jiagasue jiakhalele gumubuila. Uvi, walanduile gukombelela Yehowa. Nzambi wamonele ndaga jiene jiagasue, hene wasuangulugile nu Yobo muavula.

Gungima, Satana watumile luko mala thathu ha guya mulola Yobo. Amuwambelele egi: ‘Idi naye gukhala egi watshitshi gubola nu wakambi gusuega gubola guene, hene Nzambi waguhana ndola.’ Yobo wazuelele egi: ‘Ngakalegelego nga ndaga imoshi yabola.’ Uvi gungima wasendesele gutangiza egi Nzambi udi gumubatela malamba ene agasue. Wazuelele egi Nzambi udi gungukalegela ndaga mu luholo luabola.

Muvuala mumoshi wa yala jina dienji Elihu, wakhalele tedie mutegelela tangua akhalele muta maga. Gungima wazuelele egi: ‘Ndaga jiagasue mudi muzuela jidi jiabola. Yehowa udi wakoma gubalega, tuajiyilego gukotelesa ndaga jienji jiagasue. Gajiyilego gutshita nga ndaga imoshi yabola. Wana mona ndaga jiagasue, wana khala nji hehi ha gukuatesa athu adi mutagana nu malamba.’

Gungima Yehowa watele maga nu Yobo. Wamuhudile egi: ‘Tangua ngafugile dilu nu mavu, aye wakhalele gui? Mukunda natshi udi muzuela egi ngudi gugukalegela ndaga mu luholo luabola? Udi muzuela uvi ushigo mujiya mukunda natshi ndaga eji jiagasue jidi mubua.’ Yobo watshiginyile gubola guenji, wazuelele egi: ‘Ngatshitshi gubola. Ngakhalele guguvua gu maga, uvi henyaha ngagujiya diago muabonga. Gushigo nga ndaga imoshi idi yakola gutuama diaye. Ngabuba, ngutotesele mukunda nu ndaga jiagasue ngazuelele.’

Gungima dia ndaga jiene jiagasue, Yehowa wahanele Yobo umonyi wavula gubalega unu gakhalele nawo thomo. Yobo wajingile masugu avula, wakhalele nji nu gusuanguluga. Yehowa washimbigile Yobo luholo gasalele ya gujinginyina gudi muene ikhale mu tangua dia lamba. Aye nji mbawulandula gukombelela Yehowa ikhale watagana nu malamba ba?

Tangua fami ya Yakoba yakhalele gu Ejipitu, akhalele mutamegewa egi enya Isalele. Gungima dia gufua gua Yakoba nu Yozefe, Farao muhe-muhe wasendesele guhinyina. Wavile woma handaga enya Isalele akhalele mubua nu ngolo jiavula gubalega enya Ejipitu. Hene Farao wabuishile enya Isalele ahiga enji. Wakhalele guashinjiga ha gulonda brike nu gukalagala midimo yakola mu mahia. Uvi ikhale ngenyi, enya Isalele alanduile gudivudisa. Ndaga yene yasuanguluishilego Farao, hene wambile mukhuala egi mona wa yala wagasue wavualewa gudi muenya Isalele udi naye gushiyiwa. Aye mujiya luholo enya Isalele adivile ba?

Muenya Isalele mumoshi wa mukhetu jina dienji Yokebede, wavualele mona wa yala wabonga. Wamumbile mu musanda, wayile gumusuega moshi’a muangu wakhalele mu khulo ya Muta wa Nile, ha gumubamba. Mona muene wakhalele nu phangi’enji wa mukhetu jina dienji Miriame; Miriame wamagenele ndambo gualeha ha gumutalela.

Mun’a Farao wa mukhetu wayile gu muta ha guzua meya, wamonele musanda. Tangua gakangudile musanda wene, wamonele mona mudila, wamuvidile khenda. Miriame wamuhudile egi: ‘Ngajiya guya gugutamegela mukhetu mumoshi hagula aze akhale guguwamuesela mona yowu ba?’ Mun’a Farao wa mukhetu watshiginyile, hene Miriame wayile mutamega gin’enji Yokebede. Mun’a Farao wa mukhetu wamuwambelele egi: ‘Zangula mona yowu, ukhale gunguwamuesela n’enji, ame mbangugufuta.’

Tangua diakudile mona muene, Yokebede wayile n’enji gudi mun’a Farao. Mun’a Farao wamusasele gifua mun’enji, wamuhanele jina egi Moize. Moize wakhalele gifua mun’a fumu, wakhalele naye gutshita ndaga yagasue gakhalele mutshigina. Uvi Moize gajimbidilego Yehowa nga hazonda. Wakhalele mujiya muabonga egi gashigo muenya Ejipitu uvi udi muenya Isalele. Hene, watombele ha gukombelela Yehowa.

Tangua Moize watangenesele ivo 40, watshiginyile gukuatesa aphangi’enji enya Isalele. Lusugu lumoshi wamonele muenya gu Ejipitu mubeta muhiga mumoshi wa gu Isalele; Moize wabetele muenya gu Ejipitu muene mangololo, wamushiyile. Wavumbigile kimbi gienji mu gishegele. Tangua Farao wajiyile ndaga yene, wakambele luholo lua gushiya Moize. Uvi Moize walengele, wayile mu gifutshi gia Madiana. Yehowa walanduile gumubamba guene.