MMoize watshitshile ivo 40 gu Madiana. Wazudile mukhetu mu ulo, gungima wavualele ana. Lusugu lumoshi hakhalele muene mubamba imeme yenji hehi nu mulundu wa Sinayi, wamonele ndaga imoshi ya gushimana. Gamutshi gamoshi gakhalele mulema tshuya, uvi gakhalelego muhia! Hasuenele muene hehi ha gutala muabonga, wavile dijui dimoshi muzuela hakatshi dia gamutshi gene egi: ‘Moize! usuenyigo hehi. Katula saphata jiaye handaga fundo udi wagumagana didi fundo dia gijila.’ Yakhalele Yehowa wakhalele muzuela n’enji mu njila ya muanjelo.

Moize wavile woma, watshuigile phala yenji. Dijui diene diamuwambelele egi: ‘Ngamona malamba a enya Isalele. Ngudi guahuluisa ha mago a enya Ejipitu ha guabata mu gifutshi giabonga. Aye mbawutuameza athu ami ha guzoga gu Ejipitu.’ Moize wadihudile diago mukunda nu ndaga yene.

Moize wahudile egi: ‘Mbaguzuela egi tshi gula athu anguhula egi nanyi wa gutumi?’ Nzambi wamuvutudile egi: ‘Awambele egi Yehowa, Nzambi wa Abalahama, Nzambi wa Izake nu Nzambi wa Yakoba wangutumi gudi enue.’ Uvi Moize wazuelele egi: ‘Itshi mbangutshita gula atuna gungutegelela?’ Yehowa wamuhanele ijiyishilo inyi yakhalele naye gumukuatesa. Wamuwambelele ha gubishila muhango wenji hashi. Tangua Moize wabishidile muhango, wabuile nyoga! Wakuatele nyoga yene gu ngonzo, yavutugile luko muhango. Yehowa wamuwambelele egi: ‘Tangua mbawaahana gijiyishilo gigi, mbaatshigina egi ame ngagutumi.’

Moize wazuelele egi: ‘Ngana zuela ndo muabonga, ngana gukukuma.’ Uvi Yehowa wamulayele egi: ‘Mbanguguwambela ndaga jia guzuela; mbangutuma nji phangi’aye Alona ha gugukuatesa.’ Moize wakotelesele egi Yehowa mbawumukuatesa diago, hene wazudile mukaji’enji nu an’enji, ayile gu Ejipitu.

Enya Ejipitu akhalele mushinjiga enya Isalele ha gutshita midimo gu ngolo. Yehowa watumine Moize nu Alona ha guwambela Farao egi: ‘Bemba athu ami aye ha gungukombelela mu mavu a luselenga.’ Uvi Farao wazuelele nu lulendo luagasue egi: ‘Ngatuna ndaga jiazuela Yehowa, ngushigo mubemba enya Isalele ha guya.’ Gungima wakolesele luko midimo yakhalele mutshita enya Isalele. Yehowa wakhalele mutshigina gulongesa Farao ndaga imoshi. Aye mujiya ndaga yene? Wahanele enya Ejipitu ndola kumi. Yehowa wawambelele Moize egi: ‘Farao gashigo gungutegelela. Hamene mu gimenegena mbawukhala gu Muta wa Nile. Nda umuwambele egi luholo gabembelego athu ami ha guya, meya a Muta wa Nile adi mubua mahatshi.’ Moize watshitshile gifua luholo Yehowa wamuwambelele, wayile gudi Farao. Alona wabetele muhango holu dia muta wa Nile ha meso a Farao, meya abuile mahatshi, asendesele guzola vumba diabola, jishui jiafile, guakhalelego luko nu luholo lua gunua meya a Muta wa Nile. Uvi Farao watunyile gubemba enya Isalele ha guya.

Gungima dia masugu 7, Yehowa watumine luko Moize gudi Farao ha gumuwambela egi: ‘Gula watuna gubemba athu ami ha guya, mbanguzalesa gifutshi gia Ejipitu nu minonge.’ Alona wathuphuile muhango wenji, minonge yazalele mu gifutshi. Minonge yakhalele mungina mu jinzo, ha itanda (iphona) nu mu malonga. Yazalele mu mafundo agasue! Farao watogele Moize ha gububidila Yehowa ha gukatula minonge. Wazuelele egi gula minonge yahua, udi mubemba enya Isalele ha guya. Yehowa wakatudile ndola yene. Enya Ejipitu abungishile minonge thundu-thundu. Gifutshi giagasue giasendesele guzoga vumba diabola. Uvi Farao gambembelego enya Isalele ha guya.

Yehowa wawambelele Moize egi: ‘Alona udi naye guthuphula muhango wenji ha gubeta fuphi ya mavu, fuphi yene mbayibua jimue nga tunzunzu mu gifutshi giagasue gia Ejipitu.’ Jimue jiazalele mu mafundo agasue mu mbala imoshi. Athu a Farao amuwambelele egi: ‘Ndola yiyi yakatuga gudi Nzambi.’ Uvi ikhale ngenyi, Farao gabembelego enya Isalele ha guya.