Moize nu Alona ayile muwambele Farao ndaga jiazuelele Nzambi egi: ‘Gula watuna gubemba athu ami ha guya, mbagutuma tudimu mu gifutshi.’ Tudimu tuavula tuazalele mu jinzo jia enya Ejipitu, ikhale mu jinzo jia enya umonyi nga phutu. Gifutshi giagasue giazalele nu tudimu. Uvi tudimu tuakhalelego mu mavu a Goshene, fundo enya Isalele akhalele mujinga. Ndola ya nguana nu ndola jiko jialanduile jiakhalele mukuata phamba enya Ejipitu. Farao wabubidile Moize egi: ‘Bubila Yehowa akatule tudimu, gungima ngumubemba athu enu ha guya.’ Uvi tangua Yehowa wakatudile tudimu, Farao watunyile gubemba enya Isalele ha guya. Farao gakhalelego muzula malongo mu ndaga jiakhalele guabuila ba?

Yehowa wazuelele egi: ‘Gula Farao gabembelego athu ami ha guya, shitu jiagasue jia enya Ejipitu mbajikata nu mbajifua.’ Mu lusugu lualanduile, shitu jiasendesele gufua. Uvi shitu jia enya Isalele jiakhalelego mufua. Ikhale ngenyi Farao wakhalele muto tenyi, gabembelego enya Isalele ha guya.

Yehowa wawambelele Moize ha guzula fuphi ya ha jigo ha mago ha guya guyikuwa gosa gutuama dia Farao. Fuphi yene yamuanganele mu gifutshi giagasue gia Ejipitu. Yazolele ijimbo gu mila ya enya Ejipitu agasue nu shitu jiawo. Uvi Farao watunyile gubemba enya Isalele ha guya.

Yehowa watumine Moize ha guvutuga luko gudi Farao ha gumuwambela egi: ‘Uu nu lunyelu ushigo mutshigina gubemba athu ami ha guya. Hamene mvula yakola ya may’a-nzanza mbayinoga mu gifutshi giagasue.’ Mu lusugu lualanduile, Yehowa watumile may’a-nzanza nu miandu nu tshuya. Yakhalele mvula yakola ya gikudi inyi khenji inogele galego gu Ejipitu. Yabolesele mitshi nu mbuto jiagasue jia enya Ejipitu. Uvi mvula yene yanogelego gu Goshene. Farao wawambelele Moize egi: ‘Bubilenu Yehowa ha gumanesela mvula! Gungima ngudi gumibemba ha guya.’ Uvi hahuile mvula ya may’a-nzanza, Farao watunyile guabemba ha guya.

Gungima Moize wazuelele egi: ‘Matulu mbaadia ima yagasue yabembele may’a-nzanza.’ Gungima matulu adile ima yagasue yasalele mu mahia nu mitshi. Farao wabubidile Moize egi: ‘Bubila Yehowa ha gukatula matulu wawa.’ Uvi tangua Yehowa wakatudile matulu ene, Farao watunyile gubemba enya Isalele ha guya.

Yehowa wawambelele Moize egi: ‘Thuphula koko diaye gosa.’ Moize wathuphuile koko gosa, guma guabutshile mbala imoshi. Enya Ejipitu akhalele mu phipha yakola masugu thathu, akhalelego mumona nga gima gimoshi. Uvi enya Isalele akhalele mu muanya.

Farao wawambelele Moize egi: ‘Zangula athu aye, muye. Uvi bembenu shitu jienu.’ Moize wazuelele egi: ‘Tudi naye guya nu shitu jietu ha guhana milambu gudi Nzambi wetu.’ Farao wavile khabu jiavula. Wabalele Moize egi: ‘Katuga haha! Gula mbangagumona luko haha, mbangugushiya.’

Moize wawambelele Farao egi mbagashigo muza luko gutuama dienji. Uvi gutuama egi akatuge, wamuwambelele egi: ‘Ana a somi agasue a gu Ejipitu amuza mufua mukatshi dia phipha; sendese gudi mun’a Farao uu nu gudi mun’a muhiga.’

Yehowa wawambelele enya Isalele ha gulondega ima ya gudia ya ndando. Waawambelele egi: ‘Shiyenu mun’a gimeme nga mun’a khombo wagasue udi nu givo gimoshi, mukule mahatshi enji gu mufulo. Mudi naye guwetshia misunyi yenji nu guyidia nu mapha ashigo nu levire. Mudi naye gusudiga mikaba yenu ha kete, nu saphata gu malu ha guya. Mbangumizola mu uhiga mu phipha yene.’ Tangiza luholo enya Isalele akhalele nu gusuanguluga tangua avile ndaga eji!

Mukatshi dia phipha, muanjelo wa Yehowa wabalegele mu jinzo jiagasue jia enya Ejipitu. Washiyile ana agasue a somi anyi akhalele mu jinzo jinyi jiakhalelego nu mahatshi agukula ha mifulo. Uvi muanjelo gakhalelego mungina mu jinzo jinyi jiakhalele nu mahatshi a gukula ha mifulo. Fami jiagasue jia gu Ejipitu, ikhale jia enya umonyi nga jia phutu, jiafishile mona. Uvi gushigo nga mona mumoshi wa enya Isalele wafile.

Mun’a Farao nji wafile. Ndaga yene yasagesele Farao muavula. Wawambelele Moize nu Alona mbala imoshi egi: ‘Zugenu, katugenu haha. Ndenu mukombelele Nzambi wenu. Zangulenu nji shitu jienu, ndenu!’

Enya Isalele azogele gu Ejipitu mu mueji (mota) wa ngonda; athu nu athu akhalele muzoga mu fami yawo nu mu giphuta giawo. Mala a enya Isalele azogele gu Ejipitu akhalele 600 000; akhalele nu an’awo nu akhetu. Athu ako avula azogele nji nawo ha guya mukombelela Yehowa. Yehowa wazolele enya Isalele mu uhiga!

Enya Isalele akhalele naye gutshita wano ha gudia ima ya ndando givo nu givo ha guwunguluga luholo Yehowa wahuluishile. Wano wene wakhalele mutamegewa egi Pake.