Yehowa wawambelele Moize egi: ‘Kanduga haha gudi ame gu mulundu. Mbangusonega mikhuala yami holu dia ibala ya seso, gungima mbaguguhana nayo.’ Moize wakandugile gu mulundu, wakhalele guene masugu 40 phipha nu muanya. Tangua diakhalele muene guene, Yehowa wasonegele mikhuala kumi holu dia maseso mbadi, gungima waahanele Moize.

Gungima dia masugu, enya Isalele atangijile egi Moize mbagashigo muvutuga luko. Awambelele Alona egi: ‘Tudi nu funu ya muthu ha gututuameza. Tulondele nzambi!’ Alona wazuelele egi: ‘Ngubatelenu wolo.’ Alona wawotshiele wolo wene, gungima walondele gisongo gia mun’a ngombe. Athu azuelele egi: ‘Mun’a ngombe wuwu wene Nzambi watuzolele gu Ejipitu!’ Asendesele guwukombelela; akalegele wano wakoma. Udi mutangiza egi atshitshile muabola ba? Ayi, handaga anemeselego ndaga alayele Yehowa egi mbamukombelela phamba muene. Uvi gungima akombelele gawo gisongo.

Yehowa wamonele ndaga athu akhalele mukalagala. Wawambelele Moize egi: ‘Bulumuga gudi athu. Atuna gungutumagela, adi mukombela nzambi ya mambo.’ Moize wabulumugile gu mulundu, wakhalele nu maseso mbadi a mikhuala ha mago.

Tangua Moize wasuenele hehi nu phundo, wavile athu muyimba. Waamonele mukina nu gufugama gutuama dia mun’a ngombe. Moize wavile khabu jiavula. Wabishidile maseso a mikhuala mu mavu, amuanganele itshinyi-itshinyi. Wamuangele mbala imoshi gisongo giene. Gungima wahudile Alona egi: ‘Luholo lutshi athu wawa agutuma ha gutshita gubola guakoma ngegi?’ Alona wazuelele egi: ‘Ulabigo guvua khabu jiabala. Aye hakhaye udi mujiya athu awa muabonga. Akhadi nu funu ya nzambi, hene ngazudi wolo wawo, ngawumbi ha tshuya ha gualondela mun’a ngombe wuwu!’ Alona gakhalelego naye gutshita ndaga ya luholo elu. Moize wakandugile luko gu mulundu, wabubidile Yehowa ha guatotesela.

Yehowa watotesele athu anyi akhalele hehi ha gumutumagela. Yakhalele diago nu ndando egi enya Isalele alandule utuameji wa Moize.

Tangua Moize wakhalele gu Mulundu wa Sinayi, Yehowa wamuwambelele ha gutunga tenta imoshi hagula enya Isalele akhale muya gumukombelela guene; tenta yene yakhalele mutamegewa egi tabernakle. Akhalele mubata tabernakle yene fundo diagasue akhalele muya.

Yehowa wawambelele Moize egi: ‘Wambela athu ha guhana ima adi nayo ha gutunga tabernakle.’ Enya Isalele ahanele wolo, utadi wa siliva, kuivre, maseso a ndando nu misanga ya ndando. Ahanele nji milele ya linene, ilema ya shitu nu ima iko yavula. Ahanele diago ima yavula, hene Moize waawambelele egi: ‘Yatagana! Mubatshigo ima iko.’

Mala nu akhetu anyi akhalele mujiya gutshita midimo ya mago akuatesele ha gutunga tabernakle. Yehowa waahanele ndunge ha gutshita mudimo wene. Athu ako akhalele mulonda wanda, gutunga milele nga gulonda ifuanesa gu milele yene. Uvi ako akhalele mulonda maseso, nu wolo, nga gukoka mabaya.

Atungile tabernakle yene gifua luholo Yehowa waawambelele. Alondele rido yabonga ha gukhaphumuna tabernakle yene mu itshinyi mbadi, Fundo dia Gijila nu Fundo Diabalega Gijila. Ha Fundo Diabalega Gijila hakhalele nu mushete wa gikotelo walondewe nu mabaya a akazia nu wolo. Ha Fundo dia Gijila hakhalele nu gihagelo gia muenda nu mesa nu giwotshielo gia uhafu. Mu gibanzala gia tabernakle muakhalele nu longa diakoma dia kuivre nu giwotshielo giakoma. Mushete wa gikotelo wakhalele muwungunguluisa enya Isalele ndaga alayele Yehowa ha gumutumagela. Aye mujiya gula gikotelo gidi itshi? Idi ndaga imoshi ya ndando muthu wana laya ha gutshita.

Yehowa watombele Alona nu an’enji ha gutshita mudimo wa unganga-nzambi mu tabernakle. Akhalele naye gubamba tabernakle nu guhana Yehowa milambu. Phamba nganga-nzambi wakoma Alona wahanewe njila ya gungina ha Fundo Diabalega Gijila. Wakhalele mungina mbala imoshi mu givo ha guhana mulambu mukunda nu gubola guenji nu gua enya fami yenji nu gua enya Isalele agasue.

Tangua enya Isalele amanesele gutunga tabernakle, akhalele atagenesa gale givo gimoshi sendese tangua azogele gu Ejipitu. Ahetele diago fundo dia gukombelela Yehowa.

Yehowa wazalesele tabernakle nu lutumbu luenji, wahagele nji kunji dia tuta holu dia tabernakle. Tangua diagasue tuta diakhalele holu dia tabernakle, enya Isalele akhalelego mukatula phundo yawo hene. Uvi gula tuta diene diakatuga, ene nji akhalele mukatuga ha fundo diene. Akhalele mukatula tabernakle ha gulandula tuta.