Tangua enya Isalele akatugile gu Mulundu wa Sinayi, abalegele mu mavu a luselenga a Parane, ayile gu Kadeshe. Yehowa wawambelele Moize egi: ‘Tuma athu ha guya mutala gifutshi gia Kanana, gifutshi ngudi muhana enya Isalele. Mu giphuta nu giphuta, udi naye gutuma muthu mumoshi.’ Moize watombele mala 12, waawambelele egi: ‘Ndenu gu Kanana mutale gula mavu ene anazola mbuto. Talenu nji gula athu a mu gifutshi giene adi enya ngolo nga ndo, gula ana jinga mu matenta nga mu membo.’ Mala ene 12 ayile mutala gifutshi gia Kanana; Yoshua nu Kalebe akhalele nawo.

Gungima dia masugu 40, mala ene ajile muvutuga, abatele mabundu a figi nu a grenade nu a vinyo. Azuelele egi: ‘Gifutshi giene gidi giabonga, uvi athu a mu gifutshi giene adi enya ngolo, membo awo adi nu ibayi yakola.’ Uvi Kalebe wazuelele egi: ‘Tuajiya guabinga. Tuyenu tualuise!’ Umujiya mukunda natshi Kalebe wazuelele ngenyi? Idi handaga muene nu Yoshua akhalele mushila Yehowa mutshima. Uvi Mala ako kumi azuelele egi: ‘Ndo! Athu ene adi nu ngolo, adi akoma, aleha! Tuakhadi gifua tumatulu gutuama diawo.’

Enya Isalele alebele diago muila. Asendesele guboguta, akhalele muzuela egi: ‘Tutombenu fumu muko, tuvutuge gu Ejipitu. Mukunda natshi tudi naye guya mu gifutshi giene hagula tushiyiwe?’ Yoshua nu Kalebe azuelele egi: ‘Mulumbugilago Yehowa, muvuigo woma, handaga Yehowa mbawutubamba.’ Uvi enya Isalele atunyile guavila. Atshiginyile gushiya Yoshua nu Kalebe!

Itshi Yehowa watshitshile? Wawambelele Moize egi: ‘Uu nu tangua ditshi mbaalandula gutuna gungutumagela, ikhale ngaakalegele gale ndaga jiavula. Hene mbaawungagana mu mavu a luselenga ivo 40 nu mbaafua muene. Phamba an’awo nu Kalebe nu Yoshua mbaangina mu mavu ngalayele ha guahana.’

Tangua enya Isalele akhalele mu mavu a luselenga, Kora, Datana nu Abirame nu athu ako 250 atunyile gutumagela Moize. Azuelele egi: ‘Muatusegela diago! Mukunda natshi phamba aye udi naye gukhala fumu wetu nu phamba Alona udi naye gukhala nganga-nzambi wakoma? Yehowa gashigo phamba nu aye nu Alona, uvi udi nji nu esue.’ Yehowa gasuangulugilego nu ndaga yene. Wamonele egi athu ene akhalele gumulumbugila!

Moize wawambelele Kora nu athu agasue akhalele gu khanda yenji egi: ‘Hamene mu gimenegena zenu gu tabernakle, mudi naye guza nu tshuya nu uhafu ha malonga. Yehowa muene hakhenji mbawutuwambela muthu watombi muene.’

Mu lusugu lualanduile, Kora nu athu ako 250 ayile mutagana nu Moize gu tabernakle. Asendesele guwotshia uhafu gifua muana tshita nganga-nzambi. Yehowa wawambelele Moize nu Alona egi: ‘Katugenu hehi nu Kora nu athu enji.’

Ikhale Kora wayile gudi Moize gu tabernakle, uvi Datana nu Abirame nu enya fami jiawo atunyile guya. Yehowa wawambelele enya Isalele ha gukatuga hehi nu tenta ya Kora, ya Datana nu ya Abirame. Enya Isalele akatugile mbala imoshi. Datana nu Abirame nu enya fami jiawo amaganele gutuama dia tenta jiawo. Mavu akangulugile mbala imoshi ha fundo diakhalele ene, a aminyile! Tshuya tuakatugile mu tabernakle tuakondele Kora nu athu enji 250.

Gungima Yehowa wawambelele Moize egi: ‘Zula muhango wa fumu wa giphuta giagasue, sonega jina dienji gu muhago wene. Uvi gu muhango wa giphuta gia enya Levi udi naye gusonega jina dia Alona. Haga mihango yene mukatshi dia tabernakle, muhango wa muthu mbangutomba, mbawuzola iyaji.’

Lusugu lualanduile, Moize wazogele nu mihango yene, ha guyitalesa mafumu a iphuta. Muhango wa Alona wazolele iyaji nu mabundu a amande a guhia. Yehowa wamonesele diago egi watombele Alona ha gukhala nganga-nzambi wakoma.