Gungima dia gutuameza enya Isalele ivo yavula, Yoshua wafile nu ivo 110. Enya Isalele akhalele mukombelela Yehowa tangua diagasue Yoshua wakhalele nu monyo. Uvi tangua diafile muene enya Isalele asendesele gukombelela nzambi jia isongo jia enya Kanana. Tangua Yehowa wamonele egi enya Isalele akhalelego luko gumukombelela, wabembele egi fumu Yabine wa gu Kanana a amonese lamba. Athu asendesele gububila Yehowa ha guakuatesa. Hene Yehowa waahanele fumu muhe-muhe, jina dienji Balaka. Wakhalele naye gukuatesa athu ha guvutuga gudi Yehowa.

Profete Debora, watumile athu ha gutamega Balaka. Wakhalele mutshigina gumuwambela ndaga jiazuelele Yehowa. Wawambelele Balaka egi: ‘Zula mala 10 000, uye utagane nu masuta a Yabine gu gamuta ga Kishana. Mbawubinga Sisera fumu wa masuta a Yabine.’ Balaka wawambelele Debora egi: ‘Mbanguya gula watshigina guya nu ame.’ Debora wazuelele egi: ‘Mbagumuya nu aye. Uvi jiya egi ishigo aye mbawushiya Sisera, handaga Yehowa wazuelele egi idi mukhetu mbawumushiya.’

Debora wayile nu Balake nu masuta enji gu Mulundu wa Tabola ha gudilondega ha gulua ita. Tangua Sisera wavile ndaga yene, wabungishile phusu-phusu jia ita mu baba dimoshi diakhalele hehi. Debora wamuwambelele egi: ‘Mangino Yehowa udi gugukuatesa ha gubinga Sisera.’ Balaka nu masuta enji 10 000 akatugile gu mulundu, abulumugile ha gulua nu masuta a ngolo a Sisera.

Yehowa watshitshile egi gamuta ga Kishona gazale. Phusu-phus jia Sisera jiakuataganele mu ithotho. Hene sisera watulugile ha phusu-phusu walengele. Balaka nu masuta enji abingile masuta a Sisera. Uvi Sisera walengele! Wayile gudisuega mu tenta ya mukhetu mumoshi, jina dienji Yaele. Yaele wamuhanele miliki ha gunua, gungima wamutshuigile mbulaketa. Sisera wabandele, wakhalele ya guhuila diago. Gungima Yaele wazudile muphushi mutshi wa tenta wamukhokhele mu muto. Sisera wafile.

Balaka wajile nu gukamba Sisera. Yaele wamaganele ha mufulo wa tenta yenji, wamuwambelele egi: ‘Ngina, umone muthu udi mukamba.” Hanginyile Balaka mu tenta, wamonele Sisera hashi ya gufua. Balaka nu Debora ayimbile lungimbo ha gutumbuisa Yehowa luholo luakuatesele muene enya Isalele ha gubinga mbalagaji jiawo. Enya Isalele akhalele mu guhuima ivo 40.

Tangua nzala yanginyile gu Isalele, muenya Isalele mumoshi jina dienji Naomi wayile mu gifutshi gia Moabe nu mulumi’enji nu an’enji mbadi a mala. Gungima mulumi’enji wafile. An’enji a azudile akhetu a gu Moabe mu ulo; Luta nu Orpa. Ndaga ya gikenene idi egi ana a Naomi nji afile.

Tangua Naomi wavile egi nzala yahui gale gu Isalele, wazudile desizio dia guvutuga guene. Luta nu Orpa avutugile nji n’enji. Uvi tangua akhalele muya mu njila, Naomi waawambelele egi: ‘Muakhalele akhetu abonga mukunda nu an’ami nu iwaji yabonga gudi ame. Ngudi mutshigina egi muzudiwe luko mu ulo. Vutugenu gumbo dienu gu Moaba.’ Uvi Luta nu Orpa azuelele egi: ‘Tuaguzumba! Tushigo mutshigina gugubemba.’ Naomi wakhalele guabubila ha guvutuga. Orpa wavutugile, uvi Luta wasalele. Naomi wamuwambelele egi: ‘Orpa wavutuga gudi akuaku’enji nu nzambi jienji. Aye nji vutuga n’enji, nda gumbo dia gin’aye. Uvi Luta wazuelele egi: ‘Mbangushigo gugubemba. Athu aye mbaabua athu ami, Nzambi waye mbawubua Nzambi wami.’ Udi mutangiza egi Naomi wadivile gikhuatshi havile muene ngenyi?

Luta nu Naomi ahetele gu Isalele mu sungi ya gukatula orje. Lusugu lumoshi, Luta wayile munona mbuto mu dihia dia muthu mumoshi jina dienji Boaze; Boaze wakhalele mun’a Rahabe. Athu awambelele Boaze egi Luta udi muenya Moabe munu wajile nu Naomi. Hene, Boaze wawambelele enya mudimo wenji ha gubemba ndambo ya mbuto hashi ha gula Luta anone.

Mu ngueze, Naomi wahudile Luta egi: ‘Mangino watshitshi mu dihia dia nanyi?’ Luta wazuelele egi: ‘Mu dihia dia muthu mumoshi, jina dienji Boaze.’ Naomi wazuelele egi: ‘Boaze udi phangi’a mulumi’ami. Khala mutshita mudimo mu dihia dienji nu mavuala ako a akhetu. Mbawukhala mu ubambi guene.’

Luta walanduile gutshita mudimo mu dihia dia Boaze uu nu tangua sungi ya gukatula mbuto yahuile. Boaze wakotelesele egi Luta wakhalele mutshitshi wa midimo, wakhalele nji mukhetu wabonga. Mu masugu ene, gula yala wafua uvi muene nu guvuala ndo nga mona wa yala, phangi’enji udi naye guzula mukaji’enji mu ulo. Hene Boaze wazudile Luta mu ulo. Avualele mona wa yala, amuhanele jina egi Obede. Obede wabuile khakha wa Fumu Davidi. Mafuta a Naomi asuangulugile muavula. Azuelele egi: ‘Thomo, Yehowa wa guhanele Luta, munu wa gukuatesele muavula, henyaha wa guhana mujigulu. Yehowa atumbuishiwe.’