Enya Isalele abembele gukombelela Yehowa, asendesele gukombelela nzambi jia mambo. Enya Madiana akhalele mukuya shitu jia enya Isalele nu gubolesa mbuto jiawo ivo sambadi. Enya Isalele akhalele gudisuega mu mawina nu gu mulundu ha gula enya Madiana a amonyigo. Asendesele gububila Yehowa ha guahuluisa. Hene Yehowa watumile muajelo gudi muvuala mumoshi wa yala, jina dienji Gideona. Muanjelo wawambelele Gideona egi: ‘Yehowa wa gutombi ha gukhala suta dia ngolo.’ Gideona wamuhudile egi: ‘Luholo lutshi ngajiya guhuluisa Isalele? Ame ngudi muthu wa githuhu.’

Luholo lutshi Gideona wakhalele naye gujiya egi Yehowa wamutombi? Wahagele uvuji wa shitu mu mavu, gungima wawambelele Yehowa egi: ‘Mu gimenegena, gula ngasanga mame a gubua phamba holu dia uvuji wuwu uvi mu mavu ndo, hanyanyi mbangujiya egi wangutombi ha guhuluisa enya Isalele.’ Mu gimenegena wasangele uvuji waguzala nu mame uvi mavu akhalele a gimigina! Gungima, watogele luko Yehowa egi mame abue phamba mu mavu uvi holu dia uvuji ndo. Ndaga jiakalegewe diago ngenyi. Gideona wakotelesele egi Yehowa wamutombi diago. Wabungishile masuta enji ha guya muluisa enya Madiana.

Yehowa wawambelele Gideona egi: ‘Mbangukuatesa enya Isalele ha gubinga. Uvi muajiya gutangiza egi muabingi ita yene mu ngolo jienu hakhenu, handaga mudi nu masuta avula. Wambela muthu wagasue udi muvua woma ha guvutuga gumbo dienji.’ Masuta 22 000 avutugile gumbo diawo. Gideona wasalele nu masuta 10 000. Yehowa wazuelele luko egi: ‘Masuta wawa gawo avula. Abate gu muta, waawambele ha gunua meya. Udi naye guzula phamba masuta adi munua meya gugu nu gukengelela.’ Gideona wasalele phamba nu masuta 300. Yehowa wamulayele egi, masuta wawa azonda mbaabinga masuta 135 000 a enya Madiana.

Mukatshi dia phipha, Yehowa wawambelele Gideona egi: ‘Tangua dia guluisa enya Madiana diatagana!’ Gideona wahanele athu enji mbinga nu mabungu akoma akhalele agusuega tshuya mukatshi. Waawambelele egi: ‘Ngutalenu, tshitenu gifua luholo ngudi mutshita.’ Gideona washigile phungi, wabudile bungu dienji, watuphudile tshuya tuenji goza, wakalulugile mu dijui diakola egi: ‘Phogo ya kusa ya Yehowa nu ya Gideona!’ Mala agasue 300 akalegele nji ngenyi. Enya Madiana avile woma, alengele khanda jiagasue. Abuile diago tunga-tunga, asendesele gudiluisa. Ngenyi Yehowa wakuatesele enya Isalele ha gubinga mbalagaji jiawo.

Guakhalele nu muenya Isalele mumoshi jina dienji Elekana, wakhalele nu akhetu mbadi: Ana nu Penina. Uvi wakhalele muzumba Ana muavula. Penina wakhalele mulela Ana tangua diagasue handaga gakhalelego nga nu mona, uvi muene wakhalele nu ana avula. Givo nu givo, Elekana wakhalele muya nu fami yenji ha gukombelela gu tabernakle gu Shilo. Lusugu lumoshi tangua akhalele guene, Elekana wakotelesele egi Ana wakhalele nu gikenene giavula. Wamuwambelele egi: ‘Ngabuba Ana, udidigo. Ngudi nu aye. Ngaguzumba.’

Gungima Ana wayile hakhenji mu tabernakle ha gukombelela. Wakhalele mububila Yehowa nu gudila ha gumukuatesa. Wamulayele egi: ‘Yehowa, gula wanguhana mona wa yala, mbanguguhana n’enji ha gugukalegela mudimo monyo wenji wagasue.’

Tangua Nganga-nzambi wakoma Eli wamonele Ana musewuga, watangijile egi matombe amukuatshi. Uvi Ana wamuwambelele egi: ‘Ndo, fumu wami, ishigo matombe angukuatshi. Ngudi nu mulonga wakola udi gungusagesa. Ngudi muwambela Yehowa ndaga yene.’ Eli wakotelesele egi ndaga yazuelele muene yakhalelego yabonga, hene awambelele Ana egi: ‘Nzambi aguhane gima udi mukamba.’ Ana wadivile diago muabonga, gungima wavutugile gumbo dienji. Mbeji jiavula gungima, Ana wavualele mona wa yala, wamuhanele jina egi Samuele. Tangiza gusuanguluga Ana wakhalele nago mukunda nu ndaga yene.

Ana gajimbidilego ndaga yalayele muene Yehowa. Tangua Samuele wabembele gunua mele, wamubatele gu tabernakle ha gutshita mudimo guene. Wawambelele Eli egi: ‘Mona ngakhalele mutoga Yehowa muene yowu. Ngamuhana gudi Yehowa monyo wenji wagasue.’ Givo nu givo, Elekana nu Ana akhalele muya mutala Samuele, akhalele gumubatela milele ihe-ihe. Yehowa wahanele Ana ana ako thathu a mala nu ana a akhetu mbadi.