Yehowa wawambelele Samuele egi: ‘Nda gumbo dia Yese, umbe mun’enji mumoshi wa yala maji ha gubua fumu gu Isalele.’ Hene Samuele ayile gumbo dia Yese. Hamonele muene mun’a Yese wa mbuta, watangijile egi yakhalele muene Yehowa watombi.’ Uvi Yehowa wamuwambelele egi ishigo muene atombi. Yehowa wazuelele egi: ‘Ngana tala mutshima wa muthu, ngana talago ndaga jiana monega gu meso.’

Yese wabatele an’enji ako a mala 6 gudi Samuele. Uvi Samuele wazuelele egi: ‘Yehowa gatombelego nga mumoshi mukatshi diawo. Wamuhudile egi: ‘Ushigo nu mona muko wa yala?’ Yese wazuelele egi: ‘Guasala nu galenge gawo mumoshi wa yala, jina dienji Davidi. Udi mubamba imeme hanze.’ Tangua Davidi wajile, Yehowa wawambelele Samuele egi: ‘Muene ngatombi!’ Samuele wambile Davidi maji holu dia muto hagula abue fumu gu Isalele mu masugu adi muza.

Lusugu lumoshi, enya Isalele akhalele mulua ita nu enya Filistiya; enya Filistiya akhalele nu suta mumoshi wakoma, waleha, jina dienji Goliyate. Lusugu nu lusugu Goliyate wakhalele musegulula enya Isalele. Wazuelele egi: ‘Ngutumilenu yala mumoshi ngulue n’enji. Gula wangubinga, mbatubua ahiga enu. Uvi gula ngamubinga, mbamubua ahiga etu.’

Davidi wayile gu phundo ya enya Isalele ha gubatela aphangi’enji akhalele masuta ima ya gudia. Tangua Davidi wavile ndaga jiakhalele muzuela Goliyate, wazuelele egi: ‘Ngudi mulua n’enji!’ Uvi Fumu Saula wamuwambelele egi: ‘Udi mona wazonda.’ Davidi wamuvutudile egi: ‘Yehowa mbawungukuatesa.’

Saula wasudigishile Davidi iluilo yenji ya ita, uvi Davidi wazuelele egi: ‘Ngajiyilego gulua nu iluilo eyi.’ Davidi wazudile lanse, wabulumugile gu gamuta. Wanonele tumaseso thano tula diadiadia, watumbile mu gakuba. Gungima, wayile phushi gudi Goliyate. Muthu muene wakoma, waleha wazuelele egi: ‘Aye mon’aye, iza haha nguhane musunyi waye gudi tunjila tua gosa nu shitu jia mu foto.’ Uvi Davidi gakhalelego muvua woma. Wazuelele mu dijui diakola egi: ‘Udi muza gudi ame nu phogo nu mulumbu, uvi ame ngudi muza gudi aye mu jina dia Yehowa. Ushigo mulua nu esue uvi udi mulua nu Nzambi. Mangino athu agasue aza mumona egi Yehowa udi nu ngolo jiavula gubalega phogo nga mulumbu. Uza gumihana mukut’enu agasue ha mago etu.’

Davidi wambile seso mu lanse yenji, wayihungile nu ngolo jienji jiagasue. Seso diene diakuatele Goliyate mu muto, dia mujinginyile ha mbombo. Goliyate wabuile kungulu mu mavu, wafile. Yehowa wakuatesele diago Davidi. Gungima, enya Filistiya alengele. ye nji wana shila Yehowa mutshima gifua Davidi ba?

Tangua Davidi washiyile Goliyate, Fumu Saula wamubuishile fumu wa masuta enji. Davidi wabingile ita yavula, athu akhalele gumuzumba muavula. Tangua diagasue Davidi wakhalele mukatuga gu ita ha guvutuga gu inzo, akhetu akhalele muzoga nu gushiga tungoma nu gukina. Akhalele muyimba egi: ‘Saula washiyile inunu ya athu, uvi Davidi washiya makumi a inunu ya athu!’ Saula wasendesele guvila Davidi fuwa, wakhalele mukamba luholo lua gumushiya.

Davidi wakhalele mujiya gushiga gitare muabonga. Lusugu lumoshi tangua diakhalele muene mushigila fumu Saula gitare. Fumu wamusonuele mulumbu nu ngolo jiagasue. Davidi wadiwungile mbala imoshi, mulumbu wene wakuatele gu gibayi. Gungima, Saula wakambele maluholo avula a gushiya Davidi. Gishina giene Davidi walengele, wayile gudisuega mu mavu a luselenga.

Saula wazudile masuta 3 000, ahatele Davidi. Gungima Saula wahetele gu wina dimoshi diakhalele mosh’a seso fundo Davidi nu athu enji adisuegele. Athu a Davidi amufetesele egi: ‘Wuwu okazio wabonga diago wa gushiya Saula.’ Davidi wayile hehi nu Saula wakokele mulele wenji wa holu. Uvi Saula gajiyilego. Gungima Davidi wavile gikenene luholo ganemeselego muthu Yehowa watombele ha gukhala fumu. Watunyishile athu enji ha guluisa Saula. Gungima watamegele Saula, wamuwambelele egi wahetshi okazio wa gumushiya uvi wamubembi nu monyo. Saula wasombegesele matangi’enji a gukamba gushiya Davidi ba?

Ndo. Walanduile gukamba Davidi ha gumushiya. Mu phipha imoshi Davidi nu muehu wenji Abishayi, anginyile mu phundo ya Saula mu gisuegi. Abnere, suta diakalele mubamba Saula wakhalele gu tulo. Abishayi wawambelele Davidi egi: ‘Wuwu okazio wabonga diago! Ngubembe ngumushiye.’ Uvi Davidi wamuwambelele egi: ‘Yehowa muene hakhenji mbawudi gumushiya. Tuzule mulumbu wenji nu bungu dienji dia meya, tuye nayo.’

Davidi wakandugile holu dia mulundu wakhalele hehi nu phundo ya Saula. Wakalulugile egi: ‘Mukunda natshi wabambelego fumi’aye? Mulumbu wa fumi’aye nu bungu dia meya idi gui?’ Saula wavuile dijui dia Davidi, wazuelele egi: ‘Wakhala naye gungushiya, uvi wangushiyilego. Ngumujiya egi aye mbawubua fumu ha fundo diami gu Isalele.’ Saula wavutugile gumbo dienji. Uvi athu ako a mu fami ya Saula akhalele muzumba Davidi.