BIBLIOTEKE YA MU INTERNET
Biblioteke
YA MU INTERNET
Kipende
  • BIBLIA
  • MIKANDA
  • GUDIBUNGISA
  • Wakhalele Muenya Gikhesa nu Yagujinginyina Gudi Futa Dienji
    Malongo wajiya guzula mu Biblia
    • Yonatana nu suta udi gumubatela iluilo yenji ya ita

      LONGO DIA 42

      Wakhalele Muenya Gikhesa nu Yagujinginyina Gudi Futa Dienji

      Yonatana mun’a fumu Saula wa somi, wakhalele suta dia ngolo. Davidi wazuelele egi Yonatana wakhalele nu phushi jiavula gubalega njila ya khuyi nu ngolo jiavula gubalega khoshi. Lusugu lumoshi, Yonatana wamonele masuta a enya Filistiya 20 gu gamulundu. Wawambelele suta diakhalele gumubatela iluilo yenji ya ita egi ‘Tumuya gualuisa gula Yehowa watuhana gijiyishilo. Gula enya Filistiya atuwambela egi, zenu gugu, tudi naye guya ha gualuisa.’ Enya Filistiya azuelele egi: ‘Gula mudi mala, zenu gugu tulue!’ Hene Yonatana nu suta dienji akandugile gu gamulundu; abingile masuta ene.

      Yonatana udi muhana David ima yenji iko

      Luholo Yonatana wakhalele mona wa somi wa Saula, muene wakhalele naye gubua fumu ha fundo dia sh’enji. Uvi Yonatana wakhalele mujiya egi Yehowa watombele Davidi ha gukhala fumu wa Isalele ha fundo dia sh’enji; uvi gamuvidilego fuwa. Yonatana nu Davidi abuile mafuta akola. Adilayele egi mbaadibamba nu mbaadikuatesa. Yonatana wahanele Davidi mulele wenji wa holu nu phogo nu uta wenji wa manana nu mukaba gifua ijiyishilo idi mumonesa egi akhalele mafuta akola.

      Tangua Davidi wakhalele mulenga Saula, Yonatana wayile gudi muene, wamuwambelele egi: ‘Khala nu ngolo nu gikhesa. Yehowa wa gutombi ha gubua fumu, tata nji udi mujiya ndaga yene.’ Wana tshigina nji gukhala nu futa diabonga gifua Yonatana ba?

      Yonatana wahagele monyo wenji mu gingoza mbala jiavula ha gukuatesa futa dienji. Wakhalele mujiya egi fumu Saula wakhalele mutshigina gushiya Davidi, hene wamuwambelele egi: ‘Davidi gagukalegelego nga ndaga imoshi yabola; mbawutshita gubola guakoma gula wamushiya.’ Saula wavidile Yonatana khabu jiavula. Ivo yazonda gungima Saula nu Yonatana afile gu ita.

      Gungima dia gufua gua Yonatana, Davidi wakambele Mefiboshete mun’a Yonatana. Tangua diamumonele muene, wamuwambelele egi: ‘Mbangugubamba monyo waye wagasue handaga sh’aye wakhalele futa diami diakola. Mbawukhala mujinga mu inzo yami nu gudia ha mesa ami.’ Davidi gabuitshilego futa dienji Yonatana mutshima.

      “Dizumbenu gifua luholo ngamizumbile. Gushigo nu muthu udi nu guzumba guakoma gubalega gua muthu udi muhana monyo wenji mukunda nu mafuta enji.”​—Yone 15:12, 13

      Mihu: Luholo lutshi Yonatana wamonesele egi wakhalele muenya gikhesa? Luholo lutshi Yonatana wamonesele egi wakhalele ya gujinginyina gudi Davidi?

      1 Samuele 14:1-23; 18:1-4; 19:1-6; 20:32-42; 23:16-18; 31:1-7; 2 Samuele 1:23; 9:1-13

  • Fumu Davidi Wakalagala Gubola
    Malongo wajiya guzula mu Biblia
    • Profete Natana udi muhana Fumu Davidi malongo

      LONGO DIA 43

      Fumu Davidi Wakalagala Gubola

      Tangua diafile Saula, Davidi wabuile fumu. Mu tangua diene wakhalele nu ivo 30. Lusugu lumoshi, hakhalele muene watshitshi gale ivo yavula mu ufumu, wakandugile holu dia yangi dia inzo yenji, wamonele mukhetu mumoshi wabonga diago. Amuwambelele egi mukhetu muene jina dienji Batesheba, wakhalele mukaji’a suta dienji mumoshi jina dienji Uriya. Davidi watamegela Batesheba ha guza gumbo dienji. Wabungishile n’enji muila, Batesheba wamitshile vumo. Davidi watshitshile yagasue ha gusuega gubola guenji. Wawambelele fumu wa masuta enji egi: ‘Haga Uriya gutuama ha fundo ita idi yakola, masuta ako avutuge gungima muene asale hakhenji. Tangua Uriya washiyiwe gu ita, Davidi wazudile Batesheba mu ulo.

      Fumu Davidi udi mutoga Yehowa ha gumutotesela

      Uvi Yehowa wamonele ndaga jiagasue jiabola jiakalegele Davidi. Itshi akalegele? Watumile profete Natana gudi Davidi. Natana wazuelele egi: ‘Muenya umonyi mumoshi wakhalele nu imeme yavula, uvi phutu wakhalele nu gagimeme phamba gamoshi, wakhalele gugazumba muavula. Uvi lusugu lumoshi muenya umonyi muene watambuile gagimeme ga phutu.’ Davidi wavile khabu jiavula, wazuelele egi: ‘Muenya umonyi muene udi naye gushiyiwa!’ Natana wamuwambelele egi: ‘Muenya umonyi muene idi aye!’ Davidi wavile gikenene giavula, watshiginyile gubola guenji. Wawambelele Natana egi: “Ngakalegela Yehowa gubola.” Gubola guakalegele Davidi guamubatediele malamba avula nu gudi enya fami yenji. Yehowa wahanele Davidi ndola; uvi wamubembele nu monyo handaga wazuelele giamatshidia nu wamonelesele khadilo dia gudibulumuisa.

      Davidi wakhalele mutshigina gutungila Yehowa tempelo, uvi Yehowa watombele mun’enji Salomo ha gutunga tempelo yene. Davidi wasendesele gubungisa ima fundo dimoshi mukunda nu Salomo, wazuelele egi: ‘Tempelo ya Yehowa idi naye gukhala yabonga diago. Salomo udi muvuala, mbangumukuatesa ha gulondega ima.’ Davidi wahanele makuta enji avula mukunda nu mudimo wa gutunga tempelo. Wakambele athu akhalele mujiya gutshita mudimo muabonga. Wabungishile wolo nu utadi wa siliva nu mitshi ya sedre; mitshi yene yakhalele mukatuga gu Tile nu gu Sidona. Tangua Davidi wakhalele mutshigina gufua, wawambelele Salomo luholo luakhalele naye muene gutunga tempelo. Wazuelele egi: ‘Yehowa wanguwambelele ha gusonega ndaga eji mukunda nu aye. Yehowa mbawugukuatesa. Uvigo woma. Khala nu ngolo, tshita mudimo.’

      Davidi udi muwambela Salomo luholo ludi naye muene gutunga tempelo

      ‘Muthu udi musuega gubola guenji mbagashigo mubinga; uvi mbaatotesela muthu udi muzuela gubola guenji nu udi mubemba guwukalagala.’​—Ishima 28:13

      Mihu: Gubola gutshi Davidi wakalegele? Itshi Davidi wakalegele ha gukuatesa mun’enji Salomo ha gutunga tempelo?

      2 Samuele 5:3, 4, 10; 7:1-16; 8:1-14; 11:1–12:14; 1 Gudilanduluila 22:1-19; 28:11-21; Ngimbo 51:1-19

Mikanda ya Kipende (2000-2025)
Zoga
Ngina
  • Kipende
  • tumina muthu muko
  • Tomba ndaga jia luholo nu luholo
  • Copyright © 2025 Watch Tower Bible and Tract Society of Pennsylvania
  • Luholo lua Gukalegela Site Yetu
  • Gunemesa Ndaga jia Athu Ako
  • Paramètres de confidentialité
  • JW.ORG
  • Ngina
tumina muthu muko