Tangua Salomo wabuile fumu gu Isalele, Yehowa wa muhudile egi: ‘Itshi udi mutshigina egi nguguhane?’ Salomo wazuelele egi: ‘Ngudi muvuala, ngushigo mujiya ndaga ya gutshita. Ngabuba, nguhane ndunge hagula ngubambe muabonga athu aye.’ Yehowa wamuwambelele egi: ‘Luholo watoga phamba ndunge, mbanguguhana ndunge jiavula gubalega athu agasue ha mavu. Mbangugubuisa nji muenya umonyi. Gula wangutumagela mbawujinga masugu avula.’

Salomo wasendesele gutunga tempelo. Wakalegele wolo wabonga, utadi wa siliva nu mitshi nu maseso. Mala avula nu akhetu akhalele mujiya gutshita mudimo muabonga, akhalele mutshita mudimo gu tempelo. Gungima dia ivo 7 amanesele gutunga tempelo. Yakhalele hehi ha guhanewa gudi Yehowa. Ahagele mulambu holu dia giwotshielo; gungima Salomo wafugamele gutuama dia giwotshilo giene, wakombelele egi: ‘O Yehowa, tempelo eyi ishigo yakoma nga yabonga gubalega mukunda nu aye, uvi tuabuba vua gukombelela nu isambu yetu.’ Luholo lutshi Yehowa watadile tempelo nu gisambu gia Salomo? Tangua Salomo wamanesele gutshita gisambu, tshuya tuakatugile mu dilu tuakondele milambu yakhalele holu dia giwotshielo. Yehowa wasuangulugile nu tempelo yene. Tangua enya Isalele amonele ndaga eji, asuangulugile muavula.

Fumu Salomo wajiyiwe muavula gu Isalele yagasue uu nu mu mafundo a gualeha mukunda nu ndunge jienji. Athu akhalele muza gudi muene ha gukamba ukuateshi gu milonga yawo. Fumu mukhetu wa gu Sheba wajile ha gulola Salomo nu mihu yakola. Tangua diavile muene mvutu jiamuhanele Salomo, wazuelele egi: ‘Ngatshiginyilego ndaga athu akhalele muzuela mukunda nu aye, uvi henyaha ngakotelesa egi udi nu ndunge jiavula gubalega luhoho athu akhalele muzuela. Yehowa Nzambi waye wagushimbiga muavula.’ Enya Isalele akhalele muabonga, akhalele nu gusuanguluga. Uvi gungima ndaga jiasombegesele.

Tangua Salomo wakhalele mukombelela Yehowa, gifutshi gia Isalele giakhalele mu guhuima. Uvi gungima, wazudile akhetu avula a mu ifutshi iko mu ulo, akhetu ene akhalele mukombelela isongo. Salomo wasendesele gusombegesa mage-mage, muene nji wasendesele gukombelela isongo. Yehowa wavile khabu. Wawambelele Salomo egi: ‘Ufumu wa Isalele mbawukatudiwa mu fami yenu, mbawukhaphumuiwa mu itshinyi mbadi. Mbanguhana gitshinyi giakoma gudi muenya mudimo waye mumoshi, uvi enya fami yaye mbaahinyina mu gitshinyi giazonda.’

Yehowa wamonesele desizio dienji haphelo. Tangua Yeloboama muenya mudimo wa Salomo wakhalele muya mu njila, watagenele nu profete Ahiya. Profete Ahiya watawudile mulele wenji mu itshinyi 12, wawambelele Yeloboama egi: ‘Yehowa mbawutambula ufumu wa gu Isalele mu fami ya Salomo nu mbawuwukhaphumuna mu itshinyi mbadi. Zula itshinyi 10 handaga aye mbawuhinyina mu iphuta 10.’ Tangua Fumu Salomo wavile ndaga jiene, wakambele gushiya Yeloboama! Hene Yeloboama walengele gu Ejipitu. Tangua fumu Salomo wafile, mun’enji Roboama wabuile fumu. Gungima Yeloboama wavutugile gu Isalele.

Akulu a gu Isalele awambelele Roboama egi: ‘Gula udi mukalegela athu ndaga mu luholo luabonga, mbaakhala yagujinginyina gudi aye.’ Uvi mafut’a gindongo gienji amuwambelele egi: ‘Udi naye gukalegela athu ndaga nu khuta! Kolesa mudimo wawo!’ Roboama watshiginyile malongo amuhanele mafuta enji. Wakhalele mukalegela athu ndaga nu khuta, hene athu asendesele gumulumbugila. Gungima Yeloboama wabuile fumu wa iphuta 10; akhalele guyitamega egi ufumu wa gu Isalele. Uvi iphuta iko mbadi yakhalele mutamegewa egi, ufumu wa gu Yuda. Fumu Roboama wasalele phamba nu iphuta yene mbadi. Iphuta 12 ya gu Isalele yakhaphumuiwe.

Yeloboama gakhalelego mutshigina egi athu enji aye gu Yelusalema, dimbo diakhalele Roboama ha gukombelela. Udi mujiya mukunda natshi? Yeloboama wakhalele muvua woma egi enya Isalele ajiya gumulumbugila avutuga gu khanda ya Roboama. Gishina giene, walondele isongo mbadi ya ana a ngombe a wolo, wawambelele athu enji egi: ‘Yelusalema idi gualeha. Muajiya gukombelela ha fundo edi.’ Athu asendesele gukombelela ana a ngombe anyi alondewe nu wolo, abembele gukombelela Yehowa.