BIBLIOTEKE YA MU INTERNET
Biblioteke
YA MU INTERNET
Kipende
  • BIBLIA
  • MIKANDA
  • GUDIBUNGISA
  • Yehowa Wamonesa egi udi Nzambi wa Giamatshidia
    Malongo wajiya guzula mu Biblia
    • Yehowa watuma tshuya ha gukonda mulambu wa Eliya

      LONGO DIA 46

      Yehowa Wamonesa egi Udi Nzambi wa Giamatshidia

      Mafumu anyi akhalele muhinyina iphuta kumi ya Isalele akhalele mutshita ndaga jiavula jiabola. Uvi Ahaba wakalegele ndaga jiavula jiabola gubalega. Wazudile mukhetu mumoshi mu ulo, jina dienji Yezabele. Mukhetu muene wakhalele mutshita ndaga jiabola, wakhalele mukombelela Bale. Ahaba nu Yezabele atumile athu ha gukombelela Bale, akhalele nji mushiya baprofete a Yehowa. Na ndaga itshi Yehowa wakalegele? Watumile profete Eliya ha guwambela Ahaba ndaga imoshi.

      Eliya wawambelele Fumu Ahaba egi, mvula mbayishigo luko munoga gu Isalele mukunda nu gubola guaye. Mvula yanogelego mu ivo thathu, mbuto jiakhalelego muzoga, nzala yanginyile mu gifutshi. Gungima Yehowa watumile Eliya gudi Ahaba. Ahaba wazuelele egi: ‘Aye udi mubata malamba avula! Idi gubola guaye.’ Eliya wamuwambelele egi: ‘Ishigo ame ngudi mubata malamba. Idi aye udi mubata malamba handaga wana kombelela Bale. Tudi mutshita ndaga imoshi. Bungisa athu agasue nu baprofete a Bale gu Mulundu wa Karmele.’

      Athu adibungishile gu mulundu wene. Eliya wazuelele egi: ‘Mukhadigo tunga-tunga. Gula Yehowa udi Nzambi wa giamatshidia, mulandulenu. Uvi gula Bale, mulandulenu! Ngumutshigina tutshite ndaga imoshi. Baprofete a Bale 450, adi naye gulondega mulambu, gungima atamege nzambi wawo; ame nji nguza mulondega mulambu, gungima ngutamege Yehowa. Nzambi uza mutuma tshuya, muene udi Nzambi wa giamatshidia.’ Athu atshiginyile matangi ene.

      Baprofete a Bale alodele mulambu wawo. Atamegele nzambi wawo lusugu lua mudidi egi: “Oo Bale, tuhane mvutu!” Uvi Bale gaahanelego mvutu; Eliya wasendesele gualela. Wazuelelele egi: ‘Kalugugenu mangololo! Mbala iko yajiya gukhala egi udi yagubanda, idi mutoga egi muthu mumoshi amuzugise!’ Ngueze yabuile, uvi baprofete a Bale akhalele mulandula gumutamega mu dijui diakola. Uvi ahetelego nga mvutu.

      Eliya wahagele mulambu wenji holu dia giwotshielo, gungima wabunduile meya holu dia giwotshielo giagasue. Wakombelele egi: ‘Oo Yehowa! Nguhane mvutu hagula athu awa ajiye egi aye udi Nzambi wa giamatshidia.’ Yehowa watumile tshuya mbala imoshi mu dilu, tuakondele mulambu. Athu akalugile egi: ‘Yehowa udi Nzambi wa giamatshidia!’ Eliya wazuelele egi: ‘Kuatenu baprofete a Bale! Nga mumoshi galengigo!’ Ashiyile baprofete a Bale 450 mu lusugu luene.

      Tangua gatuta gazonda gazogele holu dia kianga, Eliya wawambelele Ahaba egi: ‘Mvula idi mutshigina gunoga. Londega phusu-phusu yaye, uye guembo.’ Gosa guabuitshile, funji yasendele gubunda, mvula yakola yasendesele gunoga. Gikalala giahuile mbala imoshi. Ahaba wakhalele muwendesa phusu-phusu yenji muphushi. Uvi Yehowa wahanele Eliya ngolo, wazudile phushi, wabalegele phusu-phusu ya Ahaba! Na, idi mukotelesa egi malamba a Eliya ahuile ba? Tutadile ndaga yene.

      ‘Athu agasue ajiye egi, jina diaye Yehowa, phamba aye udi wa gudinyinyiga ha mavu agasue.’​—Ngimbo 83:18

      Mihu: Luholo lutshi Yehowa wamonesele egi udi Nzambi wa giamatshidia gu Mulundu Karmele? Luholo lutshi Yehowa wahanele mvutu gu gisambu gia Eliya?

      1 Mafumu 16:29-33; 17:1; 18:1, 2, 17-46; Yakoba 5:16-18

  • Yehowa Wahana Eliya Gikhesa
    Malongo wajiya guzula mu Biblia
    • Eliya wamaga hanze ya wina dia seso gu Mulundu wa Holebe, udi mutegelela ndaga jidi gumuwambela muanjelo wa Nzambi

      LONGO DIA 47

      Yehowa Wahana Eliya Gikhesa

      Tangua Yezabele wavile ndaga jiabuidile baprofete a Bale, wavile khabu jiavula. Watumidile Eliya mbimbi egi: ‘Hamene mbawumufua gifua luholo washiyile baprofete a Bale.’ Eliya wavile woma wavula, walengele mu mavu a luselenga. Wakombelele egi: ‘Oo Yehowa, ngahuila gami! Ngushiye.’ Eliya wakhalele ya guhuila muavula, hene wabandele ha mushin’a mutshi.

      Muanjelo wamuzugishile, wamuwambelele nu gisemo giagasue egi: ‘Zuga, udie.’ Eliya wamonele dipha diakhalele gifua munengu holu dia maseso a tshuya nu bungu dia meya. Wadile, wanuile, gungima wabandele luko. Muanjelo wamuzugishile luko, wamuwambelele egi: ‘Dia, handaga njila udi muya idi diago yaleha, idi mutoga egi ukhale nu ngolo.’ Hene Eliya wadile luko. Gungima wawendele masugu 40 phipha nu muanya, uu nu tangua diahetele muene gu Mulundu wa Holebe. Wanginyile mu wina dia seso, wabandele. Uvi Yehowa watele n’enji maga. Wamuhudile egi: ‘Eliya, itshi udi mutshita haha?’ Eliya wazuelele egi: ‘Enya Isalele ashiya gikotelo giaye. Amuangi iwotshielo yaye nu ashiyi baprofete aye. Uvi henyaha adi mukamba nji gungushiya.’

      Yehowa wamuwambelele egi: ‘Nda, umagane holu dia mulundu.’ Thomo funji yakola yabundjile holu dia mulundu. Gungima, mavu adigitshile, tshuiya tuazogele. Gungima, Eliya wavile dijui diatuluga. Watshuigile mulele wenji wa holu gu phala, wazogele, wamagenele ha mufulo wa wina dia seso. Yehowa wamuhudile egi, mukunda natshi udi mulenga? Eliya wazuelele egi: “Phamba ame ngasala.” Uvi Yehowa wamuwambelele egi: ‘Ushigo hakhaye. Gudi nu athu ako 7000 gu Isalele ana gungukombelela. Nda, umbe Elisha maji ha gubua profete ha fundo diaye.’ Eliya wayile mbala imoshi, wakalegele gifua muamuwambelele Yehowa. Udi mutangiza egi, aye nji Yehowa mbawugukuatesa gula udi mutshita ndaga jiana tshigina muene ba? Ayi, mbawugukuatesa. Tutalenu ndaga imoshi yakalegewa mu tangua dia gikalala giakola.

      “Mudisagesago nga mukunda nu ndaga imoshi, uvi kombelelenu Nzambi mukunda nu ndaga jiagasue, mububilenu, muhanenu mersi, muwambelenu nji milonga yenu yagasue.”​—Filiphi 4:6

      Mihu: Mukunda natshi Eliya walengele ha guhuluisa monyo wenji? Ndaga itshi Yehowa wawambelele Eliya?

      1 Mafumu 19:1-18; Roma 11:2-4

Mikanda ya Kipende (2000-2025)
Zoga
Ngina
  • Kipende
  • tumina muthu muko
  • Tomba ndaga jia luholo nu luholo
  • Copyright © 2025 Watch Tower Bible and Tract Society of Pennsylvania
  • Luholo lua Gukalegela Site Yetu
  • Gunemesa Ndaga jia Athu Ako
  • Paramètres de confidentialité
  • JW.ORG
  • Ngina
tumina muthu muko