Mu sungi ya gikalala giakola, Yehowa wawambelele Eliya egi: ‘Nda gu Salefata. Mukhetu mumoshi wa gafunda wa mu dimbo diene, mbawuguhana ima ya gudia.’ Tangua Eliya wahetele ha mufulo wa dimbo, wamonele mukhetu mumoshi wa gafunda munona khunyi. Mukhetu muene wakhalele phutu. Eliya wamutogele meya a gunua. Uvi tangua mukhetu muene wakhalele muya ha guzula meya, Eliya wamuwambelele egi: “Ngabuba, ngubatele nji gitshinyi gia dipha.” Uvi mukhetu muene wazuelele egi: ‘Ngushigo nu dipha dia guguhana. Ngudi phamba nu koko dimoshi dia phupha nu ndambo ya maji ha gulondega ima ya gudia mukunda nu ame nu mun’ami.’ Uvi Eliya wamuwambelele egi: ‘Yehowa Nzambi wa wazuela egi, gula wangulondela dipha, phupha nu maji aye mbaashigo muhua uu nu lusugu mvula mbayinoga.’

Mukhetu muene wavutugile gumbo dienji, walondele dipha mukunda nu profete wa Yehowa. Ndaga jiakalegewe gifua luholo Yehowa wazuelele, mukhetu muene wa gafunda nu mun’enji wakhalele nu ima ya gudia mu sungi yagasue ya gikalala. Bungu dienji dia phupha nu dia maji diakhalele dia guzala.

Uvi gungima ndaga imoshi ya lamba yabuile. Mun’a mukhetu muene wa gafunda wasendesele gukata, gungima wafile. Mukhetu muene wabubidile Eliya ha gumukuatesa. Eliya wazudile mona muene ha mago, wakandugile n’enji gu sugu ya gosa mu inzo ya mukhetu muene. Wamubandesele ha gitanda, wakombelele egi: “Yehowa, ngabuba, vutula monyo wa mona yowu.” Udi mujiya mukunda natshi ndaga Eliya watogele Yehowa ha gukalagala yakhalele ya gushimana diago? Idi handaga mu tangua diene guakhalele khenji guafuzumugile galego nga muthu wa gufua. Mukhetu muene wa gafunda nu mun’enji, akhalelego nji enya Isalele.

Uvi mona muene wafuzumugile, wasendesele guhuima! Eliya wawambelele mukhetu muene egi: “Tala, mun’aye udi nu monyo.” Mukhetu muene wasuangulugile muavula diago, wawambelele Eliya egi: “Henyaha ngajiya egi udi diago muthu wa Nzambi wa giamatshidia, ndaga wana zuela mu jina dia Yehowa jidi jia giamatshidia.”

Tangua Fumu Ahaba wakhalele mutala ha fenetre ya inzo yenji gu Yizelele, wakhalele mumona dihia dia vinyo dia yala mumoshi, jina dienji Nabote. Ahaba wakhalele nu funu ya dihia diene, watogele Nabote ha gumudigila nadio. Uvi Nabote watunyile, handaga mukhuala wa Yehowa wakhalele mutunyisa gudiga khapho dia mavu. Ahaba wasuangulugile luholo Nabote wazudile desizio diabonga ba? Ndo. Wavile khabu jiakola, wayile mubanda ha gitanda phala gu gibayi, watunyile gudia.

Mukaji’enji Yezabele munu wakhalele Fumu Mukhetu, wamuwambelele egi: ‘Aye udi fumu wa Isalele. Wajiya guzula gima giagasue watshigina. Ngumuya gugutambudile dihia diene.’ Wasonegele akulu a mu dimbo mukanda, wawambelele ha gufunda Nabote egi washingi Nzambi, gungima amushiye nu maseso. Akulu atshitshile gifua muawambelele Yezabele. Gungima Yezabele wawambelele Ahaba egi: ‘Nabote wafi gale. Dihia dia vinyo diabua diaye.’

Yezabele gashiyilego phamba Nabote. Washiyile nji athu avula akhalele muzumba Yehowa, ikhale akalegelego nga ndaga imoshi yabola. Wakhalele mukombelela isongo nu gukalagala ndaga jiavula jiabola. Yehowa wamonele ndaga jiagasue jiabola Yezabele wakhalele mutshita. Itshi Yehowa wamukalegele?

Gungima dia gufua gua Ahaba, mun’enji Yolama wabuile fumu. Yehowa watumile yala mumoshi, jina dienji Yehu ha guhana Yezabele nu enya fami yenji ndola.

Yehu wanginyile ha phusu-phusu yenji wajiyile gu Yizelele, dimbo diakhalele mujinga Yezabele. Yolama wajile holu dia phusu-phusu yenji ha gutagana Yehu, wamuhudile egi: ‘Udi muza mu guhuima ba?’ Yehu wazuelele egi: ‘Luholo lutshi guhuima guajiya gukhala guene hadi gin’aye Yezabele mutshita uthambi nu ndaga jiavula jia wanga.’ Yolama wabalumuine phusu-phusu yenji ha gulenga. Uvi Yehu wamusonuene mufula, wamushiyile.

Gungima Yehu wayile gumbo dia Yezabele. Yezabele wavuile egi Yehu yowu muza. Wadisembegele, walondele sanga dienji. Wayile mutala ha fenetre. Hahetele Yehu, Yezabele wamuhanele moyo nu gusegulula guagasue. Yehu wawambelele enya mudimo a Yezabele egi: “Mubishilenu hashi!” Abishidile Yezabele ha fenetre, wabuile mu mavu, wafile.

Gungima Yehu washiyile ana a Ahaba 70, wakatudile gikombelelo gia Bale gu Isalele. Ndaga yiyi idi mumonesa egi Yehowa wana mona ndaga jiagasue nu wana hana athu ana kalagala ndaga jiabola ndola mu tangua diatagana.