Wanajiya Mathemua a Yehowa guvula gutshi? Mu katshi dietu, ako adi hehi nu inzo yaye, muana kalagala nawo mudimo, mafuta a khalasa. Nga ndo tuasoluile gale nu aye Biblia. Tudi diago akhuatshi? Mukunda natshi tuanazuelela malongi etu tuanatshigina gua athu agasue?

Tudi gifua athu agasue. Tuakatuga mu ifutshi ya kudisha, ako phutu, ako mvuama. Ako mu katshi dietu akhalele mu ikombelelo ya gudisha, uvi ako akhalele go nu gutshigina gua Nzambi. Uvi, gutuama dia gubua Mathemua, tuabalegesele tangua ha gulonguga muabonga malongi a Biblia. (Makalegelo 17:11) Tuatshiginyile malongi ene, enji muthu nu muthu watombele ha gukombelela Yehowa Nzambi.

Gulonguga gua Biblia guana gutukuatesa. Tudi nu milonga nu guleba gua muila gifua athu agasue. Uvi, tuanasha ngolo ha gukalegela tangua dia gasue shigu jia Biblia mu monyo wetu. Tuamona egi jianabalumuna diago khalelo dia monyo wetu. (Lungimbo 128:1, 2) Idi gikumba gingoshi giana gututuma ha gujiyisa akuetu ndaga jia bonga tuanalonguga mu Biblia.

Tuanahata shigu jia Nzambi. Shigu jiene jidi mu Biblia jiana gututuma ha gukhala nu monyo wa bonga, nu gunemesa athu ako, ha gubungisa nu giamatshidia nu gusuangulugila athu.jianagutukuatesa ha gukhala anadimbo abonga ashigo imonya. Jiana kolesa fami ha gukhala hamoshi nu makalegelo abonga. Luholo tuanatshigina egi “Nzambi anakhapumuna go,” tudi mu fami ingoshi ya aphangi a mu nyuma mu ifutshi ya gasue, enji tuana gudikhapha ndo mukunda nu ibanda ya muila nga politike. Ata tudi gifua athu agasue, tudi hunji dingoshi diagudisha nu athu ako.​—Makalegelo 4:13; 10:34, 35, NW.

• Mathemua a Yehowa adi gifua athu ako mu ndaga jitshi?

• Shigu jitshi Mathemua alongugile mu Katshi dia Biblia?

Athu avula anatangiza egi Mathemua a Yehowa adi jina dia gikombelelo gia gihegihe. Uvi, guabalega gale ivuo 2 700, akombeledi a Nzambi a matshidia akhalele mutamegewa “mathemua” enji. (Yeshaya 43:10-12) Tii nu mu givuo 1931, tuakhalele mutamegewa egi Alongogi a Biblia. Mukunda natshi tuazanguile jina dia Mathemua a Yehowa?

Diana guleza nani udi Nzambi wetu. Ha gutalela maniskri a kulu, jina dia Nzambi, Yehowa, dianamonega mu mafundo inunu nu inunu. Mu Biblia jiko, jina diene diakatuwe ha fundo dienji ashile batitre, gifua Maweze, Fumu nga Nzambi. Uvi, Nzambi wa matshidia wadijigile Moise jina dienji, Yehowa, egi: “Didi jina diami gashidi.” (Guzoga 3:15, NW) Luholo luene, wadikhaphumuine nu nzambi jagasue jia mambo. Tudi nu ginemua gia gubata jina dia gijila dia Nzambi.

Dianadijiga mudimo wetu. Sendesa nu muthu wabonga Abele, gudi mulongo wa leha w’athu akulu atele githemua gia gutshigina guawo gua Yehowa. Gu ngima dia ivuo, Nowa, Abalahama, Sala, Moise, Davidi nu athu ako anginyile mu katshi dia “thundu yakoma ya mathemua.” (Hebelu 11:4–12:1) Luholo muthu wanazoga themua wa muthu wambiwa mambo gu tribinale, esue nji tuatshigina gudijiga giamatshidia giatalela Nzambi wetu.

Tuanakabula Yesu. Biblia yanatamega Yesu egi “themua wa gufubidila nu wa giamatshidia.” (Yatuwuwe 3:14) Yesu muene akhenji wazuelele egi ‘wajiyishile jina dia Nzambi’ enji ‘wazuelele githemua gia matshidia’ mukunda nu Nzambi. (Yone 17:26; 18:37) Hene, alandundi amatshidia a Klisto adi naye gubata jina dia Yehowa nu gudijiyisa. Ndaga yene diago Mathemua a Yehowa anakalagala.

• Mukunda natshi Alongogi a Biblia azanguile jina dia Mathemua a Yehowa?

• Sendese tangua ditshi Yehowa udi nu mathemua ha mavu?

• Nani udi Themua wakoma wa Yehowa?

Biblia yazuelele gutuama egi gu ngima dia gufua gua Yesu, alongeshi a mambo mba azoga mu katshi dia aklisto enji mba bolesa matshidia a Biblia. (Makalegelo 20:29, 30) Gu suga yenji, ndaga jiabuile diago luholo yazuelewe. Anginyishile mu malongi a Yesu matangi a aphagano, yene yazolele aklisto a jina phamba. (2 Timote 4:3, 4) Mangino awa, luholo lutshi tuajiya gutshigina gamba tudi nu ukoteleshi wa waha wa eyi Biblia yana longa diago?

Tangua diataganele gua Yehowa ha gumonesa matshidia, Wayizuelele gu tuama egi mu ‘tangua dia gisugishilo, ujiyi wa matshidia mba ukhala wavula.’ (Danyele 12:4) Mu 1870, gahungu ga zonda ga akambi a matshidia amonele egi ikombelelo yavula yanalonga ndaga jia gudisha nu Biblia. Hene asendesele gukamba ha gukotelesa muabonga malongi a gisendeselo a Biblia, enji Yehowa waakuatesele ha gukuata ukoteleshi wa matshidia wa Biblia.

Athu azumba matshidia diago alongugile Biblia. Alongogi ene a Biblia ajingile gutuama dietu ahatele luholo lua gulonguga tuanakalegela mu masugu etu. Akhalele mulonguga ndaga ingoshi ingoshi mu Biblia. Gula akuatelego ukoteleshi wa ndaga yimoshi muabonga, akhalele mukamba baverse ako adi mukotelesa ndaga yene. Gula amona egi ukoteleshi wene udi gudivua nu itshinyi yiko ya Biblia, akhalele guisonega. Luholo akhalele mubemba Biblia idi kotelese hakhayo, amonele matshidia atalela jina dia Nzambi, Ufumu wenji, matangi enji mukunda nu athu enji mavu, luholo athu agufua anakhala, enji felela dia gutugumuisa athu mu gufua. Ndaga jiene amonele mu gukamba guawo jia akudile mu uhiga wa malongi nu makalegelo avula a mambo.​—Yone 8:31, 32.

Mu 1879, Alongogi a Biblia amonele egi tangua diatagana ha gujiyisa athu matshidia ene. Mu givuo giene, asendesele guzola zulunalo yanazoga tii nu mangino, Inzo ya Leha ya Mutaledi Yanajiyisa Ufumu wa Yehowa. Mangino awa, tudi mujiyisa matshidia a Biblia mu katshi dia athu a ifutshi gubalega 239 enji mu mazuelelo gubalega 700. Gushigo nu sungi mathidia azalele gale luholo lulu!

• Gungima dia gufua gua Yesu, itshi yabuidile matshidia a Biblia?

• Luholo lutshi matshidia a Biblia ajiyiwe luko ?

Mu sungi ya ivuo yavula, Mathemua a Yehowa akhalele mu kalegela, guzola enji gukhapha Babiblia agudisha athu ako abalumuine. Uvi gungima, tuavile giheho gia guzola balumuino dia gihegihe dia jiya gukuatesa athu ha gulonguga “ujiyi wa diago wa matshidia,” luholo Nzambi anatshigina gua athu agasue. (1 Timote 2:3, 4) Hene, mu 1950, tuasendesele guzola itshinyi ya Biblia Gubalumuna gua mavu a gihegihe mu Gingeleji. Biblia yene yabalumuiwe muabonga enji yatagana mu mazuelelo gubalega 120.

Yatogele gukhala nu Biblia idi ya leba. Mazuelelo adi mubalumuga tangua nu tangua, enji mabalumuino a Biblia ako akhalele nu zuelelo dikulu diakola ha guyikotelesa. Gima giko, bamaniskri akulu amonewe ha gudivua nu bamaniskri a gishina. Hene, akotelesele gihebelu, giarama nu Gigreke ya mu Biblia.

Yatogele gubalumuna Biblia idi gudivua nu Mbimbi ya Nzambi. Athu ene akhalele mubalumuna Mbimbi ya Nzambi adihanele ndo njila ya gukena nu ndaga jafundishiwe gudi Nzambi, uvi adi naye guhata phamba luholo yasonegewe mu gisendeselo. Ata ngenyi, mabalumuino avula a Mbimbi ya Nzambi akatuile jina dia Nzambi, Yehowa.

Yatogele Biblia idi munemesa Fumu enji. (2 Samuele 23:2) Mu Gubalumuna gua mavu a gihegihe, jina dia Yehowa diavutuwe mu mafundo gubalega 7 000 luholo yidi mu bamaniskri akulu muavula, gifua yidi mu gifanesa gidi goshi a yiji didi. (Lungimbo 83:18) Biblia iyi yidi gueteya gua gukamba gua diagodiago mu ivuo yavula, hene yidi ya leba ha gutanga mukunda yidi mudijiga matangi a Nzambi haphelo. Ikhale udi nu Biblia Gubalumuna gua mavu a gihegihe nga ndo, tuagutoga ha gutanga Biblia lusugu nu lusugu.​—Yoshua 1:8; Lungimbo 1:2, 3.

• Mukunda natshi tuamonele egi idi funu ha guzola balumuino dia gihegihe dia Biblia?

• Itshi muthu wagasue watshigina gujiya gutshigina gua Nzambi adinaye gukita lusugu nu lusugu?