Tuana khala ndo nu mafumu-a-hungu anafutshiwa mu ulondegi wetu. Luholo yakhalele mukitshiwa mu hungu di’aklisto a sendesele, atadi a tema atombewe ‘ha gubamba hungu dia Nzambi.’ (Makalegelo 20:28) Akulu ene adi mala a gukula mu nyuma anatuameza enji gudisa hungu, ‘mutshitshigo nu gudinjota, mutshite nu mutshima wa gudihana gutuama dia Nzambi, mutshitshigo mukunda nu nzala ya falanga, uvi nu mutshima wa gusuanguluga.’ (1 Phetelo 5:1-3) Mudimo utshi ana anakalagala mukunda nu esue?

Anagututala nu gutubamba. Akulu anatuameza nu gukuatesa hungu dikhale diakola mu nyuma. Luholo anajiya egi Nzambi wahanele mudimo wene wa funu, akulu ana guhinyinago hungu, uvi anagutukuatesa ha gukhala muabonga enji gusuanguluga. (2 Kolinto 1:24) Gifua mubambi wa imeme wanujiya imeme yenji gingoshigingoshi, akulu anakalagala yagasue ha gujiya muthu nu muthu mu hungu.​—Ishima 27:23.

Anagutulonga ha gukalagala gutshigina gua Nzambi. Phoso yagasue, akulu anatuameza gudimbungisa mu hungu mukunda nu gukolesa gutshigina guetu. (Makalegelo 15:32) Mala wawa adihana anazangula fundo dia thomo gu mudimo wa gulongesa; anakalagala hamoshi nu esue enji anagutukuatesa mu ndaga jagasue jiatalela mudimo wa Nzambi.

Anakolesa muthu nu muthu. Ha gukuatesa muthu wagasue ha gukhala nu gudivua guabonga nu Yehowa, akulu ajiya gututala mu jinzo jietu nga mu Inzo ya Ufumu. Lukhanu luwo luana khala lua gutukuatesa nu gutukolesa mu njila ya Biblia.​—Yakoba 5:14, 15.

Holo dia mudimo wawo mu hungu, havula mu katshi diawo adi nu midimo yawo, enji inemo ya fami jiawo yana guatoga tangua nu gudihana. Aphangi wawa anakalagala mudimo wavula atagana gunemesewa.​—1 Tesalonike 5:12, 13.

• Mudimo utshi akulu anakalagala mu hungu?

• Mu njila jitshi akulu anagutukuatesa muthu nu muthu?

Biblia yana zuelela mahunji ayadi a aklisto a mala anakhala nu inemo ya gubamba hungu: “atuameji nu akuateshi mu mudimo.” (Filiphi 1:1, NW) Mbala jiavula, atadi nu akuateshi anakhala avula mu katshi dia hungu diagasue. Mudimo utshi akuateshi mu mudimo anakalagala mukunda nu kubonga guetu?

Anakuatesa hunji-dia-akulu. Akuateshi mu mudimo anagudivua muabonga nu Yehowa, enji adi athu agushila mutshima, athu anakalagala mudimo nu mutshima ungoshi, ikhale alenge nga mambuta. Anakalagala midimo yavula ya gudisha yatalela utuameji wa ulondegi nu midimo iko yamago mu hungu. Yanahana akulu njila ha gudihana gu mudimo wawo wa gulonga enji wa gubamba imeme.

Anakalagala midimo ya funu. Akuateshi mu mudimo anakhala nu mudimo wa gutagana athu anaza mu gudibungisa guetu. Ako anatalela ivuidilo ya mbimbi, gukhapa mikanda, gutalela falanga jia hungu, enji gukhapa itshinyi ya terituare ya gujiyishila mu hungu. Anawova enji gukomba Inzo ya Ufumu. Akulu ajiya guatoga ha gukuatesa ashinagaji. Ikhale midimo itshi akuateshi adi na yo, anaguikalagala nu mutshima wa gasue. Yene yanatuma hungu ha gutumagela.​—1 Timote 3:13.

Anahana gifezekeselo gia bonga gua aklisto amala. Akuateshi mu mudimo anatombewa mukunda adi nu gudivua guabonga nu Nzambi. Gula adi nu mene ha gulonga mu dibungisa, anakolesa diago gutshigina guetu. Luholo anazangula fundo dia thomo gu mudimo wa gujiyisa, anagutukuatesa ha gula tukhale nu ngolo giavula. Gudivua guawo nu akulu guanukuatesa hungu dikhale nu gusuanguluga enji hamoshi. (Efeso 4:16) Gungima dia masugu, ajiya nji gulungisa ndaga jianatogewa ha gukalagala gifua akulu.

• Akuateshi mu mudimo anakhala mala a luholo lutshi?

• Anakita itshi ha gukuatesa hungu ha guwenda muabonga?

Mukanda wa Biblia w’Aklisto wasonegewe mu greki wanazuelela muavula Banaba nu Phaula. Mala wawa akalegele gifua atadi awendi; akhalele mutala mahungu a thomo. Mukunda natshi? Akhalele diago mutangiza muavula gula gudivua gua aklisto ako nu Nzambi gudi guabonga. Phaula wazuelele egi wakhalele mutshigina ‘guvutuga luko ha gutala aphangi’ ha gumona adi luholo lutshi. Wakhalele gudilondega ha gukalagala khama jia kilometele ha guya guakolesa. (Makalegelo 15:36) Yene yanakalagala diago atadi a wendi mu tangua dietu.

Anaza gutukolesa. Mutadi wa njunga mumoshi-mumoshi wanatala mahungu hehi nu 20; wanubalegesa poso imoshi mu hungu diagasue mbala jiyadi mu givuo. Giphungu gimoshi mu givo. Gukula guawo mu katshi dia hungu nu gua akaji awo, gula adi nu akhetu, guanagutukuatesa muavula. Ana gudihana ha gujiya alenge nu mambuta ana gudilondega ha guzoga nu esue mu mudimo wa Nzambi enji nu gulonga athu ako Biblia. Atadi ene anuya hamoshi nu akulu ha gutala anetu mu hungu, enji ha gutukolesa, anakalagala mene jia mu Biblia mu hungu nu gua asamblé.​—Makalegelo 15:35.

Anukamba gujiya muthu wagasue. Atadi a njunga anukamba gujiya luholo lutshi gudivua gua aklisto mu mahungu gudi nu Yehowa. Anagudibungisa hamoshi nu akulu enji akuatshi mu mudimo ha gutalela luholo hungu dimutuamezewa nu guahana malongo ajiya guakuatesa ha gukudisa mudimo wawo. Anakuatesa avundi a njila ha gununga mudimo wawo, enji anasuanguluga ha gujiya athu gihegihe nu gujiya luholo lutshi gutshigina guawo gudi mukula. Mutadi muwendi mungoshi mungoshi wana gudihana diago gifua muthu udi “muenya mudimo na muku’etu . . . ha ndaga yetu.” (2 Kolinto 8:23) Tudi naye gulandula gutshigina guawo nu ngolo giawo mu mudimo wa Nzambi.​—Hebelu 13:7.

• Mukunda nu gikuma gitshi atadi a njunga anatala mahungu?

• Luholo lutshi gukhala guawo mu katshi dietu guajiya gugukuatesa?

Tangua lamba dianabua, Mathemua a Yehowa ana gudilondega mbala imoshi ha gukuatesa aphangi awo adi nu lamba. Ngolo jiene jianumonesa egi tudi nu guzumba gua diago mu katshi dietu. (Yone 13:34, 35; 1 Yone 3:17, 18) Luholo lutshi tuana kuatesa?

Tuana hana falanga. Mu tangua dia aklisto a thomo, tangua nzala yanginyile gua anetu a gu Yudea, aklisto a gu Antiokia atumile aklisto a gu Yudea falanga. (Makalegelo 11:27-30) Luholo lumoshi, tangua tuana vua egi anetu a mu dimbo diko ha mavu adi nu lamba, tuanu tuma falanga mu njila ya hungu dietu ha guakuatesa mu malamba awo.​—2 Kolinto 8:13-15.

Tuana kuatesa luholo luabonga. Akulu adi mu fundo lamba diabua anukamba ha gujiya gula Themua mumoshimumoshi wamuenega enji adi muabonga. Anusha komite ya gukuatesa ha guwendesa mudimu wa gukhapha ihemba, yima ya gudia, meya ya gunua, milele nu mafundo a gubanda. Mathemua avula ajiya midimo ya luholo nu luholo anagudihana ene ha khawo enji anashimbiga falanga jiawo ha guya guakuatesa ha gutunga jinzo nu jinzo jia Ufumu jia bolesewe. Luholo tuana khala hamoshi enji tuana kalagala mudimo hamoshi, tuana khala nu lamba ndo ha guheta athu agudihana ha gukuatesa mu tangua dia lamba. Tuana kuatesa “enya jigo dietu dia enya gutshigina,” tuana kuatesa luko athu ako, ata muthu wa gikombelelo gitshi.​—Galatiya 6:10.

Tuana walagana athu mu njila ya Biblia. Athu ana buila gijita ana kamba guwalagana. Tangua diene tuana kamba utuameji wa Yehowa, “Nzambi wa uwalaganyi mu mahugo agasue.” (2 Kolinto 1:3, 4) Tuana zuelela nu gusuanguluga felela dia Biblia gua athu adi mu malamba egi Ufumu wa Nzambi umuza mukatula malamba agasue nu gubala, nu phashi.​—Yatuwuwe 21:4.

• Mukunda natshi Mathemua ana shipha ndo gukuatesa mu tangua dia lamba?

• Luholo lutshi tuana walagana athu abuila malamba mu njila ya Biblia?

Hehi nu gufua guenji, Yesu wasoluile nu alandudi enji Phetelo, Yakoba, Yone nu Andele. Waalezele njimbu jia gukhala guenji mba jitagenesewa mu masugu a gisugishilo, enji wahudile muhu umoshi wa ndando: “Nanyi udi muhiga wa gufubidila nu wa tema yago wahagewe gudi fumu’enji holu di’athu enji ha ndaga ya gu ahua ima yawo ya gudia ha tangua dia tagana”? (Matayo 24:3, 45; Mako 13:3, 4) Ima ya gudia azuelela idi ima ya gudia ya mu nyuma, ujiyi wa Nzambi. Yesu walezele alandudi enji egi muene ‘mfumu’ wawo mba wa ashila athu mba khala guahana gujiya guavula jia ndaga ya Nzambi mu tangua dia gisugishilo. Nanyi udi naye gukhala muhiga muene?

Adi hunji diazonda dia alandudi a Yesu ambiwa maji mu nyuma. “Muhiga” muene udi Hunji-dia-Akulu Atuameji dia Mathemua a Yehowa. Wana hana akombeledi a Yehowa ima ya gudia mu nyuma mu tangua dia gutagana. Tuana shila aphangi ene mutshima ha gutuhana “ima ya gudia tudi naye nu funu.”​—Luka 12:42.

Adi mutuameza inzo ya Nzambi. (1 Timote 3:15) Yesu wahanele muhiga muene ginemo gia koma gia gutala nu gutuameza midimo ya ulondegi wa Yehowa ha mavu, yazuela egi gutala ima yenji yagasue ya funu: gutuameza mudimo wa gujiyisa nu gutulonga mu mahungu etu. Ha gutuhana ima tudi naye nu funu mu tangua tudi naye nu funu, “muhiga wa gufubidila nu wa tema” udi mukhapha ima ya gudia ya mu nyuma mu njila ya mikanda tuana kalegela ha gujiyisa lukuma luabonga nu mu njila ya malongi mu gudibungisa guetu nu mu baasamblé.

Muhiga udi wa gufubidila gu matshidia a mu Biblia nu gu mudimo w’enji wa gujiyisa lukuma luabonga. Enji udi watema mukunda udi mutala nu gubamba muabonga ima ya Klisto yidi ha mavu. (Makalegelo 10:42) Yehowa wana gumusagumuna nu gumukudisa muavula ha guhana ima ya gudia ya mu nyuma.​—Yeshaya 60:22; 65:13.

• Nanyi Yesu atombele ha gudisa alandudi enji mu nyuma?

• Mukunda natshi tuajiya guzuela egi muhiga udi wagufubidila nu watema?

Gungima dia gufa gua Yesu, ga hunji gazonda ga “ba apostolo nu akulu akhalele gu Yelusalema,” akhalele mukalagala gifua hunji dia akulu atuameji a mangino akhalele muzangula badesizio a funu mukunda nu aklisto agasue ambiwa maji mu nyuma. (Makalegelo 15:2) Gu tuama dia guzula desizio mukunda nu aklisto agasue, akhalele mutalela itshi Mbimbi ya Nzambi yazuela gu ndaga yene enji akhalele gudibemba hagula nyuma ya Nzambi ya atuameze. (Makalegelo 15:25) Luholo lumoshi, Akulu Atuameji anakalagala mangino.

Nzambi wana kalegela hunji diene ha gukalagala gutshigina guenji. Aphangi amala ene ambiwe maji mu nyuma adi muhunji dia akulu atuameji, ana zumba muavula Mbimbi ya Nzambi enji ajidila gale mu guzula badesizio akoma adi mutalela gikombelelo nu mudimo wetu. Ana gudibungisa phoso nu phoso ha guzuelela nzala jia anetu amuyifutshi yagasue. Luholo lungoshi nu aklisto athomo, mangino mahungu anazula utuameji wa Biblia nu guakolesa mu njila ya mikanda nga mu njila ya atadi awendji nu mu njila ya anetu ako. Yana bungisa fami ya anetu a Nzambi ha gukhala hamoshi. (Makalegelo 16:4, 5) Hunji-dia-Akulu Atuameji dia nutuameza mudimo wa gulondega ima ya gudia ya munyuma,ana gutukolesa mukuta agasue hakudihana mumudimo wa gujiyisa lukuma luabonga lua ufumu,enji gutalela luholo lutshi gutomba aphangi amala ajiya guzula ginemo mu mahungu.

Ana gulandula utuameji wa nyuma ya Nzambi. Hunji dia-Akulu Atuameji dia nushila Yehowa, Fumu Wabalega Yagasue idi mudilu nu hamavu mitshima yawo yagasue, nu gua Yesu Fumu wa hungu ha guatuameza. (1 Kolinto 11:3; Efeso 5:23) Aphangi ene ana gudimona ndo gifua mafumu a akombeledi a Nzambi. Ene nu aklisto ako agasue ambiwe maji mu nyuma ene athu adi “mulandula Mon’a Gimeme guagasue gudi muene muya.” (Yatuwuwe 14:4) Hunji dia akulu atuameji anasuanguluga gula tudi mukombelela mukunda nu’ene.

• Akhuatshi a khalele hunji-dia-akulu atuameji muntangua dia aklisto athomo?

• Luholo lutshi hunji-dia-akulu atuameji Diana kamba utuameji wa Nzambi mangino?

Mu Giebelu, jina Betele diakotelesa “Inzo ya Nzambi.” (Gisendeselo 28:17, 19) Jina diene diatagana diago ha guzuelela jinzo jiji Mathemua a Yehowa ana tunga mu membo avula, mafundo mudimo wa gujiyisa lukuma lua bonga udi mutuamezewa nu gulondegewa. Hunji-dia-Akulu Atuameji dianakhala gu New York, gu États-Unis, fundo didi bilo dia koma dia Mathemua a Yehowa, guanakalegewa mudimo wa gutuameza mabilo a bafiliyale agasue. Anyi agasue anakalagala midimo mu mafundo ene ana guatamega fami ya Betele. Luholo yanakhala mufami ingoshi, anetu amu fami ya Betele nji anakhala fundo dimoshi, anakalagala mudimo fundo dimoshi, anadia fundo dimoshi, anagulonguga Biblia hamoshi.​—Lungimbo 133:1.

Fundo dingoshi dia funu anetu afami yene anagudihana nu mutshima ungoshi. Mu Babetele agasue, anetu amala nu akhetu ana gudihana diago tangua dia gasue ha gukalagala gutshigina gua Nzambi nu ndaga jidi mutala Ufumu wa Nzambi. (Matayo 6:33) Anaguafuta ndo falanga uvi anaguahana fundo dia gukhala, ima ya gudia, anaguahana tufalanga tua zonda mukunda nu gusumba ima ya zonda. Muthu wagasue gu Betele udi nu mudimo amuhanele ha gukalagala, yajiya gukhala mu bilo, mu gikhukhu, nga mu fundo dia gudia. Ako anakalagala mudimo mu fundo dia guzola nu gujitshiga mikanda, ako ana komba luphango, guweva milele, nu gulondega mashinyi a luholo nu luholo.

Fundo mudimo wa kola wana kalegewa hagula mudimo wa gujiyisa lukuma lua bonga lua ufumu uye gutuama. Funu ya gudiangela ya Betele idi egi giamatshidia gidi mu Biblia gihetele athu avula. Gifua gamukanda gaga udi nago ha mago gadi mukuatesa athu avula hagujiya gia matshidia. Gasonegewe mu utuameji wa Hunji-dia-Akulu Atuameji enji gatumiwe mu njila ya internet mu jikhama jia baekipe ya abalumunyi mu Babetele amu ifutshi yagasue. Yazolewe mu mashinyi anazola mikanda ya vula mu ntangua dia zonda. Gungima yatumiwe mu mahungu gubalega 110 000. Fami ya betele yana gudihana gu midimo eyi yagasue, enji ana gudihana ha gula mudimo wa gujiyisa lukuma luabonga uwu udi naye gukalegewa phushi phushi utagenesewe.​—Mako 13:10.

• Akhuatshi anakalagala mudimo gu Betele enji itshi ya londegewe mukunda nu ene?

• Mudimo utshi udi naye gukalegewa phushi phushi aphangi agu Betele mumoshi mumoshi ana hana mago?

Anetu a gu Betele ana hana mago mu midimo ya luholo nu luholo enji mudimo wawo wanakuata mudimo wa gumuanga lukuma lua bonga mu gifutshi gimoshi nga mu yifutshi yavula. Ajiya gukalagala mudimo mu ekipe ya gubalumuna mikanda mu zuelelo diko, guzola mikanda, gubungisa mikanda mu badepo a mikanda, guzola ba-CD nga filime jietu, nga gukalagala midimo iko.

Komite ya filiyale yana tuameza mudimo. Hunji-dia-Akulu Atuameji dianasha komite ya filiyale idi nu akulu agukulamu nyuma mutatu nga gubalega ha gutuameza Bilo ya filiyale. Akulu ene ana wambela Hunji-dia-Akulu Atuameji luholo mudimo udi mu wenda nu malamba agasue adi muzoga mu dimbo adi mutuameza mudimo. Yene yana kuatesa Hunji-dia-Akulu Atuameji ha gutomba ndaga jia guzuelela mu mikanda yinyi mba izoga, nu mu gudibungisa nu mu baasamble etu. Givo nu givo, Hunji dia Akulu atuameji dianatuma atumiwi ha gutala mabilo a filiyale enji ha guhana malongo ana kuatesa komite ya filiyale ha gukalagala mudimo wawo muabonga. (Yishima 11:14) Mu gudibungisa gua koma, mutumiwi wa Biro dia koma wana kalagala lumene ha gukolesa anetu a mu mahungu a filiyale yene.

Yana tala midimo ya mahungu a mugifutshi gienji. Aphangi amala ako adi gu bilo ya filiyale adi nu ginemo gia gukangula mahungu a gihegihe, enji gutomba akulu nga akuateshi mu mudimo. Aphangi ako anatala mudimo wa avundji a njila agasue, bamishionere nu atadi a wendji a ijietela adi mu gitshinyi gia filiyale yene. Ana londega baasamble azonda nu akoma, anatuameza mudimo wa gutunga jinzo jia ufumu jia gihegihe, enji anasha ngolo ha gula mikanda ihetele anetu agasue mu mahungu. Midimo eyi yagasue tuatanga yana kalegewa gu bilo ya filiyale ha gula mudimo wa gumuanga lukuma ukitshiwe nu gudilanduluila.​—1 Kolinto 14:33, 40.

• Luholo lutshi komite ya filiyale yana gukuatesa hunji-dia-akulu atuameji?

• Ndaga jitshi jiana kalegewa gu bilo ya filiyale?

Hagula “lukuma lua bonga” lujiyishiwe muabonga-muabonga mu “athu a ifutshi yagasue nu iphuta ya gasue nu amazuelelo agasue nu athu agasue,” tudi muzola mikanda mu mazuelelo gubalega 700. (Yatuwuwe 14:6) Luholo lutshi tuana kalagala mudimo uwu wakoma? Tudi nu asonegi amu ifutshi yagasue nu abalumunyi a mazuelelo ako gubalega 3 300, khungi awo agasue adi Mathemua a Yehowa.

Mikanda ya gishina yanasonegewa mu Gingeleji. Anetu adi mu Hunji dia Akulu Atuameji anatuameza mudimo wa bilo dia gusonega diana khala gu bilo dia koma dia mathemua a Yehowa a mavu agasue. Bilo diene diana tala mudimo wa asonegi adi gu bilo dia koma nu adi mu mabilo azonda adi mu bafiliyale. Luholo asonegi etu adi mu ifutshi ya gudisha,anazuelela makalegelo nu matangi agudisha,luholo luene luana hana mikanda yetu njila ya gusuanguluisa athu amu ifutshi ya gasue.

Gungima yana gutumiwa gudi abalumunyi. Gungima dia gusonega lumene lumoshi, ana gulutanga luko mua bonga, gula luatshiginyiwa, ana gulutuma mu njila ya internet mu mahunji a abalumunyi adi mu bafiliyale ha mavu agasue. Anetu ene ana balumuna lumene luene mu mazuelelo agudisha, gungima ana tala muabonga muabonga gula matangi ene adi agudiva nu lumene ludi mu matangi agishina ha gutala matamegelo a zuelelo diene, gungima ana tanga lumene luene ha gutala gula luadiva mu mikhuala ya zuelelo diene. Abalumunyi ene ana kalagala yagasue ha gutomba “mbimbi jia matshidia” jidi naye guzola matangi diago luholo adi mu gingeleji muzuelelo adi mubalumuna.​—Mulongeshi 12:10.

Ba ordinatere ana kalagala hagula mudimo uye phushi. Ordinatere wa jiyile go guzula fundo dia asonegi nga abalumunyi. Uvi mudimo wawo wana guya phushi luholo ana kalegela ba diksionere, ima iko ya gukambela ukoteleshi, nu ikalegelo iko yidi mukatshi dia odinatere. Mathemua a Yehowa azolele programe imoshi ya ordinatere yana tamegewa egi MEPS (Système de photocomposition électronique multilingue), yana kuatesa anetu ha gubalumuna, gusha yifanesa nu foto, ha gulondega mikanda mu mazuelelo avula agudisha hagula izolewe.

Mukunda nu itshi tuana gudihana lamba mua vula ata mu mazuelelo adi nu athu azonda? Mukunda gutshigina gua Yehowa gudi egi “athu agasue ahuluishiwe nu gateme gukotelesa ndaga ya giamatshidia.”​—1 Timote 2:3, 4.

• Luholo lutshi mikanda yetu yana gusonegewa?

• Mukunda nu itshi tuana balumuna mikanda yetu mu mazuelelo ako avula?

Givuo nu givuo, ulondegi wetu wana zola nu gukhapha khama jia inunu jia Biblia nu mikanda idi muzuelela Biblia ya ofele. Tuana gutunga nu gulondega luko jinzo jia ufumu, tuana gutunga nu gubongesa Babetele, tuanakuatesa anetu ana kalagala mudimo gu Betele, nu bamisionere; tuana kuatesa anetu ako adi mubuila malamba nu gudigita gua mavu. ‘Wajiya gudihula falanga jiana katuga gui?’

Tuana gutoga ndo dikumi,nga gukungula musomonyi. Ata mudimo wetu wa gumuanga lukuma lua bonga wana gutulomba falanga jia vula, tuana toga ndo athu falanga. Yabalega ivuo lukhama nimero ya mbadi ya Inzo ya Leha yaMutaledi ya zuelele egi tuatshiginyisa egi Yehowa muthu udi gutukuatesa ha guyizola, “yamonega egi tuajiyile ndo gutoga athu falanga gu mudimo tuana kalagala.” Tuajiyile go guyikalagala ata ha zonda!​—Matayo 10:8.

Mudimo wetu wa kuatesewa gumusomonyi wa athu atshigina guhana muguzumba guawo. Athu avula ana suanguluga nu mudimo wetu wa gulonga Biblia nu nji ana guhana falanga ha gu ukuatesa. Mathemua ene hakhawo ana suanguluga ha guhana ntangua diawo, ngolo jiawo, falanga jiawo, nu umonyi wawo hagula gutshigina gua Nzambi gukalegewe ha mavu agasue. (1 Gudilanduluila 29:9) Mu Inzo ya Ufumu, tudi nu bakese amisomonyi, athu atshigina ajiya gumba misomonyi. Falanga jia vula jiana katuga gua athu adi nu umonyi wazonda adi agudifana nu mukhetu mumoshi wa phutu yagafunda, owu Yesu amonegesele, wambile tuyamo tuyadi tua utadi mu kesi ya musomonyi mu tampelo (Luka 21:1-4) Hene muthu nu muthu wajiya tangua nu tangua “gubamba falanga ha gumba” “luholo mutshima wenji wa mutuma” mu kesi ya musomonyi.​—1 Kolinto 16:2, NW; 2 Kolinto 9:7.

Tua tshigina diago egi Yehowa udi mukuata mitshima ya athu adi nu funu ya ‘gumutumbuisa nu yima yawo ya ndando,’ Ha gukuatesa mudimo wa ufumu, hagula Yehowa atagenese gutshigina guenji. Ishima 3:9.

• Luholo lutshi ulondegi wetu udi wa gudisha nu ikombelelo iko?

• Luholo lutshi ana gukalegela falanga jia musomonyi?

Luholo jina Inzo ya Ufumu dia yimonegesa, malongi a Biblia ana longewa muene anutalela ha thomo Ufumu wa Nzambi, muto wa gishina gia ndaga Yesu alongele muavula mu malongi enji.​—Luka 8:1.

Jidi mafundo agikombelelo gia matshidia mu dimbo nga mu kartye. Jinzo jia Ufumu jidi mafundo Mathemua a Yehowa ana gulondegela mudimo wawo wa gumuanga lukuma lua bonga lua Ufumu wa Nzambi. (Matayo 24:14) Jinzo jia Ufumu jidi jia gudisha, uvi jia gasue jishigo jia mindondo; mu mafundo ako, mahungu avula ana gukombelela mu Inzo ya Ufumu imoshi. Mu ivuo ya balega, tua tunga inunu ya Jinzo jia Ufumu jia uhe-uhe (yatshigina guzuela egi lusugu nu lusugu tuanatunga jinzo jia ufumu jitano) mukunda mahungu adi gudilunda holo dia ako. Luholo lutshi yidi mu kalegewa?​—Matayo 19:26.

Jidi mutungiwa nu falanga jia misomonyi yana katuga mu ifutshi ya gasue. Misomonyi yene yana tumiwa gu bilo ya filiyale nga gu mahungu adi mutshigina gutunga, enji gulondega Jinzo jia Ufumu ha gukalegela falanga jiene, ha gujitshitshidisa gungima.

Jidi mutungiwa gua aphangi a luholo nu luholo gukonda gua afuta falanga. Mu membo avula, alondele gale mahunji agutunga Jinzo jia Ufumu. Mahunji a atungi ene nu aphangi ako ana gudihaha haguya mu membo ako nga mu mafundo ako agualeha ha gutunga, ana kuatesa mahungu a mafundu yene ha gutunga Jinzo jia Ufumu. Mu ifutshi iko, Mathemua ajiya midimo anatombewa ha gutala midimo ya gutunga nu gulondega Jinzo jia Ufumu mu mafundu ene. Ikhale aphangi avula ajiya mudimo ana za mu hana mago, uvi athu adi fundo dimutungiwa Inzo ya Ufumu ene ana kalagala mudimo avula. Mu mafundo agasue ana gutunga, mudimo wa bala afumia dimbo nga hungu ana gu ukalagala. Nyuma ya Yehowa nu gudihana guawo mu mutshima ungoshi guana guakuatesa ha gukalagala mudimo wene.​—Lungimbo 127:1; Kolosai 3:23.

• Mukunda natshi mafundo etu agukombelela ana tamegewa egi Inzo ya Ufumu?

• Itshi yana kalegewa hagula egi jinzo jia ufumu jitungiwe mu ifutshi ya gasue?

Inzo ya Ufumu y’agasue ya Mathemua a Yehowa idi nu jina dia gijila dia Nzambi. Hene tuana gudihana ha guyibamba ya gukonda ushala, ya bonga idi milonga ya lukumu enji ya funu ya vula mugikombelelo gietu. Khungi etu agasue tuajiya gudihana.

Dihane ha gukomba Inzo ya Ufumu gungima dia gudibungisa. Gungima dia gudibungisa gua gasue, aphangi amala nu akhetu ana komba, guweva nu gukatula fuphi mu Inzo ya Ufumu mu gusuanguluga gua gasue. Ana guyiweva mbala yingoshi mu phoso. Mukulu mungoshi nga mukuateshi mu mudimo umoshi wana tuameza mudimo wene, mbala jiavula wana talela liste ya midimo adi naye gukalagala. Gula yatoga egi aphangi wawa adihanyi mu gutshigina guawo akombe, ayiweve nu meya, akatule fuphi gu mesa nu ife nga mafundo ako agukhalela, alondege ife, aweve khumba, madidishi nu nganza, abishile mvindu yagasue ha shita. Ana kokelela hanze nu mukatshi dia luphango. Mbala ingoshi mu givuo, tuana tomba lusugu lungoshi ha guweva muabonga muabonga Inzo ya Ufumu. Tuana hana ana azonda midimo iko ha gualonga luholo lua gutumagela fundo dietu dia gukombelela.​—Mulongeshi 5:1.

Hana mago gula yatoga gulondega gima gimoshi giabola. Givuo nu givuo, tuana tala muabonga Inzo ya Ufumu yetu, ikhale mu katshi nga hanze. Yanagutukuatesa ha guilondega tangua diagasue mukunda ikhadi go nu ushala, ngenyi tuajiya gubamba falanga. (2 Gudilanduluila 24:13; 34:10) Inzo ya Ufumu idi ya pelegeta enji yabonga idi fundo diatagana ha gukombelela Nzambi wetu. Gula tudi muhana mago gu mudimo wene, tudi mumonegesa egi tuana zumba diago Yehowa nu fundo dietu dia gukombelela. (Lungimbo 122:1) Yene yajiya gutuma athu ako ha gutumbuisa gikombelelo gietu.​—2 Kolinto 6:3.

• Mukunda natshi tuajiyile ndo gulelula mudimo wa gubongesa fundo dietu dia gukombelela?

• Ulondegi utshi washiwe ha gubamba Inzo yetu ya Ufumu gukonda mvindu?

Wana suanguluga gukamba gukudisa ujiyi waye wa mu Biblia? Wana tshigina gukuata verse ingoshi muabonga nga gujiya muthu nga fundo dingoshi diatangewa mu Biblia? Wadihudile gale kula mbimbi ya Nzambi yajiya gugukuatesa gu mulonga umoshi wana guguhana lamba? Gula idi ngenyi, wajiya gukamba gueteya mu katshi dia mikanda idi mu gibambelo gia mikanda gidi mu yinzo ya Ufumu.

Gidi nu mikanda nu ikambelo iko ya ndaga tudi najio funu. Iphapha ishigo egi, ushigo nu mikanda yagasue ya Mathemua a Yehowa mu zuelelo dienu. Uvi gibambelo gia mikanda gidi mu Inzo ya Ufumu gidi nu mikanda yagasue nu ya gihegihe. Muajiya gukhala nu mabalumuino ako a Biblia, diksionere diatagana nu mikanda iko yajiya gugukuatesa ha gukamba ndaga udi nayo funu. Wajiya gukalegela yikambelo yagasue idi mu gibambelo gia mikanda, gutuama nga kungima dia gudibungisa guetu. Gula ordinatere udi guene, programe ya Watchtower Library yajiya gukhala muene. Idi programe yana nginyishiwa mu ordinatere idi nu mikanda yetu ya vula enji idi gikambelo gia leba ha guheta mulonga udi nawo funu, mbimbi nga verse ingoshi.

Giana kuatesa ana khalasa dia mudimo wa teyokrasi. Gula wasonegele gale jina mu Khalasa diene, wajiya gukalegela mikanda idi mu gibambelo gia mikanda gidi mu Inzo ya Ufumu tangua udi mulondega lumene luaye. Mutadi wa khalasa muene udi mu ginemo gia gutala gibambelo gia mikanda. Udi luko nu ginemo hagulunda mikanda ya gihegihe yagasue idi muzoga ha guyisha mu mulongo. Muene, nga muthu muana longuga nenji Biblia wajiya guguleza luholo wajiya gumona mulonga udi mugukamba. Uvi, gushigo ndo nu muthu wa hanewa njila ya guzula mukanda udi mu katshi dia gibambelo gia mikanda dia mu Inzo ya Ufumu ha gu uzola hanze nga guya nawo. Tangua tudi mukalegela mikanda yene, tu ibambe muabonga, enji guyisonega ndo mu katshi.

Biblia yazuela egi ha “guzula ujiyi wa diago wa Nzambi,” tudi naye gu ukamba “gifa ima ya ndando idi ya gusuega.” (Ishima 2:1-5) Gibambelo gia mikanda gia mu Inzo ya Ufumu giajiya gugukuatesa ha gusendesa gukamba ujiyilo wene.

• Mu Inzo ya Ufumu, itshi yajiya gutukuatesa hagukamba ndaga?

• Nanyi wa jiya gugukuatesa ha gula ujiye gukalegela gibambelo gia mikanda muabonga?

Yesu Klisto wa lezele alandudi enji egi: “Ngenyi muanya wenu uleme gu meso a athu. Ha ene ateme gumona makalegelo enu abonga nu ha ene atumbuise she’nu udi mu dilu.” (Matayo 5:16) Hene, tuana kalegela mua bonga ndunge jia luholo nu luholo jia mu masugu etu, ikhale nga internet. Site www.jw.org idi site ofisiele ya Mathemua a Yehowa, fundo azuelela ndaga ana tshigina nu midimo yawo. Ndaga jitshi mba usanga mu site yene?

Mba usanga gueteya gua Biblia gu mihu yana hudiwa muavula. Wajiya guheta gueteya gu mihu ya ndando ya vula eyi athu ana guhula. Gueteya gu mihu isambano yaluholo lununu idi mu trakte Wajiya gusuanguluga gujiya giamatshidia? Eyi azolewa mu mazuelelo gubalega 400. Mba usanga luko Biblia Balumuino dia mavu a gihe gihe mu mazuelelo avula, nu mikanda iko yavula yana kotolesa Biblia, Mukanda gifa itshi Biblia yana longa diago? Enji gamukanda Inzo ya Leha ya Mutaledi nu Tugumuga! ya gihe gihe. Wajiya guyitanga nga guyivua gu matshi mu internet. Wajiya guizola luyadi mu mbimbi, mu PDF, nga mu EPUB. Wajiya nji guzola ha diyiji dia mukanda mene jiko ha guhana muthu muzuelelo dienji. Gudi nu mikanda iko ana sha muzuelelo dia tutabu tua muyifutshi ya vula. Wajiya guzula drame jia gutanga Biblia, badrame ako, nga mizike ya bonga wajiya gutegelela tangua diagasue watshigina.

Mba usanga ndaga jiko jidi mutala Mathemua a Yehowa. Mba usanga nji ndaga jia gihe gihe nu bavideyo adi muzuelela mudimo wetu wa muyifuthi y’agasue, ndaga jiana buila Mathemua a Yehowa nu luholo tuakuatesele aphangi abuidiwe ijita. Wajiya gujiya badate aba asamble adi muza nu mafundo mba akalegewa nu banimero a telefone a bilo ya filiyale.

Ndaga jiene jiagasue jidi gutukuatesa ha gulemesa muanya wa gia matshidia a Biblia tii nu gusuga ya mavu.yana kuatesa athu amuyifutshi ya gasue, ikhale mu membo adi nu humo dia vula gifua Antarktike. Tudi mutoga egi “mbimbi ya Yehowa imuangane phushi phushi” ha mavu agasue, mukunda nu gutumbuisa Nzambi.​—2 Tesalonika 3:1, NW.

• Luholo lutshi site ofisiele yetu www.jw.org yana kuatesa athu avula ha gulonguga matshidia a Biblia?

• Ndaga jitshi wana suanguluga gukamba mu site yetu ya internet?